Rusiyada kütləvi özəlləşdirmə çərçivəsində və ondan sonrakı dövrdə özəlləşdirmənin başlıca
olaraq səhmləşdirmə, kommersiya müsabiqələri və dövlət əmlakının sonradan icarəçiyə satılması
üsulları geniş tətbiq imkanı qazanmışdır. 1995-ci ildən etibarən daşınmaz əmlakın
və torpaq
ərazisinin özəlləşdirilməsinə başlanılması bu üsulun ümumi yekunda xüsusi çəkisini 16 faizə
çatdırmaqla yanaşı onun özəlləşdirmə prosesində rolu və əhəmiyyəti xeyli artırılmışdır.
Yeri gəlmişkən, onu qeyd edək ki, Rusiyada özəlləşdirmənin forma və üsulları ilə bağlı
müzakirələr bir çox ölkələrin praktikasına nisbətən xeyli qızğın keçmişdir. Məsələn, Beynəlxalq
Maliyyə Korporasiyasının mütəxəsisləri hesab edirlər ki, Rusiya üçün hərraclar vasitəsilə
özəlləşdirmə üsulu daha çox uyğundur. Onlar bunu hərracların investisiyalar cəlb edilməsinə
daha geniş şərait yaratması ilə izah edirlər. Lakin, "İqtisadiyyat və həyat" qazetinin (Rusiya)
analitik icmalçıları
hesab edirlər ki, əksinə Rusiyanın özəlləşdirmə praktikasında investisiya
müsabiqələrinin gec tətbiqi səmərəliliyi aşağı salan başlıca amil kimi qiymətləndirilməlidir1. Belə
ki, 1994-cü ildə Rusiya üzrə ticarət müəssisələrinin 68,8 faizi, ictimai iaşə müəssisələrinin 61,1
faizi, məişət xidməti obyektlərinin isə 71,8 faizi özəlləşdirildikdən sonra, investisiya
müsabiqələrinin xüsusi çəkisi artmağa başlamışdır və müvafiq göstərici 1993-cü ildə 3,8 faiz təşkil
etmişdir.
Rusiyada 1992-1999-cu illərdə özəlləşdirmənin həyata keçirilməsindən 9,25 mlrd. ABŞ dolları
məbləğində vəsait əldə edilmişdir. Bu məbləğin 7 mlrd. 628 mln. dolları (82,5 %-i) müxtəlif
səviyyələrdə büdcə orqanlarına, o cümlədən 5 mlrd. 545 mln. dolları (60%) Federal büdcəyə daxil
olmuşdur. *
Rusiyada özəlləşdirmənin gedişinin təhlilini yekunlaşdırarkən, onu xronoloji
qaydada iki mərhələyə
ayırmaq mümkündür. Birinci mərhələ 1994-cü ilin yayına qədər davam etməklə, kütləvi
özəlləşdirmə modeli çərçivəsində kiçik və orta səviyyəli müəssisələrin özəlləşdirməsini xarakterizə
edirdi. İkinci mərhələ vauçer özəlləşdirilməsi başa çatandan sonra başlasa da hələ də davam
edir. Bu mərhələnin keyfiyyət xarakteri daşımasına təminat verən hüquqi bazanın
formalaşdırılması prosesi uzun müzakirələrdən sonra reallaşdırılmışdır. Belə ki, birinci mərhələnin
siyasi və sosial aspektlərə xidmət etməsinin son nəticədə nomenklatur kapitalizminə,
maliyyə
oliqarxiyasına gətirib çıxarması, əvvəlki iki proqramla müqayisədə 1994-cü il iyul ayının 22-də
prezident fərmanı ilə təsdiq olunan yeni proqramın konseptual əsaslarının Rusiyanın elmi, ictimai
və işgüzar dairələrində, hökumətdə və Dövlət dumasında həddindən artıq siyasiləşdirilmiş və uzun
müddət davam edən müzakirəsini şərtləndirmişdir. Bu proqramla özəlləşdirilməyə münasibətdə
əmlakın üç növü müəyyənləşdirilmişdir:
1) özəlləşdirilmiş müəssisələrdə dövlətin səhm paketi;
2) özəlləşdirilmiş müəssisələrin torpaq əraziləri;
3) daşınmaz əmlak.
Belə yanaşma potensial ödəmə qabiliyyətli tələbin qiymətləndirilməsi əsasında formalaşmışdır.
Ənənəvi istehsalat sahələrinin məhdudulaşdırılmış siyahısına gəlincə, o əvvəlki proqramda olduğu
vəziyyətdə saxlanılmışdır. Bu proqramla özəlləşdirmənin pul formasına
keçidin təmin edilməsi
nəticəsində büdcənin bütün səviyyələrində özəlləşdirmədən daxil olan vəsaitlərin həcmi
əhəmiyyətli dərəcədə artmağa başlamışdır. Bu zaman özəlləşdirmə zamanı əmlakın
qiymətləndirilməsi məsələsində Dövlət Əmlak Komitəsi əvvəlki formal mövqeyində qalaraq
hərrac, müsabiqə prinsipi üzrə son satış qiymətinə üstünlük verirdi. Bu istiqamətdə dəyişən
yeganə olaraq, əmlakın 1 yanvar 1992-ci ilə yenidən qiymətləndirmə bazasında ilkin-start
qiymətinin qaldırılması ilə bağlı idi. Bu mərhələdə özəlləşdirmədən daxil olan vəsaitin yeni sxem
üzrə bölgüsü tətbiq olunurdu. Belə ki, əgər əvvəllər, yəni 1994-cü ilin iyul ayınadək
özəlləşdirmədən əldə edilən vəsaitlər büdcənin müxtəlif səviyyəli orqanlarına
daxil olurdusa, yeni
proqrama görə müəssisənin satışından əldə edilən vəsaitin 51 faizi sonradan investisiyaları
maliyyələşdirmək məqsədilə onun hesablaşma hesabına köçürülürdü. Bu da praktiki olaraq,
alıcıların müəssisəni tələb olunan qiymətin yarısını ödəməklə özəlləşdirməsi demək idi.
