86
qayğı bu salnamə səciyyəli əsərdə öz bədii əksini tapmışdır. Kitabda Rəsul Rzanın ağır
günlərində, çətin dəqiqələrində ona böyük qayğı göstərən Ulu öndərimiz Heydər
Əliyevə minnətdarlıq hissləri duyulur. Anar müəllim bütün bunları real şəkildə,
obyektiv əks etdirmişdir. Burada mənim bayaqdan söz etdiyim Rəsul Rza və Nazim
Hikmət dostluğu da öz geniş əksini tapıb.
Rəsul Rzanın “Çinar” şeiri var, Nazimin “Ceviz ağacı”. “Çinar” Azərbaycanda,
“Ceviz ağacı” Türkiyədə bu iki nəhəng sənətkarlarımızın ölməz rəmzləridir. Kökü Ana
torpağın dərinliklərinə bağlı çinarlar, ceviz ağacları var olduqca, xalqlarımız yaşadıqca
Rəsul Rza da, Nazim Hikmət də yaşayacaqlar . Əbədi olaraq!
“Ədalət” qəzeti, 26 oktyabr 2002.
87
“Mavi gözlü dev”in dostu Əkbər Babayev
İllər yaman tələsir. Nə Nazim Hikmət həyatdadır, nə də onun əsərlərinin
mahir tədqiqatçısı, tərcüməçisi Əkbər Babayev. Xatirələr qalıb ancaq. Nazim haqqında
çox yazılıb. Əkbər haqqında yox. Yadımda qalan Əkbər üçün xalq şairimiz Rəsul
Rzanın böyük səmimiyyətlə yazdığı essedir. Adı də “Bizim Əkbər”di.
Əkbərin nekroloqu üçün Bakıda şəkli tapılmırdı. Qəzetdən mənə zəng vurdular.
Məndə bir fotoşəkil vardı. Əkbər Babayev ortada, bir tərəfində Arif Məlikov, bir
tərəfində də mən. Həmin fotonu göndərdim. Qəzetin fotoqrafçısı sağ olsun. Üç nəfərin
arasından Əkbərin şəklini ustalıqla ayırdı, çapa verdi. Vəssalam. Bununla da hər şey
bitdi. Nazim Hikmətin xatirə günlərində kimin yadına düşdüsə, adını çəkdi Əkbərin. Bu
sözləri yazanda Əkbər Babayevin dediklərini xatırlayıram: “Azərbaycan mətbuatında
bəzən Nazim Hikmət sənətindən söz açan elə qəribə yazılara və imzalara rast gəlirəm
ki, təəccüb edirəm. Düzdür, Nazim Hikmət haqqında hamı yaza bilər. Amma burda bir
mənəvi haqq məsələsi də var. Bunu unutmaq olmaz. Bir də Nazim haqda yazanda heç
olmasa onun başına gələnləri biləsən gərək. Hələ mən başqa mətləbləri demirəm”.
Əkbər ipək kimi yumşaq təbiətliydi, amma elmi mübahisələrdə sərtdi.
Doktorluğunu müdafiə eləmədi. Əsəri hazırdı. Doktorluq işi hazır olmasaydı belə onu
türk ədəbiyyatına, xüsusən Nazim Hikmətə, Səbahəddin Əliyə, Orxan Kamala və başqa
sənətkarlara həsr etdiyi elmi əsərlərinə görə diplomsuz doktor adlandırmaq olardı.
Əkbər çox tələbkardı. Özünə qarşısa lap çox, hətta amansızca tələbkardı. Mən
Moskvada olarkən ona deyəndə ki, Əkbər müəllim, sizin kitabxanadakı namizədlik
dissertasiyanızı oxudum, qanı bərk qaraldı. “Nahaq oxudun, Aqşin” – dedi, “zəif
əsərdir”. Halbuki Əkbərin dissertasiyası Nazim Hikmət haqqında yazılmış ilk və çox
sanballı tədqiqat işi idi. Doktorluğunu soruşanda deyərdi: “Hazır deyiləm. Hələ
işləyirəm. Bir də ki, hara tələsirəm. Ömür vəfa edər”.
Amma ömür vəfa eləmədi, yarımçıq qaldı hər şey. Əkbər bizdən erkən ayrıldı.
Ölümün xəbər atı çaparaqdır. Əkbərin cənazəsini Gəncəyə gətirmişdilər. Biz də bir
göz qırpımında gəlmişdik onun doğma yuvasına. Sən demə, onu istəyən çox imiş. Dəfn
mərasimində xeyli danışan oldu. Hamı da gözü yaşlı. Mənim də sözüm vardı.
88
Bacarmadım. Son borcumu verə bilmədim. Boğazımda bir parça qəhər daşı vardı.
Qoymadı danışam. Beləcə son mənzilə yola saldıq Əkbəri. Bakıya dönərkən dəfn
mərasimində söz deyənlərin tez-tez “yaxşı insan”, “işıqlı şəxsiyyət” ifadələrini
xatırlayırdım.
Hamı bilir ki, bu “yaxşı adam” ifadəsi nə qədər sadə görünsə də, mənası böyükdür.
İnsanlara təmənnasız kömək eləyən, özündən kəsib başqasına verən, şəxsi işini buraxıb
ehtiyacı olanlara qayğı göstərən adamların sayı azaldıqca “yaxşı adam” ifadəsinin də
qiyməti artır. Bu söz bir o qədər də sadə görünmür.
