160
Bəlkə özünü tanımışdı bu misralarda Nazimi sevməyən türk. Adını
yazardım. Əgər tək bu olsaydı. Nə yazıq ki, tək bu deyil. Hələlik var belə “Əqrəb
kimilər”. Amma bir ovucdur onlar. Tarix gec-tez siləcək onları öz səhnəsindən!
161
Əsrimizin böyük sənətkarı
(Nazim Hikmətin 90 illiyi qarşısında)
Nazim Hikmət bu dünyadan Türkiyəni, oğlunu görmədən getdi. Göz yaşı axıdanlar
da oldu, sevinənlər də, inanmayanlar da. Nazimi sevməyənlər dünyaya car çəkdilər:
“Vətənini satan Nazim Hikmət öldü!”. Sağlığında belə tale oyunlarından çox görmüşdü
N.Hikmət. Onu “Vətən xaini” də adlandırmışdılar.
Nazim vətənindən ayrılanda buna sevinənlər olmuşdu. Bu sevinənlərə o, “Ceviz
ağacı” şeirilə cavab vermişdi:
Ben bir ceviz ağacıyım Gülhanə parkında,
Ne sen bunun farkındasın, ne de polis farkında.
Elə indi də Nazim Hikmət ceviz ağacıdır, nəinki Gülhanə parkında, bütün
Türkiyədə yaşayır o. Özü də polis hər şeyin fərqindədir. Gah Nazimi göylərə qaldırırlar,
gah da onun “Kərəm” kimi şeirini oxuyan cavanları həbs edirlər. Gah yeni-yeni
kitablarını çapdan buraxırlar, gah da əsərlərini yığışdırırlar... Beləcə yaşayır Nazim
Hikmət. Beləcə ölüb-dirilir Nazim...
Üç il yaşadığım Türkiyədə mən bunun canlı şahidi oldum. Bir dəfə hətta kitab
dükanından Nazim Hikmətin əsərlərini soruşduqda “Bizde Vatan haininin kitabı
satılamaz!” cavabını aldım.
Öz ölkəsində mövcud olan siyasi hakimiyyətlə razılaşmayan mütərəqqi fikirli
adamlar zaman-zaman vətənlərini tərk edib qürbətdə yaşamaq məcburiyyətində
qalıblar. Belə mühacirlərə vətən xaini demək olarmı? Özü də xaricdə yaşamaq
məcburiyyətində qalanların ən böyük həsrəti, ən müqəddəs diləyi gec-tez öz vətənlərinə
qayıtmaq olub. Nazim də bu duyğularla yaşayıb həmişə. Türkiyədə çap olunmuş
kitablarda, xüsusən “Nazim Hikmət dosyası”, “Bu dünyadan Nazim keçdi”, “Nazim
Hikmətin son illəri” və s. əsərlərdə böyük sənətkarın öz vətənindən uzaq düşməsi
səbəbləri dəqiq faktlarla, şahidlərin xatirələri ilə, ən başlıcası isə hüquqi sənədlərlə
göstərilib. Bütün bu kitabları oxuduqdan sonra belə bir qənaətə gəlirsən ki, 1950-ci ildə
azadlığa buraxılan şair türk hakim dairələri tərəfindən mütləq öldürüləcəkdi.
162
Əvvəlki səhifələrdə qeyd etdiyim bir fakta yenidən qayıtmaq istəyirəm. Nazim
həbsdən çıxdıqdan sonra dərhal əsgərliyə çağırılmışdı. 48 yaşlı Nazim Hikmət əsgəri
xidmətə göndərilirdi. Halbuki, o, dənizçilik məktəbində oxuduğu vaxt sətəlcəm
xəstəliyinə tutulmuş, ölümdən qurtulmuş və hərbi komissiya onu səhhətinə görə rəsmən
əsgərlikdən azad etmişdi. Bu azadedilmə bir sənəd kimi Nazimin arxiv işinə tikilmişdi.
Sonra həmin işi həbsxanaya aparmışdılar. 1950-ci ildə N.Hikmət əsgəri xidmətə
çağırılarkən bu sənədi tapmaq üçün çalışdı. Nazimin yaxın dostu İrfan Emin bu sənəd
üçün Bursa həbsxanasına getdi. Amma məyus qayıtdı. “N.Hikmət hərbi xidmətdə
iştirak etməmək üçün əsgərlik sistemindən xaric edilsin” sənədi tapılmadı ki, tapılmadı.
N.Hikmət başa düşdü ki, həmin sənədi işin içindən çıxarıblar. Demək, əsgərlik
bəhanədir. N.Hikməti bu yolla öldürmək istəyirdilər. Sonralar “Dünya” qəzeti yazmışdı:
“Nazimin Türkiyədən son qaçışının səbəbi 50 yaşından sonra əsgərliyi ilə bağlı istintaq
işlərinin başlanması ilə əlaqədardı. Əsgərliyə bir borcu yoxdu... Səbahəddin Əli kimi
öldürüləcəyindən qorxdu. İllərlə həbsdə çəkdiklərindən sonra yeni bir işkəncəyə
uğramaq hər şeyi onun gözləri önündə canlandırdı”.
