115
idi. Ev sahibi qonaqlıq süfrəsindəki yeməklərin də müxtəlif çeşidli olmasına çalışırdı.
Qonağın şərəfinə düzəldilən məclis süfrəsinin bəzədilməsinə xüsusi diqqət verilirdi.
Gələn qonaq üçün açılan süfrə daha ləziz, bol yemək növləri ilə bəzədilir və adi
günlərdə olduğundan fərqlənirdi. Süfrəyə içkilərdən şərbət və ayran qoyulur, bəzi
hallarda şərab da verilirdi. Qonaqlıq süfrəsində yeməklərdən əsasən düyü və ət
xörəkləri üstünlük təşkil edirdi. Xörəklərlə bərabər süfrəyə müxtəlif göyərti də
gətirilirdi. Şirniyyat süfrəsinə isə ayrı-ayrı milli şirniyyat növləri, mürəbbələr və s. ilə
yanaşı, meyvələr də düzülürdü.
Tarixi qaynaqlardan məlum olur ki, 1637-ci il avqustun 16-da Qolşteyn
elçilərinə Şah Səfi sarayında verilən rəsmi ziyafətdən sonra süfrə xeyir-duası
verilmişdir:
"Süfrə haqqına
Şahın dövlətinə
Qazilər qüvvətinə
Allah deyəlim"[21].
XVI-XVII əsrlər Səfəvi tarixçisi Mirzəbəy ibn Həsən əl-Hüseyni Günabadi
farsca yazdığı "Rövzət əs-Səfəviyyə" ("Səfəvilər bağı") əsərində Səfəvilər dövründən
bəhs edərkən bir sıra ziyafət məclislərindən söz açmağı da unutmamış, "ziyafət
mərasimi və peşkəş ədabını və böyüklərin görüş şəraitini yerinə yetirdikdən sonra,
onun hökuməti müxtəsərlə qərarlaşıb yerləşdi"[22]. Müəllif daha sonra qonaqlıq
mərasiminə necə həyəcan və ciddiyyətlə yanaşıldığını vurğulamışdır. Başqa müəlliflər
kimi, Günabadi də burada qonaqlara hədiyyə təqdim olunmasına işarə etmişdir.
Müəllif bununla yanaşı, orta əsrlərdə ziyafət məclislərində nəğmə oxunmasına da
toxunaraq yazır: "Nəğmə oxuyan çalğıçılar hər bir zamanda bir çığırtı və bağırtı
qoparıb qoca-cavan məclisində ən yüksək dərəcədə olanların qulaqlarına çatdırırdılar".
"Beləliklə, şərab qədəhlərini başına çəkməkdə və kəman (kamança - Ş.B.) tellərini
dinləməkdə vaxtlarını xoş keçirirdi" - deyən Günabadi həm şərabdan istifadə
edildiyini, həm də qonaqlıqda kamança çalındığını qeyd edir. Onun məlumatları
bununla bitmir. O, Səfəvilərin qonaqlıq ziyafətini "cənnət nişanəsi" kimi dəyərləndirir,
qonağın məclisin yuxarı başında oturduğunu göstərir. Digər qonaqların da yer aldığı
məclisdə çalğıçılar və xanəndələrin hər birinin münasib yerdə əyləşdiyini qeyd
etməklə bərabər, müəllif həmçinin onların gözəl səs və avaza malik məşhur
xanəndələr olduqlarını da söyləyir.
Günabadi şahidi olduğu qonaqpərvərliyə xas olan xüsusiyyətləri yığcam
şəkildə təsvir etməklə yanaşı, qonaqlıq məclisinin sonunda "bir çox məbləğ qırmızı -
qızıldan və ağ gümüşdən və qiymətli cinslərdən, yəni ipək və zərbaflardan peşkəş yolu
ilə və hədiyyə tərzilə o həzrətin mülazimlərinə verdilər", - deməklə, hədiyyələr
paylanmasına toxunmuş və o şəxsin də öz növbəsində xələtlər və az tapılan libaslar
təqdim etdiyini vurğulamışdır[23]. Maraqlı cəhət budur ki, müəllif hədiyyələrin nədən
ibarət olduğunu da göstərmişdir. Bu cür məlumata məşhur tarixçi alim Fəzlullah
Rəşidəddinin (1247-1318) əsərində də rast gəlmək mümkündür. O da Qazan xanın
116
qəbuluna gəlib ona xidmət edəcəklərini bildirən adamlara xanın verdiyi bəxşişlərdən
söhbət edərkən hədiyyələr sırasında kaftan, papaq, kəmər və digər qiymətli əşyaların
adlarını çəkmişdir[24]. Qazan xan dövrünün tarixini müfəssəl şərh etməyə çalışan
müəllif, eyni zamanda xanın Marağadakı rəsədxananı görməyə getdiyi zaman yerli
hakimlər tərəfindən təşkil olunmuş ziyafətdən də bəhs etmişdir[25].
