128
Sovet dövlətinin mahiyyət etibarı ilə sosial-paternalist və ideokratik
imperiya kimi qəbul etsək, əvvəlki fikirlərimizi ümumiləşdirərək, söyləyə bilərik:
bolşevik yuxarıları - imperiyanın yeni hakim sinfi vahid siyasi və ideya təməli
üzərində Avrasiya məkanında yaşayan çeşidli etnosları bir ümumiliyə inteqrasiya
etməyə çalışırdılar. Bu da etnoərazi münaqişələrinin tezliklə yoluna qoyulması
istəyini obyektiv olaraq şərtləndirirdi.
Burada bir məqama da diqqət yetirilməlidir: sovet dövləti imperiya idi.
Fəqət o, 1917-1921-ci illərin milli-dövlətçilik təcrübəsinə də etinasız yanaşa
bilməzdi. Məhz ona görə də milli-ərazi təşkilinin əsasına federativ dövlət quruluşu
forması qoyulmuşdu. Federasiya çərçivəsində yaradılan respublikaların (bunlar
özünəməxsus millət-dövlətləri xatırlayırdı) ərazilərinin təsbiti isə bu federasiyanın
təşkilatçıları və ideoloqlarının obyektiv istəyindən asılı olmayaraq, tarixi, təsərrüfat
və s. səbəblər üzündən mübahisə və ixtilaflar doğurmaya bilməzdi.
Ona görə də unutmamalıyıq ki, milli-ərazi ayrılmalarının praktiki
gerçəkləşdirilməsi zamanı tarixi, etnosiyasi və etnososial reallıqlar müəyyən
hallarda ya az nəzərə alınır, ya da onlara etina edilmirdi. Azərbaycanın 20-30-cu
illərə aid bu sahədə acı təcrübəsi də deyilənlərə dəlalət edir. Elə növbəti fəsildə
bəhs edəcəyimiz zaqatalalıların Sığnaq qəzasındakı torpaqları məsələsi də bu qəbil
problemlərdən idi.
Beləliklə, 1920-21-ci illərdə Zaqatalanın siyasi mənsubluğu ilə bağlı
münaqişə dinamikasında mühüm dəyişikliklər baş vermişdi. Həmin dəyişikliklərə
təkan verən hadisə kimi Azərbaycanın sovetləşməsi çıxış etdi. Bu hadisə Cənubi
Qafqazı bir müddət sosial-siyasi və geosiyasi hüdudlarla parçaladı: nəticədə
obyektiv olaraq Gürcüstan Antantanın - Qərbin düşərgəsində, Azərbaycan isə
həmin Qərbin antitezisi kimi formalaşmaqda olan Avrasiya ümumiliyində - sovet
düşərgəsində bulundu. Bu amil 1920-ci ilin aprelin sonu-mayın əvvəllərində
Azərbaycan-Gürcüstan münasibətlərinin sürətlə pisləşməsində və hətta lokal
konfrontasiyanın meydana çıxmasında önəmli rol oynadı. Sözügedən
konfrontasiyanın səbəb və amilləri sırasında bir məqam diqqətimizi xüsusən cəlb
etmişdir. Qeyd etdiyimiz kimi, 1920-ci ilin mayında mərkəzi Sovet hökuməti ilə
Orconikidze və Kirovun simasında yerli Qafqaz bolşevik rəhbərliyi arasında
regionda sonrakı hərəkətlər barədə taktiki səciyyəli fikir ayrılığı ortaya çıxmışdı.
Əgər Lenin başda olmaqla birincilər Polşa və Vrangel ilə müharibə şəraitində
Cənubi Qafqazda hələlik yalnız Azərbaycanla kifayətlənməyi lazım bilirdilərsə,
Qafqaz bolşevikləri Azərbaycan ssenarisinin Gürcüstanda da uğurla tətbiqinə
ümid edirdilər. Elə Azərbaycan-Gürcüstan hərbi münaqişəsinin (əslində isə
«Azərbaycan» psevdonimi altında XI Ordu hissələri maskalanırdı) əsas
129
təşəbbüskarları da məhz bu şəxslər idilər: onlar öz planlarında Azərbaycana bir alət
və platsdarm rolunu ayırmışdılar.
