79
Heç kəs Nəbinin səsini, naləsini, fəryadını eşitmirdi… Bəlkə o deyirdi: «Qan
eləmə, Bərgüşad! Aman ver, Bərgüşad, uşaqlarımın üzünü görüm! Onların məndən
başqa pənahı yoxdur. Axı mən evimə un aparıram… un, un!..»
Çox keçmədi ki, Bərgüşad çayının üzü ağardı. Sanki yay günü, onun üstünə
qar yağdı. Nəbinin həsrət və əzabla aldığı, böyük bir sevinclə evinə aparmaq
istədiyi ianə unu sulara qismət oldu…
Adamlar hər iki sahil boyu, çay aşağı qaçışırdılar…
Bu taydan bir, o taydan iki adam özlərini çaya vurub, suyun üzündə qovuq
kimi gedən dağarcığa tərəf üzdülər. Amansız çayın qüvvətli dalğaları ilə əlbəyaxa
oldular. Özlərinin həyatları təhlükədə olan bu adamlar, xeyli əlləşdikdən sonra,
Nəbini çıxartdılar.
Kim isə dedi:
- Yazıq kimi, özünü bir dağarcıq una qurban verdi… Gör dağarcığı əlində nə
möhkəm tutub ki, su da qoparda bilməyib…
Yamaqları sökülüb, içi boşalmış dağarcığın ağzını Nəbinin dəmirə dönmüş
ovcunun içindən zorla çəkib çıxartdılar. Onun yumulu barmaqlarının arasından
sıyıq xəmir axırdı…
Kəndlilərdən biri yaşarmış gözlərini silib köksünü ötürdü:
- Üzün qara olsun, ay insan, nəyə gərəksən?! Çalış, əlləş, ilan kimi qabıq
qoy, axırı da belə!
…Nəbinin facianə ölümünü eşidən kənd camaatı o saat tökülüb gəldi.
Bəziləri həyətdə oturdu, bəziləri içəri keçdi.
Tövlənin ortasında qoyulmuş meyitin ətrafında oturan qoca, cavan arvadlar,
qızlar səs-səsə verib ağlayırdılar. Lakin onların içində bir adamın tükürpədici səsi
nəinki tövləni, həyəti, hətta kəndi də götürmüşdü. Ölümdən də qorxunc və dəhşətli
olan bu səs Növrəstənin səsi idi. Üz-gözünü cırıq-cırıq eləmiş, göz yaşı ilə
yanaqlarının qanı bir-birinə qarışmış Növrəstə, saçlarını yola-yola deyirdi:
- Kaş dilim quruyaydı, ata, sənə deməyəydim ki, ianə paylayırlar. Mən
bədbəxt oldum, Allah! Mən necə olacağam, xudaya!.. Hardasan, gəl, ay əmi,
qardaşın gedər oldu…
- Özünü öldürmə, ay bala, - deyə arvadlardan kim isə Növrəstəni zorla
meyitin üstündən ayırdı… Onun səsi kəsildi…
Cavan yaşında neçə-neçə müsibət görmüş Növrəstə ağlamaqdan
yorulmuşdumu? Daha saçını yolub, şivən qoparmaq istəmirdimi? Xeyr, o,
bayılmışdı. Bəlkə o bədbəxtin də quş kimi çırpınan ürəyi bu müsibətə davam
gətirməyib partlayacaqdı.
Həyətdə, bəziləri oturmuş, bəziləri kürəklərini divara söykəyib ayaq üstə
dayanmış kişilər öz aralarında müxtəlif söhbətlər edirdilər.
Birdən hönkürtü ucaldı.