O vaxtlar Nazim Hikmətin qapısında polis maşını gecə-gündüz keşik çəkirdi.
Nazim həbsxanadan sonra göz dustağı olmuşdu. Vətənindən ayrılmasaydı, onu mütləq
öldürəcəkdilər. Nazimin başına gələn oyunlardan onun taleyində bir həqiqət
təkzibedilməzdir ki, Nazim sağ qalmaqla çox iş gördü. Mən onun monumental
əsərlərini, həm də ictimai fəaliyyətini nəzərdə tuturam. Moskvada keçirdiyi 13 illik
ömrü də rahat , işıqlı, hamar olmamışdı onun. Mən Nazim Hikməti görəndə, tanıyanda
onun 58 yaşı vardı. Moskvada dəfələrlə evində olmuşdum. Onun haqqında dissertasiya
işi yazırdım. Tələsirdim ki, tez bitirəm. Bitirdim də. Amma... 1963-cü ildə Nazim
Hikmət 61 yaşında vəfat etdi. 60 illiyini böyük təntənə ilə qeyd etmişdik. “Bakıya sənin
müdafiənə mütləq gələcəyəm” - deyirdi. Gələ bilmədi. Nə yaxşı ki, üç il onu görə
bilmişdim və bu üç ildə onunla birlikdə teatr tamaşalarına baxa-baxa, müxtəlif disput və
görüşlərdə onu dinləyə-dinləyə başa düşmüşdüm ki, Nazim bütün ömrünü döyüşərək
yaşamışdır. O mənim nəzərimdə söz ustasından çox döyüşkən bir əsgər idi. Mübahisə
edirdi, razılaşmırdı, küsürdü, nifrət edirdi, söyürdü, onu başa düşməyənlərə, “İvan
İvanıç varmıydı, yoxmuydu” kimi sovet cəmiyyətindəki bürokratizmi ifşa edən
163
pyeslərini repertuardan çıxaranlara “Allah qəhr etsin” deyirdi, ürək ağrıları tuturdu,
yatağa düşürdü.
Amma əqidəsindən dönmürdü. Çünki o, bütöv şəxsiyyət idi. Və bu bütövlük təmiz
duyğulardan yoğrulmuşdu. O, partiya biletini atıb sonra geri götürənlərdən, partiya
biletini sol cibində, ürəyinin başında gəzdirib rüşvət alanlardan, pulla vəzifə satan, evlər
yıxan, qapılar bağlayan “adamlar”dan deyildi. Öz dili ilə desək “Mən nə xalqın alın
tərindən on para qapmışam, nə bir şairin cibindən bir sətir” (“Cavab N 2” şeirindən).
N.Hikmət əsl xalq oğluydu. Mübarizəsi də xalq yolunda idi. Nazim özü ehtiyac
içində yaşamamışdı. Varlı-hallı, tanınmış, yüksək mənsəbə malik bir ailədə böyümüşdü.
Ancaq məqsədi, idealı başqa idi. O bu idealı “Bir aşq masalı” pyesində Fərhadın dililə
vermişdi. Əsərin sonunda Fərhad öz Şirininə qovuşandan sonra hiss edir ki, xoşbəxt
deyil. Şirinə deyir : “Bir tək qaya qalıb. Onu da parçalayacağam. ... Məni yenə illərlə
görməyəcəksən. Alnımdakı qırışlar gözlərimin, dodaqlarımın uclarına enəcək...
Qocalacağam”. Fərhadın xalq yolunda çarpışması onun həyat amalı idi.
Nazim Hikmət də ömrünün sonuna qədər bu məqsədlə yaşadı. Əqidəsindən
dönmədi.
...Qürbətdə yaşayanlar üçün vətənin nə demək olduğunu izah etməyə ehtiyac
yoxdur. Nazim Türkiyə yadına düşəndə ( yadından çıxırdı ki?..) gilə-gilə əriyirdi.
“Məmləkətim” şeiri buna ən yaxşı misaldır. Şeir çox lakonik və mənalıdır. Şair
məmləkətindən bir nişanə axtarır. Tapa bilmir. Türkiyənin yollarını daşımış
ayaqqabıları yoxdur artıq, Şile bezindən olan son köynəyi də kürəyində paralanıb, özü
də çoxdan... Bəs indi vətən hansı nişanələrdə yaşayır? Şair belə mənalandırır
duyğularını:
Sen şimdi yalnız saçımın akında
İnfarktında yüreğimin,
Alnımın cizgilerindesin Memleketim,
Memleketim,
Memleketim...
Dostları ilə paylaş: |