68
-
Mən də bilirəm keçmir, amma sən saxla. Zəmanəyə etibar yoxdur. Bəlkə
Müsavat yıxılacaq, yenə Nikolay taxta çıxacaq. Hə, ilahinin kərəminə şükür ki,
pulum, qızılım yenə öz oğluma qismət oldu. Deyirdim, ölüb gedəcəm, o bu tapıb
sahib olacaq. Fərman, strajniklikdən çıxarsan. Əynini-başını düzəldib çarığı,
patavanı tullarsan. Oturarsan mənimlə dükanda. İndi alverdən başı salamat,
qazanclı peşə yoxdur. Ucuz al, baha sat. Bunun da təhrini sənə öyrədərəm. Mən
öləndən sonra da tacirliyini eləyib başını dolandırarsan. Oğul, bu torbalar sənin əlli
ilinə bəs elər. Ancaq israfçılıq eləmə, qədrini bil. Dövlət adamın əlinə yavaş-yavaş
gələr, qədrini bilməyəndə quş kimi birdən uçub gedər. – Hacı Atakişi torbaları
bağlayıb bir tərəfə qoydu. – Hə, oğul, nə deyirsən,
mənimlə bir yaşamaq istəyirsən,
ya ayrı?
- Daha niyə ayrılaq ki, ata… Ancaq bilmirəm pristav məni buraxacaqmı?
- Buraxar, öz adamımızdır. Sənin yerinə, dərədə ağzına qurd düşənin birini
götürər. Qulluqdan çıxmaq üçün pristavdan icazə almağa gedəndə, bir gəbə
apararsan, boyun olmuşam. Eşitmişəm ki, bərk yeyəndir.
Özün də deyərsən ki,
atam qocalıb, gərək onun qulluğunda duram.
- Baş üstə.
Hacı Atakişi gözünü Fərmanın gənclik təravətini itirmiş, arıqlamış, uzanmış
sifətinə, ağarmış gicgahlarına gəzdirərək, köksünü ötürdü:
- Çox əziyyət çəkmisən, qara gün görmüsən. Eybi yoxdur, fikir eləmə.
Kənddə sənə toy eləyə bilmədim. Allah qoysa burda evləndirəcəyəm. Arvadsız ev
olmaz. Mənə bu qoca vaxtımda qulluq eləyən gəlin lazımdır. Bu Həkəri-
Bərgüşadda gözəl, ağıllı qızlar çoxdur.
Sənə dövlətli, adlı-sanlı bir kişinin qızını
alacağam. – Hacı Atakişi güldü. – Daha bizim Zəngəzura qayıtmağımız baş
tutmaz. Oğul, bəlkə özünün gözaltın var?
Fərman susdu.
- Hə, utanma, oğul, de. Varsa, mən də baxım, xoşuma gəlsə, toyunu eləyim.
- Gözaltım yoxdur… Boynuma keçən bir zəncir var. O dəfə görüşəndə bu
barədə söz düşmədi, mən də demədim. Bəli, zəncir, özü də lap ağırından…
- Sənin boğazına keçən kimdir?
- Fatıdır. Məni ölümdən necə qurtardığını sənə danışmışam. İndi yaxamdan
əl çəkmir. Düzü, elədiyi yaxşılığın qabağında pislik eləməyə, boşamağa insafım
yol vermir. Amma içimi yeyirəm. Elə bilirəm ki, el-oba mənə gülüb deyir: «Başına
daş düşsün, Fərman! Aldığın arvada bax!..»
Hacı Atakişi, ürəkdən yana-yana danışan oğluna diqqətlə qulaq asıb köksünü
ötürdü.
- Hə-ə-ə… bala! Demək, bala!.. Sən işə düşmüsən. Dünənə kimi qapımda
qazan dibi yalayan Fatı indi gözümün ağı-qarası bir oğlumun arvadı olub… Ah,
zəmanə, zəmanə!.. Onun qocalığı, qaravaşlığı hələ bir
yana dursun, oğul, o, səni bir
gün xataya-bəlaya sala bilər. O, hiyləgər, cadukün ifritə mənim ürəyimə dağlar
çəkib… Mən axmaq, o zaman kənddə qara Fatının kələklərini başa düşməmişəm.
