237
birləşdirən kilsəmiz son zamanlar həddən artıq kökəlmiş və yoğunamış, içindən keçdiyi bütün yerlərin
zir-zibilini toplayaraq, saflığını və birliyini itirmişdir. Təsvir etdiyim çayın minlərlə qola ayrılması onun
dənizə mümkün qədər tez qovuşmaq cəhdidir, yəni paklaşmağa can atmasıdır. Fəqət bu, mükəmməl
bənzətmə deyil, mən yalnız onu göstərmək istəyirdim ki, çay öz varlığını itirincə, müxtəlif bidətçilik
qolları və yeni cərəyanlar necə çoxalır və necə bir-birinə qarışır. İstəyirsən, bu uğursuz təşbehi başqa bir
nümunə ilə zənginləşdirməyə çalışaq. Tutaq ki bir nəfər öz gücü ilə bu çayın dağılmış sahillərini yenidən
bərpa etmək istəyir. Bacaracaqmı? Yox, başqa cür etmək lazımdır. Çayın bəzi qollarını qum və palçıqla
doldurmaq, bəzi qollarını arxlar açmaqla yenidə çayın ana qoluna birləşdirmək, bəzi qollarını isə
istədikləri yerə axsınlar deyə sərbəst buraxmaq lazımdır. Çünki müxtəlif suların hamısını bir yatağa
yönəltmək olmaz; həm də çayın öz suyundan müəyyən miqdar itirməsi, məcrasından çıxmaması üçün
hətta faydalı və əvvəlki kimi qalması üçün hətta zəruridir”.
“Düzünü desəm, dərinə getdikcə daha az anlayıram”.
“Mən də. Yox, bənzətmələrlə danışmağın ustası deyiləm. Ən yaxşısı, bu çay hekayəsini unudaq. Bayaq
sadaladığın cərəyanların iki yüz il bundan əvvəl yarandığını, indi isə artıq mahiyyətcə mövcud olmadığını
anlamağa çalış. Bəzi cərəyanlar isə lap yenicə yaranmışdır”.
“Amma bidətçilərdən danışarkən hamısının adı çəkilir”.
“Əlbəttə. Batil inancların möhkəmlənməsinin bir səbəbi də budur. Həmçinin, zəifləməsinin də səbəbi”.
“Yenə anlamıram”, - dedim.
“Ah, Tanrım, bu nə qədər çətindir. Yaxşı. Təsəvvür et ki, sən cəmiyyəti dəyişdirmək istəyən bir
islahatçısan və həmfikirlərini yoxsulluq içində yaşamaq üçün uca bir dağın zirvəsinə toplayırsan. Bir
müddət keçdikdən sonra uzaq ölkələrdən bir çox insan sənin yanına axışıb gəlir, səni peyğəmbər, ya da
yeni bir həvari adlandırır və tərəfdarlarına çevrilirlər. Necə fikirləşirsən, onlar doğrudanmı səndən ötrü,
sənin fikirlərindən ötrü gəlirlər?”
“Bilmirəm. Ümid edirəm, belədir. Başqa nə üçün gəlsinlər?”
“Ondan ötrü ki, bu adamlar lap uşaqlıqdan ata və babalarından islahatçılar haqqında çoxlu hekayələr
eşitmişlər və az-çox mükəmməl olan icmalar barəsindəki əfsanələrə inanırlar. Və düşünürlər ki, sənin
icman bunlardan biridir”.
“Deməli, keçmiş cərəyanların uşaqları miras olaraq yeni cərəyanlara qalırmı?”
