- 84 -
qədər gəlib çatan klassik şeir ənənəsini və üslubunu təkmilləşdirərək hamının gördüyü və bildiyi,
lakin dilə gətirməyi bacarmadığı məsələləri ictimai düşüncənin məhsulu etmiş, Azərbaycanda
vətəndaşlıq poeziyasının əsasını qoymuşdur. Nəticə etibarilə millilik və müasirlik, dərin lirizm, fəal
vətəndaşlıq mövqeyi və bəşərilik Məmməd Araz şeirinin özünəməxsusluğunu müəyyən etmişdir.
Məmməd Araz Azərbaycan pedaqoji fikir tarixində Vətən mövzusuna özünün nəzəri
baxışını əsaslandıraraq yazırdı:”Vətən torpağı fiziki cəhətdən daim dəyişdiyi, onun xarici mənzərəsi
gözəçarpacaq dərəcədə yeni görkəm aldığı kimi, Vətənin vətəndaş oğlunun da münasibəti yaxşı
mənada dəyişməlidir. Şair ucsuz-bucaqsız kainat axınında üzən bu Vətən gəmisini müxtəlif
səmtlərdən görməli, onu tuta biləcək meteor yağışlarını duyub xəbər verməlidir. Bunlar, əlbəttə,
astronomik, meteoroloji məkanda yox, beynəlxalq, siyasi, ictimai, mənəvi mənada başa
düşülməlidir”. Məmməd Arazın irəli sürdüyü bu fikirlər o dərəcədə ciddi mətləblərdən xəbər verirdi
ki, onları tərənnüm şeirləri ilə ifadə etmək mümkün deyildi. Ona görə də ötən əsrin 50-ci illərində
Məmməd Arazın ilk qələm təcrübəsi olan tərənnüm poeziyası, şeirin fikir yükü artıqca öz yerini
düşüncə poeziyasına vermişdir. Bununla bərabər tərənnüm şeirlərinin müəllifi kimi Məmməd
İbrahim təxəllüsü də düşüncə poeziyasının böyük ustadı Məmməd Arazla əvəzlənmişdir. Bu,
sadəcə, təxəllüs dəyişikliyi deyildi. Məmməd Araz yaradıcılığından qırmızı xətlə keçən Araz
mövzusu poeziyamıza vətəndaşlıq lirikasının ən yaxşı nümunələrini gətirmişdir. Ona görə ki, bu
mövzu şairin ruhuna və təbiətinə uyğun idi. O, Arazla öz döğma dilində danışmağı bacarır, hətta
şeirlərinin birində “Araz dili” ifadəsini işlədərək yazırdı:
...Mən neçə yol danışmışam Arazla,
Araz dili, ürək dili, göz dili,
Torpaq dili, hava dili, göy dili (3,səh.138).
Məmməd Arazın “Üç oğul anası” (1957) poeması xalq yazıçısı İsa Hüseynovun psixoloji
nəsrinin milli poeziyadakı yol yoldaşıdır. Əsərdə İkinci cahan hərbində üç oğlunu itirmiş
Azərbaycan qadınının-Ananın mərdanə bədii obrazı uğurla canlandırılmışdır . “Araz axır” (1960)
poemasında isə təxminən əlli ildən çox bundan əvvəl müharibə əleyhinə yazılmış poetik çağırış bu
gün də bütün dünya üçün aktual səslənir.
Əridib silahları
Biz marten sobasında,
Körpü yarada billik
Yerlə Mars arasında,-
Müharibə olmasa! (4,səh.61-62).
“Paslı qılınc (1964) poeması sanki yazıldığı dövrün yeni tipli “Aygün”üdür. Bu əsərlə,
poema Azərbaycan ədəbiyyatında bir janr kimi ümumi pafoslu mövzulardan sadə, bir qədər də
mürəkkəb həyati mətləblərin ifadəsinə yön almışdır.
“Məmməd Araz təpədən dırnağa qədər milli şairdir” (5,səh.95). Bunu onun bütün
yaradıcılığı təsdiq edir . İlhamının, bədii təfəkkürünün, qan yaddaşının hopduğu “Atamın kitabı”
poemasında bütün hadisələrə, fikir düzümünə məhz milli-mənəvilik mövqeyindən yanaşılmışdır.
