qiymətlərin düşməsi ilə həll olunmur) böhranının mümkün olmasını göstərir.
Əmtəə-təsərrüfat sistemində böhranların mümkünlüyünün daha geniş imkanı pulun meydana gəlməsi, onun
tədavül və ödəmə vasitəsi kimi funksiyalarının yerinə yetirilməsi ilə bağlıdır. Əmtəə tədavülünün Ə-P-Ə müstəqil
iki hissəyə bölünməsi formal olaraq böhranların meydana gəlməsi üçün şərait yaradır. Əmtəə tədavülünün Ə-P və
P-Ə kimi iki hissəyə bölünməsi, yəni ayrıca alıram və ayrıca satıram, onların zaman və məkanda üst-üstə
düşməməsinə imkan yaradır. Əmtəələrin reallaşması prosesində fasilələr yaranır. Əmtəə mülkiyyətçisi öz əmtəəsini
satandan sonra başqa əmtəə almaya da bilər. Bu əmtəələrin hərəkətində fasiləsizliyi pozur, bu da böhranın başlanma
imkanlarını göstərir. Pulun ödəmə vasitəsi funksiyasına gəldikdə isə burada əmtəə alıcıya istifadə etmək üçün eyni
zamanda pula ödəniş olmadan, yəni kreditə verilir. Müqavilə vaxtı çatanda pullar əmtəə sahibinə ödənilməlidir.
Əmtəə haqqının belə ödənilməsi prosesində kredit müqaviləsinin vaxtında yerinə yetiriləcəyinə və pulların satıcıya
veriləcəyinə tam təminat yoxdur. Pullar inkişaf edərək və onlar tədavül və ödəniş vasitəsi funksiyaları kəsb etdikcə,
alqı-satqı əməliyyatlarının zaman və məkanda bir-birindən uzaqlaşması potensialı get-gedə daha çox qaydaya
çevrilir. Əmtəələrin realizasiya probleminin, ümumiyyətlə bazar iqtisadiyyatının və o cümlədən kapitalist
istehsalının ən mühüm problemlərindən biri kimi, sadəcə müəyyənliyi belə yaranır. Kapitalizm şəraitində kiminsə
həmişə pulu çatışmır, kimsə heç də həmişə əmtəəsini sata bilmir və orada və həmin məqamda, haradasa və nə
vaxtsa müəyyən şərtlərə səbəb pul istəyən, amma onu (heç olmasa ucuz kredit şəklində) əldə edə bilməyən əmtəə
sahiblərinin kütləsi böhranlı olur və bu yerdə ifrat istehsal böhranı baş verir. Orada və həmin məqamda bu əmtəə
sahibləri (müasir dildə desək, biznesmenlər) hökumətdən ucuz kredit və subsidiyalar tələb etməyə başlayırlar.
Kredit zəminində kredit verən və borc götürənlərin olduqca mürəkkəb qarşılıqlı münasibətləri yaranır,
müxtəlif "piramidalar" qurulur və fərz etsək ki, maliyyə aktivlərinin sahibləri onları dərhal istənilən formada olan
real kapitala çevirmək istəsələr, o, əlbəttə ki, çatmaz. Kredit əsasında ola bilər ki, borc götürənin müəyyən
səbəblərdən ödəmə məqamı üçün sadəcə olaraq lazımi məbləği olmasın. Bir yerdə ödənişin həyata keçirilməməsi
bir-biri ilə kredit münasibətləri ilə bağlı bazar subyektləri arasında başqa ödəmələrin həyata keçirilməməsinə səbəb
olur. Kredit öz təbiəti etibarilə iqtisadiyyatda saxta tələb yaradır ki, bunun da nəticəsində təkrar istehsal real tələb
hədlərindən kənara çıxır. Kredit tələbi hansısa anda qırıla bilər və bu zaman real tələblə istehsal arasındakı əlaqə
böhran vasitəsilə bərpa olunur. Zahiri olaraq kredit böhranı arxasında faktiki olaraq təkrar istehsal böhranı durur.
Buna görə də kredit münasibətləri zəminində həmişə "maliyyə" böhranı imkanı mövcuddur. Nəzəriyyədə bu, qeyd
etdiyimiz kimi, hətta pulun adicə ödəmə vasitəsi kimi təhlilindən də məlumdur. Kredit-bank sisteminin, saxta
kapitalın və kapital bazarının yaranması və inkişafı bu imkanı xeyli gücləndirir və maliyyə böhranı ehtimalını xeyli
artırmış olur.