“Əlbəttə, çünki islahatçıların ardınca gedən kütlənin çoxu, nəzəriyyələrdən bixəbər olan avam
insanlardan ibarətdir. Həm də cəmiyyəti islah etmək uğrunda meydana çıxmış yeni cərəyanlar yeni
yerlərdə, yeni əsaslarla və yeni təlimlərlə yaranır. Məsələn, insanlar katarlarla valdcnsləri çox həvəslə
qarışıq salırlar. Fəqət bu iki cərəyan arasında dərin fərqlər vardır! Valdenslər mövcud kilsənin
toxunulmazlığını saxlayaraq dini islahatların aparılması üçün çalışırdılar, katarlar isə kilsənin dəyiş-
238
məsi, yeni kilsə, Tanrı və əxlaqi dəyərlər haqqında yeni təsəvvürlər uğrunda mübarizə aparırdılar. Katarlar
deyirdilər ki, bizim dünyamız bir-birinə qarşı olan iki qüvvəyə, xeyirə və şərə bölünmüşdür; və buna görə
də kamil insanlarla avam kütlənin ayrıldığı bir kilsə qurmuşdular; gizli ayinləri və xüsusi adətləri vardı;
bizim müqəddəs Kilsə Anamızdaki kimi çox sərt iyerarxiya qurmuşdular. Katarların hər hansı hökmranlığı
aradan qaldırmaq fikrindən çox uzaq olduğunu anlamaq lazımdır. Hərbi rəislərin, iri mülkədarların və
zəngin ağaların da katarlara qoşulması bununla izah olunur. Onların məqsədi dünyanı dəyişmək deyildi,
çünki hesab edirdilər ki, xeyir və şərin mübarizəsi əbədi və rəfedilməzdir. Valdenslər isə (onlarla birlikdə
arnoldçular və yoxsul lombardlar) bunun tam əksinə olaraq saf yoxsulluq qayəsinə əsaslanmış, yeni bir
dünya qurmaq istəyirdilər. Buna görə də məhrumiyyətlərə düçar olmuş bütün insanlar onların yanına
axışır və öz əllərinin əməyi ilə dolanaraq, icma halında yaşayırdılar. Katarlar mövcud kilsənin ayin və
buyruqlarını rədd edirdilər, valdenslər isə bunları tanıyır, yalnız keşiş qarşısında şifahi tövbəkarlığı inkar
edirdilər”.
“Elədirsə, onları nə üçün bir-birindən ayırmayıb qarışdırırlar və həm katarlardan, həm də
valdenslərdən eyni alaq otları kimi söz açırlar?”
“Axı sənə dedim. Onlar məhz bu dolaşıqlığın sayəsində yaşayır və məhz bu səbəbdən ölürlər. Onların
yanına başqa hərəkatlara cəlb edilmiş və bütün hərəkatların eyni etiraz və eyni ümidlərdən
qaynaqlandığına inanan yeni-yeni sadə adamlar gəlirdilər; eyni zamanda, inkvizitorlar bir hərəkatın
günahını başqa hərəkatın adına yazaraq, qərar çıxarırdılar; əgər fırqələrdən birinin üzvləri günah
işləsəydilər, bu günaha görə bütün fırqələrin bütün üzvləri güdaza gedirdilər. Tamamilə müxtəlif olan
hadisələri bir-birinə qarışdıran inkvizitorlar hüquqi nöqteyi-nəzərdən haqsız idilər; lakin rəqibləri haqsız
olduqları üçün onlar haqlı idilər, zira tutaq ki, bir şəhərdə arnoldçular baş qaldırdığı zaman, başqa
yerlərdəki katarlar, yaxud valdenslər də onlara qoşulurdular. Rahib Dolçinonun həvariləri mülkədarları və
kilsə mənsublarını cismani olaraq məhv etməyə çağırırdılar və bir çox zorakılıqlara da qol qoymuşdular;
onlardan fərqli olaraq, valdenslər - cismani zorakılığın əleyhinə idilər, yarıqardaşlar da belə idi. Lakin
tamamilə əminəm ki, rahib Dolçino öz dəstəsini toplayan zaman valdenslərin yaxud yarıqardaşlann tə-
limini mənimsəmiş narazıların çoxu ona qoşulmuşdu. Avam adamların özlərinə uyğun olan bidəti seçmək
imkanları yoxdur, Adso; buna görə də torpaqlarından keçib-gedən, şəhər, yaxud kənd meydanlarında xitab
edən vaizlərdən əl çəkmirlər. Düşmənləri də bundan istifadə edir. Eyni zamanda həm cinsi həzzdən imtina
etməyi, həm də vücudların eyibli birləşməsini təqdir etməyi tək bir bidətlə xalqın nəzərinə çatdırmaq -
vaizlik sənətinin gözəl tapıntısıdır. Bu zaman bidət - sağlam düşüncəni alçaldan şeytani ziddiyyətlər
yumağı kimi görünür”.
“Deməli, məzhəblər arasında heç bir əlaqə yoxdur? İoahimçilərə, yaxud ruhçulara qoşulmaq istəyən
avam insan yalnız şeytani yalan ucbatından, katarların əlinə düşür?”
“Yox, belə deyil. Əvvəldən başlayaq, Adso. İnan ki, doğru bildiyimə özümün də inanmadığım bir şeyi
sənə izah etməyə çalışıram. Fəqət düşünürəm ki, sənin səhvin budur: batil inancların - əvvəl, onların təsiri