25%-ni təşkil edən iqtisadiyyatının dünya iqtisadiyyatındakı özünəməxsus rolundan (2007-ci ildə dünyanın ÜDM-u
55 trln. doll., ABŞ-m ÜDM-u isə 14 trln. doll. təşkil etmişdir) və Amerika dollarının dünya pul sisteminin hər
tərəfinə nüfuz edərək yayılması, dünyada xammal, enerji, hazır məhsul istehsalının xeyli hissəsinin Amerika
tərəfində istehlak olunması, dünya kapital bazarında bu ölkənin payının xeyli böyük olması ilə müəyyənləşir. ABŞ
dünya əmtəə bazarının 24%-ni təşkil edir, dünya təbii resurslarının 30%-dən 40%-ə qədərini istehlak edir.
İqtisadi böhran ABŞ-da daşınmaz əmlak alışının ipoteka kreditləşməsi sahəsində yarandı. XXI əsrin ilk
illərində ABŞ-nı ipoteka həyəcanı bürüdü əhali sərbəst pul yığımlarını daşınmaz əmlaka qoymağa üstünlük
verirdilər. Bazarda daşınmaz əmlakın qiymətinin sürətlə artdığı dövrdə ipoteka üzrə ev alınması çox sərfəlidir,
çünki müəyyən dövrdən sonra qiyməti qalxmış evi sataraq istənilən faizi artıqlaması ilə geri qaytarmaq olar.
Mənzillərin qiyməti hər il 15-20% artırdı. Əgər əvvəllər daşınmaz əmlak bazarında banklar kreditləri yüksək
səviyyədə etibar etdikləri müştərilərə verirdilərsə, sonradan bu tipli kreditlər ödəniş qabiliyyəti səviyyəsi yüksək
olmayan adamlara da verilirdi, bu da, şübhəsiz, iqtisadiyyatda bazar riskini artırırdı. Belə vəziyyət mənzil bazarında
"sabun köpükləri"nin meydana gəlməsinə böyük təkan verdi.
Daşınmaz əmlak bazarında qiymətlərin sürətlə artması şəraitində banklar borc alan müştərilərə tələbləri
azaltdılar, bu da borc götürənlərin gəlirləri ilə kifayət qədər təmin olunmayan "pis" kreditlərin payının artması ilə
nəticələndi. 2005-ci ildə ABŞ-da ilk dəfə ev alanların 43%-nin ilkin ödəniş etmək üçün öz vəsaiti olmayıb. Müxtəlif
təbliğat yolları ilə insanları ev almaq üçün kredit götürməyi təklif edənlər, nəticə etibarı ilə daşınmaz əmlak
bazarında daha çox insanı cəlb etməyə və onları bazarda sövdələşmə apararaq hay-küylü tələb yaratmağa məcbur
etməyə yönəldilmişdir. Lakin məlum deyil ki, eyni vaxtda hamı oyuna qoşulduqdan sonra yeni tələb haradan
yaranacaq və onu əvvəlki səviyyədə saxlamaq mümkün olacaqmı. Əlbəttə ki, yox. Bu hal, istənilən bazarda sabun
köpüyü məsələsinin inkişafının klassik sonudur.
2006-cı ildə ABŞ-da satılmamış evlərin sürətlə artması ipoteka bazarında vəziyyəti mürəkkəbləşdirdi.
Bazarda daşınmaz əmlaka kütləvi tələbin olmaması mənzil satanları tədricən iştahalarını azaltmağa məcbur etdi və
qiymətlər birdən-birə düşməyə başladı. Artıq 2006-cı ildə ABŞ-da riskli ipoteka kreditinin həcmi 600 mlrd. dolları
ötmüşdür ki, bu da bütövlükdə ipoteka bazarının 20%-ni təşkil edir. Bütövlükdə ödənilməmiş riskli ipoteka
kreditinin həcmi 1,3 trln. Dollara çatmışdır.
Ipoteka böhranı kimi başlayan böhran qısa zaman kəsiyində maliyyə böhranına çevrildi. Çevrilmə mexanizmi
aşağıdakı kimi olmuşdur. Etibarsız borc alanlardan kreditləri geri ala bilməyən Amerika bankları yeni kreditlər verə
bilmədi. Ləğvliyə tələbat duyan banklar bir-birlərindən borc götürməyə başladılar. Bundan əlavə, ipoteka
kreditlərinin verilməsi zamanı sənədləşdirilən girov kağızları əsasında banklar ikinci qiymətli kağızlar (derivativlər)
buraxdılar, bunlar da bütün dünyada banklar tərəfindən alınırdılar. Beləliklə, ABŞ-da yaranmış ipoteka böhranı
maliyyə böhranına çevrilərək onun hüdudlarından kənara çıxdı və tədricən bütün dünyanı əhatə edərək dünya
iqtisadi böhranı formasını aldı.
