156
Nazim Hikmətin “Romantika” kitabının Azərbaycan nəşrinə ön söz.
Bakı,“Yazıçı” nəşriyyatı, 1983.
157
Gün kimi şəfəq saçdı...
(Nazim Hikmətin 80 illiyi münasibətilə)
Nazim Hikmət XX yüzilin 4-5 ulu ozanından biri idi. O kiminlə yanaşı
durur? Bu sualı “Kim onunla yanaşı durur?” şəklində qurmaq yəqin ki, daha doğru
olardı. Yaxşı, kim onunla yanaşı durur? Pablo Neruda, Lui Araqon, Jorj Amadu,
Vladimir Mayakovski, Rəsul Rza. Bir də hər xalq özünün ən böyük çağdaş
ozanını bu cərgəyə qata bilər…
Nazim Hikmət həzin, titrək, kövrək, ağlar bir bayatı idi. Türk xalqının
bağrından qopmuşdu. Nazim Hikmət 61 il həyat yolu ilə, 47 sənət yolu ilə keçən
bir atlı idi. O, dünyanın və Türkiyənin ona olan ehtiyacından yaranmışdı. Atını
heçlikdən əbədiyyətə çapırdı.
Burdan bir atlı keçdi,
Atın oynatdı keçdi.
Gün kimi şəfəq saçdı,
Ay kimi batdı keçdi.
Yaxşı ki, günəşlə ay səmanı boş qoymurlar. Gündüz biri, gecə o biri nur
saçır…
Nazim Hikmətin həzinliyi, kövrəkliyi, titrəkliyi bir sıra səbəblərə bağlı idi.
Başdan, özü qəlbi yumşaq idi. Humanist idi. Bütün ulular kimi. Sonra uzun illər
həbsxanada yatmışdı. Acılar dadmışdı. Daha sonra, ömrünün bir hissəsi vətəndən
uzaqlarda keçmişdi. Həsrətlə. Lap sonda, açıq desək, Nazimin şəxsi həyatı faciəli
idi.
Nazim “Tərcümeyi-hal” şeirində yazırdı:
Həbsxanalarda da yatdım,
Böyük otellərdə də.
Kimi balıqların çeşidini bilir,
Mənsə ayrılıqların.
Bütün bunlardan sonra kim idi Nazim Hikmət? Bu sualın çox cavabları var.
Nazim mətin, yenilməz, cəsur bir insan idi. Özü kimilərin zəfər şərqisi, marşı idi.
158
Kərəm idi, siqarasını qurşun yaxacaq fədai idi. Məmləkətindən insan mənzərələri
yaradan rəssam idi.
Nazim Hikmət Azərbaycana və azərbaycanlılara son dərəcə böyük rəğbət
bəsləyirdi. Təsadüfi deyil ki, onun ilk şeirlər kitabı (1928) məhz Bakıda nəşr
olunmuşdu. Nazim görüşlərinin birində demişdi: “Canım, gözüm bakılılar! Bakıya
gəldim, dünyalar mənim oldu! İnanın, həmişə sizi xatırlayıram. Bakı, Azərbaycan
bilirsinizmi mənə nə qədər əzizdir? Mənim gəncliyim də, qocalığım da Bakıya
bağlıdır”.
N. Hikmət bizim sənət və ədəbiyyat xadimlərimizlə sıx yaradıcılıq və
dostluq telləri ilə bağlı olmuşdu. Bu əlaqələr, bu görüşlər N.Hikmətin
yaradıcılığında öz geniş əksini tapmışdı. Şübhəsiz N. Hikmətin Azərbaycan
poeziyasına böyük təsiri olmuşdur.
Şairin Bakıya hər gəlişi nazimsevərlər üçün o cümlədən mənim üçün də əsl
bayram idi. Mən həm onun haqqında tədqiqat işi yazan aspirant və eyni zamanda
bir radiojurnalist kimi tez-tez Nazimlə görüşərdim, onunla maraqlı söhbətlər
edərdik.
