120
– Ay Həsən, bu nədir belə bişir, ətri hər tərəfi bürüyüb.
– Adı şüyüd plovdur, mən hər yeməyə bir az yaradıcı
yanaşmağı xoşlayıram. İndi də belə etdim. Bu plova bir az əlavə
ədviyyatlar qatdım. Bu saat bir yerdə yeyərik.
Fərəc bəy yemək təklifindən imtina etmədi. O, daim Həsən
kimi bir oğlunun olmasını arzu edirdi. İstəyirdi, onun da ağıllı,
müstəqil, azad düşüncəli, fikirlərini qarşısındakı müsahibinə
dəlillərlə, məntiqlə çatdıran, oxumaqdan, elmdən doymayan bir
oğlu olsun. Fərəc bəy Həsəni öz oğlu kimi sevirdi.
Şüyüd plovu yumşaq, isti təndir çörəyilə şirin-şirin yedilər.
Fərəc bəy:
– Sən heç soruşmursan, mən axşamın bu çağı sizə niyə
gəlmişəm?
– Gələndə nə olar, ay dayı, gəlişinlə məni elə şad etdin ki, bir
anlığa düşündüm, doğmaca atam gəldi. Siz elə hərdən gəlin, mənə
bu xoşbəxtliyi yenə yaşadın.
– Həsən, oğlum, sən bilirsən, mən səni nə qədər çox istəyirəm.
Məni soyuqqanlı bir insan kimi tanıyırlar. Amma əsla belə deyil,
mən hərbçi olduğum üçün belə görünməyə məcburam. Söhbət
qanın, canın olan doğmalardan gedəndə işin də, söhbətin də səmti,
yönü dəyişir, artıq soyuqqanlılığı bir tərəfə qoyursan.
– Bilirəm dayı, səni çağırıblar, məni başa salmağı tapşırıblar,
elədirmi?
– Haradan bildin?
– Bunu bilməyə nə var, sənin durub-durub mənim kirayə
qaldığım mənzilə gəlməyindən hər şey aydındır. Yoxsa qocaman
general Fərəc Ağayevin bizim məhəlləyə, bizim evə gəlişini necə
izah etmək olar?!
– Həsən, dövlətlə dövlətçilik etməyəcəksən ki… Sənin inki şa-
fın hələ qarşıdadır. Əslində, bu dəfə səni mənim qohumum olduğun
üçün bağışlayıblar, tənbeh deyil – xəbərdarlıq ediblər. O nədir elə,
Moskvaya-filana borçalıların əvəzindən məktub yazırsan? Sən Çar
Rusiyasının əyalət məmurusan, sənə yaraşarmı belə şeylər?
– Bu yolu mən məcburiyyət qarşısında seçdim, onlar məni bu
121
ərizəni yazmağa təhrik etdilər. “Mejevaya palata”nın rəisi məni
məcburiyyət qarşısında qoydu. Belə vicdansızlıq olar?! Yerlərdə
zülm ərşə dirənib, kəndlini məcbur edirlər ki, toyuq hininə bənzər
daxmasında toyuqları, iti, yeganə dolanışıq mənbəyi olan keçisi ilə
birlikdə yaşasın. On iki baş külfətlə insanları gecə yarısı evindən
bayıra atırlar. Bu vəziyyəti görəndən sonra mən dəhşətə gəldim,
çətinliyi yerindəcə həll etməyə cəhd etdim. Amma bunların “qu-
durtduğu”, “kürəyinə əl çəkdiyi” Yadigarov tipli nadürüstlər imkan
vermədi. Mənim yalnız bir yolum qaldı, yuxarılara müraciət etmək!
– Bax, oğul, hərəkətlərinə, danışığına bir qədər fikir ver, məni
də, özünü də pis vəziyyətdə qoyursan.
Həsən acı-acı gülümsündü, bir qədər zarafatla dayısını
sakitləşdirməyə çalışdı:
– Dayı, bir dəfə Molla Nəsrəddin Teymur Lənglə söhbət
edirmiş. Birdən Əmir Teymur molladan soruşur: “Molla, keç-
miş ərəb xəlifələrindən çoxunun adının müvvəffəqbillah, möh-
tə şimbillah, mütəvvəkküllbillah, müəyyidbillah və s. olmasının
sirrini bilirsənmi?”
