Qarshi davlat universiteti pedagogika kafedrasi

Yosh inqirozi – keskin pedagogik-psixologik o‘zgarishlar bilan xarakterlanadigan ontogenezning alohida, nisbatan uzoq davom etmaydigan davrlaridir. Asabiy va jaroxatli xarakterga ega tangliklardan farqli ravishda shaxs rivojlanishining izchillik qonuniyatlariga bo‘ysunadi.
Stress- turli xil ekstremal ta’sirlar – stressorlarga javoban yuzaga keluvchi keng doiradagi holatlarni belgilovchi holat.
Frustrasiya – ma’lum maqsad yo‘lidagi mavjud mavhum to‘siqlarni paydo bo‘lishiga nisbatan hosil bo‘ladigan muvaffaqiyatsizlikni boshdan kechiruvchi ruhiy holat.
O‘smirlik 10-11 yoshlardan 14-15 yoshlargacha bo‘lgan davrni tashkil etadi. Hozirgi o‘smirlar o‘tmishdoshlariga nisbatan jismoniy aqliy va siyosiy jihatdan bir muncha ustunlikka ega. Ularda jinsiy yetilish, ijtimoiylashuv jarayoni, psixik o‘sish oldinroq namoyon bo‘lmoqda. Aksariyat o‘quvchilarda o‘smirlik yoshiga o‘tish, asosan 5-sinflardan boshlanadi. “Endi o‘smir bola emas, biroq katta ham emas”- ayni shu ta’rif o‘smirlik davrining muhim xarakterini bildiradi. O‘smirlik – bolalikdan kattalikka o‘tish davri bo‘lib fiziologik va pedagogik-psixologik jihatdan o‘ziga xos xususiyatlari bilan xarakterlanadi. Bu bosqichda bolalarning jismoniy va psixik taraqqiyoti juda tezlashadi, hayotdagi turli narsalarga qiziqishi, yangilikka intilishi ortadi, xarakteri shakllanadi, ma’naviy dunyosi boyib boradi, ziddiyatlar avj oladi. O‘smirlik balog‘atga yetish davri bo‘lib, yangi hislar, sezgilar va jinsiy hayotga taalluqli chigal masalalarning paydo bo‘lishi bilan ham xarakterlanadi. Bu yoshda o‘smir rivojida keskin o‘zgarishlar ro‘y bera boshlaydi. Bu o‘zgarishlar fiziologik hamda psixologik o‘zgarishlardir. Bo‘yiga o‘sish bir tekis bormaydi: qiz bolalar 5-7 sm o‘ssalar, o‘g‘il bolalar 5-10 sm.ga o‘sadilar. Bo‘yiga qarab o‘sish paysimon ilik suyaklarning uzunlashishi va umurtqa qismining kattalashishi hisobiga ro‘y beradi.
O‘smirlar o‘zlarini kattalardek tutishga harakat qiladilar. Ular o‘zlarining layoqat, qobiliyat va imkoniyatlarini ma’lum darajada o‘rtoqlari va o‘qituvchilariga ko‘rsatishga intiladilar. Bu holatni oddiy kuzatish yo‘li bilan ham osongina ko‘rish mumkin. O‘smirlik davri “o‘tish davri”, ”krizis davri”, “qiyin davr” kabi nomlarini olgan psixologik ko‘rinishlari bilan xarakterlanadi. Chunki, bu yoshdagi o‘smirlarning xatti harakatida muqobil yangi sharoitlarda o‘z o‘rnini topa olmaganligidan psixik portlash hollari ham kuzatiladi. O‘z davrida L.S.Vigotskiy bunday holatni “psixik rivojlanishdagi krizis” deb nomlagan.
O‘smirlik davriga ko‘pincha so‘zga kirmaslik, o‘jarlik, tajanglik, o‘z kamchiliklarini tan olmaslik, urushqoqlik kabi salbiy xususiyatlar hosdir. O‘smirlar hayotda, ekranda va kitoblarda kattalarning mustaqilligini va erkinligini, ularni katta va qiziqarli ishlarini, dadil harakatlarini, qahramonliklarini, atrofdagilar orasidagi obro‘larini ko‘radilar hamda havas qiladilar. O‘smirda katta yoshli odam bo‘lishga yoki hech bo‘lmaganda katta yoshli odam bo‘lib ko‘rinishga qiziqish intilish paydo bo‘ladi va bu xohishni amalga oshirish unga osondek bo‘lib ko‘rinadi. O‘smirlarning ehtiyojlari va imkoniyatlari o‘zaro mos kelmasligi o‘smirlar bilan ota-onalar, o‘qituvchilar va boshqa murabbiylar o‘rtasida qarama-qarshiliklarni keltirib chiqaradi.
