Möhtəşəm fərman

Səhvin qarşısını almaq üçün agahlığı təkmil edən amillər

Burada bir məsələyə diqqət yetirmək lazımdır. Bəzən agahlıq var, amma eyni zamanda səhv davam edir. Dedik ki, agahlıq uğur üçün kifayət edən şərt deyil, lazım olan şərtdir. Burada bəzi amillər var. Biri iradə və əzmkarlığın olmamasıdır. Bəziləri həqiqətləri bilirlər, amma işə qərar vermirlər, deməyə qərar vermirlər, haqq mövqedə dayanmağa və haqqı müdafiə etməyə qərar vermirlər. Əlbəttə, bu qərar verməməyin də səbəbləri var: bəzən tənbəlliyə görədir, bəzən nəfsdir, bəzən ehtiraslardır, bəzən şəxsi mənafe güdməkdir, bəzən inadkarlıqdır; bir söz deyib və indi bu sözün üstündə durmaq istəyir, sözündən dönməyi eyib bilir. Hədisdə buyurulur: "Allah inadkara lənət eləsin!" Bəzi insanların məlumatı var, həqiqəti də bilirlər, eyni zamanda müxalif cinahlara və düşmən cinahlarına kömək edirlər. Peşman olub qayıdan bu şəxslərin çoxu bir zaman radikal inqilabçılar idilər, amma bir gün görürsünüz ki, tam əks tərəfdə dayanıb inqilab düşməninə xidmət edirlər. Bu sözügedən amillərə görədir; nəfsi istəklərə, ehtiraslara, maddi istəklərə qərq olmaq. Bunların əsas səbəbi də Allahı yada salmamaq, vəzifəni unutmaq, ölümü və qiyaməti unutmaqdır. Bunlar istiqamətlərin 180 dərəcə dəyişməsinə səbəb olur.

Əlbəttə, bəzi adamlar da səhv edirlər; hamını müqəssir bilmək olmaz. Biz hörmət əlaməti olaraq bunlara hədiyyə kimi pul verən bəzi adamları da gördük. Bunlar da pulu aldılar və adının rüşvət olduğunu bilmədilər. Real aləmdə baş verənlər bir-birinə bənzəyir, lakin önəmli olan bunun adının rüşvət olub-olmamasını bilməkdir. Siz elə yerdəsiniz ki, bu işi onun istəyinə uyğun şəkildə görə bilərsiniz. O gəlib əlinizi öpür və sizə pul verir. Bunun adı rüşvətdir. Haram rüşvət budur.

İğtişaş zamanı da belə oldu. Bəziləri bu iğtişaşa və çaxnaşmaya qoşuldular, amma adının təxribat olduğunu bilmədilər; anlamadılar ki, bu, Əmirəl-mömininin (ə) buyurduğu fitnədir: "Fitnə əl-ayağı altda qalanları əzib məhv edir". Onlar bunun fitnə olduğunu anlamadılar. Bir nəfər bir söz dedi, bunlar da təkrarladılar. Buna görə hamını eyni hökmlə ittiham etmək olmaz; düşmənin hökmü diqqətsizlik edənin hökmündən fərqlidir. Və təbii ki, diqqətsizi oyatmaq lazımdır.

Agahlıq - İranı başıuca etmək üçün lazım olan şərt

Mən siz gənclərə demək istəyirəm: Siz müsəlman İranı qurmaq, yəni həm əziz vətəninizi, xalqınızı və tarixinizi başıuca etmək, həm də əzəmətli İslam qarşısındakı vəzifənizi yerinə yetirmək üçün - bu gün kimsə müsəlman İranın başucalığı üçün çalışsa, həm öz vətəninə, xalqına və tarixinə xidmət etmişdir, həm də bəşəriyyətin xilas amili olan əziz İslama – ayıq-sayıq olmalısınız, səhnədə olmalısınız, agahlığı rəhbər tutmalısınız. Ehtiyatlı olun ki, avamlığa düçar olmayasınız.

Düşməni tanıyın, onun görkəminə aldanmayın. Materialistlik, maddiyyata təmayül, materialist təfəkkür və sivilizasiya bəşəriyyətin və sizin düşməninizdir.

