Öz orijinal yanaşmasını inkişaf etdirən Keyns eyni zamanda o dövrdə əsas olan və monetarizm adı altında
məlum olan xüsusi kapitalizm iqtisadiyyatının özünütənzimləmə nəzəriyyəsini inkar edirdi. Keyns hər şeydən öncə
«görünməz əl» ideyasını tənqid edirdi ki, həmin nəzəriyyəyə görə, bazar o qədər ağıllı və yaxşıdır ki, rəqabət yolu
ilə avtomatik olaraq resursların bölgüsü, insanların tam məşğulluğu təmin olunur, hər bir istehsal amili isə (birinci
növbədə əmək və kapital) əldə olunmuş nəticəyə tam müvafiq olaraq ədalətli mükafatlandırılır. İqtisadiyyatı
müvazinətə yaxınlaşdıraraq bazar sanki hər kəsin rifahının yaxşılaşdırılmasına aparır («Pareto üzrə optimalhq»). Bu
konsepsiyada böhrana tamamilə yer yoxdur. Keyns bu əsassız fikirləri rədd edirdi. Keyns, kapitalizmin son nəticədə
onu böhran vəziyyətinə gətirib çıxardan əsas qüsurlarını bilavasitə göstərmişdi. O yazırdı ki, «Bizim yaşadığımız
iqtisadi cəmiyyətin ən böyük qüsurları onun tam məşğulluğu təmin edə bilməməsi, həmçinin sərvət və gəlirlərin
ixtiyari və ədalətsiz bölgüsüdür» [4].
Keyns və Kaletski nəzəriyyəsi də böhranın nəticələrini zəiflətməyə yönəldilmişdir. Onlar bu məqsədlə
kifayət qədər geniş elmi anlayışlar işləyib hazırlamışdılar ki, məhz onların köməkliyi ilə iqtisadi artımın nədən asılı
olduğunu göstərmişdilər. Bu, öz növbəsində məşğulluq səviyyəsi və investisiyaların həcmindən asılı olan məcmu
tələb və məcmu təklifdir. Belə asılılıqlar şkalasının yaradılması artımı stimullaşdırmaq və deməli, tənəzzülün
qarşısını almaq üçün nəyə və necə təsir etməyin müəyyənləşdirilməsi üçün hədsiz dərəcədə vacib idi.
Bu sxemdə əsas məqam əhalinin məşğulluğunun və gəlirinin artması çıxış edir ki, bu da bölgü və istehlakdakı
qeyri-bərabərliyin azaldılmasına aparır. Amma varlılarda istehlaka meyil daha yüksək olduğundan, bu, məcmu
tələbin artmasına səbəb olur və məcmu təklif də (istehsal) buna uyğunlaşır. Keyns hər şeyi bazarın öhdəsinə
buraxmayıb, iqtisadiyyata dövlət tənzimləməsi metodları ilə təsir etməyi təklif edir. O, hər şeydən əvvəl məşğulluğu
artırmağı və kreditin faiz dərəcəsi aşağı olduqca sahibkarı daha çox maraqlandıracaq investisiyaları
stimullaşdırmağı nəzərdə tuturdu. Buna görə də o, növbəti addım kimi yüksək sahibkar fəallığım stimullaşdıran
aşağı faiz dərəcəsi uğrunda çıxış edirdi və bunu iqtisadi artımın əsas mühərriki qismində görürdü.
Keçən əsrin 40-60-cı illərində keynsçi ideyalar geniş tanındı və öz tətbiqini tapdı. Onların əsasında Qərb
ölkələrinin və Yaponiyanın iqtisadiyyatında görünməmiş yüksəliş oldu ki, buna görə də həmin dövr yüksək iqtisadi
artım tempi ilə səciyyələnən kapitalizmin «qızıl dövrü» adını aldı. Keynsçi tənzimləmə məqsədilə kapitalizm həm
də sosializmin müəyyən cizgilərini mənimsəməyə başladı. İqtisadiyyatın sosializmə xas olan daimi, fasiləsiz artımı
olmasa da və tənəzzül fazaları daha tez-tez baş versə də, onlar daha dərin olmurdular; məşğulluq sosializmdəki kimi
ümumi olmasa da, o qeyri-adi yüksək dərəcədə saxlanılırdı. Əhali gəlirinin artması zəminində onun orta təbəqəsinin
nisbəti artdı və məcmu tələbinin artırılması iqtisadi artımı stimullaşdırdı.