Bərgüşad çayında, bizim kəndlilərdən öyrənmişəm ki,
rəhmətlik ananla, yazıq
Tamaşanın arasını vuran o imiş. Məni öz arvadlarıma düşmən eləyən o imiş. O,
bədbəxt Tamaşanın qanına bais o imiş. Mənim təmiz, vəfalı arvadımın müəllimlə
69
heç bir əlaqəsi yox imiş… Bəli, oğul, yazıq Zöhrənin başına gələn işlər də Fatının
əli ilə olmuşdur.
- Məni də gecə-gündüz dəli elədi… Mən də qanmadım, cavanlığıma saldım,
bacı dediyim bir qıza kəm baxdım. Axırda o da özünü bədbəxt elədi. – Fərman
danışdıqca qızışdı. – Yox, daha onu saxlaya bilməyəcəyəm. Elə bu saat gedib iti
öldürən kimi öldürəcəyəm… - Fərman yerindən qalxmaq istədi.
Hacı Atakişi onun qolundan tutub durmağa qoymadı. Tez qızışmağın, tez
özündən çıxmağın sadəlik və zərərli olduğunu ona başa saldı.
- Bu gecə vaxtı heç yerə səni buraxmaram, oğul.
Onu öldürmək yox, boşayıb
qovmaq lazımdır. Get bir mollanın yanına, talağını geri oxut, vəssalam. O evdən də
heç bir şey götürmə, hər nəyiniz var ona ver, özün qayıt gəl. Başa düşdün, oğul?
Özünü də nə söy, nə döy. – Hacı Atakişi bir an susub nə isə fikirləşdi və dedi: -
Bəlkə heç onun yanına getməyin də lazım deyil!
- Yox, ata, belə olmaz. Həyasız gəlib bura da çıxar, bizi narahat elər. Gedib
işi birdəfəlik qurtarsam yaxşıdır.
- Ə, onun yanında
bir sirin, pis işin yoxdur ki?
- Xeyr. Heç sənin yanına gəldiyimi də bilmir.
- Yaxşı eləmisən ki, bildirməmisən. Arvad kişinin gözünün işığı olsa da,
onun sirrini bilməsə yaxşıdır. Allah onları hülqumsuz, naqis yaradıb, ürəklərində
söz saxlaya bilməzlər.
Aralarında heç bir inciklik olmayıbmış kimi, ata ilə oğulun şirin söhbəti
xoruz banına kimi uzandı.
Nəhayət, Hacı Atakişi dedi:
- Əldə xərcləməyə pulumuz var. İndi dur torbaları yerinə qoyaq, özümüz də
yataq, səhərə az qalıb.
Hər ikisi ayağa durdu. Torbaları çalaya qoyub, üstünü torpaqladılar.
- Hələlik torbalara əl vurmayacayıq, oğul. Səhər çalanın üstünü palçıqla
suvayacağam. Gərək heç kim burda nə olduğunu bilməsin. Bu sənin, mənim, bir də
Allahın arasında olan bir sirdir…
Hacı Atakişi gəbəni götürüb, torbaları basdırdıqları yerə sərdi,
sonra yorğan-
döşək açdı.
Ata ilə oğul, iki il ayrıldıqdan sonra, bir yerdə, qızıl-gümüş torbalarının
üstündə rahat yatdılar.
Fatı pəyədə qüsl eləyib, evə gəldi. Gur saçlarını daradı, gicgahlarında səliqə
ilə halqa burdu. Şəkidən gətirdiyi ağ kəlağayını bağlayıb, başının dövrəsinə
qəşbənd vurdu. Səhər tezdən hazırladığı sürməni evin bucağından götürdü.
Keçənin üstündə bardaş qurub balaca güzgünü qoltuq cibindən çıxartdı. Güzgüdə
gah qaş-gözünə,
gah halqa birçəklərinə, gah dodaqlarına, dişlərinə dönə-dönə
baxdı. Öz-özünə vurulmuş kimi dedi:
- Ağ kəlağayı mənə yaxşı yaraşır. Rəngimi açır. Məni on yaş cavan göstərir.
Padar arvadları mənə deyirlər: ay Fatı bacı, sizin Zəngəzur adamlarının hamısı
sənin kimi layiqli, nəcib, gözəl-göyçəkdir? Mən də deyirəm, a başı xeyirlilər, hələ
mənim nə vaxtımı görmüsünüz… Vallah, bir cavanlığım, bir gözəlliyim, bir
şınqrovlu vaxtım var idi ki, oğlanların ağzının suyu axırdı. Hələ öz kəndimizdə