4
Azərbaycanın maddi mədəniyyət tarixinin tipoloji baxımdan tədqiq olunmasına rəvac
verən, onun tədris və təbliğ edilməsinin ilk təşəbbüskarı olmaq etibarı ilə AMEA-nın
müxbir
üzvü, millət vəkili Yaqub Mikayıl oğlu Mahmudovun xidmətlərini minnətdarlıqla xatırlayıram.
Əsərin işıq üzü görməsində xeyirxah səylərini əsirgəməyən «Bakı Universiteti»
nəşriyyatının direktoru İslam Şirinova, nəşriyyatın əməkdaşları Ulduza Saniyevaya, Azadə
İmanovaya və BDU-nun Tarix fakültəsi «Azərbaycanşünaslıq» ETM-in əməkdaşı Sevil
Heydərovaya səmimi təşəkkürümü bildirirəm.
Monoqrafiyanın müvafiq bölmələrinə aid rəngli illüstrasiyaların hazırlanmasında
Azərbaycan Dövlət İncəsənət Muzeyinin, Azərbaycan Xalçası və Xalq Tətbiqi Sənəti Dövlət
Muzeyinin, «Şirvanşahlar sarayı» kompleksi Dövlət Tarixi-Memarlıq Qoruğu Muzeyinin elmi
əməkdaşlarının, nəhayət Azərbaycan Milli Kulinariya
Mərkəzinin direktoru Tahir
Əmiraslanovun və peşəkar fotoqraf Mübariz Hüseyn oğlu Dadaşovun təmənnasız köməyi
olmuşdur. Onların xeyirxah səylərini yüksək qiymətləndirir və minnətdarlığımı bildirirəm.
5
GİRİŞ
1.Azərbaycanın maddi-mədəni irsinin inkişaf mərhələləri
İbtidai icma cəmiyyətinin maddi mədəniyyət örnəkləri
Azərbaycan ərazisinin füsunkar təbii-coğrafi şəraiti biososial varlıq olmaq etibarilə ibtidai
insanın təşəkkül tapması üçün zəruri şərt olan hər cür əlverişli ekoloji amillərə:
mülayim iqlimə,
zəngin flora və fauna aləminə malik olmuşdur. Məhz ekoloji şəraitin bu cür əlverişli olması
səbəbindən Cənubi Qafqazın bu dilbər guşəsi tarixən dünyanın ilk sivilizasiya mərkəzlərindən
birinə çevrilmişdir. Yaşı milyon yarım ili haqlamış dünya şöhrətli Azıx düşərgəsi və onun ibtidai
sakinlərindən biri hesab edilən azıxantrop olduqca münbit və bol təbii qida mühitində təşəkkül
tapmışdır. Təbiətin səxavəti üzündən tarixi Azərbaycan ərazisi dünyanın ən qədim sivilizasiya
beşiklərindən birinə çevrilmişdir. Bu ərazidə zaman etibarı ilə biri-digərini əvəz edən bir sıra
arxeoloji mədəniyyət örnəyi təşəkkül tapmışdır.
Ölkəmizin ilk arxeoloji mədəniyyətlərindən biri Kiçik Qafqazın cənub-şərq ətəklərinə
düşən Quruçay hövzəsində təşəkkül tapmışdır.
Quruçay mədəniyyəti daşıyıcıları çaydaşından
bəsit əmək alətlərinin ilk tipoloji nümunələrini yaratmaqla, yurdumuzun qədim sakinlərinin
sonrakı sosial-mədəni tərəqqisinə texniki zəmin hazırlamışdır.
İbtidai icma cəmiyyətinin maddi mədəniyyəti bilavasitə insanın yaranması prosesinin
gedişində təşəkkül tapmaqla, zaman etibarı ilə o, 1,5-2 milyon ilə yaxın
çox böyük tarixi mər-
hələni əhatə edir. İbtidai insanın yaranmasının ilk mərhələsi üçün səciyyəvi olan
erkən ovçuluq,
yığıcılıq, bəsit əmək alətləri və oddan istifadə kimi ümdə mədəni dəyərlər meydana gəlmişdir.