Baxış bəy:
- A Məmməd kişi, sənə nə olub, uşaq kimi ağlayırsan? – dedi. – Kim bu
dünyanı tutub qalacaq?.. Ağlamaq vaxtı deyil, elə eləyin ki, meyiti axşama
saxlamayın. Yay günündə yaxşı olmaz…
Kişilərin hamısından qoca, beli bükülmüş, doxsan yaşlı Məmməd kişi, kirli
dəsmalı ilə gözünü silə-silə dedi:
80
- Bəy, ona ağlamıram ki, ölüb… Ölmək Allah əmridir. Ona ağlayıram ki,
yazıq bu kəndə gələndən heç ağ gün görmədi. Sağalıb, ayağı təzə-təzə yer tuturdu
ki, belə oldu… Bir ovuc unun bəlasına düşdü… Bədbəxtin iki balası necə olacaq…
- Sən onların fikrinə qalma, Məmməd kişi! – deyə Baxış bəy gülümsündü. –
Məgər mənim başımdakı papaq deyil? İki adamı da dolandıra bilməyəcəyəm? Nəbi
yaxşı adam idi. Necə deyərlər, tikansız balıq kimi. Onun uşaqlarını korluq
çəkməyə qoysam, bəylik mənə haram olsun…
- Allah atana rəhmət eləsin, bəy. Allah sənin kölgəni bu camaatın üstündən
əskik eləməsin, - deyə molla Səfər dilləndi.
Yanlarını zorla çəkə-çəkə gələn Aftab xanım, həyətin o başında görünən
kimi oturanlar ayağa qalxdılar. Aftab xanım yaxınlaşanda, hamı əlini döşünə
qoyub, ona baş əydi. Kimi ucadan, kimi alçaqdan: «Xanım, salaməleyküm!» dedi.
Baxış bəy, yanından ötüb keçən anasını saxladı, onun qulağına pıçıldadı:
- Növrəstəni özünü döyüb öldürməyə qoyma. De ki, bundan sonra,
həmişəlik bizdə qalacaq…
Heç bir söz deməyib, oğlunun üzünə tərs-tərs baxan Aftab xanım getdi.
- Qəbir qazmağa gedən varmı? – deyə Baxış bəy Məmməd kişiyə müraciət
elədi.
- Bəli, bəy. Camalla bərabər iki adam gedib.
İçəridən arvadların həzin ağlaşması eşidilirdi.
Bir neçə dəqiqədən sonra qəbir qazanlar gəldilər.
Meyiti samanlıqda yudular, kəfənə tutduqdan sonra, tabuta qoyub həyətə
çıxartdılar.
Qabaqda molla Səfər, onun arxasında isə camaat, üzü qibləyə durub, meyit
namazı qıldılar.
Arvadlar içəridən çıxdılar.
Dörd kişi irəli gəlib tabutu qaldırmaq istərkən Növrəstə özünü tabutun
üstünə sərdi.
- Məni qoyub hara gedirsən, ata? – deyə dəhşətlə qışqırdı, sonra insan
ürəyini parçalayan bir səslə bayatı çəkdi:
Əzizim dərdi qovun,
Bostançı dərdi qovun.
Yığılın, dərd qovanlar,
Üstümdən dərdi qovun!..
Hönkürtüsü kəndin qayalarında, kahalarında əks-səda verən Növrəstəni
güclə tabutdan ayırdılar.
Meyiti qəbiristana aparırdılar. Hamı başını aşağı salıb yavaş-yavaş, qəmli-
qəmli gedirdi.
Yalnız kəndlilər deyil, bağlar, zəmilər, quşlar, qan eləmiş Bərgüşad çayı özü
belə, sanki matəmə bataraq, Növrəstənin halına ağlayırdı.
Yalnız Baxış bəy, ürəyində nə isə fikirləşir, gözünü Növrəstənin qan-yaşla
dolmuş ala gözlərindən çəkmirdi…
81
Atasının ölüm xəbərini eşidən Yusif bacısının yanına gəldi, başına-gözünə
döyüb çox ağladı…
Növrəstə atasının qəbrini qardaşına göstərmək üçün onu qəbiristana apardı.