Bəli, Əkbər yaxşı adamdı. İndi, mən yaşa dolduqca bunu daha aydın başa düşürəm.
1961-ci ildi. Azərbaycan radiosunda- türk şöbəsində işləyirdim. Universitetdə türk
ədəbiyyatı üzrə qiyabi aspiranturada oxuyurdum, Nazim Hikmətdən yazırdım.
Moskvaya uzun müddətli ezamiyyətə gəldim. Burada təhsil alan dostum Yavər
Eyvazovdan Əkbər Babayevin telefonunu öyrəndim, zəng vurdum. Nazim Hikmətlə
görüşmək istədiyimi bildirdim. Əkbər məni evlərinə dəvət elədi. “Səhər doqquzda
gözləyirəm”-dedi. Səhərisi evini çətinliklə tapdım. Sən demə, məni səhər yeməyinə
gözləyirmiş.
-Niyə belə gec?
-Evi tapa bilmirdim.
-Eybi yox. Otur çay içək. Sonra gedək instituta (o, işlədiyi Asiya Xalqları
institutunu nəzərdə tuturdu). Səni Moskvalı türkşünaslarla tanış edəcəyəm.
-Bəs Nazim Hikmətlə... nə vaxt...
Cümləni bitirə bilmədim. Qorxdum ki, deyə heç vaxt.
Amma özümü o yerə qoymadım. Sən demə Əkbər təhər-tövrümdən hiss eləyibmiş
ki, nəsə özümdə deyiləm. Yenə çay gətirdi, gülə-gülə:
- İç, gedək - dedi. Yolçu yolunda gərək.
Yol boyu türk ədəbiyyatından danışırdıq. Mən elə güman edirdim ki, Əkbər yalnız
müasir ədəbiyyatı yaxşı bilir. Belə deyilmiş. Klassik türk poeziyasından məhəbbətlə
danışır, əzbər bildiyi parçaları həvəslə izah eləyirdi. Mənimsə fikrim-zikrim elə Nazim
Hikmətin yanındaydı. Nə yaxşı ki, Əkbər də bunu hiss eləmişdi. İnstituta çatanda dedi: -
89
Yaxşı, - zəng edərəm Nazim Hikmətə, imkan olsa, gedərik. Amma çox oturmarıq,
yaxşı?
-Yaxşı, - dedim.
Mənimçün bundan böyük sevinc ola bilməzdi. Əkbər əvvəlcə məni moskvalı
türkşünaslarla tanış elədi. Çox səlis ruscası vardı Əkbərin. Sonra Nazim Hikmətə zəng
vurdu. Türkcəsinə heyran oldum. Fəxr elədim Əkbərlə. Öz ana dilini də gözəl bilirdi,
rusu, türkü də. Hər üç dildə eyni səviyyədə yazırdı, danışırdı.
Əkbər Nazim Hikmətlə telefonla danışdı. Nazim bizi gözləyirdi. Getdik.
Görüşdük.
O gündən etibarən Əkbər Babayev məni evinə təkidlə dəvət eləyir, süfrə açırdı. Bir
yerdə teatr tamaşalarına baxır, Nazim Hikmətlə müxtəlif görüşlərdə iştirak edirdik. Bu
görüşlərin faydası haqda danışmıram. Çünki sözüm Əkbərdəndir. İndi fikirləşirəm ki,
onun axı nəyinə lazımdı bu. Öz işi başından aşırdı. Elmi əsərləri, tərcümələri, Moskva
radiosunda Türkiyə üçün hazırladığı xüsusi proqramlar və hər şeydən əvvəl, Nazim
Hikmətlə birgə fəaliyyəti. Əkbər bu böyük sənətkarın sağ əliydi. Nazim onu oğlu kimi
sevirdi. Bunu qısqananlar da vardı. Nazim Hikmət haqqında ilk dissertasiya müdafiə
edən Əkbərdi. Böyük sənətkar da öz kitabını Əkbər Babayevə verəndə avtoqraf olaraq
“Beni bana tanıtana”yazmışdı.
İndi bütün olub keçənləri göz önünə gətirəndə başa düşürəm ki, Əkbərin böyük
ürəyi vardı. O, məncil, yalnız özünü düşünən deyildi. Ürəyinin nurunu, işığını insanlara
təmənnasız paylayardı. Və bundan dünyaca zövq alardı...
Bakıya qonaq gələn türklər tez-tez məndən soruşurdular: “Soyadınız birdir, yoxsa
Əkbər Babayevlə qohum-qardaşsınız?” “Qardaşdan da artığıq”- deyirdim və bu sözlə
fəxr edirdim.
Əkbəri Azərbaycanda tükşünaslığın vəziyyəti çox maraqlandırırdı. Tez-tez Bakıya
gələr, ya rəhbəri, ya da opponenti olduğu türkşünasların irəliləyişi, inkişafı üçün əlindən
gələni əsirgəməzdi. Əkbər qalın-qalın dissertasiyalar oxuyur, Orta Asiyadan,
Azərbaycandan göndərilmiş türk ədəbiyyatına dair əsərlərə rəy verirdi. Belə rəylərdən
birini də mənim üçün yazmışdı.
Dostları ilə paylaş: |