Kattalar o‘smirlarning foydali jamoa ishlarida muvaffaqiyatga erishishlarida yordam berishlari va bu bilan ularning o‘z qadr qimmatlarini namoyon qilishlariga imkon berishlari lozim. Aks holda ular boshqalarning oldida o‘zlarini yuqori qo‘yishlari, bepisandlik qilishlari mumkin. Buni ular o‘zlarining qadr-qimmatlari tan olinmaganligi yoki kamsitilganligiga qarshi chiqib salbiy ishlar va xatti harakatlar orqali amalga oshirishlari mumkin bo‘ladi.
O‘smirlar nihoyatda taqlidchan bo‘lib, ularda hali aniq bir fikr, dunyoqarash shakllanmagan bo‘ladi. Ular tashqi ta’sirlarga va hissiyotlarga juda beriluvchan bo‘ladilar. Shuningdek, ularga mardlik, jasurlik, tantiqlik ham xosdir. Tashqi ta’sirlarga beriluvchanlik o‘smirda shaxsiy fikrni yuzaga kelishiga sabab bo‘ladi, lekin bu shaxsiy fikr aksariyat hollarda asoslanmagan bo‘ladi. Shuning uchun ham ular ota-onalarning, atrofdagi kattalarning, ustozlarining to‘g‘ri yo‘lini ko‘rsatishlariga qaramay, o‘z fikirlarini o‘tkazishga harakat qiladilar. O‘smirlarga farosatlilik, tejamkorlik, ehtiyotkorlik va uzoqni ko‘ra bilishlik kabi psixik xususiyatlar hali yetishmaydi.

Tengdoshlar va o‘quvchilar bilan kelishmovchilik kelib chiqishiga qo‘yidagi toifadagi o‘quvchilar sabab bo‘ladi: 1.Oilasi notinch, ota-onasi janjalkash bolalar ko‘pincha sinfda jizzakilik qilib, arzimagan sabablar tufayli ham tengqurlari bilan nizolashadi, ularni odatda sinfdoshlari va o‘qituvchilari “tarbiyasi og‘ir” bolalar deb ta’riflaydilar(6-rasm).

6-rasm

2. Kamol topishida nuqsoni bo‘lgan bolalarda, o‘ta erka tarbiyalangan bola va yoshlarda bilimlar bilan tizimli shug‘ullanish uchun iroda yetishmaydi. Hissiy qo‘zg‘alish va tormozlanish jarayoni kamchiliklar ham bilimlarni egallash va sinf jamoasiga kirishib ketishga to‘sqinlik qiladi.
3. Ruhiy rivojlanishi sustlashgan va aqli zaif bolalar va yoshlar ham darslar va berilayotgan bilimlarni o‘zlashtirishi qiyinlashgani va murakkablashib borishi natijasida bilimlarning mazmuni va ma’nosini egallashga qiynaladilar, bu holat ularda janjalkashlikka moyillikni kuchaytiradi. Chunki dars ular uchun mashaqqatli – ish, ular ilojini topsa darsga kelmaydi, kirmaydi. Janjal qiladi.
4. Iqtidorli bolalar. Ular darsda berilayotgan bilimlar darajasidan qoniqmaydi. Zerikadi. Ko‘pincha sinfdan ajralib qoladi. O‘qituvchi bilan kelisha olmaydi, shu sababli o‘zlashtirishdan orqada qolayotgan tengdoshlari ham, uning talabi va istagi darajasida dars berilmayotgan pedagog bilan ham konfliktga kirishishga moyil bo‘lib qoladi.