Müasir bazar iqtisadiyyatında pulun təbiətində ciddi dəyişikliklər baş verir. Dünya birliyi ölkələrinin
həyatındakı rolunun hədsiz dərəcədə artdığını nəzərə alaraq, pul əvvəlki ənənəvi funksiyalarını yerinə yetirməklə
yanaşı, müasir dövrdə pul V.T. Ryazanovun fikrincə "özü artan universal dəyərə" çevrilmişdir [12]. Bu dünyanın
aparıcı valyutalarının timsalında daha səciyyəvidir. Bu keyfiyyətdə pullar onların yerinə yetirdikləri adi
funksiyalardan başqa ən likvidli aktiv qismində çıxış edərək xüsusi faydalıq kəsb etmişlər. Özü də belə faydalıq
iqtisadiyyatın bütün subyektləri üçün əhəmiyyətlidir.
Əslində pulun təbiətində baş verən bu kimi dəyişikliklər elə bir prinsipial yenilik deyil. Bununla əlaqədar, K.
Marks tərəfindən işlədilmiş "kapitalın ümumi formulu" kateqoriyasına müraciət etmək və ya pulu tədavül aləti və
dəyərin saxlanılması qismində nəzərdən keçirən, pulun istifadə edilməsində möhtəkirlik motivinə xüsusi diqqət
yetirən C. Keynsi yada salmaq yerinə düşərdi. Pulun təbiətinin nisbətən yeniliyi onun özü artan mexanizminin
fəaliyyətinin qeyri-məhdud olmasında və onun həqiqi iqtisadi nemətlər istehsalı üçün istifadə olunan kapitala
çevrilməməsindədir. Belə vəziyyət praktiki olaraq pul tədavülü ilə iqtisadiyyatın real bölməsi arasında dərin
uçuruma səbəb olmuşdur. Hazırda dünyada bütün maliyyə əməliyyatlarının cəmi 2-3%-i iqtisadiyyatın real
bölməsinə aiddir, qalanları isə maliyyə institutlarının özləri arasında olan əməliyyatlardır. Bu, müasir bazar
iqtisadiyyatında pulun möhtəkirlik amilinin rolunun sürətlə artmasına bariz nümunədir.
Müasir dövrdə nəinki pulun özü, hətta real iqtisadi nemətlər neft, qaz, torpaq, daşınmaz əmlak və s.
möhtəkirlik alətinə çevrilmişdir. Məsələn, neft bazarında hazırda neft fyuçerlərinin həcmi real neft satışından 20
dəfə çoxdur, halbuki 1990-cı illərin əvvəlində belə üstələmə beşqat idi. Bu o deməkdir ki, neftin qiymətlərinin
dinamikası və səviyyəsi bazarda formalaşan tələb və təklifin nisbətindən deyil, möhtəkirlik qüvvələrinin
hərəkətlərindən aslıdır.
Qlobal kapitalizm dövrünə keçidin qanunauyğun nəticəsi iqtisadiyyatda maliyyə sisteminin aparıcı olmasıdır.
Məsələn, ABŞ-da ölkənin ÜDM-nun yaradılmasında maliyyənin payı sənayenin payından azı iki dəfə çoxdur.
İnkişaf etmiş ölkələr qrupunda maliyyə xidməti göstərilməsi sahəsində əmək qabiliyyətli əhalinin 20%-i çalışır.
Maliyyə sahəsinin aparıcı fəaliyyət göstərən və qeyri-məhdud həcmdə maliyyə resursları yaratmaq imkanı olan
qlobal şəbəkəyə çevrilməsi məhdud resurslar zəminində və əsasən milli təkrar istehsal çərçivəsində inkişaf etməkdə
davam edən istehsaldan təhlükəli ayrılmaya səbəb olur. Maliyyə kapitalizminin müasir modelinin əsas ziddiyyəti,
V.T. Ryazanovun fikrincə, məhz burada yaranır.
Maliyyə sahəsinin yüksəlməsinin digər mühüm nəticəsi sosialist sisteminin iflasından sonra dünyanın
təsərrüfat quruluşunda müəyyən ciddi dəyişikliklərin olmasıdır. Ona birqütblü dünya və ikiqütblü dünya təsərrüfat
sistemi kimi baxmaq olar. Birinciyə ABŞ-ın hərbi-siyasi hökmranlığı, ikinciyə isə dünyanın iki təsərrüfat