437
etdilər. Onlar bu sazişin ABŞ-la Türkiyə arasında münasibətlərin yeni mərhələsini
açdığını, Birləşmiş Millətlərin əsas prinsip və ideallarının həyata keçirilməsində
mühüm hadisə olduğunu qeyd etdilər. E.Vilson dedi: "Biz danışıqlar zamanı biz
hər iki ölkənin müstəqilliyi və suverenliyinə tam hörmət etmək prinsipini rəhbər
tutmuşuq. Bu prinsiplər sazişin ayrılmaz hissəsini, əslində onun əsasını təşkil edir.
Bu sazişin məqsədi Türkiyəyə öz silahlı qüvvələrini möhkəmləndirmək və eyni
zamanda öz iqtisadiyyatını stabilləşdirmək xəttini davam etdirməyə imkan
verməkdir". Baş nazir R.Peker sazişin imzalanması münasibətilə E.Vilsona təbrik
teleqramı göndərdi (50). Ankara valisinin bununla bağlı Amerika nümayəndə
heyətinin şərəfinə verdiyi ziyafətdə general Oliver dedi ki, amerikanlar Türkiyənin
bütün guşələrində olublar, quru, dəniz, hava qüvvələri ilə yaxından tanış olublar
və fabrik, zavod, liman, məktəb və digər yerlərlə maraqlanıblar. Amerika
nümayəndələri imzalanmış sazişin işığında Türkiyənin gələcəyinə, iki ölkənin
münasibətlərinin perspektivlərinə böyük ümidlə yanaşırlar. İyul ayının 19-da
Oliver missiyası Türkiyəni tərk etdi. Bundan sonra ekspertlər səviyyəsində
Türkiyəyə gələn Amerikanın hərbi, maliyyə, iqtisadçı və işgüzar dairələrinin
nümayəndələri sazişdən irəli gələn vəzifələrin icrasına başladılar.
Trümen doktrinasının elan olunması ilə bağlı SSRİ xarici işlər nazirinin
müavini və Sovet İttifaqının BMT Təhlükəsizlik Şurasındakı daimi nümayəndəsi
A.Qromıko kəskin bəyanatla çıxış etdi. O qeyd etdi ki, H.Trümenin Türkiyə və
Yunanıstana yardım üçün konqresə müraciəti təcavüzkar və təxribatçı xarakter
daşıyır. A.Qromıko Təhlükəsizlik Şurasının iclasındakı bəyanatında deyirdi ki,
"Yunanıstan müharibədən və düşmən işğalından böyük ziyan çəkən müttəfiq ölkə
kimi xaricdən kömək almaq haqqına malikdir. Türkiyəyə münasibətdə bunu
demək olmaz, Türkiyə xaricdən yardım almaq üçün belə bir hüquqa malik
deyildir, belə ki, o müharibədən ziyan çəkmiş ölkə adlandırıla bilməz. Onun
ərazisi işğala məruz qalmayıb. Türkiyə müttəfiqlərə onların Hitler Almaniyasına
qarşı mübarizəsində kömək etməyib. Demokratik ölkələrin güclü və qəddar
düşmənlə mübarizəsində Türkiyə demokratik düşərgədə olmayıb" (51). 1947-ci
ilin iyun ayının 12-də "Pravda" qəzetində Q.Verşinin "ABŞ-ın planları üzrə
Türkiyənin modernləşdirilməsinə dair" adlı yazısı bütövlükdə A.Qromıko
tərəfindən Birləşmiş Ştatlara və Türkiyəyə qarşı irəli sürülmüş ittihamların
əsaslandırılmasına həsr edilmişdi. Q.Verşinin yazırdı: "Türkiyə ictimaiyyətinin
narazılıqları bu ölkənin yeni "himayəçilərini" zərrə qədər də olsa narahat etmir.
Onlar bu ölkədə özlərini elə aparırlar ki, guya onun sahibləridirlər. Öz
yardımlarını təklif etdikdən sonra amerikanlar xüsusi hərbi nümayəndələrinə
nəinki Türkiyə ərazisində aparılmalı olan işlərin proqramının müəyyən edilməsini,
həm də "Trümen doktrinası"na əsasən amerikan sahibkarlarının
438
maraqlarına tam şəkildə cavab verən siyasi məqsədlərinin həyata keçirilməsini
həvalə etməklə Türkiyənin suverenliyinə tam sayğısızlıq nümayiş etdirdilər".