Beləliklə aydın olur ki, istər keçmişdə, istərsə də müasir dövrümüzdə qonaqlar,
bir qayda olaraq müxtəlif hədiyyələrlə yola salınmışlar. XVII əsr məşhur türk səyyahı
və coğrafiyaçısı Evliya Çələbi Azərbaycanda olmuş və burada Qərşi qalasının ağası
tərəfindən necə qarşılandıqlarını belə təsvir etmişdir: "Şahın dizçökən ağası başındakı
tacı müxtəlif quş lələyi ilə bəzəyib və nəyi var idisə, hamısını başına tac bağlayıb
yanımıza gəldi. Xahiş edib dedi: "Hey qurban sənə. Qədəmin xeyirli olsun. Üz basa-
basa, göz basa-basa səfa gəldiniz", - deyib bizi cahannüma evinə dəvət edib, yaxşı bir
qonaqlıq verdi. Qonaqlıqda adi süfrə yerinə qələmkarı çitdən hazırlanmış süfrə sərildi.
On bir növ plov qoyuldu: avüşlə plov, kükü plov, zəfəran plov, ud plov, şilən plov,
xuruş plov, çilov plov, ənbər plov, sarımsaq plov, kösə plov, düzən plov, qızardılmış
kişmiş ilə plov, müstəbə şorbası, tamlı xörəklər yeyib xoş söhbətlər etdik. Ziyafətdən
sonra elçiyə və mənə, kiçik Həsənağaya zərif vaşaq dəriləri hədiyyə verdi. Oradan
aşağıda yerləşən alaçığımıza gəldik. Bizim arxamızca təqribən əlli qoyun, minə qədər
ağ çörək, 7-8 qatır yükü meyvə və şərbətlər göndərdi. O gecə biz böyük bayram edib
iki gün daha burada qalıb, Qərşi çayı kənarındakı gözəl saraylara tamaşa etdik".
Müəllif Naxçıvanda olarkən mehmandarın onlara çox hörmət etdiyini söyləyir[26].
Aşıq şerinin qüdrətli ustadlarından biri olan Xəstə Qasım yazır:
İskəndər atlandı çıxdı zülmatdan,
Qasım, Xızr içdi abı-həyatdan.
Bəhs düşsə igiddən, qılıncdan, atdan,
Süfrəni hamsınnan kübar deyərlər[27]
Müəllif burada çox maraqlı bir fikir irəli sürmüşdür. Ənənəyə görə, kişiyə
xas
olan ən yaxşı keyfiyyət onun səxavəti və evinə gələnə yaxşı süfrə açıb qonaqlıq verə
bilməsidir. Nahaq yerə deməyiblər ki, səxavətli insanın ruzi-bərəkəti Allahdan olar.
Azərbaycan ərazisinə bu və ya digər məqsədlərlə gələn müxtəlif ölkə
nümayəndələri öz məlumatlarında, yerli əhali tərəfindən necə qarşılandıqları barədə
bəhs etmişlər. 1473-1477-ci illərdə Ağqoyunlu hökmdarı Uzun Həsənin sarayında
səfir olmuş venesiyalı Ambrozio Kontarini "Səyahət" əsərində Azərbaycan ərazisində
olarkən yerli əhali arasında müşahidə etdiyi adət və ənənələr barədə söhbət açmış və
demişdir ki, burada əhali mülayim və xoşsifətdir. Müəllif həmçinin bütün yolboyu
orada heç bir kəs tərəfindən cüzi narahatçılığa və təhqirə məruz qalmadıqlarını xüsusi
qeyd etmişdir.
İsfahanda olarkən Ambrozio Kontarininin gəldiyini bilən kimi Uzun Həsən
dərhal ona müxtəlif tələbat malları göndərir. 1474-cü ilin noyabr ayında Q.İosafat
Barbaro ilə Ambrozio Kontarinini sarayına dəvət edən Uzun Həsənin onları necə
qonaqpərvərliklə qarşıladığını həvəslə şərh edən səfir göstərir ki, "biz otağa daxil