İki yetim, qardaş-bacı, kiçik bir təpə kimi qalxmış, üç günlük məzarın
yanında oturdular. Gah Növrəstə, gah Yusif baş daşından öpür, təzə qəbrin
torpağını göz yaşları ilə suvarırdılar.
Hər ikisi doyunca ağlayıb yorulduqdan sonra, dərdləşməyə başladılar. Öz
gələcəkləri haqda düşündülər. İlk dəfə olaraq əmilərinin, dayılarının və
Şahmərdanın qarasınca danışdılar. Onları atıb getdiklərinə gileyləndilər.
Yusif bacısına Qazıyana getməyi təklif elədi. Orda kimi-kimsəsi, qalmağa
bir yeri olmadığından, Növrəstə bu təklifə razı olmadı. Bir xeyli danışdıqdan sonra,
qəbiristandan ayrılıb yola endilər. Yusif bir tərəfə, Növrəstə isə başqa bir tərəfə
getməyə üz qoydu. Hər ikisi ürəklərində hicran və ata dərdi apardı…
Nəbi öləndən sonra Camalgildə qalan Növrəstə yenə onlara getdi.
Camal və onun mehriban arvadı Tükəzban, gözləri ağlamaqdan qızarıb,
şişmiş Növrəstəyə təsəlli və ürək-dirək verdi.
Növrəstəni həqiqi bir bacı kimi istəyən Camal cibindən bir kağız çıxardıb
dedi:
- Növrəstə, Bakıdan gəlib, Şahmərdandan. Oxuyum, qulaq as.
Palazın üstündə oturmuş Növrəstə küskün-küskün dedi:
- Oxu.
- «Əzizim Nəbi dayı!..»
Nəbi adı çəkilən kimi, yenə Növrəstə özünü saxlaya bilməyib hönkürdü…
Onun səsi Camala məktubu ucadan oxumağa imkan vermədi. Camal məktubu
ürəyində oxuyub, məzmununu bir neçə sözlə söylədi. Şahmərdan Comərdlə
Qiyasın sağ-salamat olduqlarını, özününsə bir aya kimi gələcəyini yazmışdı.
…Tükəzban Növrəstəni öz evində bir neçə gün də saxladı.
Növrəstə, bu mehriban, lakin vəziyyəti ağır olan ailədə çox qalmadı. Yenə
öz yuvasına çəkildi. Tövlənin hər daşı-divarı sanki qurd olub onu yeyirdi. Vahimə
və tənhalıq Növrəstəni əldən salırdı.
Ehtiyacın amansız əli, bir gün Növrəstəni Baxış bəyin evində həmişəlik
kəniz olmağa sürüklədi.
Yusif gündüzlər yorğun olduğu üçün gecələr daş kimi yatırdı. Ancaq səhər
alaqaranlıqdan, hələ ağası, onun qoca arvadı, gəlini yuxudan qalxmamış, oyanırdı.
O, buna həm alışmışdı, həm də ağası onun gözünü qorxutmuşdu.
Deyir, ilan vuran, ala çatından qorxar. Yusif bir dəfə gün çıxana qədər
yatdığı üçün ağası: «…Bəli də, nökər də gün göbəyinə düşənə kimi yatsa, biz
yarıyıb bəy olarıq!» deyə onu söyüb, danlamışdı. «Bir də belə qələt eləsən,
qulağını çəkib, eşşək qulağına döndərəcəyəm, sonra qolundan tutub evdən
qovacağam» deyə hədələmişdi. Odur ki, Yusif hər gün işıqlaşmamış yuxudan
dururdu…
Yusifin işi çox və ağır idi. Gündüz malları otarmaq, axşam onlara yem
tökmək, tövləni kürüyüb, peyini atmaq, mal otardığı yerlərdə odun yığıb axşam
evə gətirmək – bunların hamısı Yusifin boynunda idi.
Dostları ilə paylaş: |