Molla cavab verir, bəli, Əmir həzrətləri, onlara adı gördükləri
işə uyğun şəkildə xalq ləqəb kimi qoyurmuş.
Teymur yenə soruşur:
– Molla, o zaman, səncə, mənə gələcəkdə hansı adı verəcəklər?
Molla:
– Əmir həzrətləri, sizə camaat artıq ad verib.
Teymur sevinir və maraqlanır:
– Nədir o elə?
– Əmir sağ olsun, Nəüzənbillah…
Bu baməzə əhvalata güləndən sonra Həsən bəy sözünə davam
etdi:
– Fərəc bəy, indi mən neyləyim, kəndliləri bu günə salan
insanlar əməlləri ilə adlarını özləri qazanıblar.
– Mən səndən qat-qat yaxşı bilirəm bu insanların əməllərini.
Amma ehtiyatlı olmaq lazımdır. Mən rus imperiyasındakı idarə-
çiliyin cikinə-bikinə bələdəm. Bunların nifrəti ilə sevgisi, xidmətiylə
122
qiyməti bəlli olmaz. Bax, sənə deyirəm, bir şey bilməsəydim, heç
bura gəlməzdim. Get başını aşağı sal, öz işini gör, bu idarəçilik
rejimini sən yaratmamısan, sən də dəyişəsən.
– Yox, əziz dayı, bağışla məni, mən belə miyanə həyat tərzi
keçirə bilmərəm. Yəni nə ət, nə balıq. Mən Rəhim bəyin nəvəsiyəm,
sona qədər də belə hallarla barışmayacam!
Fərəc bəy eşitdiyi qəti cavaba çox təəssüf etdi.
“Allahım, iyirmi üç yaşlı od-alov püskürən bu oğlanı sən özün
hifz elə…” – Fərəc bəy düşündü.
– Nə isə, Həsən, oğlum, bir də söyləyirəm, ehtiyatlı ol, sənə
bir şey olsa, mən ömrüm boyu od tutub yanaram. Elədiklərini elə,
amma sakit, səssiz-küysüz. Belə inqilabçı ruhunla özünü də, ətrafını
da məhv edərsən. Bax, gimnaziyaya dəyişilməyin üçün Qafqaz
qubernatoru ilə danışdım. Söylədi ki, ondan yazılan məktubları çap
etsək, bir dastan yaranar. O qorxur ki, sən gimnaziyada gəncləri
yoldan çıxara bilərsən. Beləcə, imtina etdi. Mən sənin işini başqa
yerə dəyişmək üçün yenə fikirləşəcəm.
Fərəc bəy evdən çıxanda bir anlığa geriyə döndü:
– Onu düz dedin, Rəhim bəyin nəvəsi elə sənin kimi olmalıdı.
O, fikirli-fikirli həyətdən çıxaraq hara getdiyinin fərqində
deyildi: “Mən nəinki qohum-əqrəbadan, hətta millətimdən, dilim-
dən, dinimdən uzaq düşmüşəm. Oğlum yaşda Həsən mənə bu
gün həyat dərsi verdi, öz tariximi, milli kimliyimi yenidən mənə
xatırlatdı. Belə gənclərə baxaraq biz yaşlı ziyalı nəsli keçmişdə
gördüyümüz çox işlərdən xəcalət çəkməli, görə biləcəyimiz, lakin
görmədiyimiz işlərimizdən peşmanlıq keçirməliyik. Bu cavan
oğlandan cəsarət, millət, soydaş sevgisi öyrənmək hələ də gec
deyil. Mübarizədə iradə nümayiş etdirməyi belələrindən öyrənmək
lazımdır”.
Həsən bəy qısa müddətdə Tiflisdə tanınmağa başladı. Onu yer-
li kəndliləri çar üsul-idarəsinə qarşı itaətsizliyə çağırmaqda, in san-
ları dövlətin qanunlarına qarşı qaldırmaqda, “Mejevaya pa la ta”nın
rəhbərliyi ilə üz-üzə gəlməkdə, yerlərdə geniş inqilabi təb li ğat
aparmaqda günahlandırırdılar. İş o yerə çatdı ki, Fərəc bəyi Za qafqaziya
Qubernatorluğuna – Baş idarəyə çağırıb xəbərdarlıq etdilər:
Dostları ilə paylaş: |