80
Aleksandr Kiçik Asiyanı, Suriyanı, Misiri, Mesopotamiyanı, başqa sözlə
Persiya imperiyasının qərb yarısını işğal edəndə, bəzi hallarda onu xilaskar kimi
qarşılayırdılar. Doğma torpaqlar – Persiya və Midiya tutulduqda perslərə görə
təkcə imperiyanın taleyi deyil, öz azadlıqları da sual altında qalırdı. Buna
baxmayaraq onlar zəiflik göstərdilər. İndi isə dövlətin şərq hissəsini – Şərqi İranı
və Soqdiana ilə birlikdə Baktriyanı tutmaq lazım idi. Aleksandr burada uca dağları
gördü. “Dünyanın damından” hər tərəfə çaylar axırdı. Burada təbiətin rəngarəngliyi
kimi adamlar da bir-birinə bənzəmirdi. Səhralar Şərqi İranı Avropadan başqa, qərb
və cənub sahillərindən və qalan Asiyadan ayırırdı. Hindistandan isə onu əlavə
olaraq uca dağlar ayırırdı. Bu ərazidə dünya tarixinin saatı dayanmışdı. Perslər və
midiyalılar mesopotamiyalı qonşularının daha çox inkişaf etmiş mədəniyyətlərinin
təsiri altında öz sifətlərini itirmişdilər. Yad qaydaları mənimsəmiş, köhnə
qaydalarını isə itirməklə onlar miskinləşmişdilər. Hakimiyyət zəhəri, başqa xalqlar
üzərində hökmranlığın ağırlıqları onların xarakterini dağıda bilmişdi. Dünya
imperiyalarının ənənəvi sxemi onları sinkretizm burulğanına salmış, bu isə köhnə
dayaqların itirilməsinə gətirib çıxarmış, əvəzində isə yeniləri yaranmamışdı.
Şərqi İrana isə toxunulmamışdı. Vaxtilə buraya gələn Kir onlardan kömək
tələb etmiş, əvəzində isə öz sədaqətini vəd etmişdi. Lakin Kir da onlar kimi iranlı
idi və onları şimal köçərilərinin hücumlarından qoruyurdu, qoşunlar arasındakı
toqquşmaları yoluna qoyurdu, bütün başqa məsələlərdə isə onlar olduqları kimi
qalırdı. Kir onları şöhrət və qənimətlə özünə xidmətə cəlb edirdi,
həm də bu xidmət
onlara səhranın o tərəfində olan dünyanı öyrənməyə imkan verirdi. Persiya
hökmranlığı varlanmaq gətirirdi, lakin kök salmış adətlərdən imtina etməyi tələb
etmirdi. İndi isə vəziyyət başqa idi. Qərbdən hər şeyi udan alov gəlirdi.
Makedoniyalı gənclərlə dil tapmaq olardı, onlar şəraba və qadına həris idilər. Lakin
onlara başçılıq edən adam qorxulu idi. Hətta məlum deyildi ki, o, allahdır, ya
sehrbazdır. Bir də bu lovğa, çox bilmiş yunanlar. Onlar özləri ilə dərk olunmayan
bir şey gətirirdilər, Makedoniya çarını da öz torlarına salmışdılar. Bəlkə onlar
iranlıların da ruhunu və dinini oğurlayacaqlar. Bir sözlə İran mədəniyyəti özü
təhlükə altında idi.