10
həyatda rast gələcəyinə inanır, şirin xəyallar aləmiylə yaşayırdı... Axı, elə bir
oğlan hardasa var, sadəcə tanışmaq, ürcah olmaq, rast gəlmək tale məsələsidir.
Natəvandan sonra Fidanın ürək sirrini danışmağa rəfiqəsi yox idi, kiçik bacısı
ilə aralarında xeyli yaş fərqi vardı, qəlbini aça bilmirdi. Anasıyla bir-iki kəlmə
kəsən kimi söhbət gah hərlənib-fırlanıb ingilis oğlana ərə getməyə hazırlaşan
Natəvanın üstünə çıxır, gah da Fidanın varlı-karlı ailəyə gəlin getməyinin
üstünə. Açıq-aşkar ana qızını tezliklə ərə verməyə tələsdirirdi. Ona görə Fidanın
son vaxtlar anasıyla söhbəti tutmur, mövzusu sanki tükənmişdi.
Bişirdiyi isti qutabları Aynazla ərinə göndərəndən sonra anası ona yaxınlaşıb:
- Ay qızım, qadan alım, nigarançılığın nədir? Xəlvətə çəkilib öz-özünə nə
danışırsan? – deyə astaca soruşurdu. Fidan anasının bu gözlənilməz gedişindən
çaşıb qaldı, nə cavab verəcəyini bilmədi, elə bil hansısa bir xoşagəlməz iş
üstündə yaxalanmışdı. Gözlərini sevimli anasının baxışlarından yayındırmağa
çalışdı.
- Heç, heç ay ana, burda nə var, elə-belə bağ-bağçaya baxa-baxa fikrə
dalmışam.
Anası saçlarını sığallaya-sığallaya məni dilə tutdu:
- Ağıllı, qəşən balam, bəsdi göylərdə gəzib-dolaşdın, yerə enməyin, ətrafa
baxmağın vaxtıdı. Sən indicə nəsə danışırdın, mən pıçıltılarını eşidirdim, nə
dərd-sərin varsa, gəl məndən gizlətmə, aç ürəyini anana, bəlkə istədiyin var?
Fidan xəfifcə gülümsündü:
- Yox anam, mənim aşiq ola biləcəyim şəxs yoxdu. Özün də yaxşı bilirsən ki,
küçə iti kimi qızların arxasınca sülənən kəslərdən zəndi-zəhləm gedir. Axı, sən
özün də deyirsən, sevsəm də, məni elə-belə təsadüfi oğlana ərə vermək fikriniz
yoxdu.
- Ey, ay qızım, qız yükü, duz yükü: deyiblər, kaş, Allah qarşına halal süd
əmmiş birini çıxaraydı, bizim də yükümüz azalaydı. Onda təhsil haqqını
ödəmək bizə çətin gəlməzdi.
Fidan anasını qucaqladı:
11
- Darıxma ana, vədəsi var, çalışıb sizi bu qayğıdan qurtaracağam, inşallah.
Anası pörtmüş sifətində puçurlanan tər damcılarını önlüyünün ətəyi ilə silib
sözünə ara verdi:
- Bəlkə Natəvanla o ingilis gədəsinin eşq macərası barədə xəyala qapılmısan?
Özünü boş-boş yoranacan, rəfiqənlə barışsan, məsləhətdi. “Niyyətin hara,
mənzilin də ora” – deyiblər, ay qızım, sağ əli sənin başına. Allah bütün subay
qızları xoşbəxt eləsin, Natəvan da onların içində. Məncə, o qız ailəsini əzab-
əziyyətdən, maddi-mənəvi bataqlıqdan, kasıbçılıqdan qurtarmaq naminə
fədakarlıq edir. Təki Allah bu fədakarlığının əvəzini min qat artıq versin, çox
zirək qızmış, xoşbəxt olsun!
- Ana, öz işidi, mənə “nə istisi soyuğu”, başlama. Açma sandığı, tökmə
pambığı.
