__________________Milli Kitabxana_________________
99
-Eşitmişəm, neynəmək olar, atadı...
-Elə atanı Allah özü haqqına çatdırsın... Uşağımı bir kökə salıb ki... Başına
dönüm, ay Minasoltan, dərdimi götürüb sənin üstünə gəlmişəm, deyirəm böyük
Ağanın canamazını ver, aparım uşağımın başına salım, bir az rürbət vermişem.
Qorxub deyirəm bəlkə... Ağanın cəddinə qurban olum, ruhuna yasin oxutdurram,
balamı nəzirli elərəm, qapından şəfa istəyirəm balama, Minasoltan, atasından
inciyib, balama iraq-iraq, qarğış eləməyin!..
Minasoltan diksindi, rəncidəxatir oldu:
-Nə danışırsan, Bircə bacı, ayıb deyil? Ağa Tərlan kimi cavana kimin dili gələr
qarğış eləyə? Dilin Allah qurudar. Ona dəyən dəyib.Bircəxanım gözlərini dizinə
dikib dilləndi:
-Düzdür, balama dəyən deyib, bəlası güclü gəlib, özü də düşmən əliynən
dəyməyib, belindən gəldiyi atasının əlindən, əli qurumuşun...
Allah mənim naləmi yerdə qoymaya gərək. Bu bir ayda, Allah şahiddi ki, mən
nə çəkmişəm, balam nə çəkib?.. Nə yeyir, nə içir, gücnən bir tikə dadızdırıram.
Deyir: "Ana, dayı mən tay-tuş içinə necə çıxaram"- gözünün yaşını leysan kimi
tökür. Neçə vaxtdı heç nə demirdi, indi dünən kişi ölmüş gedib Şəkiyə, xam ipəyə,
karvan üstüynən... Deyəsən, elə özü də dərdin dağıtmağa çıxıb, yoxsa sarvan
Kərbəlayı Vəliyə gördürürdü qırağkı alverini. Bu səhər atasının getdiyini eşidən
kimi dedi: "Ana, sənə qurban olum, get Ağagilə, deyinən bir zəhmət çəkib bizə
gəlsin, ona sözüm var". Əvvəl istəmədim gələm, dedim: "Ay bala,o soz-sovdan
sonra Ağa bizə ayaq qoymaz, üzüm də gəlməz, necə gedim? Sonra atan bilər,
qayıdandan sonra, iraq-iraq Ağaya tərk-ədəb söz-zad deyər, cəddi bizə qənim olar".
Çox yalvardı, Minasoltan, sənə qurban olum, neynim, balamdı! Bala adamı, sizdən
irağ yerdə, düşmən qapısına da aparar... Qorxuram balam xəft-damağ ola...
Bircəxanım danışdıqca onun sözlərindəki şübhələr Minasoltanın da qəlbini
gəmirirdi. Lakin o ana idi, həm də Seyid Əzim anası! Məgər o, dərddən boğulan
başqa bir anaya yox deyə bilərdimi? Sonra oğlunun üzünə necə baxardı. "Allah,
sən saxla xata-baladan! Görəsən, razı olum? Görəsən, özü nə deyər? Gedər! Heç
bir söz deməz - gedər".
Bircəxanımın intizarlı sükutu ananı dilləndirdi:
-Ağa evdə yoxdu, qəssaba gedib! İndi gələr, deyərik, mən bilən o,dostunu darda
qoymaz. Qoy hələ bir durum kişinin canamazını gətirim.
Bu sözlərlə Minasoltan narahatlığım büruzə verməmək üçün yerindən qalxdı,
qonşu otağa keçdi, ərinin köhnə canamazını taxçadan alıb
__________________Milli Kitabxana_________________
100
qonağın yanına qayıtdı; titrək əllərini uzadıb canamazı əlinə alan Bircəxanım,
seyid canamazını dərin bir etiqad və ümidlə öpdü, gözlərinə, alnına sürtdü, qatlayıb
bağrına basdı:
-Cəddinə qurban olum, qəbrin nurnan dolsun, Ağa! Allah sənin balanı cənab
peyğəmbər yanında üzü ağ eləsin. Səndən balama şəfa istəyirəm...
Analar çox gözləməli olmadılar. Şair içəri girən kimi Bircəxanım oğlunun
yaşıdı olsa da, Ağadan yaşmaqlanıb, cəld ayağa qalxdı. Qadının tez yaşınmasına
baxmayaraq, Seyid Əzim onu tanıdı. Bu, Tərlanın anası idi. Gənc şairin ürəyi
qırıldı, təzəcə açılan üzünü bulud aldı, ona elə gəldi ki, Tərlanın taleyində o da
nədəsə müqəssirdir. Bu fikir neçə vaxtdan bəri şairə rahatlıq vermirdi. Amma dostu
haqqında Mahmud ağa ilə Cavaddan başqa heç kəslə danışa, xəbər-ətər tuta, yanına
gedib əhval soruşa bilmirdi. Qapaqlı onun kölgəsini də qılınclayırdı. Şair, Hacının
bütün hiylələrindən xəbərdar idi. Dostları, xüsusilə Cin Cavad ona bir çox şeyi
demiş, xəbərdar eləmişdi. Hacı Əsəd nədənsə, oğlunun işlərinin açılmamasına soy
edir, Tərlanı soruşana "azarlayıb" deyir, döydüyünü, yaraladığını bildirməməyə
çalışırdı. Tərlanı küçədə-bazarda görən olmamışdı. O mənhus gündən bəri, heç kəs
onunla alağa-salağa saxlaya bilməmişdi. Qapaqlının evi qapaqlı qazan kimi
bağlanmışdı, quş quşluğuynan hasardan içəri səka bilmirdi. İndi Bircəxanımı öz
evlərində görməsi Seyid Əzimi çox təəccübləndirdi və təşvişə saldı. Dərhal
"görəsən, Tərlanın başında nə iş var?" - deyə dostunu düşündü.