Nəticədə isə əvvəllər olmayan, hazırda isə «keynsçi ümumi rifah dövləti» adlanan anlayış yarandı. Elə
təəssürat yarandı ki, dövri tənəzzüllər keçmişin xoşagəlməz təsadüfləridir və «böhran» anlayışı «resessiya» anlayışı
ilə əvəz edildi. C. Soros göstərir ki, «1950-ci illərdə mən London iqtisadi məktəbində oxuyanda, sanırdıq ki, laissez
faire (dövlətin müdaxilə etməməsi) prinsipi biryolluq dəfn olunub. Amma o, 1980-ci illərdə yenidən dirçəldi» [5].
1970-ci illər üçün dünya iqtisadiyyatında çox uzaq gedən nəticələri olan iki iri dəyişiklik baş verdi. Birincisi
iqtisadiyyatın ağırlıq mərkəzinin real bölmədən maliyyə bölməsinə dəyişməsindən, ikincisi isə bir sıra hallarda
beynəlxalq arenanın millidən daha vacib olmasından ibarət idi. Bu tələblərə azad bazar nəzəriyyəsi (laissez faire)
keynsçilikdən daha çox uyğun gəlirdi, çünki keynsçilik, birincisi, iqtisadiyyatın real bölməsinin nəzəriyyəsi,
ikincisi, onun milli hüdudlarda tənzimlənməsi üçün idi. O dövrdə iqtisadiyyatda keynsçi nəzəriyyənin daşıyıcısı
qismində Henri Ford çıxış edirdi. O çalışırdı ki, fəhlələri o qədər qazansınlar ki, onun maşınlarını alsınlar. Bazar
fundamentalizmi nəzəriyyəsinin yenidən dirçəlməsinin carçısı Milton Fridmanın başçılıq etdiyi Çikaqo məktəbi,
onun praktik ifadəsi isə reyqanomika və tetçerizm oldu. Bu nəzəriyyənin simvolu onun ən qatı tənqidçisi, real
əmtəələr, əşyalar istehsal etməyən, amma fond birjalarında möhtəkirikdən çoxlu milyardlar qazanmış Corc Sorosu
hesab etmək olar.
Kapitalizmin mahiyyətindəki dəyişikliyi Fridman çox qabarıq şəkildə özünün məşhur «money is matter»
(məsələ puldadır) formulunda vermişdi. Hazırda varlanmağın əsas mənbəyi qismində iqtisadiyyatın real deyil,
azadlığı çox olduqca, uğuru da çox olan maliyyə bölməsi çıxış edir. 70-ci illərdə bazar azadlıqlarının xeyli
genişləndirilməsi üçün tədbirlər göstərilmişdi: valyutaların təsbit olunmuş kursundan sərbəst üzmə adlandırılana
keçid; əmtəə, kapital və işçi qüvvəsinin hərəkəti yolundakı milli maneələrin azaldılması; geniş maliyyə vasitəçiləri
sisteminin yaradılması; banklara əsas fəaliyyətləri ilə yanaşı həm də kommersiya fəaliyyəti ilə məşğul olmaq
imkanının verilməsi və s. Bu tədbirlərin hər biri maliyyə möhtəkirliyi üçün yeni imkanlar açıldığından intensiv
surətdə cəmiyyəti getdikcə böhrana yaxınlaşdırırdı.
Bununla bağlı hazırda tez-tez səsləndirilən sualı verək: bəs elə etmək olardımı ki, böhranlar olmasın?
Kapitalizmin təbiəti elədir ki, o, böhranları tam istisna etməyə imkan vermir. Bununla belə, müharibədən sonrakı ilk
onilliklərin təcrübəsi göstərir ki, onları keynsçi tənzimləmə metodları vasitəsilə zəiflətmək tamamilə mümkündür.
Onlardan imtina və azad bazar məntiqinə riayət etmək cəmiyyəti böhrana sürüyüb.
Bunu ABŞ-da böhranın detonatoru olmuş derivativlərin timsalında nəzərdən keçirək. Hələ bu yaxın vaxtlara
qədər yalnız iqtisadçı-mütəxəssislərə məlum olan bu məfhum hazırkı böhranın simvolu olmuşdur. Bu, təminatçısı
qismində borc öhdəlikləri çıxış edən maliyyə alətləridir. Məsələn, siz ev almaq üçün bankdan kredit götürürsünüz
və bank qarşısında öhdəlik qoyursunuz ki, bütün məbləği faizləri ilə birgə 20-30 ilə ödəyəcəksiniz. Sizin
götürdüyünüz öhdəlik bank tərəfindən qiymətli kağızlar bazarında satılan yeni borc öhdəlikləri buraxmaq üçün