1957-1958-ci illərin müharibədən sonrakı ilk böhranı inkişaf etmiş sənaye ölkələrinin hərbi iqtisadiyyatından, sosial
problemlərin həllini önə çəkən sülh tipli iqtisadiyyata keçidin baş verdiyini göstərdi. Ötən əsrin ikinci yarısının ən
dərin böhranı olan 1974-1975-ci illərin böhranı müxtəlif dövlətlər arasında iqtisadi fəaliyyətin beynəlxalq
tənzimlənməsi mexanizmlərinin yaradılmasını tələb etdi. 80-90-cı illərin sonrakı dünya böhran hadisələri dünya
iqtisadi inkişafının postsənaye cəmiyyətinin qurulduğu və qloballaşma prosesinin genişləndiyi yeni mərhələyə
keçidini təsdiqlədi. Yerindəcə qeyd edək ki, keçən əsrin 20-ci illərində meydana gələn N.D. Kondratyevin və onun
ardıcıllarının konyunkturanın uzun dalğalarına həsr olunmuş nəzəriyyələri on doqquzuncu əsrdə dünya
böhranlarının maddi əsasını hər 8-10 ildən bir əsas kapitalın tsiklik yeniləşmə dalğaları ilə deyil, hər bir böhranın
iqtisadi-texnoloji quruluşlarının dəyişmələri ilə əlaqələndirilməsi xüsusi əhəmiyyət kəsb edir.
Müasir dünya böhranını ümumi qiymətləndirmək üçün onun üç əsas cəhətini fərqləndirmək lazımdır.
Birincisi, bu böhran qlobal kapitalizmin dünya sosialist sisteminin dağılmasından sonra baş vermiş ilk dünya
böhranıdır və onun sistem tərəfini səciyyələndirir. Bu baxımdan onu yüksək xarici siyasi və iqtisadi ziddiyyətlərin
kəskinləşməsi katalizatoru olan qloballaşma böhranında əks olunan yeni növ böhran kimi müəyyənləşdirmək
lazımdır. XX əsrin sonu XXI əsrin əvvəllərində milli iqtisadiyyatların və regionların qlobal iqtisadiyyatın
prinsiplərinə əsaslanan ümumi asılılığı yarandı, dünya iqtisadiyyatının koordinasiyasının yeni mexanizmlərinin
elementləri (beynəlxalq təşkilatlar və institutlar) formalaşdı. İnformasiya cəmiyyətinin formalaşması, transmilli
kapitalın yeni rolu qloballaşma prosesini kəskin sürətləndirdi. Müasir qlobal münasibətlər sisteminin yaranmasında
maliyyə kapitalı və maliyyə bazarları xüsusi rol oynamışlar. Maliyyə kapitalının öz təbiətinə görə, onun milli
sərhədləri sərbəst keçə bilmək qabiliyyətinə görə o, bir tərəfdən, qloballaşmanın potensialı, digər tərəfdən isə milli
iqtisadiyyatların ziddiyyətlərinin və münaqişələrinin bir ölkədən digərinə sürətlə ötürülməsi kanalı oldu. Müasir
dünyanın qloballaşması şəraitində sistemin "xəstələndiyi" təqdirdə maliyyə kapitalı böhranı ani olaraq bütün
dünyaya yayılmağa başladı. Beləliklə, hazırkı böhran qlobal dünyanın birinci dünya böhranı və ya maliyyə
kapitalının xüsusi rolu olmaqla qlobal iqtisadi böhrandır.
İkincisi, hazırkı böhran qlobal liberalizm modelinin böhranı kimi çıxış edərək müasir dünya təsərrüfatı
quruluşunun fundamenal əsaslarının və hakim liberal iqtisadi nəzəriyyələrin dağılmasını göstərir.
Son zamanlar cəmiyyətin iqtisadi inkişafının alternativ iqtisadi konsepsiyaları və onlara uyğun inkişaf
modelləri geniş müzakirə edilir. Bununla əlaqədar, Dzarasov S.S. Kembric universitetinin professoru Devid Leynə
istinad edərək kapitalizmin iki modelini fərqləndirir. Bunlardan birini "liberal-bazar iqtisadiyyatı", digərini isə
"koordinasiya olunmuş (və ya təşkil olunmuş) bazar iqtisadiyyatı adlandırır [9J. Liberal model anqlo-sakson
cəmiyyətində tətbiq olunur ABŞ, Böyük Britaniya, Kanada, Avstraliya və Yeni Zelandiya. Burada firmalar
iqtisadiyyatın bütün sahələrində öz fəaliyyətlərini əsas indikatorlar olan qiymət siqnallarının, tələb və təklifin
əsasında qururlar. Bu cür iqtisadi sistem qiymətli kağızlar bazarının yüksək kapitallaşmasına, məşğulluğun müdafiə
olunmasının aşağı olmasına, yüksək əməkhaqqı dərəcəsinin və gəlirlərdə xeyli bərabərsizliyin olmasına əsaslanır.