-Xoş gəlmisən, Bircə xala, ağa Tərlan nə təhərdi?
-Xoş günün olsun, Ağa, babatdı... - qadın naməhrəmlə danışdığını unudub
dilləndi və utandığından səsini kəsdi.
Ana dəsmala bükülü əti oğlundan alıb, məsələni anlatmağa başladı:
-Başına dolanım, Bircə bacını ağa Tərlan özü yollayıb ismarışdayıb, səni
istəyir...
Şair tərəddüd içində duruxdu:
-Bəs...
Hər iki ana məsələni anladı; Ağa, Hacının bu işə necə baxacağını fıkirləşirdi, o
razı olardımı ki, şair, Tərlanla görüşsün? Tərlanın anası tələsik dedi:
-Qurbanın olum, Ağa, kişi kəsmiş. şəhərdə yoxdu, Şəkiyə gedib...
Seyid Əzim məsələni anladı, onun dostu ilə görüşü gizli təşkil olunurdu.
Bircəxanım sözünə davam elədi:
__________________Milli Kitabxana_________________
101
- Tərlan deyir ki, Ağa narahat olmasın, gedələr dəyirmanda olacaq, axşam
azanından sonra zəhmət çəkib gəlsin. Evdə səndən, məndən, bir də bədbəxtimdən
başqa heç kim olmayacaq...
Bu "oğurluq" görüş şairin qüruruna toxunurdusa da başqa çarəsi yox idi, dostu
Tərlan ağır xəstə yatır, onu görmək istəyir, məgər getməmək olarmı?
...Qadın heç kəsin naümid qayıtmadığı qapıdan ürəyi ümidlə dolu çıxdı. O,
Tərlana süd verdiyi döşlərinin arasına bir də bir canamaz sıxmışdı. Yazıq ana,
oğluna bu köhnə, tarixi bəlkə də yüz ilə keçmiş, nəsil canamazından daha çox ümid
gözləyir, oğlunun sağalıb ayağa durması üçün nəziri nəzir dalınca deyirdi...
...Qalabazar məscidinin minarəsində Kəblə Mürvət "Lailahə İlləllah" deməyə
başlayanda şair, evlərindən çıxdı, ona elə gəldi ki, indicə darvazadan on qədəm
aralıda əli qələmkar boğçalı Məşədi Qənbəri görəcək. Kədərli olsa da bu təsadüf
ehtimalı onu gülümsətdirdi, lakin bu gün nədənsə Məşədi Qənbərə rast gəlmədi,
görünür kişi ya tez qayıdıb, ya da qüslünü gecikdirib. O gedir və düşünürdü:
"Qəribə aləmdi bu aləm, burada arvadlarını o dünyaya yolladıqca, təzə cavan arvad
alıb "səvaba nail olan", səhər-axşam qüsl, namaz və orucla, ibadət, zikrlə məşğul
olan Məşədi Qənbər "müqəddəsdi"; az qala bigünah oğul qatili Qapaqlı hörmətə
minir; yüz baş kəsəndən sonra tövbə əstəğfar edən Alış izzət sahibidi... Bu aləmdə
Tərlanların, Rzaların, Əzimlərin nəsibi niftin, nifrət, söyüş qarğışdı... Görəsən, bu
nə vaxtacan belə olacaq? Yox, Mahmud ağa da, Ağaseyidəli də, dostlarım da haq-
lıdır. Mən əgər bu el-camaata xidmət eləmək istəyirəmsə, getməliyəm, təhsilimi
artırıb qayıtmalıyam. Elə başnan qayıtmalıyam ki, avam, yazıq olmuş millətimin
başını piyləyənlərin, gözünü bağlayanların qabağında duruş gətirə bilim. Yoxsa
cənab Rza bəy kimi mənim də məktəbimə heç kəs uşaq verməz, mən mütləq
Tərlanı da dilə tutmalıyam; o da oxusun, təhsilini artırsın və biz, cənab Rza bəyin
yarımçıq qalmış işini davam etdirək, özü də elə bir təhsil və savadnan ki, heç kəs
döşümüzə durmasın. Təkcə arzudan bir şey çıxmaz, bu arzunu yerinə yetirmək, işə
çevirmək üçün bitikbaş lazımdır..." O bir aydan bəri Nəcəfuləşrəfə təhsilə getmək
haqqında düşünməyə başlamışdı.
Fikir dəryasına qərq olduğu halda, Tərlangilin mənzilinə çatdı. Qapaqlının
darvazası bağlı idi. Şair tərəddüd içərisində qapının önündə dayandı. Ehtiyatla əlini
öküz başı şəklində qayrılmış bürünc caxçaxa uzatdı. Çalmaq istəyirdi ki, qapı
içəridən açıldı... İlk azan səsindən bəri ana onun yolunun intizarında, örtülü
darvaza dalında durub gözləyirdi...
Dostları ilə paylaş: |