Böhranın nədən baş verdiyi haqqında iqtisadi nəzəriyyədə vahid fikir yoxdur. Bir qrup mütəxəssisin fikrincə,
kapitalizm böhransız olmur; başqalarının fikrincə, böhran yaxşılaşdırılmış kapitalizmdə aradan qaldırıla bilər;
üçüncü qrup isə hesab edir ki, azad bazar şəraitində böhran ümumiyyətlə ola bilməz. İqtisadi nəzəriyyədə bu
mövzu ətrafındakı mübahisələrdə çoxlu fikir ayrılıqları vardır. Amma bu yerdə göstərilən iqtisadi fikirlərin üç əsas
nümayəndəsinə Karl Marks, Con Keyns və Milton Fridmana müraciət edək.
Marksa görə, istehsaldakı tənəzzüllər kapitalizmin özünün təbiəti ilə şərtlənir və buna görə də müntəzəm
vaxtaşırılılıqla hər 8-10 ildən bir təkrarlanır. Daha geniş baxımdan Marks onları aşağıdakı kimi nəzərdən keçirirdi:
(a) kapialist iqtisadiyyatının tsiklik təkrar istehsalının böhran fazaları; (b) kapitalizmin istehsalın bütün cəmiyyət
üzvləri tərəfindən həyata keçirilməsindən, onun ləzzətli bəhrələrinin isə nisbətən kiçik qrup xüsusi mülkiyyətçi
tərəfindən mənimsənilməsindən ibarət əsas ziddiyyətinin təzahürü.
Marks deyirdi ki, kapitalizm gəlir dalınca qaçanda bir-birinə zidd iki cür hərəkət edir. O, bir tərəfdən əmtəə
istehsalı və təklifini artırır, digər tərəfdən isə əməkhaqqının və bununla da tələbin artmasının qarşısını alır. Başqa
sözlə, kapitalizm istehsalla əhalinin gəlirləri arasında disproporsiya yaradır və nəticədə əmtəələrin bazarda satıla
bilməyəcəyi bir məqam gəlib çatır. Böhran məhz budur. Bir halda ki, kapitalizm belədir, Marks deyirdi,
kapitalizmdən qurtarmayıncayadək böhranlardan qurtarmaq olmaz.
Con Keyns məsələnin izahına tamamilə başqa cür yanaşıb. O göstərirdi ki, böhranlardan qurtarmaq üçün
kapitalizmdən imtina etmək deyil, onun fəaliyyət göstərmə üsulunu, mexanizmini dəyişmək lazımdır. 1929-33-cü
illərin "Böyük durğunluğ"undan xeyli əvvəl yazdığı əsərində («End of laissez faire») o sübut edirdi ki, azad bazar
gəlir bölgüsündəki qeyri-bərabərliyi təhlükəli həddə çatdırır və buna görə də kortəbii fəaliyyət göstərən bazardan
tənzimlənən bazara keçməyi təklif edirdi. Amma təəssüf ki, böhran baş verməyənə qədər buna fikir verən olmadı.
Böyük durğunluq hakimiyyətdəkiləri hərəkətə gətirdi. Bunun təsiri altında Keynsin 1936-cı ildə çıxan o biri kitabı
«Məşğulluğun, faizin və pulun ümumi nəzəriyyəsi» çox nadir bir təqdirlə qarşılandı. Kitab belə qarşılanmağa layiq
idi, çünki o, iqtisadçıların, dövlət xadimlərinin və sahibkarların təsərrüfatın aparılması üsullarına dair bir çox
baxışlarını əsaslı surətdə alt-üst etdi. Ədalət naminə qeyd etmək lazımdır ki, Keynsdən bir neçə il əvvəl, sonra isə
onunla paralel həmin ideyaları sonradan onların hətta daha ardıcıl yürüdücüsü kimi tanınan Polşa iqtisadçısı Mixail
Kaletski də inkişaf etdirmişdi. Amma bu yanaşma keynsçi kimi məşhurlaşdığından biz də hər iki mütəfəkkirin irsini
nəzərdə tutaraq onu keynsçi adlandıracağıq.