64
UOT 339
BAZAR İQTİSADİYYATI ŞƏRAİTİNDƏ BEYNƏLXALQ ƏLAQƏLƏRİN
QLOBALLAŞMASININ BƏZİ MƏSƏLƏLƏRİ
1
MƏMMƏDOV İLQAR SƏMƏNDƏR oğlu
2
TAĞIYEVA AİDƏ VALEH qızı
Sumqayıt Dövlət Universiteti, 1-dosent, 2-baş laborant
e-mail:aidatagiyeva02@gmail.com
Açar sözlər: qloballaşma, əmtəə, informasiya, texnologiya, kapital, resurslar, təbii ehtiyatlar,
transmilli korporasiya
Qloballaşma prosesinin neqativ cəhətlərinə – daxili bazara davamlı dempinq təzahürlərinin
güclənməsi nəticəsində yerli əmtəə istehsalçılarının çoxsaylı çətinliklərə məruz qalması, Elmi-
Texniki Tərəqqinin ən yeni nailiyyətlərinin istehsalda tətbiqi nəticəsində iş yerlərinin itirilməsi,
əhalinin gəlirlərinin səviyyəsi arasındakı təbəqələşmənin güclənməsi və sair amillər aid edilir.
Qloballaşma prosesi mahiyyət etibarı ilə əmtəə, xidmətlərin, işçi qüvvəsinin informasiya,
texnologiya və kapital resurslarının maneəsiz hərəkəti, iqtisadi sərhədlərin və fəaliyyət zonalarının
liberallaşdırılması, təbii ehtiyatlardan istifadənin azad bazar konyukturuna tabe etdirilməsi ilə
səciyyələnən tədbirlərin məcmusu kimi dəyərləndirilir. Araşdırmalar göstərir ki, qloballaşma
prosesinin daha geniş coğrafi əraziləri əhatə etməsində önəmli rolu qlobal strukturlar oynayır.
Xüsusilə, əsrlərin qovşağında qloballaşma prosesinin daşıyıcısı kimi, qlobal müəssisələr, başqa
sözlə, transmilli korporasiyalar əhəmiyyətli rola malikdir.
Qloballaşma prosesinin beynəlxalq iqtisadi və təsərrüfat münasibətləri sferasında daha
genişmiqyaslı rola malik olması, onun siyasi proseslərlə sıx əlaqəsilə şərtlənir. Analitiklərin
araşdırılmalarından belə nəticəyə gəlmək olar ki, qloballaşma kifayət qədər uzunmüddətli tarixi
prosesi əhatə etsə də, onun daha güclü sürət alması XXI əsrin zaman etibarilə sonlarına təsadüf
edir. Belə ki, XXI əsrin son onilliyində cəmiyyətdə baş verən geosiyasi dəyişikliklər dünya
sosialist düşərgəsinin dağılmasına, nəticədə, postsovet və postsosialist məkanında yerləşən
regionların açıq satış bazarlarına və sərbəst iqtisadi zonalar çevrilməsinə gətirib çıxarmışdır.
Dünyada baş verən geosiyasi dəyişikliklər, ilk növbədə, beynəlxalq aləmdə inkişaf etmiş
dövlətlərin superiqtisadi güc mərkəzlərinə çevrilməsilə nəticələnmişdir. Təhlil göstərir ki,
qloballaşma prosesinin siyasi motivləri bütün dövrlərdə mübaliğəsiz olaraq iqtisadi məqsədlərə
xidmət etmişdir. Əslində, bütün dövrlərdə hərbi siyasi qarşıdurmalar və ziddiyyətlər ərazi
ilhaqına, təbii ehtiyatların xammal və satış bazarlarının ələ keçirilməsinə xidmət etməklə, bu və
ya digər dərəcədə qloballaşma prosesinə yardımçı olmuşdur.
