79
Zərfin üzərində bu sözlər yazılmışdır:
“Rəsul Rza
Gələlim hatıranıza. 1958”
Kiçik bir teleqram da nəzərimi cəlb edir:
“Rəsul qardaş, yarım yüzülliyini təbrik edirəm, gələcək 50 ildə də gəncliyini
itirmə. Qardaşın Nazim Hikmət”.
1958-ci ildə Nazim Hikmət göndərdiyi başqa bir məktubun üzərində iri hərflərlə
belə yazmışdı: “İki şair evinə bir üçüncü şairdən salam, sevgi!”
Rəsul Rzanın arxivində Nazim Hikmətin əlyazıları – şeirləri qorunur. “Mikayıl
Rəfiliyə ağı” və “Bakıda oyanmaq”. Bu şeirləri Azərbaycan dilinə tərcümə etmiş Rəsul
Rza Nazimin dili ilə desək, “onları bir az daha gözəlləşdirmişdir”.
Nazim Hikmət xarici ölkələrdə olarkən bütün jurnalistlərin suallarına böyük
məmnuniyyətlə cavab verər, səfərdən döndükdən sonra özü ilə bərabər müsahibələri
çap olunmuş qəzetləri də gətirərdi. Rəsul Rzanın arxivində Nazim Hikmətin İtaliya
jurnalisti Covanni Krino ilə müsahibəsi dərc olunmuş bir jurnala rast gəldim. Müsahibə
əvvəlcə “Realta Sovetika” jurnalında (yanvar 1963-cü il) dərc olunub. Sonra isə
“Oqonyok” jurnalının 1987-ci il 10 mart nömrəsində ruscaya tərcümə edilərək verilib.
Nazim Hikmət həmin müsahibəsində çox problemlərə toxunur, eyni zamanda,
Azərbaycanın siyasi taleyindən, eləcə də Rəsul Rzanın yaradıcılığından söhbət açır:
“Jurnalist: Şəxsiyyətə pərəstişin mədəniyyət sahəsində nəticələri Sovet İttifaqının
milli respublikalarında daha az görünür, eləmi?
Nazim Hikmət: Mən belə deməzdim... Azərbaycan şairi Rəsul Rzanı misal gətirə
bilərəm. O, şəxsiyyətə pərəstiş illərində Azərbaycan xalqının bəxtinə düşən faciələri əks
etdirən çox maraqlı bir poemanın müəllifidir. Poemanın baş qəhrəmanı şair özüdür.
Rəsul Rzanın yaradıcılığında forma cəhətdən də yeniliklər çoxdur”.
Rəsul Rzanın arxivində Nazim Hikmətin “Dostum Rəsul Rza”, “Aydındır şeirin
dili” və “İkinci nəfəs” adlı məqalələri də vardır. Oxuculara tanış olsa da, həmin
məqalələrdən kiçik parçaları nəzərdən keçirməyə ehtiyac duyuram:
80
“Rəsul Rza xalq və klassik ədəbiyyata böyük pərəstiş edən bənzərsiz bir şair,
Azərbaycan poeziyasının novatorlarından biridir.
... Rəsul Rza Sabir gələnəyinin - ənənəsinin davamçısıdır.
...Rəsul Rza sözü nə şişirdir, nə də bayağılaşdırır. O inanır ki, hər bir söz öz
yerində olsa, poeziya bağında çiçəkləyə bilər. Məzmun, mövzu baxımından şeirin
imkanları nə qədər hüdudsuzdursa, bu mövzunun ifadəsi üçün işlənən sözlər də o qədər
sonsuz olmalıdır. Rəsul Rza şeirin texnikasına bir doqmatik kimi baxmır. O, qafiyəni,
ölçünü rədd etmir, ancaq nəzm aləmindəki qayda-qanunları da qəbul etmir”. («Dostum
Rəsul Rza»).
“Şair adi günləri elə təsvir edir ki, onun poeziyasında hər yan gur işığa qərq olur.
Şair-səadət axtarandır. O, həyatındakı, bizim ömrümüzdəki xoşbəxtliyi üzə çıxarır.
Rəsul Rza filosofdur. “İki buruğun söhbəti” şeiri ilk baxışda olduqca sadə və adi
görünür. Ancaq onlar haqqında, həyat, nəsillər, gələcək haqqında və onların
cavabdehliyi barədə nə qədər gözəl deyilmişdir” (“Aydındır şeirin dili”).
“Mən bir şair haqqında danışmaq istəyirəm. Azərbaycan şairi Rəsul Rza haqqında.
