101
əl çəkməsini xahiş etsə də, müsbət cavab almadı. Sara xatunun gəlininin biri Trabzon
imperatoru IV İohanın qızı Teodora idi. O, Uzun Həsənin zövcəsi olandan sonra
Dəspinə xatun deyə çağırılırdı. Sara xatun bu qohumluqdan istifadə edərək varislik
hüququnu II Mehmetdən tələb etdi. Trabzon xəzinəsindən payını alıb vətənə qayıtdı.
Şübhəsiz, bu özü də böyük qələbə deməkdi.
Ər qeyrətli, nər hünərli Sara xatun öz xalqı yolunda, oğlu uğrunda mənalı və
qayğılı günlər keçirdi. Analı dünyamızın, mübarizəli tariximizin qızıl səhifələrini
bəzədi...
Taclı xanım. Müharibə 1514-cü ilin avqust ayının 23-də Maku yaxınlığındakı
Çaldıran çölündə başladı. I Sultan Səlimin əmrilə nə az, nə çox, iki yüz minlik
osmanlı qoşunu Səfəvi torpaqlarına yeridi. Hər iki tərəf çoxlu qurbanlar verdi.
Səfəvilər məğlub oldu.
Deyilənlərə görə Çaldıran döyüşündə 10 min nəfər qadından ibarət süvari
iştirak etmişdi. Venesiyalı Katerina Zenonun bu münasibətlə yazdıqları heyrət
doğurur, qürur yaradır: "...qadınlar ərlərilə birlikdə silaha sarılaraq döyüş meydanına
girirdilər və ərlərinin taleyinə şərik çıxırdılar. Onlar kişilər kimi vuruşur və döyüşdə
qəhrəmanlıq göstərirdilər". Bəli, qadınlar yaxşı bilirdilər ki, ər olmayanda vətən, nər
olmayanda torpaq yoxdur.
Çaldıran döyüşündə qəhrəmanlıq göstərən bir hünərpərvər qadının adı Taclı
xanımdır. I Şah İsmayılın ürək dostu, könül həmdəmi olan Taclı xanım. Arxası,
köməkçisi, gözətçisi, döyünən ürəyi, dilinin əzbəri, zəfər, qeyrət, ismət çələngi Taclı
xanım. Çaldıran döyüşündə bir neçə dəfə yaralanmışdı. Səfəvi dövlətinin
çiçəklənməsində xüsusi xidməti olan Taclı xanım əlində qılınc, sinəsində qalxan
gəzdirmişdir. Ağıllı məsləhətçi, etibarlı dost və əmin-amanlıq carçısı kimi tarixə
düşmüşdür.
Xeyrənisə bəyim. 1568-ci ildən Məhəmməd Xudabəndə Qəzvində Səfəvilər
dövlətini idarə etməyə başladı. Lakin kor Xudabəndə həm də çox bacarıqsız
olduğundan ölkəni arvadı Xeyrənisə bəyim idarə edirdi. Zəkalı, bacarıqlı və tədbirli
qadın olan Xeyranisə bəyim səfəvilərlə türklər arasında gedən mübarizəyə özü
başçılıq edirdi.
Nigar xanım. Nigar türk qızı, İstanbul gözəliydi. Əsilli-nəsilli tayfanın isməti,
gözünün işığıydı. Türk oğlu, Azərbaycan igidi Koroğluya ürək açan, könül verəndi.
Nigar Koroğlunun gözünün ilk ovu, sığınacağı, sınağıydı. Ömür-gün sirdaşıydı,
igidlik dünyası, ismət qalasıydı. Əyilməyən məğrur başı - ilham pərisi, şah əsəri,
dilinin əzbəriydi Nigar. Namusuydu-arıydı, pozulmaz ilqarıydı. İlk istəyi, son harayı,
son arzusuydu Nigar.
Nigar xanımlar xanımı, gözəllər gözəliydi. Koroğlunun boyuna biçilən,
taleyinə yazılanıydı. Sərv boylu, şux qamətli qənirsizdi Nigar. Qaşları kaman, gözləri
can alan, lalə yanaq, bəyaz buxaq, ismət qızartısı da bir ayrı tamaşa. Zəncir zülfləri
topuğa çatırmış, mələklərə, ilahələrə oxşarı varmış. Qırx qız yığnağında sayılan,
seçilən, nazlanan, sazlananmış Nigar. İsmətində cahan ismətlənər, qənirsizliyində
102
gözəllər gizlənərmiş Nigarın.
