Leyli Məcnun üçün qətiyyən adi qadın deyil.
O, rəmzdir, təcəssümdür, ilahi, müqəddəs varlıqdır.
Əslində Məcnun Leylini yenidən yaradır.
Leyli Məcnunun bütüdür.
Leyli əslində Məcnunun əlindən bütün dünyanı alır.
Hər şeydən təcrid olunmaq dərəcəsinə qalxan məhəbbət artıq ehtizazdır, vəcddir.
Təbiidir ki, bu möhtəşəmlik zamana sığmazdı və məhəbbət fədailərinin cismani məhvi labüd
idi. Ancaq həmin fəlakətdən Məcnunluq adlanan ölməz sevgi abidəsi yarandı.
Məcnunluq – məhəbbətin müdrikliyidir.
Məcnunluq – həqiqətin faciəsidir.
Məcnunluq – paklığın təntənəsidir.
Məcnunluq – möhtəşəmliyin qələbəsidir.
Məcnunluq – Nizaminin zəmanə ilə döyüşüdür.
Cazibədardır dünya!
V. MƏNƏVİ PAKLIQ TƏLƏBİ
Çoxrəngliliyi, əlvanlığı, səsləri, harayları, sehri, nəşəsi ilə çağırandı dünya!
Müdrikliyə, əzəmətə və eyş-işrətə, idrak dağlarına və nəşə çəmənlərinə!
Ucaldandı və endirəndi dünya!
Paklıq səmalarına və bəsitlik bataqlığına!
Ani cinsi həvəsə də sövq eləyir səni dünya, böyük, qadir duyğuya da.
Zahirə də meyil edirsən, daxilə də!
Bir-birini inkar edən duyğular insana gəl-gəl deyir.
Munisliklə də, şəhvaniliklə də.
İnsanın mənəvi aləmi durulur da, bulanır da.
Nizaminin qəhrəmanı Bəhram ədalətli, vüqarlı, möhtəşəm şahdır.
Həm də eyş-işrət əhlidir.
Rəhmlidir, həm də keyfə meyillidir.
Səbrlidir, təmkinlidir, həm də çılğın ehtiraslıdır.
Dünyanın ali mənasına dalandır, həm də kiçik ləzzətində hərisdir.
Elmə də meyli var, meyə də.
Barışarmı bu duyğular bir-biriylə?
Əsildimi kef əhlinin müdrikliyi?
Dünyadan beşəlli yapışan dünyanı dərindən anlarmı?
Şəhvət ocağı yanında hikmət ocağı sönməzmi?
Kim qazanır dünya, kim itirir?
Dünya adlanana bağın bütün meyvələrini dadanmı, yoxsa, ən yaxşısını yeyənmi?
Nizaminin “Yeddi gözəl”i böyük suallar və böyük cavablar əsəridir.
Aqillər yüz ehtirasın içərisindən birini seçənlərdir.
Müdriklik ilə eyş-işrət əsirliyi bir yerə sığmaz.
Eyş-işrətin özünəməxsus cazibədarlığı var. Ancaq bu həvəsdə ismətə, xalisliyə, iradəyə, ağıla
düşmən kəsilən qəbahət də yaşayır.
Eyş-işrət sevinci qəbahət qarşılıqlı səadətdir. Həm də onda insanı zahirdə saxlamaq, zahirə
pərçimləmək xisləti var.
Ani gözəlliyə hərislik, Bəhrama həmişə mane olur. Onu düz yoldan azdırır.
O özündə iki qütbü – şəhvaniliyi və mənəvi qüdrəti heç cür birləşdirə bilmir.
Ağlının yetkin çağında o, dünyanın əsil mahiyyətinə varır və cəlbedici nəşələr “günbəzlər
səltənətinin” puçluğunu duyur.
Həqiqət işığı xülya qaranlığını qovur.
Şahlıq səlahiyyəti Bəhramı aqillərdən ayırır, hökmranlıq pilləsinə qaldırır.
Buna o ədalətlə cavab verməlidir.
Burada şahlıq çiyinə düşən ağır yük olur. Ancaq hökmranlığın digər tərəfi də var: imtiyaz
genişliyi, gözəlliyi mənimsəmək imkanı.
Bəhram şahlığın hər iki tərəfini özündə cəmləşdirməyə çalışır. O, xalqa səxavət və mərhəmət
göstərir, ürəklərə fərəh gətirir.
İnsafı gətirdi o bizim yerə,
Qalxdı ədalətin başı göylərə.
Təzədən başladı toyu dünyanın,
Geniş nəfəs aldı qəlbi insanın.
Onunla düzəldi işi varlığın,
Yıxıldı özülü riyakarlığın.
O həm də özünü unutmamağa, dünyanın şərbətini böyük piyalələrdə içməyə can atır.
Həftədə çalışdı şah kimi bir gün,
Altı günü keçdi işrətdə bütün.
İlk baxışda oxucu Bəhramın hər şeyə nail olduğuna inanır.
Adama elə gəlir ki, Bəhram bəxtəvərliyin zirvəsidir: həm rəiyyət yaxşı yaşayır, həm də
Bəhram kefindən qalmır, həm də dövlət möhtəşəmliyini artırır.
Əslində isə belə “vəhdət” əsərdə yoxdur.
Şahlıq məsuliyyəti dinəndə eyş-işrət susur.
Eyş-işrət həvəsi coşanda, hökmranlıq əzmi azalır.