“Atamın kitabı” poeması Azərbaycan ədəbiyyatında böyük Mirzə Cəlil Məmmədquluzadənin
“Anamım kitabı” əsərindən sonra birlik, Vətən təəssübkeşliyi və mənəvi ucalıq haqqında yazılmış
ən kamil poetik dastandır.
Mirzə Ələkbər Sabirə həsr olunmuş “Mən də insan oldum” (1962) poemasında Məmməd
Araz o zamankı sərt rejimə baxmayaraq, örtülü vasitələrlə mənsub olduğu xalqın azadlığı və
müstəqilliyi haqqındakı arzularını ifadə etmişdir. “Əsgər qəbri haqqında ballada” poemasında isə
lirik başlanğıc aparıcıdır. Əslində, bu əsər poema-monoloqdur. Qayalara yazılan səs” poemasında
orjinal təbiət mənzərələri canlandırılmış, peyzaj lirikasının yaddaşlara həkk olunan mükəmməl
nümunələri yaradılmışdır. Belə məqamlarda Məmməd Araz mahir bir şair-rəssam kimi çıxış edir.
Məmməd Arazın çoxcəhətli yaradıcılığında publisistikanın da özünəməxsus yeri var. Şeirin
ölçülərinə sığmayan ciddi həyati mətləbləri, aktual məsələləri Məmməd Araz publisistika
nümunələrində əks etdirmişdir.”Naxçıvan albomu”, “Yer üzünün Qarabağ düzü”, “Kür qovuşur
salyana”, “Torpaqdan göyərən ucalıq”, “Arpaçayın aşıb-daşan nəğməsi”, “İyirmi üç ildən sonra
yazılmış cavab” və s. kimi publisist yazılar aradan illər keçə də, əhəmiyyətini və dəyərini itirməyən
- 85 -
sənət nüminələridir. Məmməd Araz doğulduğu torpaq barədə, onun gələcəyi haqqında
düşündüklərini “Naxçıban albomu”nda cəmləşdirib, nəsillərə yadigar qoymuşdur. Məmməd Arazın
ən böyük yadigarı unun bitib-tükənməyən istedadının məhsulu olan əsərləri-şeir və poemaları,
publisistika və tərcümə materiallarıdır.
Bədii tərcümə sahəsində də Məmməd Araz uğurla fəaliyyət göstərmişdir. Vaxtilə Abbas
Abdullanın yazdığı kimi o, “ürəyindən keçənləri başqa millətdən olan sənət dostlarının şeirlərində
görəndə sevinən, onları ana dilimizdə oxuculara çatdırmağı özünə borc bilən şairdir”. Buna görədir
ki, onun tərcümələrinin böyük əksəriyyəti Məmməd Arazın şair ürəyindən qopan öz şeirləri kimi
səmimi və poetikdir.Xüsusən, şairin Mixail Lermantov, Taras Şevçenko, Qaysin Quliyev, Mustay
Kərim, Olyas Süleymenov, Mixail Svetlov, Sergey Vasilyev, Oleq Şeştinski və başqalarından etdiyi
tərcümələr kamil sənət nümunələridir.
Məmməd Araz yaradıcılığının bəzəyi düşüncədir. O, oxucunu sözlər vasitəsilə düşündürür.
Bu sözlərin isə hər birinin öz məna tutumu var. Sadəlik, poetik vüsət, ifadə özünəməxsusluğu-bütün
bunlar Məmməd Araz yaradıcılığına fəlsəfi dəyər və hikmət gətirmişdir. Bu gün sözləri zərbi
məsələ, hikmətli sözlərə çevrilən az sayda şair var ki, onlardan biri də Məmməd Arazdır. Şairin
aforizmə çevrilmiş bəzi fikirlərinə diqqət yetirək: “Nahaqqa tən olan yerdə haqq itər”, “Dərd asan
əkilər, çətin biçilər, “Od halal olmasa, ocaq alışmaz”, “Qeyrətdən güc alar gücü az ölkə”, “Bu
dünyada qurmaq çətin, yıxmaq asan”, “Halal şöhrətlərə şörətdi zaman”.