Şair Bakıya gələndə həmyerlimiz Əkbər Babayev həmişə onun yanında
olardı. İndi nə Nazim Hikmət həyatdadır, nə də Əkbər Babayev. Qalan xatirələrdir,
lent yazılarıdır, şəkillərdir, bir də ən qiymətli xəzinə olan kitablardır. Əkbər özü
ömrü boyu bircə dəfə də Türkiyədə olmadı, amma onu bu məmləkətdə tanıyırlar,
sevirlər. İndi də onu kövrək duyğularla yad edirlər. Bu yadetmələr təkcə quru söz
olaraq qalmır, mətbuat səhifələrinə çıxır, xalqın malı olur. Türkiyədə Əkbər
haqqında yazılanları oxuyanda iftixar hissi keçirirəm.
Türk sənət xadimlərinin dediklərindən:
HALDUN TANER: “Hamımızın dostu, ən böyük köməkçimiz idi. Demək
olar ki, onu həm heç tanımırıq, həm də çox yaxşı tanıyırıq. Çünki Nazim Hikmətin
bir parçası kimi idi. Nazimə olan böyük sevgisinə görə bəlkə də bir az kölgədə
qalmışdı. Amma bu sevgidən, bu dostluqdan, yaxınlıqdan əsla istifadə etməyə
çalışmamışdı…Əkbərin təvəllüdünün 1913-cü il olduğunu biləndə inanmadım.
159
Yaşından xeyli cavan görünürdü… Sanki 100 yaşınadək yaşıyacaq insanlar kimi
idi…”
ÇİNGİZ BEKTAŞ: “Türk yazıçıları üçün Sovet İttifaqında iki səfirlik
vardı. Biri rəsmi səfirlik, o biri Babayevin evi di. Belə bir dost idi… Sovet
yazıçıları, tadqiqatçıları türkoloqları və tərcüməçiləri isə onun haqqında belə
deyirlər: Ə. Babayev olmasaydı, biz türk ədəbiyyatını tanıya bilməzdik. O, türk
ədəbiyyatının ağzı, dili, qulaqı idi…”
ƏZİZ NESİN: (Türkiyə Yazarlar Sindikatının sədri olaraq Sovet Yazıçılar
İttifaqına göndərdiyi teleqramdan) “Qabaqçıl türk yazıçılarının dostu olan Ə.
Babayevin ölümü münasibətilə Türk Yazarlar Sindikatının bütün üzvləri dərin
kədər duymuşlar. İllərdən bəri həsrətlə Türkiyəni ziyarət etmək istəməsinə və
bizim də bu yolda əlimizdən gələni etdiyimizə baxmayaraq, Türkiyəni görmədən
ölməsi bu kədərimizi daha da artırmışdır.”
Amma türklərin hamısı Nazimi sevməz. Məsələn, bir türk gəlmişdi bu
yaxınlarda Bakıya. Yaxşı süfrə açdıq ona. Nazimin səsini dinləyəndən sonra “Onu
sevmirəm” dedi. Ağzından bir kəlmə də xoş söz çıxmadı Nazim Hikmət üçün. Mən
bilirəm, Türkiyədə Nazimin Orxan Seyfi, Pəyami Səfa kimi düşmənləri olub.
Bunlar böyük düşmənlərdi. Bunun kimi cılız deyildi. Kölgəsindən qorxan bu
türkün haqqımızda dediyi sözlər zərrəbinlə baxılıb seçilmişdi. Ağarmış bənizində,
çuxura düşmüş gözlərində, rəngini itirmiş dodaqlarında bir kəlmə söz yazılmışdı.
“Qorxu!” Səksəkəliydi. Elə bilirdi səsini gizlicə lentə yazacağıq. Necə oldusa o da
tost dedi:
-
Azərbaycan xalqı çox qonaqpərvərdir. Xalqınızın şərəfinə!
Yordu bizi ədəb qaydaları. Yaxşı qonağa da hörmət eləyirik, pisinə də.
Burada üzümüzə gülürlər, çörəyimizi yeyirlər, sonra gedib əleyhimizə
yazırlar.
Bu türklə birlikdə dinlədiyimiz lent yazısında Nazim Hikmət bir şeir
oxuyurdu:
Əqrəb kimisən, qardaşım.
Əqrəb kimi!
Dostları ilə paylaş: |