5. Doimo hammadan norozi, atrofdagilarga muxolifatda bo‘lganlar. Bu o‘quvchilar ota-onasiga, o‘qituvchilarga va boshqa kattalarga salbiy munosabatda bo‘ladilar. Ularning gapiga ishonmaydilar. Mavjud tartib-intizomga bo‘ysunishni istashmaydi. Qasddan darsdan qochib ketadi, ota-onasiga azob berish uchun o‘g‘irlik qiladi, arzimagan narsalarga janjal ko‘taradi.
6. Birovlarga taqlid natijasida yuzaga keladigan konfliktlar. Bolalar yoki yoshlar o‘zidan katta kishilarga, ba’zan kino aktyorlarga va boshqa sevimli qahramonlarga taqlid qilib sinfdagi tartib-intizomga, axloq normalariga rioya qilishni istamaydilar.
Pedagogik yoki sinf jamoasidagi konfliktning kelib chiqish sabablarini ko‘rib chiqamiz:
Jamoada (sinf jamoasi, mehnat jamoasi va boshqalar) har xil mavqedagi shaxslar o‘rtasidagi kelishmovchiliklar ancha murakkab kechadi. Jamoaning rasmiy va norasmiy yetakchilari va ayrim tengdoshlar orasida kelib chiqadigan kelishmovchiliklarda, agar jismonan kuchli bo‘lsa salbiy xulq-atvori va xatti-harakati bilan o‘z atrofiga o‘ziga o‘xshagan “mushtum zo‘rlar”ni to‘plagan bo‘lsa, sinfdagi jismonan kuchsiz, xavotirlanish darajasi yuqori, qo‘rqoq, o‘ziga ishonchsiz o‘quvchilarni ta’qib qilishi, zo‘rlik bilan o‘ziga bo‘ysundirishi, ularni yomon yo‘llarga boshlashi mumkin.
Ba’zan shunday jismonan kuchli va salbiy yetakchilar, kuchsiz o‘quvchilarga “soliq to‘lash”ga majbur qilingani yoki darsga yaxshi va a’lo baholarga tayyorlanib kelgan o‘quvchilarni qo‘rqitish (yoki haqorat) bilan darsda javob bermaslikka majbur qilinganini eshitib qolamiz, bu yerda albatta sinf rahbari va boshqa o‘qituvchilarning beparvoligi, sinfdagi ichki o‘zaro munosabatlarni nazorat qilmasligi natijasida bunday nizolar kelib chiqadi. Bunday holatning oldi tez olinmasa, jismonan kuchsiz o‘quvchi (yoki o‘quvchilar) uchun yomon oqibatlarga olib kelishi mumkin. 8-v sinf o‘quvchisi jismonan kuchli bo‘lib, u o‘z atrofiga bir nechta tengdoshlarni to‘plab, butun sinf jamoasini o‘ziga bo‘ysundiradi. Ayniqsa, shu sinfdagi “a’lochi” bir nechta o‘quvchini ular ta’qib ostiga olishadi; bu asosan ularni qizlar oldida jismonan va ruhan kamsitish, darsdan keyin – ko‘chadi “jazolash”, pul talab qilish va boshqa yaramas xatti-harakatlar bilan namoyon bo‘lar edi.
Maktab psixologining tashabbusi bilan o‘tkazilgan kichik pedagogik kengash – “konselium”da 8-sinfdagi ahvol muhokama qilinib, quyidagi tadbirlar belgilandi:
1) sinfda yuzaga kelgan kichik guruhchaning a’zolarini, uning asosiy tashkilotchisi va yetakchisi bo‘lgan “S” ismli o‘quvchidan ajratish uchun, uni shu maktabdagi boshqa sinfga o‘tkazish va tezlik bilan ota-onalar yig‘ilishini chaqirish;
2) “S” bilan maktab ma’muriyati, maktab psixolgi suhbat o‘tkazishi va uni o‘z xatti-harakatining oqibatlari bilan ogohlantirishi;
3) “S”ning otasiga o‘g‘lini darsdan so‘ng futbol to‘garagiga qatnashishiga yordam berish tayinlandi (“S” futbolga juda qiziqadi);
4) 8-v sinfda psixologik muhitni yaxshilash, jipslik, hamjixatlikni rivojlantirish uchun kechalar, sayohatlar uyushtirishiga kelishib olindi.