Məmməd Araz yaradıcılığının baş qəhrəmanı Azərbaycandır. Onun “Vətən mənə oğul
desə”, “Məndən ötdü, qardaşıma dəydi”, “Mənim Naxçıvanım”, “Ata ocağı”, “Ana yurdum, hər
daşına üz qoyum”, şeirləri vətən mövzusunda ən yaxşı əsərlər kimi dillər əzbəridir.
Azərbaycan poeziya sənətini zəngin ənənələrini müstəqillik dövründə də yaşadaraq davam
etdirən Məmməd Arazın adı bu gün də böyük ehtiramla anılır. Öz əsərləri ilə yüksək bədii
sənətkarlıq və əsl vətəndaşlıq qeyrəti aşılayan, doğma Vətəni sonsuz məhəbbətlə sevən Məmməd
Araz poeziyasını Azərbaycan torpağından, tariximizdən ayrı təsəvvür etmək mümkün deyil.
Azərbaycan dilinə dərindən bələdlik, doğma Vətənə bağlılıq, istiqlalçılıq, vətəndaşlıq hisslərinin
tərənnümü, fikir dərinliyi və sadəlik, poetik təfəkkür genişliyi kimi yüksək yaradıcılıq keyfiyyətləri
Məmməd Araz irsinə uzunömürlülük vermiş, onun geniş oxucu kütləsinin dərin rəğbətini qazanan
əsərlərinə mahnılar bəstələnmişdir.
Məmməd Arazın ilk yaradıcılığı ötən əsrin 50-ci illərindən başlasa da, onun təkrarsız
istedadı 1970-ci illərdə parlamışdır. Məmməd Araza böyük şöhrət gətirən “Atamın kitabı”,
“Həyatın və sözün rəngləri”, “Oxucuya məktub”, “Qanadlı qayalar”, “Aylarım, illərim” kitabları
məhz bu illərdə çap olunmuş, əsərləri xarici dillərə tərcümə edilərək geniş oxucu kütləsinin
məhsuluna çevrilmişdir.1975-ci ildə Azərbaycan Ali Soveti Rəyasət Heyətinin Fəxri fərmanı ilə
təltif olunan böyük şairə 1978-ci ildə “Əməkdar mədəniyyət işçisi”, 1984-cü ildə “Əməkdar
incəsənət xadimi” fəxri adları verilmiş, 1988-ci ildə “Azərbaycan Dövlət mükafatı laureatı” ilə təltif
olunmuşdur. 1995-ci ildə isə ümummilli lider Heydər Əliyev Məmməd Arazı “İstiqlal” ordeni ilə
təltif etmişdir. Ulu öndər Məmməd Araz sənətini yüksək qiymətləndirərək demişdir:”Bu gün bir
daha Məmməd Arazın Azərbaycan xalqının mədəniyyətinə, ədəbiyyatına verdiyi töhfələri gördük,
eşitdik və bunların xalqımız üçün nə qədər faydalı olduğunu bir daha bildik, bir daha dərk etdik ki,
Azərbaycan xalqının həyatında Məmməd Arazın yaradıcılığının nə qədər böyük əhəmiyyəti var.
Ümidvaram ki, Azərbaycan xalqı daim müstəqilliyini qoruyub saxlayacaq və müstəqil
Azərbaycanın ilk “İsiqlal” ordeninə layiq görülmüş şəxsiyyətlərdən biri kimi Məmməd Araz,
Azərbaycan xalqının tarixində indi olduğu kimi, gələcəkdə də öz yerini tutacaqdır”.
ƏDƏBİYYAT
1. M.Araz.Seçilmiş əsərləri. Dörd cilddə, I cild, Bakı,”Ozan”, 2003
2. M.Araz.Seçilmiş əsərləri. Dörd cilddə, I cild, Bakı,”Ozan”, 2003
3. M.Araz.Seçilmiş əsərləri Dörd cilddə, III cild, Bakı,”Ozan”, 2003
4. M.Araz.Seçilmiş əsərləri Dörd cilddə, IV cild, Bakı,”Ozan”, 2003
5.H.Mehdiyev.Çağdaş poema və gerçəklik. Bakı, Elm,2000.