21
ortaya qoydu, onun yeni erasının başlandığını şeiriyyəti ilə
göstərdi. Bir növ güllərin, çiçəklərin təravətindən, bulaqların
həzinliyindən, dağların əzəmətindən qaynaqlanıb boy göstərən
və etnos ruhunda bütövləşən milli poeziya qanadını nümayiş
etdirməklə, “gərək fars dilində yazsın sənətkar” düşüncəsini
alt-üst etdi, daha doğrusu, tarixin arxivinə gömürdü. Dədə
Qorquddan, Yunis Əmrədən, Qaracaoğlandan, Dadaloğlundan,
Qurbanidən, Molla Qasımdan gələn ənənənin əzəmətini ortaya
qoydu. Türk şeir ruhunun müstəsnalığını bütün tərəfləri ilə
göstərdi. Son olaraq “hər oxuyan Molla pənah olmaz” məsələni
xalqın yaddaşına yazdı.
Bu məsəl xalqın düşüncəsindən, Molla Pənah Vaqifin
saray mühitində və ondan kənarda yaddaşlara hopmuş
böyüklüyünün, şair və şəxsiyyət nüfuzunun nümunəsidir.
Azərbaycan xalqının zəngin şifahi düşüncəsində özünə yer alan
rəngarəng folklor örnəkləri, nəğmə, bayatı, atalar sözü, məsəl,
rəvayət, nağıl, dastan nümunələri vardır ki, onlar zaman-zaman
yaddaşlarda qəlibləşmiş və əvəzsiz örnək kimi yaşamaq
hüququ qazanmışdır. Məhz bunun bir kəlam olaraq meydana
çıxması və yaşamı özlüyündə M.P.Vaqiflə bağlı olanları
yaşatmaq və gələcəyə daşımaq məqsədini ortaya qoyur. Şairin
etdikləri müqabilində təbii olaraq meydana çıxmışdır. Bunun
bir tərəfində M.P.Vaqifin ucu-bucağı görünməyən istedadı
dayanırsa, digər tərəfində şəxsiyyət olaraq böyüklüyü, fərqli
keyfiyyət xüsusiyyətləri durur. “XVIII əsr şeirinin hər iki
səciyyəvi qolunu: klassik şeiri və aşıq tərzini üzvü şəkildə öz
yaradıcılığında birlşədirən sənətkar Molla Pənah Vaqifdir.
Vaqif Azərbaycan poeziyasına yeni nəfəs, yeni üslub
gətirmişdir; Vaqif şeirindəki forma axtarışları, hisslərin
22
təbiiliyi, obrazların rəngarəngliyi, dil zənginliyi indi də öz
əhəmiyyətini saxlamaqdadır.
Vaqif XVIII əsr poeziyasınınən qüdrətli nümayəndəsi
olmaqla bərabər, onun yaradıcılığı dövrün ruhunu daha aydın,
daha səciyyəvi şəkildə əks etdirir. Məhəbbət lirikasına
gətirilmiş yeni xallar, əlvanlıq ilk növbədə Vaqifin adı ilə
bağlıdır. Vaqif şeiri və xüsusilə onun məhəbbət lirikası
Azərbaycan ədəbiyyatı tarixində diqqətəlayiq bir faktordur”
(32, 67). M.Y.Qarabağinin, A.Berjenin, M.M.Nəvvaın,
M.Müctəhidzadənin, M.Camalın, H.Ə.Qiabovun, S.Mümtazın,
F.Köçərlinin, H.Araslının və başqalarının mülahizələrində
Vaqif bir sənətkar kimi Azərbaycan ədəbiyyatı tarixində
mərhələ olaraq vurğulanır. Əlbəttə mərhələ olmanın və bu
düşüncənin ortaya qoyulmasının ciddi, həm də köklü səbəbləri
vardır. Əlavə edək ki, reallıq Azərbaycan ədəbiyyatının
mövcud zamana qədər klassik ənənəyə, ərəb və fars dilli qolun
inkişafına və əsas olaraq götürülməsinə hesablanırdı. Çünki
orta əsrlərin keşməkeşləri ərəb və fars dilində yazmanı bir
zərurət kimi ortaya qoymuşdu. Və onu da vurğulayaq ki,
kifayət qədər güclü baza yaradılmışdı. Demək olar bu
ədəbiyyat aparıcı istiqamət olaraq yüz illər boyunca ədəbi
prosesin əsas xəttinə çevrilmişdi. Əruz vəznində yazıb-yaratma
ənənəsini güclü tərəf olaraq ortaya qoymuşdu. Divan
ədəbiyyatı adında bir düşüncə, təsəvvür formalaşdırmışdı.
