39
yaranması ilə müşayiət olunurdu. Kəşf edilən torpaqlardan Avropaya külli
miqdarda qızıl və gümüş gətirilmişdi. XVI əsrdə Avropanın qızıl ehtiyatları
təqribən 550 min kiloqramdan 1192 min kiloqramadək, gümüş ehtiyatları
isə 7 milyon kiloqramdan 214 milyon kiloqramadək artmışdı. Bu,
qiymətlərin kəskin surətdə yüksəlməsinə, yaranmaqda olan burjuaziyanın
zənginləşməsinə və muzdlu işçi qüvvəsinin yoxsullaşmasına gətirib
çıxarırdı. Pul rentası alan feodalların da vəziyyətinin pisləşməsi onların
sənaye fəaliyyətinə keçməsinə səbəb oldu. Kilsə mülkiyyətinin müsadirəsi,
əmək etikasının möhkəmlənməsi ilə müşayiət olunan islahatlar kapitaldan
daha səmərəli istifadə olunması üçün imkanlar açırdı.
Məcmu məhsuldar kapitalın, sərvətin strukturunda da dəyişikliklər
baş verirdi. Əgər XI-XIII əsrlərdə məhsuldar qüvvələr əsasən canlı əmək
sayəsində möhkəmlənirdisə, XVI əsrdən onun əsas kapitalla əvəz olunması,
məhsuldar qüvvələrin maddi-əşya komponentlərinin artımı başlandı. Bu
zaman insan amilinin və nəqliyyat vasitələrinin enerji potensialının yüksək
templərlə artımı məhsuldar qüvvələrin inkişaf səviyyəsinin bütövlükdə
yüksəlməsi üçün şərait yaradırdı.
1000-1300-cü illərdə Şimali-Qərbi Avropada ÜDM-in adambaşına
düşən həcmi 50-60%, 1300-1500-cü illərdə 5-10%, 1500-1800-cü illərdə
45-50% artmışdı.
Əhalinin hər nəfərinə düşən gəlirlərin məbləği barədə məlumatlar
XV əsrdə Qərbi Avropa ölkələrinin aparıcı Şərq ölkələrindən geridə
qalmasının mümkün olduğunu göstərir. 1980-ci ilin nisbi qiymətləri ilə
1490-1500-ci illərdə müvafiq göstərici Çində 550-600 dollar, Fransada
təqribən 450-490 dollar, Florensiya Respublikasında isə 1420-ci ildə 440-
470 dollar təşkil edirdi. XVI əsrin əvvəlində ÜDM-in adambaşına düşən
məbləği 500-550 dollar, Niderlandda isə 1/3 hissə qədər artaraq, 650-770
dollar olmuşdur.
XV əsrin ikinci yarısından başlayaraq, Qərbi Avropa inkişafda Şərq
ölkələrinə çatmağa başladı. Qərbin ümumi məhsulunun adambaşına düşən
həcmi ilə Çinin müvafiq göstəricisi arasında bərabərlik, çox güman ki, XVI
əsrin ikinci yarısında əldə olunmuşdur. Hesab edilir ki, Qərb nisbi inkişaf
səviyyəsinə görə Şərq ölkələrini 1571-ci ildən, ispan donanmasının yardımı
ilə Venesiya Respublikasının türkləri Lepanto döyüşündə məğlub etdikdən
sonra ötməyə başlamışdır. Başqa qiymətləndirmələrə görə, Qərbi Avropa
Çinin səviyyəsini 1500-cü illərə yaxın dövrdə ötüb keçmiş və həmin
zamandan etibarən texnika və iqtisadiyyatın inkişafında aparıcı yer
tutmuşdur.
40
________________________________________________
Kapitalist istehsal üsulunun təşəkkül tapması
XVI əsr Qərbin iqtisadi tarixində dönüş dövrü olmuşdur: işçinin
zorla istehsal vasitələrindən ayrılması, kəndlilərin torpaqdan qovulması,
müstəmləkə qarətçiliyi ilə müşayiət olunan ilkin kapital yığımı - başlandı.
Bu vaxta qədər sənayenin inkişafında ciddi nailiyyətlər əldə edilmişdi.
Sənayenin yüksəlişi toxuculuqdan başladı. Bu yüksəlişdə iqtisadi və mədəni
həyatın transformasiyası, habelə məhsuldar qüvvələrin təşkili ilə bağlı olan
daxili amillər mühüm rol oynayırdı. Əvvəlcə Florensiyada, sonra isə
İngiltərədə yun parça istehsalında əməyin bölgüsünə və əl alətlərindən
istifadəyə əsaslanan, əmək məhsuldarlığını emalatxanalarla müqayisədə
kəskin yüksəltmək imkanı yaradan müəssisələr: manufakturalar - inkişaf
etməyə başladı. Bu müəssisələr iş prosesini bir-birini avtomatik surətdə
təkrarlayan sadə, eyni əməliyyatlara çevirdi.
İri istehsalı kifayət qədər sərbəst işçi qüvvəsi olmadan təşkili etmək
mümkün deyildi. Sənətkarlar və kəndlilər sex quruluşu və qeyri-iqtisadi,
şəxsi məcburiyyət üsulu ilə saxlanılırdılar. Bunun üçün xırda istehsalçını
istehsal vasitələrindən, ilk növbədə isə kəndlini torpaqdan ayırmaq lazım
olduğuna görə, icma torpaqlarının zorakılıqla tutulmasına və kəndlilərin
hətta pay torpaqlarından köçürülməsinə başlandı.
Qərb ölkələri kapital yığımını və dünyadakı iqtisadi mövqelərinin
möhkəmlənməsini sosial-iqtisadi dəyişikliklərlə yanaşı müharibələr,
müstəmləkələrin zəbt olunması, qul alveri, dəniz quldurluğu hesabına həyata
keçirirdi. İspan müstəmləkəçiləri Latın Amerikasını ələ keçirərək, yerli
əhaliyə amansız zülm edir və bir sıra hallarda onu tamamilə məhv edirdilər
(Yamayka). XVII əsrin əvvəllərində 2 milyona yaxın həm köçəri, həm də
oturaq həyat tərzi keçirən hindunun yaşadığı Şimali Amerika da bundan
fərqlənməyən zorakılıqla müstəmləkəyə çevrilmişdi.
Hindu qəbilələrini məhv edən müstəmləkəçilər Amerika üçün işçi
qüvvəsinin yeni mənbəyi kimi, nəzərlərini Afrikaya yönəltdilər. XVI əsrdə
kapitalist istehsal üsulu üçün mühüm hadisə olan qul ticarəti başlandı.
Qullardan istifadə ilə əlaqədar olaraq plantasiya təsərrüfatları yaradıldı.
Qiymətləndirmələrə görə, 1870-ci ilədək Amerikaya Afrikadan 10 milyona
yaxın qul gətirilmişdi. Qərbi Avropa qul ticarətindən külli miqdarda vəsait
qazanırdı. Təkcə 1680-1775-ci illərdə britaniyalılar Afrikadan Qərbi
Hindistana 3 milyona yaxın adam köçürmüşdü. Amerikaya gətirilən hər bir
qul tacirə 3000% həcmində gəlir verirdi.
Bəzi Qərb ölkələrinin (Britaniya, İspaniya, Fransa, Hollandiya)
mühüm gəlir mənbəyi dəniz quldurluğu idi.
Müstəmləkə əraziləri xarici iqtisadi qarətçiliyin obyekti idi.