STRATEJİ TƏHLİL | Say 3 • Noyabr • 2011
54
qısa və ortamüddətli perspektivdə demokratik cəmiyyətin iqtisadi əsasları
formalaşdırılmalıdır. Əgər hakimiyyətə gələcək iqtidar bu vəzifənin öhdəsindən
uğurla gələrsə, uzunmüddətli perspektivdə real demokratik cəmiyyət qurmaq
mümkün ola bilər. Əksinə, cəmiyyətdə radikal meyillər güclənə bilər, Qərbin və
Rusiyanın çox qorxduğu siyasiləşmiş islam hakimiyyətə gələ bilər.
Misirin xarici siyasəti kardinal dəyişikliyə məruz qalmayacaqdır. Ölkənin
dünya siyasətində müstəqilliyi artacaq, özünə inam güclənəcək və bu, əhalinin
siyasi oyanışı ilə şərtlənən davranış olacaqdır. Daxili sabitliyi qorumaq üçün
milli və dini köklərə meyilli siyasətin aparılması zəruri olacaqdır. Bununla yanaşı,
Misirin ABŞ və İsraillə münasibətlərində ciddi dəyişikliklər baş verməyəcəkdir.
Qısa və ortamüddətli perspektivdə Misirdəki dəyişikliklər İsrail üçün köklü
problemlər doğurmayacaqdır. Uzunmüddətli perspektivdə Fələstin problem-
inin həll edilməmiş vəziyyətdə qalması İsrailin regiondakı mövqeyinə mənfi
təsir göstərə bilər. İsrail Yaxın Şərqdə yeni aktorla - ərəb xalqı ilə qarşılaşmışdır
(7, 21). İsrail əvvəllər diqqət yetirmədiyi bu aktoru artıq nəzərə almalıdır.
Qeyd edək ki, Yaxın Şərqdə bu tip struktur dəyişikliyinin əsası 2006-cı ildə
qoyulmuşdur. Həmasin demokratik yolla hakimiyyətə gəlməsi, habelə İsrailin
“Hizbullah” ilə müharibəsi qeyri-dövlət aktorlarının regional proseslərdə rolu-
nun artmasının təzahürü idi.
Siyasi çevriliş olmuş dövlətlər içərisində Liviya nisbətən qaranlıq perspektivə
malikdir. Bu ölkədəki daxili vəziyyətin mürəkkəbliyi və böyük dövlətlərin
maraqlarının toqquşması yaxşı gələcək vəd etmir. Liviyada formalaşacaq
yeni hökumət daxili və beynəlxalq güclər arasında tarazlıq yarada bilsə,
uzunmüddətli perspektivdə normal dövlətçiliyin əsaslarını formalaşdırmaq
mümkün olacaqdır. Əks halda proseslərin Əfqanıstan ssenarisi üzrə inkişaf
etdəcəyi istisna deyildir.
Yaxın Şərq hadisələri beynəlxalq miqyasda ən çox Orta Asiya regionuna
təsir göstərəcəkdir. Orta Asiyada Yaxın Şərqdəki proseslərə oxşar ssenarinin
təkrar olunması üçün bir çox şərtlər mövcuddur. Lakin regionun mühasirə du-
rumu (Rusiya, Çin, İran tərəfindən) prosesi ləngidir.
Ərəb çevrilişlərinin İrana mümkün təsirləri
Ərəb dünyasında baş verən hadisələr fonunda İranda müəyyən eti-
raz aksiyaları baş verdi. Bir sıra təhlilçilər bu prosesin İrana da yayılacağını
proqnozlaşdırmağa başladılar. İran dövlətinin rəhbəri isə ərəb dünyasında baş
verənləri İran inqilabının yayılması kimi şərh etməyə başladı. Lakin bu fikirlərdən
heç biri həqiqəti əks etdirmirdi. İrandaxili situasiya ərəb dövlətlərindən, hər iki
tərəfin islam ölkəsi olmasına rəğmən əsaslı şəkildə fərqlənir.
1979-cu ildə İranda inqilab baş verəndə insanlar ilahi ədalətə əsaslanan bir
hakimiyyətin formalaşacağına və mövcud sosial, siyasi və iqtisadi problemlərin
aradan qaldırılacağına inanırdılar. Bu inam İraq-İran müharibəsinin sınağından
da uğurla keçdi. Lakin bu müharibədən nüvə silahını hazırlamaq siyasəti miras
qaldı.
1990-cı illərdə İran İslam Respublikası dinc inkişaf yoluna qədəm qoydu.