Fəqət bir tərəfdən Polşa cəbhəsində hadisələrin arzuolunmaz səpkidə
inkişafı, digər tərəfdən isə Gürcüstanın kifayət qədər müqavimət göstərməsi
mərkəzin nöqteyi-nəzərinin üstünlük qazanmasına gətirib çıxardı və Gürcüstana
planlaşdırılan müdaxilə dayandırıldı.
Sovet-gürcü qarşıdurması Zaqatala ilə bağlı münaqişəni aktuallaşdırdı.
Əvvəla, may toqquşmalarının bir teatrı da sözügedən mahal idi. İkincisi və ən əsası,
mayın 7 və 12-də Moskvada imzalanmış müqavilə və ona əlavə saziş, habelə
Azərbaycanla Gürcüstan arasında Ağstafada bağlanmış müqavilə mübahisəli
məsələni hüquq müstəvisinə çıxardı. Ağstafa müqaviləsi ümumiyyətlə mahalın
siyasi mənsubluğunu mübahisə predmeti kimi Azərbaycan rəsmilərinin də tanıdığı
ilk hüquqi sənəd oldu.
Fəqət əməli baxımdan bu sənədlər Gürcüstanın ümidlərini doğrultmadı:
sovet hökuməti ümumiyyətlə, Cənubi Qafqazın qəti ərazi-inzibati bölgüsünü onun
tam sovetləşməsindən sonraya saxlamışdı.
Zaqatala siyasi mənsubluğu ilə bağlı mübahisənin aktuallaşmasında bir
başqa mühüm amil iyun ayında mahalda baş vermiş üsyan oldu. Qızıl Ordu
komandanlığının sözün əsl mənasında qarətçi əməlləri və yerli xüsusiyyətlərə
etinasız siyasətinin nəticəsi kimi meydana çıxmış üsyan gedişində onun rəhbərliyi
Gürcüstan hökumət orqanları ilə saziş imzaladı. Sazişin nəzərdən keçirilməsi bizə
söyləməyə imkan verir ki, o sırf siyasi mülahizələrə əsasən imzalanmışdı: bu akt,
bir tərəfdən mahaldakı yeni, inqilabi gerçəkliyin üsyan başçılarının – bölgənin
əvvəlki elitasının sosial-siyasi maraq və statuslarına zidd olmasından, digər
tərəfdən isə əhalinin kütləvi şəkildə sosial narazılığından nəşət edirdi. Həmçinin
biz ehtimal etdik ki, bu qərar müəyyən mənada Tiflisdəki «Azərbaycan qurtuluş
komitəsi» ilə də razılaşdırılmışdı. Hər halda, qənaətimizcə, sözügedən saziş üsyan
rəhbərliyi tərəfindən müvəqqəti taktiki gediş kimi qavranılırdı.
Üsyanın yatırılmasından sonra mahalda siyasi və sosial-iqtisadi vəziyyət
ağır olaraq qalmaqda idi. Vəziyyəti mürəkkəbləşdirən bir məqam da Gürcüstan
hakimiyyət orqanlarının Şirək düzündə zaqatalalıların yetişdirib-biçdikləri taxılı
mahala aparmalarına əvvəlcə maneə törətmələri, sonra isə qismən icazə vermələri
idi.
Zaqatala mahalının hansı dövlətə mənsubluğu məsələsi öz qəti həllini
yalnız Gürcüstanın sovetləşməsindən sonra tapdı: 1921-ci ilin iyulun 5-də
F.Maxaradze və N.Nərimanov Azərbaycan və Gürcüstan arasında sərhəd xəttinin
müəyyənləşdirilməsinə dair qətnaməyə imza atdılar. Bu sənədlə, habelə 15 noyabr
1921-ci il M.Hacıyev-B.Mdivani sazişi ilə Gürcüstan SSR Zaqatala dairəsinə olan
bütün iddialarından əl çəkirdi.
Biz sözügedən münaqişənin həllində bəzi amillərin rolunu göstərmişdik.
Əvvəla, artıq qeyd etdiyimiz kimi, mahalın əhalisinin mütləq əksəriyyətini - təqr.
Dostları ilə paylaş: |