Amerikalıların Türkiyəyə gəlişini, orada apardığı işləri sadalayaraq "Pravda" qeyd
edirdi ki, hərbi nöqteyi-nəzərdən Türkiyə artıq müstəqil dövlət deyil. Amerikan
kapitalı ölkə iqtisadiyyatının dərinliklərinə nüfuz etməkdədir. Q.Verşinin fikrincə,
Türkiyə iqtisadiyyat sahəsində də müstəqilliyini itirməkdə idi və orada
britaniyalılar öz mövqelərini daha güclü və varlı rəqibə verməkdə idilər (52). İyun
ayının 15-də və 17-də də "Pravda" Türkiyə ilə bağlı yazılar vermişdi.
Yardım haqqında Türkiyə-Amerika sazişinin mətni dərc edildikdən sonra
Moskva radiosu öz şərhlərində onun ilk altı maddəsinin Türkiyənin suverenliyinə
toxunduğunu bildirdi. Sazişin mətni elan olunduqdan sonra iyul ayının 17-də SSRİ
Xarici İşlər Nazirliyinin Yaxın Şərq şöbəsinin yeni təyin edilmiş müdiri İ.Bakulin
Türkiyədəki işlər vəkili P.Yerşova eyni gündə üç məktub göndərmişdi. Bu
məktublarda tələb edilən məsələlər "Pravda" qəzetində dərc edilmiş Q.Verşinin
yazısı ilə tamamilə üst-üstə düşürdü. Birinci məktubda İ.Bakulin tanınmış türk
firmaları haqqında məlumat istəyirdi və yazırdı: "Bizdə olan məlumata görə, bir
sıra firmalar formal olaraq qoyulmuş "yalançı şəxslər" vasitəsi ilə Amerika
kapitalı əsasında işləyirlər". Həmin gün göndərdiyi ikinci məktubda İ.Bakulin
Türkiyə Böyük Millət Məclisinin tərkibi haqqında xarakteristika, onun daxilindəki
ziddiyyətlər, Xalq Respublikaçı partiyanın daxilindəki cərəyanlar haqqında
məlumat istəyirdi. Ən nəhayət, üçüncü məktubda o, Türkiyədə İngiltərə-Amerika
ziddiyyətləri haqqında, hansı sahələrdə İngiltərə-Amerika əməkdaşlığının
müşahidə edildiyi, İngiltərənin Türkiyədə hansı mövqeləri tamamilə özündə
saxladığı və türk cəmiyyətinin hansı təbəqəsinin ingilisləri və amerikanları
müdafiə etdiyi barədə məlumatları SSRİ Xarici İşlər Nazirliyinə göndərməyi
tapşırırdı (53). Eyni zamanda SİTA-nın baş direktoru N.Palqunov iyul ayının 19-
da "Türkiyədə yeni dünya müharibəsinin başlanması təbliğatı ilə bağlı aparılan
sistematik kampaniya barədə" toplanmış materialları V.Molotova göndərdi (54).
Məsələn, SİTA-nın topladığı materiallarda göstərilirdi: "Qərbi Anadoluya səfərə
gedən Xalq Respublikaçı partiyanın sədr müavini Ş.Saracoğlu demişdi ki, türk
xalqı indi o səviyyəyə qalxıb ki, bütün dünyanı təəccübləndirə bilib. Müharibə
başlanan dövrlə müqayisədə onun gücü azı on dəfə artıb. Ötən 6-7 il müddətində
biz çoxlu sayda oğullarımızı silah altında saxlayırıq, əgər bizi təhdid edən qüvvə
səfərbərliyi dayandırsa, o halda biz əsgərlərimizin bir neçə birləşməsini azad edə
bilərik" (55).
Yardım haqqında Türkiyə-Amerika sazişi imzalandıqdan sonra SSRİ işlər
vəkili A.Vışinskiyə "Amerika yardımı ilə bağlı Türkiyədə siyasi vəziyyət
haqqında" geniş hesabat göndərdi. O yazırdı ki, iyun-iyul aylarında xarici siyasət
sahəsində az-çox diqqəti cəlb edən mühüm hadisə