Say 3 • Noyabr • 2011 |
STRATEJİ TƏHLİL
55
1991-ci ildən 2011-ci ilə qədər 20 illik dövr ərzində İran gözlənilən yüksək,
ilahi ədalətin mərkəzinə çevrilə bilməmişdir. İranın ümumi daxili məhsulu
şah rejimi zamanı indikindən 30% (!) çox olmuşdur (bu vəziyyət İran üzərinə
qoyulan beynəlxalq sanksiyaların nəticəsi kimi də şərh olunur. Bax: 11).
Şah rejiminin sonuna yaxın, yəni 1970-ci illərin sonunda İran cəmiyyətin
sosial-iqtisadi strukturuna görə Yunanıstan və bir sıra digər Avropa
dövlətlərindən üstün idi. Kapitalizm sistemi mahiyyətcə yaradıcı xarakter
daşıyır. İranda mövcud vəziyyət inkişaf etdirilsəydi, daha üstün nailiyyətləri
əldə etmək olardı. Lakin bu gün İranda nə normal kapitalizm, nə də sosia-
lizm mövcuddur. Ölkə iqtisadiyyatının yalnız 1/5-i özəl sektorun əlindədir.
Bir neçə fond ölkə iqtisadiyyatının 60 faizinə nəzarət edir (12, 4). Bu gün
işsizliyin həcmi 16 faizə yüksəlmiş, əsas qida məhsullarının istehlakı 1991-
ci ildən bəri 20 faiz azalmışdır. Demoqrafik strukturda üstünlük təşkil edən
gənclərin emiqrasiyası ildə 200 min insan təşkil edir (12, 4-5). Gənc əhalinin
üstünlüyünə rəğmən İran hakimiyyəti ölkədə gənclər hərəkatına kifayət
qədər uğurlu şəkildə nəzarət etməyə nail olur (13, 375). İİR-də korrupsiyanın
səviyyəsi şah zamanındakına bərabərdir (məhz bu kimi amilləri əsas götürən
əksər qərb hökumətləri İranda inqilabın niyə
baş verdiyini anlamadıqlarını söyləyirlər: 18,
83). İranın keçmiş prezidenti M.Xatəmi İran-
İraq müharibəsi veteranları qarşısında çıxış
edərkən qeyd edirdi: “İranda neftin kəşf
olunub satışa çıxarılmasından 100 il keçir.
Bu 100 ildə neftin satışından 1 trilyon dollar
gəlir əldə edilib ki, bu rəqəmin 450 milyard
dolları son 5-6 ilin neft gəlirləri ilə bağlıdır.
Bu isə son 100 ildə neftin satışından əldə
edilən gəlirin təxminən yarısı deməkdir. Amma məmləkətin də vəziyyəti bu
gəlirə uyğun yaxşılaşıbmı?”(1). Bütün bunların üzərinə bir də siyasi böhranı
gəldikdə mənzərə tamamlanır və ortaya təbii sual çıxır: İrandakı mövcud
vəziyyətin səbəbləri hansılardır?
İmam Xomeyni özündən sonra çox ciddi və mürəkkəb bir idarəetmə sistemi
qoymuşdur. Ölkə iki səviyyədə - siyasi və dini strukturlar vasitəsilə idarə olunur.
Dini strukturlar siyasi idarəetmə üzərində üstünlüyə malikdir. Dövlətin rəhbəri
Ali dini rəhbərdir. Rəhbər ekspertlər şurası tərəfindən seçilir. Ekspertlər Şurası
Məclis və rəhbər tərəfindən birgə formalaşdırılır. Eyni zamanda, Konstitusiyaya
nəzarət Şurası da mövcuddur ki, bu da seçki zamanı namizədlərin “təmiz”liyini
yoxlayır. Dini və siyasi sistem bir-biri ilə maraqlı formada daxili əlaqəyə və
qarşılıqlı tarazlamaya malikdir. Bu sistem hələlik çox rəvan fəaliyyət göstərir.
Lakin bütün inqilablarda olduğu kimi, İran inqilabında da onu həyata
keçirənlər arasında müəyyən zamandan sonra hakimiyyət üstündə
ziddiyyətlərin dərinləşməsi qanunauyğun bir prosesdir. Səbəb və bəhanəsi
nə olmağından asılı olmayaraq, bu qanunauyğunluq əksər inqilablardan
sonra müşahidə olunur; Fransa inqilabından və rus inqilabından sonra da
belə olmuşdur. İranda 2009-cu il seçkilərindən sonra müşahidə olunan
proseslər dini elita arasındakı ziddiyyətlərin təzahürü idi. Dini proseslərdən
İranda 100 ildə neftin satı-
şından 1 trilyon dollar gəlir
əldə edilib ki, bu rəqəmin
450 milyard dolları son 5-6
ilin neft gəlirləri ilə bağlıdır.