O, gəncliklə müdrikliyi özündə birləşdirib. Onun yaradıcılığı ilə təxminən 20 ildir, özü
ilə 12 ildir tanışam. Rəsul Rza qırx yaşına kimi sadəcə olaraq yaxşı şair idi. İndi, 1959-
cu ildə məndən sovet poeziyası novatorlarının adını soruşsalar, onların arasında Rəsul
Rzanın adını da mütləq çəkərdim” (“İkinci nəfəs“).
Rəsul Rzanın arxivində Nazim Hikmətlə bağlı yadigar yazılar, sənədlər
yetərincədir. Şairin anadan olmasının 65 illiyi münasibətilə Rəsul Rzanın 1967-ci ildə
qələmə aldığı “Canlı Nazim” adlı kiçik bir xatirəsi də həmin saxlancların arasındadır:
“Nazim Hikmət deyərdi ki, hər gün azı on məktub alır. Mən bu məktubları onun
yazı masasının üstündə, iş otağındakı şüşə qapaqlı qəfəsələrdə çox görmüşəm. Bu
məktubların coğrafi xəritəsini çəkməli olsaq, gərək şairin Peredelkinodakı yaylaq
evindən və Moskvada 2-ci Pesçanındakı mənzilindən dünyanın bütün qitələrinə, ayrı-
ayrı ölkələrin bir çox şəhərinə, kəndinə xətlər çəkək. Yalnız şəhərlərdən, kəndlərdən
deyil, okeanlarda üzən gəmilərdən, təyyarələrdən də Nazimin adına məktublar,
teleqramlar gəlirdi. Bu məktubların böyük bir əksəriyyəti şairin tanımadığı adamlardan,
oxuculardan olurdu. Bu məktub müəlliflərinin çoxu gənclər idi. Görürdün ki, həmin
81
məktublardan bir dəstə götürüb baxır və onlarla canlılarla danışan kimi danışırdı.
Üstündə müxtəlif biçimli markalar olan zərflərdəki məktublar neçə-neçə insanın
sevincindən, dərdindən, arzusundan danışırdı”.
Rəsul Rza 1973-cü ilin may ayında Parisdə keçirilən Nazim Hikmət simpoziumuna
– türk rəssamı Abidin Dinoya belə bir məktub göndərmişdi:
“Hörmətli Abidin bəy! Rica edirəm, bu məktubu poeziya simpoziumunun Rəyasət
Heyətinə yetirəsiniz”.
Məktub simpoziumun Rəyasət Heyətinə təqdim olunsa da, müraciət Nazim
Hikmətə ünvanlanmışdı və Rəsul Rza həmin tarixdən on il əvvəl dünyasını dəyişmiş
sənətkar dostuna səslənirdi:
“Əzizim Nazim!
Biz səninlə bu poeziya simpoziumunda müxtəlif səbəblərdən iştirak edə bilmədik:
mən Vətənimdəki təxirəsalınmaz işlərə görə, sən isə hələ heç kəsin qayıtmadığı bir
dünyada olduğuna görə.
Ancaq mən öz səsimi... gözəl Parisə gələnlərin səsinə qatıram. Bu gün şanlı
kommunarların, müdrik ensiklopedistlərin, söz, fırça ustalarının parlaq nəslinin,
unudulmaz Müqavimət Hərəkatı qəhrəmanlarının vətəni olan Parisdə müxtəlif
millətlərin nümayəndələrinin həyəcanlı səsləri ucalmaqdadır. Onların ifadə etdiyi sözlər
içərisində xüsusi minnətdarlıq duyğuları və iftixar hissi ilə tələffüz etdikləri bir ad var.
Bu, Nazim Hikmətin adıdır.
... Poeziya öz məram və təbiiliyinə görə xeyirxah duyğuların övladıdır. Amma bu
xeyirxahlıq zərif, işıqlı olduğu qədər də ciddi və qəzəblidir. Poeziyanın xeyirxahlığı
zülmün bütün məqamlarda şair tərəfindən amansızlıqla qarşılanması deməkdir.
Poeziyanın bəşəriliyi onun zülm və qeyri-insani xüsusiyyətləri ilə barışmaz
mövqeyindədir.
Ancaq o şair bu yüksək ada layiqdir ki, o, bütün ömrü boyu ədalətsizliyə qarşı
mübarizə aparmış, mərd, humanizmin tərəfdarı olmuşdur. Sən məhz belə bir şairdin,
Nazim. Buna görə sənə minnətdarıq.
Azərbaycanın xalq şairi Rəsul Rza
May. 1973-cü il”.
Dostları ilə paylaş: |