40
“ASSOŞİEYTED PRESS” AGENTLİYİNİN MÜXBİRİNƏ MÜSAHİBƏ
15 avqust 2003-cü il
S u a l: Tamamilə aşkar bir məsələdir, seçkiqabağı kampaniya ərəfəsində hər bir kəs gözləyə bilər
ki, yeni prezident Siz olacaqsınız. Bunu çoxları gözləyir. Necə bilirsiniz, Azərbaycanın növbəti prezidenti
nə ilə qarşılaşmalı olacaqdır?
C a v a b: Bilirsinizmi, qarşıdakı seçkilər barədə çox müxtəlif informasiyalar yayırlar. Mən isə əminəm ki,
prezident Heydər Əliyev növbəti seçkilərdə iştirak edəcəkdir. O buna hazırdır. Prezident müalicədən sonra
qayıdacaq və seçkiqabağı kampaniyada iştirak etmək iqtidarında olacaq və seçkilərdə qalib gələcəkdir. Axı
ölkəmizin xalqı onu dəstəkləyir, ona inanır, fəaliyyətini layiqincə qiymətləndirir. Bu isə inanmağa əsas verir ki,
məhz Heydər Əliyev prezident seçiləcəkdir. Bundan əlavə, Prezidentin seçilməsinə yardımçı olmaq üçün bir
namizəd kimi mən də seçkilərdə iştirak etməyə razılıq vermişəm. Bu gün üçün planımız belədir.
S u a l: Siz namizədliyinizi geri götürmək fikrindəsinizmi? Əgər belədirsə, onda nə vaxt?
C a v a b: Bəli, belədir. Amma bunu nə vaxt edəcəyimi sizə deyə bilmərəm, çünki seçkiqabağı kampaniyada
iştirak etməliyəm. Müəyyən bir mərhələdə öz namizədliyimi geri götürməyi nəzərdə tuturam. Əminəm ki,
Prezident seçkilərdə iştirak edə biləcəkdir.
S u a l: Elə ola bilərmi ki, atanız öz namizədliyini Sizin xeyrinizə geri götürsün?
C a v a b: Bu mümkündür. Amma yalnız
o halda ki, Prezidentin səhhəti ona seçkilərdə iştirak etməyə imkan
verməsin. Şükürlər olsun ki, biz xəstəxanadan nikbin ovqat doğuran məlumat almışıq. Mən onunla dünən
danışmışam. Ümumiyyətlə, biz hər gün danışırıq. Vəziyyəti yaxşılaşır, ona görə də çox ümid bəsləyirik ki, o,
seçkilərdə iştirak edə biləcəkdir.
S u a l: Siz bölgələrdə seçkiqabağı kampaniyaya nə vaxt başlamaq fikrindəsiniz? Ən başlıcası, Siz
seçicilərə nə təklif edəcəksiniz?
C a v a b: Deməliyəm ki, seçicilər məni artıq neçə illərdir tanıyırlar. 1994-cü ildən mən ölkədə gedən bütün
ən mühüm iqtisadi və siyasi proseslərə cəlb olunmuşam. Bu vəzifəyə təyin edilməzdən əvvəl də mənim çoxlu
vəzifələrim vardı. Mən bölgələrə tez-tez gedirəm, ölkədəki vəziyyətə bələdəm və xalq məni tanıyır. Odur ki,
özümü təqdim etməyə elə bir ehtiyac yoxdur. Mən xalqın arasına çıxanda insanlara çatdırmaq üçün özümlə
ancaq bir müraciət götürəcəyəm – müraciətdə deyiləcək ki, gələcək inkişaf üçün prezident Heydər Əliyevin
apardığı siyasətin davam etdirilməsi son dərəcə vacibdir. Əgər bu siyasət davam etdirilməsə,
ölkə yenidən
anarxiya və qeyri-sabitlik həddinə gəlib çıxacaqdır. Əminəm ki, seçicilər bunu gözəl başa düşürlər. Bu, indiki
siyasəti davam etdirəcək hökuməti onların dəstəkləməsinin səbəblərindən biridir. Bu da çox vacibdir. Biz çox
layihələr həyata keçirməliyik, çünki Azərbaycan iqtisadiyyatı sürətlə inkişaf edir, demokratikləşmə prosesi
davam edir. Bütün bunlar dayandırılmamalıdır. Xalqa müraciətimin mahiyyəti də məhz bundan ibarətdir.