Qloballaşma prosesi uzunmüddətli tarixi mərhələlər keçmişdir ki, bunlara da aşağıdakılar
şamil edilir:
-feodal müharibələr;
-qədim sivilizasiyaların və imperiyaların təşəkkülü və inkişafı;
-şəhərlərin, nəqliyyat və ticarət mərkəzlərinin yaranması;
-dünyanın coğrafi və iqtisadi cəhətdən bölüşdürlməsi;
-imperiyaların dağılması;
-yeni satış bazarlarının yaranması və genişlənməsi;
-Transmilli korporasiyaların inkişafı;
-İnternet texnologiyalarının inkişafı.
Qloballaşma prosesinə qərb iqtisadçıları tərəfindən müxtəlif aspektlərdə yanaşılır. Bir sıra
iqtisadçılar qloballaşma prosesini, xüsusilə, müsbət məqamlarını önə çəkərək, xarici ticarətin
həcminin artmasını, əmtəə və kapital dövriyyəsinin genişlənməsini, eləcə də təsərrüfat əlaqələrinin
genişlənməsinin beynəlxalq iqtisadi münasibətlər sisteminə təsirini yüksək qiymətləndirirlər.
Sumqayıt Dövlət Universiteti – “ELMİ XƏBƏRLƏR”– Sosial və humanitar elmlər bölməsi
Cild 13 № 3 2017
65
Onlar belə bir arqumenti ön plana çəkirlər ki, iqtisadi əlaqələrin liberallaşması fonunda əmtəə və
xidmətlərin, texnologiyaların, kapitalın, işçi qüvvəsinin və informasiyaların ölkələr arasında
manesiz hərəkətin təmin olunması məhsul bolluğuna, bazarların genişlənməsinə əlverişli şərait
yaradır. Digər iqtisadçılar isə qloballaşma prosesinin xüsusilə neqativ cəhətlərini vurğulamaqla
onun sürətli sıçrayışının neqativ tərəflərini göstərirlər. Onlar belə bir arqumenti əsas götürürlər ki,
qloballaşma prosesinin, xüsusilə, dempinq təzahürlərilə müşaiyət olunması əksər hallarda suveren
ölkələrin milli iqtisadiyyatına mənfi təsir göstərir və bu da super güclərin və ondan asılı olan
ölkələrin sayının artmasına səbəb olur. Məhz bütün bunlar da dünyada anti-qlobalist hərəkatının
güclənməsilə müşayiət olunur. Bu hərəkatın nümayəndələri bu və ya digər beynəlxalq təşkilatlar
və dövlətlərin istəyilə liberallaşmanın ifrat səviyyəyə çatmasını qloballaşmanın mənfi təzahürləri
kimi dəyərləndirirlər. Lakin nəzərə almaq lazımdır ki, hər bir inkişaf etmiş ölkə iqtisadiyyatının
bütövlükdə liberallaşmasının tərəfdarı deyil. Baxmayaraq ki, bu amillər Ümumdünya Ticarət
Təşkilatı prinsiplərinə ziddir, həmin ölkələr, xüsusən də, ABŞ və Avropa Birliyi ölkələri öz milli
maraqlarını qorumaqdadırlar. Araşdırmalar göstərir ki, 60-70-ci illərlə müqayisədə sonrakı dövrdə
iqtisadiyyatda dövlətin rolu nəzərəçarpacaq dərəcədə yüksəlmiş, ABŞ-da özəlləşmənin sürəti aşağı
düşmüş, liberallaşmanın tempi ləngimişdir.
Hazırda qloballaşma ilə bağlı dünyada iki qütbləşmə mövcuddur. Bunlardan birincisi
dünyada qloballaşma ideyasının tərəfdarları, ikincilər isə antiqloballaşma cəbhəsində
birləşənlərdir.
Antiqloballaşma
tərəfdarlarının
əksəriyyəti
qloballaşmanın,
xüsusilə,
kommunikasiya sisteminin inkişafı ilə əlaqədar olan beynəlxalq əlaqələrin liberallaşdırılmasının
əleyhinə deyillər. Lakin onlar əmtəə və xidmətlər bazarına sərbəst daxilolmanı təmin edən, eyni
zamanda dövlət tərəfindən yerli əmtəə istehsalçılarına zəruri hallarda maliyyə dəstəyini nəzərdə
tutan təmərküzləşmə prosesinə üstünlük verirlər.