Rusiya özəlləşdirilməsinin növbəti mərhələsində müəssisənin işçilərinə və menecerlərə şamil
olunmuş güzəşt hüququnun reallaşdırılmasında tamamilə yeni model tətbiq edilirdi. Bu model üzrə
2 variant nəzərdə tutulurdu: kollektivə, ya səhmdar kapitalın 25 faizi həcmində səsvermə hüququ
olmayan imtiyazlı səhm, ya da 10 faizi həcmində, səsvermə hüququna malik adi səhm 1
il ərzində
ödənilmək şərti ilə nominal dəyərinin 30 faizinə qədər güzəştlə təklif olunurdu. Belə yanaşma
çeklərin dövriyyədən çıxarılması və yeni mərhələdə iri səhm paketlərinin strateji investora təklif
olunması ilə izah edilirdi. Eyni zamanda əvvəlki variant üzrə daha çox vauçerə təklif olunan 51
faizlik səhm paketinin hazırki mərhələdə kollektiv tərəfindən pul ilə alınması imkanlarının
zəifliyi də bu yanaşmada dəyişikliyi şərtləndirən başlıca arqumentlərdən biri hesab oluna bilər. Bu
proqramla bəzi istisnalarla əsas fondlarının dəyəri 1994-cü ilin 1 yanvarına 20 min rubldan yuxarı
olan bütün müəssisələrin bazasında açıq tipli səhmdar cəmiyyətin formalaşdırılması nəzərdə
tutulurdu. Əsas fondlarının balans dəyəri 20 min rubldan aşağı olan bütün müəssisələrin hərraclar,
kommersiya və ya investisiya müsabiqələri vasitəsilə özəlləşdirilməsi məqsədəuyğun hesab edilirdi.
Strateji investorları maraqlandırmaq və onları müəssisənin uzunmüddətli inkişafına, idarəetmə
fəaliyyətinə cəlb etmək üçün nisbətən iri müəssisələrin səhmlərini 15-25 faizlik paket şəklində
pul hərraclarına və investisiya müsabiqələrinə təklif etmək nəzərdə tutulurdu. Bununla yanaşı
ixtisaslaşdırılmış pul hərracları keçirilməklə bu üsulla müəssisənin səhmlərini xırda investorlara
da təklif etməyə üstünlük verilirdi.
Bu mərhələdə xarici investorların özəlləşdirmə prosesinə cəlb
edilməsinə gəlincə, bu məsələyə
münasibətdə ikinci proqramla əvvəllər tətbiq edilmiş məhdudiyyətlər saxlanılırdı.
Bu proqramdan sonra 1997-ci ilin yayında "Rusiya Federasiyasında dövlət və bələdiyyə əmlakının
özəlləşdirilməsinin əsasları haqqında" Federal Qanun qəbul edilmişdir. Bu Qanuna sonradan iki
dəfə dəyişiklik (1999-cu ilin 23 iyununda və 2000-ci ilin 5 avqustunda) edildiyindən, hazırda o yeni
redaksiyada Rusiya Federasiyasında mülkiyyətdə struktur dəyişiklərinin təşkilati və hüquqi
əsaslarını müəyyən edir.
MDB məkanında Rusiyadan sonra özəlləşdirmə təcrübəsinin zənginliyinə və nəticələrinin təhlil
nöqteyi-nəzərindən əhəmiyyətli olmasına görə fərqlənən ikinci dövlət Qırğızıstan hesab oluna bilər.
SSRİ-nin dağılması, ənənəvi təsərrüfat əlaqələrinin
itirilməsi, inzibati-amirlik sistemində fəaliyyət
göstərmiş dövlət müəssisələrinin fəaliyyətinin səmərəsizliyi Qırğızıstanda 1991-ci ildən
başlayaraq müşahidə olunan tənəzzül meyllərini gücləndirməklə yanaşı dövlət inhisarçılığına son
qoymağa, bazar mühitində azad rəqabət şəraiti formalaşdırmağa doğru yönəlmiş təxirəsalınmaz
tədbirlərin həyata keçirilməsinə zərurət yaratmışdır. Bu dövrdən etibarən mülkiyyətin
dövlətsizləşdirilməsini, müəssisələrin özəlləşdirməsini şərtləndirən struktur islahatlarının start
götürməsi üçün ilkin olaraq qanunvericilik sisteminin yeni əsaslarla formalaşdırılması tələb
olunurdu. Bu məqsədlə tez bir zaman ərzində Qırğızıstanda hüquqi və normativ bazanın təşkili
üçün yeni Qanunlar qəbul olunmağa başladı. Onların siyahısında "Qırğızıstan Respublikasında