130
insanların elementar tələbatının ödənilməsi və daha əlverişli
həyat tərzinə
çalışmalarının dəstəklənməsi, əhalinin artım surəti ilə yerin ekosistem imkanlarının
balanslaşdırılması və sairədən ibarətdir.
Bu proqramın əsas mənfi tərəfi ondan ibarətdir ki, qlobal iqtisadiyyata rəhbərlik
edən transmilli korporasiyalar, böyük maddi və maliyyə imkanına malik olan mərkəzlər
öz işlərini planetin imkanlarına uyğunlaşdırmaq, qlobal tələblə ətraf mühitin elementləri
arasında sağlam balans yaratmaq əvəzinə, təbiətin istismarından gələn gəlirləri
mənimsəyir, problemlərə lazımi diqqət yetirmirlər.
Beləliklə, yeni dünya nizamı şəraitində qloballaşmanın bəzi prinsiplərinin qısa
təhlili göstərir ki, bu qlobal plan bəşər cəmiyyətinin, təbiətin və dünyada yaşayan hər bir
insanın həyatında və fəaliyyətində idarə oluna bilməyən irrasional elementlərin ortadan
qaldırılmasına yönəlmiş son dərəcə düşünülmüş bir siyasətin nəticəsidir. Bu planın əsas
məqsədi dünyada baş verən bütün proseslərə nəzarət etmək, onu öz istəyinə müvafiq
yenidən qurmaq, inkişaf etdirmək və idarə etməkdən ibarətdir.
Qloballaşma mahiyyətcə təbii və obyektiv proses olsa da, onun dairəsinə daxil
olmuş hər bir dövlətin milli təhlükəsizlik maraqları çərçivəsində tənzimlənə bilir. O
dövlətlər ki, öz milli təhlükəsizlik çərçivəsini və vəzifələrini aydın dərk edir, onların
qorunması və təmin edilməsi qayğısına qalır həmin ölkələrə qloballaşma yalnız tərəqqi
və firavanlıq gətirir. O dövlətlər ki, qloballaşmadan yalnız öz gündəlik problemlərini həll
etmək və müvəqqəti effekt qazanmaq məqsədi ilə istifadə edir, onlar müvafiq olaraq
qloballaşmanın qurbanına çevrilirlər. Belə olan halda, müvafiq ölkənin nəinki milli
iqtisadiyyatı, təbii sərvətləri, iqtisadi potensialı transmilli korporasiyaların əlinə keçir,
həmçinin milli instinktlər, iradə, varlıq, mədəniyyət, dövləti və milləti xarakterizə edən
bütün milli dəyərlər tədricən itir, əhali kosmopolit, ucuz işçi qüvvəsinə çevrilir.
Hər bir dövlət özünün milli təhlükəsizliyi ilə bilavasitə bağlı olan resurslarını –
müdafiə, ərzaq, ekoloji, mənəvi, informasiya, ictimai və s. qorumağı, yaşatmağı və idarə
etməyi bacarmalı və ölkə ərazisinə gələn hər bir subyektə də buna hörmətlə yanaşmağı
tələb etməlidir. Bunun üçün dövlətin milli siyasəti olmalıdır.
Hər bir transmilli şirkətin (yaxud bu rolu icra edən dövlətlərin) başqa ölkələrdə
fəaliyyətinin əsas məqsədi gəlir əldə etməkdən ibarətdir. Odur ki, onlar, bir qayda
olaraq, o sahəni seçir və kapital qoyur ki, daha az sərmayə ilə daha tez və çox gəlir
qazansın. Milli dövlətin vəzifəsi isə qloballaşmadan maksimum yararlanmaqla, bir
tərəfdən öz ölkəsinin iqtisadi, siyasi, ictimai və mənəvi inkişafına nail olsun,
problemlərini xarici kapital və texnologiya əsasında həll etsin. Digər tərəfdən, milli
131
maraqlarının pozulmasına, iqtisadi, siyasi, hərbi və ekoloji təhlükəsizliyinə, məxsusi
milli dəyərlərin yad təsirlərə məruz qalmasına və itirilməsinə yol verməsin. Belə olan
halda qloballaşmadan hər iki tərəf bəhrələnər və qarşılıqlı faydalı nəticələr əldə olunar.
Qloballaşmadan ən çox ziyan görən milli mədəniyyət və digər milli dəyərlərdir.
Çünki bu proses təkcə vahid dünya təsərrüfatı və iqtisadi sistemin yaradılmasından
başqa mənəvi, mədəni, siyasi və ictimai həyatın da bütün sahələrini əhatə edir. Qərbin
daha güclü strukturları elektron və digər kütləvi yayım vasitələrinin imkanlarını işə
salaraq, sözün həqiqi mənasında “yad” (milli) tarixi-mədəni irsə, dəyərə qarşı səlib
yürüşü edir. Qərbin kosmopolit və universal “dəyərlərini” ən mükəmməl, mütərəqqi bir
sivilizasiya kimi, özü də cəlbedici şəkildə təbliğ edir. Milli mədəniyyətin, dilin, dinin, adət-
ənənələrin sıxışdırılması və milli şüurun kosmopolitləşdirilməsi nəticədə milli dövlət
institutlarının beynəlmiləlləşdirilməsinə gətirir. Bu da özünü qoruma instinktlərini
zəiflədir.
Qloballaşmanın mənfi tərəflərindən biri də prosesi idarə edən lider dövlətlərin öz
maraqlarından çıxış edərək, bu prosesə subyektiv yanaşma və ikili standart nümayiş
etdirməsidir. Qloballaşmanın əsas şərtlərindən olan əmək, maddi və insan resurslarının
sərbəst hərəkəti, tətbiqi və şəffaf idarə edilməsi üçün bütün ölkələrin sərhəd-keçid,
vergi, viza və digər qanunvericiliyi standartlaşdırılır və liberallaşdırılır. Lakin bu
standartlar əksər lider dövlətlər tərəfindən pozulur, həmin dövlətlərin firma və
vətəndaşlarının bütün dünyada sərbəst hərəkət etməsi üçün yaradılmış şərait və
tanınan hüquq kiçik dövlətlərin vətəndaş və firmaları üçün təmin edilmir. Bu da müvafiq
olaraq azad rəqabəti, əmək və insan resurslarının sərbəst hərəkətini pozur.
Qloballaşmaya subyektiv yanaşma müəssisələrin ödədikləri vergilərin, ekoloji və
sosial ayırmaların, əmək haqlarının, yerli proqramlarda iştirak etmək üçün ayrılmış
maliyyənin miqdarında da özünü büruzə verir. Məsələn, Fransa və yaxud ABŞ
ərazisində işləyən xarici müəssisənin yerli büdcəyə ödədiyi vergilər, ekoloji, sosial,
mədəni və digər məqsədlər üçün ayırdığı vəsaitlər, verdiyi maaşlar Azərbaycanda
işləyən xarici şirkətlərin analoji məqsədlər üçün sərf etdiyi vəsaitdən qat-qat çoxdur.
Yaxud elə həmin tipli müəssisələrdə xarici və yerli işçilərə verilən maaşların həcmi bir
neçə dəfə fərqlənir.
Qloballaşmanın əsas hərəkətverici qüvvəsi dünyanın inkişaf etmiş, mühüm
maliyyə və texnologiya imkanlarına malik olan dövlətləri və onlara məxsus nəhəng
transmilli şirkətlərdir. Bu sırada ABŞ, Yaponiya, Böyük Britaniya, Fransa, Almaniya,
Çin, Cənubi Koreya və b. dövlətlər xüsusi fərqlənir.