Onun enerji qaynaqları isə islam mədəniyyətindən, Qurandan,
dini elmlərdən, islam mifologiyasından, Şərq fəlsəfəsindən,
Şərq əsatir və əfsanələrindən, tarixi hekayətlərdən gələnlərlə
bağlı idi. Bütünlükdə ərəb və farsdilli ədəbiyyat bu düşüncəyə
köklənmişdi. Ucu-bucağı görünməyən zənginlikdə klassik
ədəbiyyat adında fundamental bir xəzinə özünə yer alırdı.
23
Burada Musa Şəhavət, İsmayıl ibn Yəsar, Mənsur Təbrizi,
Xəttat Nizam Təbrizi, Zəfər Həmədani, Əbülməhasim Təbrizi,
İskafi Zəncani, Qətran Təbrizi, Xətib Təbrizi, Ömər Gənci,
Qivami Mütərizi, Eynəlqüzzat Miyanəçi, İzəddin Şirvani,
Fələki Şirvani, Mücirəddin Beyləqani, Xaqani Şirvani, Məhsəti
Gəncəvi, Nizami Gəncəvi, Zülfüqar Şirvani, Hümam Təbrizi,
Arif Ərdəbili, Əssar Təbrizi, Mahmud Şəbustəri, Qazi
Bürhanəddin, Xəlili, Kişvəri, Həbibi, Məhəmməd Füzuli,
Məhəmməd Əmani, Saib Təbrizi, Məsihi, Fədai, Qövsi Təbrizi
və s. kimi böyük bir şairlər nəsli yer alır. Onlar öz yaradıcılığı
ilə nəinki Azərbaycan ədəbiyyatını, bütünlükdə Şərq
ədəbiyyatını zənginləşdirmiş, yaradıcılıqları ilə bu xəzinəyə bir
əsrarəngizlik qatmışlar. Bir növ bədii düşüncənin imkanlarını
genişləndirmişlər. Əlbəttə bu sənətkarların yaradıcılıq
qaynaqları öz mahiyyəti, nitq etiketləri, struktur komponentləri,
sintaktik fiqurların müxtəlifliyi ilə diqqəti cəlb edir. Bütün bu
inkişaf tendensiyasında, ənənə ilə özünəməxsusluğun bir-birini
tamamladığı mühitdə yeni bir düşüncə müstəvisində mühitə
daxil olmaq və bütün sərhədləri parçalayaraq özünü ortaya
qoymaq elə də asan məsələ deyildir. Çünki mövcud inkişaf
özlüyündə qəlibləşmiş bir yaradıcılıq mühitini müəyyənləş-
dirmişdi. Bundan sonra isə daha çox zəifləmiş, bir qədər də
arxa plana keçirilmiş olanın qayıdışı böyük istedad, qeyri-adi
qabiliyyət tələb edirdi. M.P.Vaqif istedadı bu sərhədlərin,
mövcud sxem və klişelərin aparıcılığında sıxışdırılmış xalq
poeziya ənənənlərinə yeni yaşam verdi. Bir növ onun
imkanlarının sonsuzluğunu, türk şeir ruhunun, xalq şeir
ənənəsinin, qopuzdan, sazdan süzülüb gələn milli dəyər və
yaddaşın imkanlarını öz istedadı ilə bir daha ortaya qoydu.
Türk şeir düşüncəsinin, nitq janrlarının, saz musiqisinin
Dostları ilə paylaş: |