Çənlibel Koroğlu dünyasının dünyasıydı. Nigarın doğma eli, anasıydı.
Dəlilərin səddi, səngər qalasıydı. Eyvazın seyrəngahı, ata yurdu, ana ocağıydı
Çənlibel. Şadlıq məclisiydi, say-seçmə igidlərin, cövlan edən dəlilərin, qurşaq tutan,
yallı gedən, çalıb-çağırdıqları evi-eşiyiydi Çənlibel. Nigar məclislər yaraşığı, dəlilər
anası, məsləhət yuvasıydı Çənlibelin. Hamıya xeyir-dua verən, dəliləri yola salan,
uğur diləyən, qəbul edən, qələbə məclisi qurandı Nigar Çənlibeldə. Yeri gələndə,
məsləhət görüləndə at da minərdi, qılınc-qalxan da gəzdirərdi, düşmən üzərinə də
yeriyərdi Çənlibeldən.
Bütün məşəqqətlərə sinə gərən, ərinin qəminə şərik çıxan, sevincini yarı
böləndi Nigar. Qəlbi sınıqdı Nigarın. Övladsızlıq tonqalında yanan, övlad həsrətilə
şölələnən məşəldi Nigar. Bir dəfə kövrəldi, Nigar üzünü Koroğlusuna tutdu:
...Toz bürümüş boş beşiyə,
Şirin layla çalan yoxdur...
Hər quş balasıynan gəzir,
Niyə sənin balan yoxdur?
Bu nisgilli sözlər Koroğlunun məlul könlündən qara qanlar axıtdı. Nigar yalan
oldu, Koroğlu doldu-doluxsundu bahar buludu tək.
Koroğlu Eyvaz sorağıyla Turkman elinə səfər elədi, onu tezliklə Çənlibelə
gətirdi, Nigara oğul etdi, Nigar Eyvazını bağrına basdı, öpdü-oxşadı. Sonra da
köynəyindən keçirib Eyvazı doğmaladı. Eyvaz şamında nurlandı, zirvələndi, ana oldu,
analandı Nigar. Eyvaz ona layiq övlad, ataya arxa, Çənlibelə yaraşıq oldu. Sayıldı,
seçildi, sevdi, sevildi. Nigar övlad yolunda saçlarını ağlı-qaralı hördü. Qara saçlar
gümüşləndi. Çənlibeldə müdam intizarda yaşayan, Eyvazı üçün, Koroğlusu üçün
yeddi min yeddi yüz dəliləri üçün əli qoynunda, fikri uzaqlarda, gözləri yollarda
qalandı Nigar.
İldırımlar çaxanda, gurşad oynayanda, atlar nərə çəkib şahə qalxanda, qılınc-
qalxanlardan od parlayanda Nigarın birmənalı baxışı hamını susdurur, qanı su ilə
yuyurdu. Əsən-coşan telli-toqqalı dəlilər, vuran-tutan igidlər, qan-qan deyən şiri-
nərləri daima əmin-amanlığa səsləyər, övlad tək bəsləyərdi Nigar.
Bəli, qoç Koroğlu təkdi dünyada. Nazlı Nigarımız təkdi, bircəydi dünyada.
Koroğlunun Nigarıydı, Nigarın Koroğlusuydu. Biri ismət, biri qeyrət heykəliydi.
Koroğlularımız çoxdu, Nigarlarımız saysız-hesabsızdı Azərbaycanda. Xalqımızın
qeyrətliləri Koroğlu adını qürurla daşıyır, ismətlilərimiz Nigar adını fəxrlə yaşayır...
Tutibikə. Azərbaycan xalqının alınmaz qalası, dünya şöhrətli Dərbənddə bir
ana qəbri var. Qırxlar qapısının lap yaxınlığındakı türbədə Tutibikənin məzarı uyuyur.
1788-ci ildə yapılıb ucaldılan, heç vaxt unudulmayan ziyarətgaha çevrilən bu türbədə
həm də qəhrəman ananın iki oğlu - Əhməd xan və Həsən xanın məzarları yerləşir.
Ananın qoynunda dünyaya gələn, ananın yanında uyuyan övladları.
Tutibikə öz əsli-kökü ilə seçilən Qaytağlı qızıdır. O, dağlarda doğulmuş,
gözəlliklərdə böyümüşdü. Çox döyüşlər şahidi, çox mübarizələr iştirakçısı olmuşdur.