İqtisadiyyat fond bazarları vasitəsilə birləşmə və udma ilə, həmkarlar təşkilatlarının zəif və əməyin müdafiəsinin
aşağı olması ilə səciyyələnir.
İkinci növ iqtisadiyyatda firmalar qeyri-bazar əlaqələri vasitəsilə koordinasiya olunur. Onlara xüsusi
informasiya mübadiləsinə əsaslanan monitorinq şəbəkəsi və şirkətlər arasında əməkdaşlıq (rəqabətə girməmək
haqqında) münasibətləri daxildir. Bu iqtisadi sistemə nümunə olaraq Almaniyanı, Danimarkanı, Fransanı və
Yaponiyanı göstərmək olar. Onlar məşğulluğun müdafiəsinin yüksək səviyyəsi, iş saatlarının nisbətən az olması və
gəlirlər arasında bərabərsizliyin aşağı səviyyəsi ilə seçilir. İqtisadiyyatda birinin digərini udması təsadüfi xarakter
daşıyır və həmkarlar təşkilatlan işçilərin əmək mənafelərini müdafiə edir. Şirkətlərin fəaliyyəti firmaların üfüqi və
şaquli assosiasiyası ilə koordinasiya olunur.
Neoklassik
nəzəriyyəyə
uyğun
bazarın
liberal
modelinin
məqsəd
funksiyası
mənfəətin
maksimumlaşdırılmasıdır. Kapitalizmin bütün infrastrukturu, dövlətin və cəmiyyətin institutları, hüquq və etik
normalar, kütləvi informasiya vasitələri, hətta kolleclərin və universitetlərin tədris planları bu məqsədə nail olmağa
yönəldilmişdir. Yaponiya iqtisadiyyatına gəldikdə isə tamam başqa mənzərə alınır. Təkcə ömürlük işlə təmin
olunma nəyə desən dəyər. O, əmək bazarında rəqabəti aradan götürür, hansı ki, bunsuz Qərb kapitalizmi mövcud
ola bilməz. Yaponiyada əməkhaqqının səviyyəsi yaşla, şirkətdə iş stajı ilə, işçinin ailə və sosial vəziyyəti ilə
müəyyən olunur. Bütün bunlara bənzər hallar Qərbdə yoxdur. Yapon iqtisadiyyatının artımının əsas mənbəyi
dövlətin iqtisadiyyatı səmərəli idarə etməsindədir. Daha cəlbedici iqtisadiyyatın Çin plan-bazar modeli görünür. Çin
iqtisadiyyatı mənfəətin əldə olunmasına deyil, əhalinin rifahının yüksəldilməsinə yönəlib. Bir sözlə, iqtisadiyyatın
hansı növünə diqqət yetirsək, aydın olar ki, yalnız neoklassik modelin məqsəd funksiyası mənfəətin
maksimumlaşdırılmasıdır. Digərləri ondan uzaqlaşmağa çalışaraq, ilk növbədə, sosial xarakterli problemlərin və
iqtisadi münasibətlərin tənzimlənməsini irəli çəkirlər. Belə zərurət daha çox postkeynsçi konsepsiyada
əsaslandırılır, hansı ki, ön planda mənfəətin əldə olunması deyil, tam məşğulluğun təmin olunması və iqtisadiyyatın
davamlı artımı məqsəd qoyulur.
Beləliklə, bütün bunlar müasir böhran dövründə dövlətin iqtisadiyyata müdaxilə etməsinin zəruri olmasını
əsaslandırır, belə olduğu halda, onda onu inkar edən neoklassik nəzəriyyənin və bazar özünütənzimləmə modelinin
iflasa uğramasını qəbul etmək, onun keynsçi nəzəriyyə və dövlətin tənzimləyici rolu modeli ilə əvəz olunmasını
qəbul etmək lazımdır.