DINAMIKA QATORLARI
1.Dinamika qatorlari to‘g‘risida tushuncha va ularni tuzish qoidalari
Hodisalarning vaqt davomida o‘zgarishini ta’riflovchi statistik ko‘rsatkichlar qatori dinamika qatori deb yuritiladi. Masalan, qishloq xo‘jaligi yalpi mahsuloti, sof mahsuloti, sof daromadi, sof foydasi kabi ko‘rsatkichlarning hisobot yilidagi hajmini bazis yiliga taqqoslab o‘zgarishi aniqlansa, bu ko‘rsatkich dinamika ko‘rsatkichi deb ataladi. Statistika ijtimoiy hodisalarning holatini va ularning o‘zgarishini davrlar bo‘yicha (yillar bo‘yicha) o‘rganadi.
Har qanday dinamika qatori ikki unsurdan tashkil topadi:
Vaqt momentlari yoki davrlar sanasi.
Davr (sana)larga tegishli ko‘rsatkichlar.
O‘rganilayotgan ijtimoiy hodisalarning miqdorini ta’riflovchi darajalar deganda hodisaning soni, miqdori va hajm ko‘rsatkichlari tushuniladi. Hodisalarning darajalariga tegishli bo‘lgan davrlar (momentlar) deganda esa sanalar, yillar, oylar tushuniladi. Dinamika qatorlarida boshlang‘ich (bazis) davr, oxirgi (joriy) davr, shuningdek, rejalashtirilgan davr mavjud.
Dinamika qatorlarini tuzishda quyidagi qoidalarga amal qilish kerak:
Birinchidan, dinamika qatorlarini tuzishda, eng avvalo, miqdorlarni taqqoslama holatga keltirish kerak. Buning uchun vaqt birligi, o‘lchov birligi, hisoblash usuli, narx-navosi bir xil bo‘lishi kerak.
Ikkinchidan, barcha davrlar uchun kuzatish obyekti bir xil bo‘lishi kerak.
Uchinchidan, ijtimoiy hodisani qamrab olgan davrning uzun qisqaligi va hisoblashdagi aniqlik (0,1; 0,01; 0,001) bir xil bo‘lishi kerak. Agar dinamika qatorlari darajasi qaysi bir jihatdan taqqoslab bo‘lmaydigan bo‘lsa, ularni tegishli usullarni qo‘llab taqqoslama holatga keltirish lozim.
Ushbu qoidalarga amal qilib, tuzilgan dinamika qatori ijtimoiy hodisalar orasidagi qonuniyatlarni aniq ko‘rsatish va xulosa chiqarishda muhim vosita, omil bo‘lib xizmat qiladi.
Dinamika qatorlar darajalari mutlaq, nisbiy va o‘rtacha miqdorlardan tuzilgan bo‘lishi mumkin.
Dostları ilə paylaş: |