İnkişaf etmiş ovçuluq, ixtisaslaşmış yığıcılıq, habelə torpağın bəsit becərilməsi (toxa
əkinçiliyi) və maldarlığın meydana gəlməsindən başlamış ilk sinifli cəmiyyətlərin yaranmasına
qədərki çox geniş dövrün maddi mədəniyyət tarixinin öyrənilməsi arxeoloji araşdırmalarla
yanaşı, həm də etnoqrafik tədqiqat orbitinə daxildir.
Azıx mağarasının Şel və Aşel dövrlərinə aid alt mədəni təbəqələrindən çaydaşından dü-
zəldilmiş ən bəsit əmək alətləri aşkar olunmuşdur. Bunların arasında «giqantolit» adlanan və
bənzərinə dünyanın paleolit abidələri arasında çox nadir hallarda təsadüf edilən iri (azman) daş
alətlər diqqəti cəlb edir. Bununla yanaşı, mağaradan yurdumuzun ən qədim sakinlərindən olan
azıxantroplara
məxsus daşdan düzəldilmiş əl çapacağı, kobud
çapılmış
bizvari alətlər, itiuclular,
bəsit
qaşovlar tapılmışdır.
1
Bütün bu faktlar Azərbaycan ərazisində ibtidai insanın uzaq daş
dövründə təşəkkül tapdığını göstərən nadir maddi mədəniyyət nümunələri olub misilsiz elmi
əhəmiyyətə malikdir.
Azərbaycanda paleolit dövrünün maddi mədəniyyət örnəkləri
mağara məskənləri və (Azıx,
Damcılı, Daşsalahlı, Tağlar və s.)
açıq tipli düşərgələr (Qayalı, Acıdərə, Şişquzey, Qədirdərə,
Çaxmaxlı, Marallı və s.), habelə onlardan əldə olunmuş müxtəlif
tipoloji növə malik daş alətlərlə
təmsil olunur.
2
Quruçay mədəniyyəti dövründə daşişləmə texnikasının təkmilləşməsi
Mustye və
Son
paleolit mədəniyyətlərinin yaranması ilə nəticələnmişdir.
Mustye (orta paleolit) dövrünün əmək alətlərini düzəltmək üçün qədim insanlar xammal
kimi təkcə çay daşından deyil, «obsidian» adlanan vulkan şüşəsindən də istifadə etməyin
yollarını öyrənib mənimsəmişdilər. Bu fakt yurdumuzda Mustye mədəniyyətinin ən gözəçarpan
nailiyyətlərindən biri sayılır. Mustye dövrü insanlarının digər sosial uğuru bu dövrün sonlarından
etibarən
qəbilə quruluşunun təşəkkül tapması olmuşdur.
3
Azərbaycanın
son paleolit abidələrindən (Tağlar, Damcılı, Yataq yeri) əldə olunmuş maddi
mədəniyyət nümunələri, əsasən, çaxmaqdaşı, bazalt, obsidian və dolomitdən olub daha təkmil
texniki üsullarla hazırlanmışdır. Bunların çoxu uzunsov qəlpələrdən düzəldilmiş
mikrolit
alətlərdən (bıçaq, biz, qaşov, kəski və s.) ibarət olmuşdur.
4
Paleolit dövrünün mədəni-texniki uğurları, öz növbəsində,
Mezolit mədəniyyətinin təşəkkül
tapmasına gətirib çıxarmışdır.
Qədim daş dövrünün başa çatması ilə əlaqədar Azərbaycan ərazisində məskunlaşmış ibtidai
icmaların həyatında, həm də onların maddi mədəniyyət tarixində yeni bir mərhələ başlanmışdır.