- Başlama, başlama, deyirsən, məgər özünü bu dünyanın adamı kimi
aparırsan, mən nəsə başlayım? Mən istəyirəm sən də yaxşı yerə gedəsən. Yağ-
bal içində yaşayasan, neynim, necə edim, deməyəsən, heç nədən korluğun
olmaya.
Natəvan söhbətin yaxşı nəticələnməyəcəyini bildiyi üçün anasının xətrinə
dəymədən aradan çırmaq istədi:
- Yaxşı, yaxşı, mən gedib imtahanlara hazırlaşım...
- Otur rahatca yeməyini ye, mənim o qədər iş-gücüm var ki... Atanın məxmər
pencəyini bayaqdan sabunlu islağa qoymuşam, gedim onu yuyum.
* * *
... Günlərin bir günüydü, adəti üzrə Fidan öz otağına çəkilmişdi. Yastığına
dirsəklənib yenə şirin xəyallara dalmışdı. Anası evdə yox idi, daha doğrusu, aşağı
mərtəbədə yaşayan qonşu qadınla həyətə enmişdi. Aynaz da bayırdaydı, öz tay-
12
tuşları ilə oynayırdı. Göldə həzin meh əsir, sakit hava hökm sürürdü. Kiçik
nəfəslikdən otağa daxil olan bayır havası pəncərənin tül pərdəsini asta-asta
yellədirdi. Fidan qəfildən öz-özünə səksəndi, ona elə gəldi ki, eyvanda kimsə
gəzişir, onun hərəkətlərinə göz qoyur, durub balkona baxdı, sonra nəfəsliyi
bağladı.
- Bəlkə nostalji duyğulardır, doğrudan da yanılıram, indi heç kəs xəyalında
nəzərdə tutduğu sevgiylə həyatda rastlaşmır, mənsə yarpaqlar titrəşəndə,
pəncərəmi xəfif meh döyəndə, elə bilirəm, bu odur, illərlə gözlədiyim şəxsdir,
oğlanın nurlu surəti böyür-başımda pərvaz edir, yağışın, küləyin diliylə mənə öz
məhəbbətini bəyan edir – deyə pıçıldadı. Sonra dərindən köks ötürdü, qəlbində:
“Yox, Fidan, yox, belə getsə, sən mütləq xəstəlik tapacaqsan. Bəlkə təcrübəli anam
haqlıdır, göydən yerə enib ətrafıma baxmalıyam, ya yox, axı həyatda gözlənilməz
hadisələr nə qədər desən olur.” – düşündü.
Gözlərini yumub heç nə, heç kim barədə düşünmək istəmirdi. Özünü əbəs yerə
“bəlkə”lərlə yorduğunu yaxşı başa düşürdü. Amma narahat qəlbi ilə bacara
bilmirdi. Ürəyə hökm etmək doğrudan da asan deyilmiş. Düşüncələr yenə onu
qoynuna alıb uzaqlara çəkib apardı...
Budur, telefonuna gələn səsli mesaj onu şirin-şəkər xəyallardan ayırdı. Barışmaq
naminə dəridən-qabıqdan çıxan Natəvanın kövrək səsiydi:
- Fida, sənə qurban, incikliyi bir yana burax, yaxında toyum olacaq, çox
istəyirəm, bu xoşbəxt anımda yanımda olasan, başımın üstündən atdığım gül
çələngini sən tutarsan...
Fidanın bütün vücudu oyandı, təsəvvüründə bir anlıq rəfiqəsini ağ gəlinlik
paltarında canlandırdı. O, xoşbəxtcəsinə hamıya xoş təbəssüm göstərir, Cekin
verdiyi gül dəstəsini “Vağzalı” sədası altında başının üstündən geri atırdı, bir dəstə
yeniyetmə qız onu tutmağa çalışsa da, gül dəstəsi axırda Fidanın qucağına düşürdü.
Bu hal həmişə təkrarlanır, sevinən məhz Fidan olurdu. Həyəcandan yanaqları od
tutub alışan qız nə edəcəyini bilmirdi. Bu dəfə elə bil qucağına bir dəstə köz
düşmüşdü. Amma bədənini bürüyən təravətli hərarətdən xoşhallanırdı, ətrafdakılar
Dostları ilə paylaş: |