S u a l: Siz davam etdirilməli olan bütün müsbət hallardan danışırsınız. Amma cəmiyyətdə başqa
məsələlər də var. Ölkənizdə bəziləri müxalifətdədir və Sizin Baş nazir vəzifəsinə təyin olunmağınıza
müsbət yanaşmırlar. Necə bilirsiniz, prezidentin səlahiyyətlərini yerinə yetirməli olduğunuz bir vəziyyət
yaransa, onlar bunu sakit qarşılayacaqlar?
C a v a b: Düşünmürəm ki, onlar hər hansı ciddi addımlar atmaq iqtidarında olsunlar. Çünki əhalinin
əksəriyyəti bizi dəstəkləyir. Bu yaxınlarda aparılmış ictimai rəy sorğusu prezident Heydər Əliyevin və onun
siyasətinin hər yerdə dəstəkləndiyini təsdiqləmişdir. Bu cür sorğuları ABŞ təşkilatları da aparmışlar.
Bu gün Azərbaycanda müxalifət azlıqdadır. Onların iyirmidən çox partiyada təmsil olunmaqlarına
baxmayaraq, keçirdikləri müxtəlif mitinqlərə heç vaxt üç min adam da toplaya bilmirlər. Müxalifətçilər elə
təsəvvür yaratmağa çalışırlar ki, guya onların hansısa bir sosial bazası var. Əslində isə, belə bir şey yoxdur.
Onlar nə qədər can atsalar da, ölkədə vəziyyətin inkişafına təsir göstərmək iqtidarında deyillər və sabitliyin
pozulmasına səbəb ola bilməzlər. Müxalifətin cəmiyyətdə sosial gərginlik yaradacağı barədə sözləri, olsa-olsa,
təəssüf doğurur.
Məlumdur ki, bu adamların cəmiyyətə təklif edə biləcəkləri yeganə bir şey varsa da, o da
bunların cəmiyyətdə sabitliyi pozmağa çalışmasıdır. Lakin, əvvəla, onlar buna qadir deyillər, ikincisi isə, onlara
imkan verməzlər. Bugünkü müxalifəti təmsil edən adamlar 10 il əvvəl hakimiyyətdə olmuşlar. Onlar
hakimiyyətdə vur-tut bir il qala bildilər, nəticədə isə ölkəni anarxiyaya və vətəndaş müharibəsinə gətirib
çıxartdılar. Ona görə də xalq onlara inanmır. Üstəlik, on ildir müxalifətdə olan bu adamlar siyasi mübarizəni
sivil üsullarla aparmağı, hökumətlə ünsiyyətin yeni yollarını axtarmağı öyrənməmişlər. Əgər siz onların adlarına
diqqət yetirsəniz görərsiniz ki, onlar düşmənçiliyə üstünlük verirlər - məsələn, Xalq Cəbhəsi.
Ötən əsrin 90-cı illərinin əvvəllərində, əslində, bütün postsovet respublikalarında xalq cəbhələri yaradılmışdı.
İndi isə onlar, Azərbaycandan savayı, heç yerdə yoxdur. Yenə cəbhələr. Düşünürəm ki, daha bəsdir. Azərbaycan
sabit
iqtisadiyyata malik ölkədir, beynəlxalq birliyin bir hissəsidir, Avropa Şurasının üzvüdür, iri beynəlxalq
41
layihələrin iştirakçısıdır, NATO-nun “Sülh naminə tərəfdaşlıq” proqramının fəal üzvüdür, Avropa Birliyi ilə
yaxşı münasibətlərimiz var, daha yaxından inteqrasiya üçün bir sıra addımlar atmışıq. Biz, bir tərəfdən,
milyonlarla dollar sərmayə qoyulmuş Bakı–Tbilisi–Ceyhan beynəlxalq layihəsi kimi nailiyyətlərə malikik, digər
tərəfdən isə, belə maneələrlə üzləşirik. Zənnimcə, bəsdir. Xalq bundan nə qədər əzab-əziyyət çəkməlidir?! Biz
hamımız əminik və şəxsən mən də əminəm ki, indiki iqtidarın siyasəti əhali tərəfindən dəstəklənir, ona görə də
bu siyasət davam etdirilməlidir. Biz ölkədə vəziyyətin daha da yaxşılaşması üçün yorulmadan çalışacağıq.
