Ürək parçalardı onun nəğməsi,
Aşiqlər səsiydi Məcnunun səsi.
Gəzəndə ardınca bağırardılar
Məcnun, Məcnun – deyə çağırardılar.
Bəsit şüur birinin başqasına meyil salmasını görmüşdü, amma birinin büt səviyyəsinə
qalxmasını görməmişdi.
Bəsit şüur məhəbbət divanəliyinin böyüklük əlaməti olduğunu anlamaz.
Eşqdən xəbərsiz adamlar ki var,
Onu “Məcnun” deyə çağırardılar.
Bəsit şüur şablon səddən kənarda ülvilik tanımır.
Gərək Məcnun aşıb-daşmayaydı, sakit axaydı, sahilə sığaydı, öz fəryadında zilə qalxmayaydı,
bəmdə qalaydı, gözlərindən qan-yaş tökməyəydi, daim Leylinin xəyalıyla yaşamayaydı, onu
unudaydı, sarsılmayaydı, onda anlaşılardı, gərəkli və hörmətli olardı.
Bəsit şüur nəhəngliyi qavramır, və nəhənglik onun gözündə dəliliyə çevrilir.
Nizami isə nəhəngliyi, bütün gözəlliyi, ülviliyi, qeyri-adiliyi təsvir edir və sən məcnunluğa
vurulursan.
Məhəbbət əhlinin məntiqi, hökmü, qənaəti, məqsədi başqalarının məntiqinə ziddir.
Birində gözəl hesab olunan, o birində eybəcər sayılır.
Bir dünyada iki dünya yaranır. Məcnun və başqaları.
Leylinin atası qızını “dəliyə” vermir. Məcnun isə öz “dəli məhəbbətində” sevgi peyğəmbərinə
çevrilir.
Mənə dəli dedin, öz haqqın vardır,
Dəli təkəbbürlü dolananlardır.
Başqa bir dəlilik görmürəm məndə,
Dəlilik budursa, dəliyəm mən də.
Həm də Məcnun öz eşqində görünməmiş mənəvi nəşə, həzz mənbəyi kəşf edir.
Məcnun öz “dəliliyində” özünü hərtərəfli təsdiq edir.
Həmişə, hər yerdə Leyli. Bu, məhəbbət duyğusunun zirvəsi deməkdir. Başqaları üçün bu
bəladır.
Hamının məqsədi Məcnunu məhəbbətdən xilas etməkdir.
Məcnunun arzusu məhəbbət xəstəliyinə daha çox mübtəla olmaqdır.
Hamı üçün dünyada məhəbbətdən başqa var-dövlət, rütbə, ad-san səadəti var.
Məcnun üçün məhəbbətdən qeyri heç nə yoxdur.
Hamı Məcnunun gününə ağlayır, Məcnun isə öz bədbəxtliyi ilə öyünür.
Hamının arzusu dəli ehtirasdan əl çəkib adi, firavan həyat sürməkdir.
Eşqin havasında inildəsin can,
Bir gün də düşməsin o qulağımdan.
Eşq ilə yaşayır aləmdə səsim,
Eşqsiz aləmdə batar nəfəsim.
Eşqdən yoğrulmuş ruhum, bədənim,
Eşqsiz bir günüm olmasın mənim.
Eşqsiz bir ürək heçliyə varsın.
Onu qəm selləri yuyub aparsın.
Qoy eşqim ucalıb namidar olsun,
Mən özüm ölsəm də eşqim var olsun.
Hamı üçün Məcnunluq bir andır, Məcnun üçün tam həyatdır.
Məcnunun şöhrəti də mühitindən kənardadır.
Məcnun məhəbbəti Məcnunun iradəsini özünə tabe edir; Məcnun, mənliyini, yeri, göyü,
dünyanı unudur. Başqaları bunu heç cür qəbul etmir. Qəribə bir vəziyyət yaranır.
Böyük “Mən” özünü fəda etməkdə səadət tapır, cılız “Mən” özündən keçmir.
Məcnun özünü böyük amala qurban verən xoşbəxtlərdəndir.
Bütün digər düşüncələr, qənaətlər, məqsədlər Məcnun varlığından uzaqdır.
Bu özünü ən çox Məcnunun atasıyla münasibətində göstərir.
Məcnunun atası oğlunu xoşbəxt görmək istəyir.
Ancaq Leylisiz Məcnun yoxdur, Leylisiz yaşamağa Məcnunun gücü çatmaz. Bu onun
ixtiyarında deyil.
Ata oğlunu var-dövlətin varisi görmək istəyir. Ancaq Məcnun varis olmaq üçün yox, sevmək
üçün doğulub.
Məhəbbət adlanan zirvədən var-dövlət varisliyi heç görünmür də.