Bəhram həm yaxşı hökmran, həm də yaxşı kef əhli ola bilmir.
Birində qalib gələndə, o birində məğlub olur.
Böyük Nizami sanki deyir: “Ey qafil, anlamırsan ki, böyük amal böyük qurban tələb edir!”
Öz ani ehtiraslarının üzərindən keçməyən şəxsdə böyüklük ola bilərmi?
Dünya rəngarəng olsa da, o bir rəngə vurulanları sevir.
Ancaq hər kəsin öz çiçəyi var.
Nəyə isə sahib olmaq üçün nədənsə imtina etmək gərəkdir.
Yollar çoxdur, seçilən yol birdir!
Bəhramın gözəllik aləmi ilə təması yeddi gözəllə münasibətində aşkara çıxır. Bu gözəllər
əsərin əvvəlində xəyalı qanadlandıran romantik mavi çiçək səciyyəsi daşıyır. Bəhramın ürəyinə
hakim olur, şirin, sehrli arzu, məqsəd kimi rahatlığını əlindən alır, onu cəlb edir, çağırır.
Bəhramın qarşısında əsrarəngiz bir mənzərə açılır. Dünya rəngləri gözləri oxşayır və ürək
onlara qovuşmaq həsrəti ilə döyünməyə başlayır.
Yeddi gözəl dünyanın Bəhrama bəxş etdiyi sehr kimi vəsf edilir.
Sonralar romantikanın yerini real qadın gözəlliyi, qəlbə nəşə verən eyş-işrət və gözləri
oxşayan əlvan rənglər tutur. Baharın, güllərin, gəncliyin şeiriyyəti bir-birinə qarışır.
Nizami misilsiz rəssam hünəri göstərir.
Yeddi rəng min rəngə dönür.
Bir anlıq Nizami ilə bərabər vurulursan, məftun olursan gördüklərinə.
Duyursan, hiss edirsən ki, bu alovu göylərə qalxan nəşəsevərlikdə özünəməxsus şeiriyyət var.
Lakin Nizami Bəhramları eyş-işrət qapısından halallıq və paklıq evinə köçürür.
Yeddi gözəlin şaha söylədikləri hekayətlərin heç birində nəşəsevərlik təbliğ olunmur. Əksinə,
gözəl qadınlar öz hökmdarlarına halallığın, düzlüyün, mənəvi təmizliyin böyüklüyündən
danışırlar.
Söhbətlərdə ağıllı, iradəli, xeyirxah, cəfakeş insanlar qələbə çalır, sərsəmlər, kef əhli bədnam
olur.
Şair mey piyaləsinə hikmət danələri tökür.
Cənnət kimi görünən nəşə aləminin cəhənnəm xislətini açıb göstərir.
Gördü altındakı dərddir, xətərdir,
Mindiyi at deyil, qızğın əjdərdir.
Dərd ayağı vardı, iki qanadı,
Yeddi başı görcək ağlı oynadı.
Beləliklə də “Yeddi gözəl”in mənası son dərəcə genişlənir.
Yer ləzzətilə səma hikmətinin, gözəllik ilə halallığın, zövq ilə düzlüyun, fərəh ilə kamalın,
cazibədarlıq ilə ismətin vəhdətiymiş “Yeddi gözəl”.
Bəhramın daxilində məskən salmış iki güclü hiss – nəşə və hökmranlıq biri digərini rədd edir.
Bəhram işrətin şahlığa mane olmadığını inadla sübut etməyə çalışır. Ancaq buna nail ola bilmir.
Çünki hər iki hiss insandan bütöv ömür istəyir.
Çünki hər iki hiss bir-birinə yaddır.
Çünki hökmranlıq səlahiyyəti həm insani böyüklüyü, həm də insani naqisliyi nəzərə almağı
tələb edir.
Şah həm xalislərlə, həm də xəbislərlə əhatə olunur.
Birincilər inama, ikincilər şübhəyə layiqdir.
Bu, dövlət xadimindən gərgin həyat tərzi tələb edir.
Dövlət xadimi bəsitlikdən yüksəkdə durmalıdır.
Eyş-işrət həvəsi Bəhramı bu zirvədən həmişə salır.
Nəşəsevərlik ağılı söndürür, iradəni sarsıdır, dövlət başçısının isə ağıldan və iradədən güclü
silahı yoxdur.
İşrət meylində ictimai aləmdən ayrılmaq təhlükəsi var.
Nəşə axarı insanı öz qoynuna alaraq aparır, yeri də, göyü də, özünü də, başqalarını da
unudursan.
Bu vaxt həyatın ahəngi pozulur, qara, şər qüvvvələr meydana atılır, cinayət ətrafı bürüyür.
Dövlət başçısı olmaq hissləri, duyğuları bir səmtə yönəltmək deməkdir.
Dövlət başçısı ən böyük nəşəni ictimai fəaliyyətin özündə axtarıb tapmalıdır. Bunun üçün
dövlət, xalqa vurğunluq istedadı tələb olunur. Bəhramda bunu görmürük.
Dünya beş gündür, deməli, tələs, ətrafa mənəvi işıq saç, sənin dünyaya gəlişin dünyanı
nurlandırsın.
Bəhram nəşəsevərliyinin ucbatından məmləkət sarsılır, xain vəzir camaatı acınacaqlı
vəziyyətə salır, zülm ərşə dayanır, xarici basqın hədəsi yaranır.
Dostları ilə paylaş: |