Qərbin texnologiya və sərvətinin aqibəti

Qərb dünyası iki-üç əsr bundan öncədən üstün elmə və üstün texnologiyaya nail oldu, sərvətin yolunu tapdı; müxtəlif ictimai məktəblər, fəlsəfi-ictimai təfəkkürlər meydana çıxdı: humanizm təfəkkürünə əsaslanan liberalizm, demokratiya düşüncəsi və sair. Bunların, yaxud bu düşüncələrlə məşğul olan şəxslərin məqsədi bəşəri rahatlığa, aramlığa və rifaha qovuşdurmaq idi, baş verənlər isə bunun əksinə oldu. Bəşər humanizm təfəkkürü sayəsində və humanist quruluşlarda nəinki insaniyyətə və rifaha nail olmadı, hətta ən çox müharibələr, ən çox qırığınlar, rəhmsizliklər və insanın insana qarşı ən çirkin rəftarları bu dövrdə baş verdi.

Bu sahədə daha öndə olanlar daha pis oldular. Dünən qəzetdə bir material oxudum; Amerika mənbələrinə istinadla yazılmışdı ki, ABŞ əlli il ərzində dünyada səksən hərbi çevriliş etmişdir. Sərvətin, texnologiyanın, silah-sursatın və daha nələrin zirvəsinə çatan şəxslərin vəhşilikləri budur; insan öldürmək bunlar üçün adi işdir, öz sözləri ilə desək, soyuqqanlıdırlar. Qərb ədəbiyyatında yazırlar ki, filankəs soyuqqanlılıqla adam öldürdü. Bu, sonsuz rəhmsizliyin əlamətidir. Yalnız onların işğalı altında olan və hərbi yolla zəbt etdikləri Əfqanıstanda, İraqda və digər regionlarda yox, öz ölkələri daxilində də belədirlər. Onların real həyatlarını təsvir edən ədəbiyyatlarına baxın; incəsənət və ədəbiyyatları həyatlarında nə baş verdiyini göstərir. Onlar üçün adam öldürmək çox asan işdir. Digər tərəfdən, cəmiyyətlərində, gənclər arasında depressiya, həyata ümidsizlik və ictimai qaydalar əleyhinə üsyan halları var. Orada gənclərin geyim formaları və bəzənmə tərzləri əksərən onlara hakim olan vəziyyətdən təngə gəldiklərinə görədir. Bu, qərblilərin yaratdığı məktəb və quruluşların təcrübəsidir. Bütün bunların səbəbi dindən, mənəviyyatdan və Allahdan uzaqlaşmalarıdır.

İran xalqı - bugünkü materialist dünyada yeni hərəkətin öncülü

Siz bu gün onlara əks istiqamətdə hərəkət edirsiniz. Siz ilahi təfəkkürlə elmə yiyələnmək istəyirsiniz; təbii və insani imkanları xalqların, öz xalqınızın və bəşəriyyətin maddi və mənəvi xeyri üçün toplamaq istəyirsiniz. Sizin istiqamətiniz ilahi istiqamətdir. Bu, uğurlu olacaq, inkişaf edəcək. Bu, iki-üç əsrdir Qərb tərəfindən başlanmış səhv və sapqın hərəkətin qarşı tərəfində olan hərəkətdir. Bu, mübarək hərəkətdir və davamlı olacaq.

Dünyaya hakim olan səhv üsullarla mübarizədə lazım olan şərait

Müsəlman iranlı gənc özünü hazırlamalı, inkişaf yolunda Allah-Taalaya arxalanmalı, Ondan yardım ummalı, agah şəkildə irəliləməlidir. Bu zaman dünyaya hakim olan yanlış üsulla mübarizə aparmaq üçün münasib imkanlar əldə olunacaq və inşallah bu inqilabın və İslamın təsvir etdiyi bütün amal və arzular əldə olunacaq.

Allahın salamı, rəhməti və bərəkəti olsun sizə!

İslam İnqilabının Böyük Rəhbərinin Qum vilayətinin tələbə və gəncləri ilə görüşdəki tələbləri

1. Milli iqtidarı qorumaqda gənclərin vəzifəsi

Bu ölkəni idarə etməli, indiyədək əldə edilmiş nailiyyətlərdən istifadə edib müxtəlif səviyyələrdə bu milli iqtidarı, milli başucalığını təkmilləşdirməli olanlar sizsiniz. Bu, tarixdə sizə yönəlik bir vəzifədir.