S u a l: Sizcə, nəyisə təkmilləşdirmək lazımdırmı?
C a v a b: Çox şey. Mənə elə gəlir ki, başlanılmış olan
nə varsa, onların hamısı davam etdirilməlidir.
Məsələn, biz iqtisadi islahatlara başlamışıq, iqtisadiyyatın özəlləşdirilməsi və sərbəstləşdirilməsi proqramını
həyata keçiririk, sahibkarlar üçün yaxşı imkanlar yaradırıq. Bunların hamısı daha geniş miqyasda davam
etdirilməlidir. Hökumətin yardımı ilə qeyri-neft sektoru da inkişaf etməlidir.
Neft sektorundakı böyük nailiyyətlərimiz buna zəmin yaradır. Ümumiyyətlə, bəzi qonşu dövlətlərlə
müqayisədə, iqtisadi vəziyyət müsbətdir. Biz ÜDM-in təxminən 10 faiz artımına nail olmuşuq. Biz birbaşa
xarici sərmayələrin cəlb edilməsində liderik, əlverişli sərmayə mühiti yaradılmışdır, milyardlarla dollar
məbləğində sərmayələr var. Odur ki, bizə ancaq ən əsas məqsədimizə – əhalinin həyat səviyyəsinin
yüksəldilməsinə nail olmaq yolu ilə irəliləməyi davam etdirmək qalır. Bu, bir nömrəli vəzifədir.
S u a l: Əlbəttə, Dağlıq Qarabağ problemi indi, tezliklə, yaxud 2008-ci ildə seçiləcək prezident üçün
yenə də aktual olaraq qalacaqdır. Siz hesab edirsinizmi ki, bu münaqişənin həllinə imkan var?
C a v a b: Əlbəttə. Mən əminəm ki, bu münaqişənin həlli üçün bütün imkanlar var. Beynəlxalq birlik
regionda sülhün bərqərar edilməsində maraqlıdır. Amma sülh hər hansı faydanın olmasına və ya yoxluğuna
əsaslana bilməz. Əgər sülh tərəflərdən birini qane edirsə və digər tərəfin mənafelərinə ziddirsə, bu halda sülh
əldə oluna bilməz. Bu, mümkün deyildir. İlk növbədə, işğal edilmiş bütün ərazilər bizə qaytarılmalıdır, Dağlıq
Qarabağa dair ardıcıl danışıqlara artıq bundan sonra başlamaq olar. Ərazi bütövlüyümüz tanınmışdır,
pozulmazdır və məsələnin dincliklə həlli yalnız bu bəndlərə əməl edilməsi şərtilə mümkündür. Biz müharibədən
zərər çəkmişik, ərazimizin 20 faizi işğal edilibdir, ölkədə bir milyondan çox qaçqın-köçkün var. Lakin buna
baxmayaraq, Azərbaycanda iqtisadi inkişafda böyük tərəqqi əldə edilmişdir. Ərazilərimizi işğal etmiş
təcavüzkar ölkə olan Ermənistan isə dərin iqtisadi böhran keçirir. Əhalinin baş götürüb köçdüyü bu ölkədə
hökm sürən vəziyyətə nəzər salsaq görərik ki, burada iqtisadiyyat bərbaddır, ölkə tamamilə xarici yardımdan
asılıdır.
Bir sözlə, qoy onlar mövcud olmayan üstünlük barədə xülyalarla özlərinə təsəlli verməsinlər.