Artıq mübaliğəsiz qeyd etmək olar ki, XX əsrin sonlarından və XXI əsrin başlanğıcından
etibarən qloballaşma prosesi kiçikliyindən və böyüklüyündən asılı olmayaraq, bütün ölkələrin
ictimai-siyasi və sosial-iqtisadi həyatlarına sürətlə müdaxilə edə bilmişdir. Doğrudur, bu
prosesdən hansı ölkələrin iqtisadi səmərə əldə edəcəyi tamamilə başqa bir problemin mövzusudur,
lakin bununla belə, qloballaşmanın hazır məhsullarının, eləcə də elm tutumlu məhsulların ixracı
ilə ixtisaslaşmış ölkələrin səmərə əldə edəcəyi şübhəsizdir. Təbiidir ki, iqtisadiyyatı beynəlxalq
bazar konyunkturundan asılı olan ölkənin strateji baxımdan zərərlə üzləşəcəyi də istisna olunmur.
Azərbaycan Respublikası dövlət müstəqilliyi əldə etdikdən sonra beynəlxalq münasibətlər
sisteminə inteqrasiya olunmaqdadır və bu istiqamətdə hüquqi və iqtisadi transformasiya tədbirləri
həyata keçirilmişdir. Transformasiya prosesinin, ilkin dövlətlərində həyata keçirilən iqtisadi
islahatlar daha çox keçmiş mərkəzləşdirilmə sisteminin dağılmasına və iqtisadiyyatın bazar
münasibətlərinin tələblərinə uyğun adaptasiya edilməsinə istiqamətləndirilmişdir. Bu mərhələdə
əsas diqqət iqtisadi qanunvericiliyin formalaşdırılmasına, mülkiyyətin özəlləşdirilməsinə,
inhisarçılıq sisteminin dağılmasına yönəldilmişdir.
İqtisadi qanunvericiliyin mühüm tərkib hissəsi kimi daxili bazarda rəqabətin qorunması,
qanunsuz inhisar fəaliyyətinin, haqsız rəqabətin və haqsız reklamın qarşısının alınması,
məhdudlaşdırılması və aradan qaldırılması məqsədilə rəqabət siyasətini həyata keçirmək üçün
antiinhisar və ya rəqabətin qorunması qanunvericiliyi yaradılmışdır. Təbii inhisar subyektlərinin
fəaliyyətinin tənzimlənməsinin qanunvericilik bazası işlənib hazırlanmışdır. Məlum olduğu kimi,
bazar iqtisadiyyatının formalaşdırılmasının əsasını rəqabətin təmin edilməsi təşkil edir. Milli
iqtisadiyyatda rəqabətin qorunmasının əsas prinsipləri Azərbaycan Respublikasının
Konstitusiyasında əks olunmuşdur.
Milli iqtisadiyyatın formalaşdığı müasir şəraitdə İqtisadi İnkişaf Nazirliyi eyni zamanda
rəqabətin stimullaşdırılması və iqtisadi qanunvericiliyə əməl edilməsinə yönəldilən funksiyalarını
da həyata keçirir ki, bunlara da aşağıdakılar şamil edilir:
-Azərbaycan Respublikasının “Antiinhisar fəaliyyəti haqqında”, “Təbii inhisar haqqında”,
“Reklam haqqında” və “Maliyyə-sənaye qrupları haqqında” qanunlara əməl olunmasına dövlət
nəzarəti;
-təsərrüfat subyektlərinin birliklərinin yaradılması, yenidən təşkili və ləğv edilməsi zamanı
antiinhisar qanunvericiliyinə riayət edilməsinə dövlət nəzarəti;
Məmmədov İ.S., Tağıyeva A.V.