Qeyri-adi oğulla ata çox adi davranır. Buna görə də istədiyinə nail olmur.
Məcnun məhəbbət səlahiyyətini var-dövlət varisliyinə dəyişmir.
Ağlı başında olan da dost ordusunun basılmasını istərmi?
Buna Nofəl inanmır.
Qeyri-adi poetik təbi olan bir şəxsin ahulara, ceyranlara həmdəm olması rəvadırmı?
Buna Zeyd inanmır.
Nəhayətsiz, sonsuz da qəm olarmı?
Buna Səlim inanmır.
Nofəl bilmir ki, Məcnun üçün Leylinin adıyla bağlı nə varsa – əzizdir.
Nofəlin ordusu Leylinin atasının əsgərlərini tələf edirlər.
Ona görə Məcnun xilaskarlarının məğlub olmasını arzulayır.
Bu anda Məcnun öz sədaqətini unudur.
Zeyd nə bilsin ki, Məcnunu təbə, ilhama gətirən elə Məcnunluğun özüdür.
Əsərdə Məcnunu anlayan, onunla mənən bir olan yeganə şəxs var: Leyli!
Məcnunun pərəstişkarları Məcnunun olsa-olsa bir cəhətini – munisliyini duyur və
qiymətləndirirlər.
Çünki Məcnunluq insanın adilikdən çıxmasıdır.
Çünki Məcnunluq dünyaya yeni baxışdır.
Çünki Məcnunluq bəsitlərin nəzərində aldanış, əcaiblik, yanlışlıqdır, aqillərin nəzərində
müdriklikdir.
Məcnunu sərsəri zənn etmə ki, sən
Deyildir gördüyün divanələrdən.
Vaxtının ən böyük bir alimiydi,
Aləmi şərh edən loğman kimiydi.
Gizli mənalara o yol açardı,
Qəlbində göylərin min sirri vardı.
Leyli Məcnuna layiqdir. O, Məcnun qədər atəşin olmasa da, Məcnun qədər məhəbbətə
bağlıdır.
O, Məcnun qədər əzabkeşdir.
Məcnun səhra sakinidir, Leyli qızıl qəfəs kirayəçisi.
Leyli həm Məcnunun qeyri-adiliyini, bənzərsizliyini anlayır, həm də qəlbində Məcnun
məhəbbətinə bərabər sevgi gəzdirir.
Məhəbbətdə özünü ən çox təsdiq edən yenə də Məcnundur.
Fəryad çəkən, yeri-göyü titrədən, aləmə səs salan, daşqın seli kimi çağlayan Məcnundur.
Ancaq Leyli təmkinində, səbrində, intizarında, naləsində Məcnunluğa qovuşan ülvi bir
şeiriyyət var.
Məcnunla Leylini bir-birindən ayırmaq əslində gözəl və ali bir ahəngi məhv etməkdir.
Təbiət Leyli-Məcnun vəhdətinə meyil etdiyi halda, mənfur qaydalar, təcavüzkar naşılıq bu
vəhdəti pozur.
“Leyli və Məcnun” dastanının dərin faciəvi mənası elə bundadır. Məcnun məhəbbəti
şimşəkdirsə, Leyli məhəbbəti yağışdır.
Məcnun məhəbbəti gur çaydırsa, Leyli məhəbbəti çaya axan bulaqdır.
Məcnunun dərdi dünyanı yandırır, Leylininki özünü.
Məcnun ilə Leyli eyni dildə danışırlar.
Bu, ətrafdakıların anlamadığı ülvi məhəbbət dilidir.
Əsərdə Leyli eşqi ilə kamala yetən Məcnun var.
Əsərdə həm də Məcnun eşqiylə həmahəng döyünən Leyli qəlbi var.
Məcnunluqda təsdiq olunan vəhdət bənzərsizdir.
Bu, əslində cismani vəhdəti rədd edən qeyri-adi, mənəvi qovuşmadır.
Sevgililərin mənəvi ayrılığı yoxdur.
Harada olursan ol, məhəbbət səninlədir.
Leyli həmişə Məcnunun qəlbindədir. Məcnunun Leylisiz saatları, dəqiqələri yoxdur.
Ali məhəbbət nəşəsi Məcnun üçün hər cür nəşədən üstündür.
Çünki Məcnun qeyri-adilik üçün doğulub.
Çünki şəhvət Məcnunluqla qazanılmır.
Məcnun Leylini böyük bir dünyaya çevirir.
(Bütün bu vəcdli deyimlər “Mütləqə İnam”ın rüşeyimləridir-Soylu Atalı.)
Əslində Leyli həyatda ali, cazibədar, mənalı nə varsa, hamısının cəminə dönür Məcnun
xəyalında.
Dostları ilə paylaş: |