Azərbaycan isə, bir milyondan artıq əhalisinin qaçqın-köçkün vəziyyətində olmasına baxmayaraq, uğurlar
qazanır. Qeyd edim ki, hökumət onlara qayğı göstərir. Bir sözlə, nə qədər çox vaxt keçsə, ölkəmiz bir o qədər
güclü olacaqdır. Ermənistanın isə regional əməkdaşlıq olmadan iqtisadi inkişaf perspektivi yoxdur.
Dağlıq Qarabağ məsələsi həll edilməyincə, Ermənistanla hər hansı regional əməkdaşlıqdan söhbət gedə
bilməz. Bunda hər iki tərəf maraqlı olmalıdır. Əminəm ki, münaqişə tezliklə sülh yolu ilə həll ediləcəkdir.
S u a l: Siz Dağlıq Qarabağın müstəqillik statusuna malik olmasını fərz edə bilərsinizmi?
C a v a b: Əlbəttə ki, yox və yenə də yox! Dağlıq Qarabağ Azərbaycanın ayrılmaz tərkib hissəsidir.
Azərbaycan öz sərhədləri daxilində tanınmışdır. Biz Avropadakı dövlət quruluşlarını misal çəkə bilərik, axı bir
çox ölkələrdə muxtar vilayətlər var. Odur ki, biz məsələnin həlli yolunu yalnız bu istiqamətdə axtarmalıyıq.
Azərbaycanın ərazi bütövlüyü toxunulmazdır, üstəlik, daha bir erməni dövlətinin mövcud olması mümkün
deyildir. Ermənistanın irəli sürdüyü ideyalar bundan ibarətdir ki, guya Dağlıq Qarabağın əhalisi öz müqəd-
dəratını təyin etmək istəyir. Halbuki ermənilər öz müqəddəratını artıq müəyyən etmişlər, onların
müstəqil
dövləti var – Ermənistan Respublikası. Dünyada ikinci erməni dövləti ola bilməz, deməli, Dağlıq Qarabağın
müstəqilliyi yolverilməzdir. Dağlıq Qarabağ tarixən Azərbaycan ərazisidir və o, ancaq yüksək muxtariyyət
statusuna malik ola bilər. Biz öz mövqeyimizi dəfələrlə izah etmişik, o da bundan ibarətdir ki, biz Dağlıq
Qarabağa ən yüksək muxtariyyət statusu verməyə hazırıq.
S u a l: Azərbaycanın ən mühüm müttəfiqi kimdir?
C a v a b: Ən mühüm müttəfiqlərimiz, zənnimcə, Birləşmiş Ştatlar və Türkiyədir. Birləşmiş Ştatlarla çox
yaxşı münasibətlərimiz var və biz onunla energetika sahəsində sıx əməkdaşlıq edirik. Biz energetika
layihələrimizi məhz ABŞ-dan aldığımız dəstək sayəsində gerçəkləşdirə bilmişik. Biz İraqda müharibə zamanı
ABŞ-la koalisiyada da olmuşuq. Türkiyəyə gəldikdə, o, ən yaxın dostumuzdur, sıx siyasi, iqtisadi və mədəni
münasibətlərimiz və əlaqələrimiz olan ölkədir. Bütün bunlar hər iki ölkənin rifahına xidmət edir. Biz
qonşularımızla,
ilk növbədə, Rusiya ilə əməkdaşlığa da böyük diqqət yetiririk. Çox məmnunuq ki, son üç ildə
Rusiya ilə münasibətlərimiz yaxşılaşmışdır. Çox narahat idik ki, Rusiyanın əvvəlki rəhbərliyi Ermənistanı
birtərəfli qaydada dəstəkləyərək Dağlıq Qarabağ münaqişəsi məsələsində tarazlı siyasət aparmırdı. Lakin indiki
rəhbərliyin mövqeyi tarazlıdır. Biz münasibətlərimizi xeyli yaxşılaşdırmağa müvəffəq olmuşuq və bu faktdan
məmnunuq. İstərdik ki, yaxın qonşularımızın hamısı ilə yaxşı münasibətlərimiz olsun. Bilirsinizmi, mən misal
olaraq üç ölkənin adını çəkdim. Axı çox rəmzidir ki, bu yaxınlarda Ankarada olan Prezidentimiz həkimlərin