Mehman Süleymanov
90
müdafiəsiz idi. Verilən vədlərə baxmayaraq rus qoşunları komandanlığı
xanlığın qorunması üçün hələ də xanlıq ərazisinə kifayət qədər qüvvə
göndərməmişdi. Bundan başqa rus zabitləri hələ Qarabağın yerli silahlı
dəstələri üçün mövcud olan azuqə və yemə də göz dikmişdilər. Belə bir
şəraitdə İbrahim xan da müvafiq siyasət yeritmək məcburiyyətində qa-
lırdı. Xüsusilə də 1806-cı ilin yazında şah qüvvələrinin yenidən Qarabağ
xanlığına hücuma hazırlaşması xəbərləri İbrahim xanı ciddi seçim qarşı-
sında qoydu. Qarabağ xanlığını 1805-ci ilin yayında şah qüvvələri
tərəfindən törədilmiş talanlardan xilas etmək, bunun nəticəsi kimi
qıtlığın, aclığın vüsət almasına yol verməmək üçün İbrahim xanın rus
qüvvələrinə ümidi yox idi. Çünki rus qüvvələrinin buna imkanı yox idi.
Sisianovun ölümündən sonra onun yerini tutacaq bir şəxsin Rusiya sarayı
tərəfindən müəyyənləşdirilməməsi isə bütünlükdə Rusiyanın Azərbaycan
xanlıqları ilə bağlı siyasətinin gələcəyi suallar doğururdu.
1806-cı ilin yazında şah qüvvələrinin Qarabağa yenidən hücum
edəcəyi real xarakter aldı. Bu dövrdə İbrahim xanın rus hərbçiləri ilə
münasibətləri xeyli gərginləşdi. Rus tarixçisi N.Dubrovin ilkin
mənbələrdən geniş istifadə etməklə yazdığı əsərində İbrahim xanla
münasibətlərin gərginləşməsini onun şah himayəsini qəbul etməyə meylli
olması ilə əlaqələndirirdi. Müəllif bildirir ki, İbrahim xan Rusiya
təbəəliyini qəbul etmək barədə müqaviləyə imza atsa da, fars meylliliyini
saxlayırdı. Xüsusən, xanlığın işlərinə rusların müdaxilə etməsi guya onun
Rusiyaya münasibətini dəyişmişdi. Onun yazdıqlarına görə, İbrahim xan
şah taxt-tacının şahzadəsi Abbas Mirzə ilə tez-tez əlaqə saxlayır və
onunla gizli yazışma aparırdı. Onların arasındakı bu əlaqələr, habelə
Abbas Mirzə elçilərinin tez-tez İbrahim xanın yanına gəlməsi isə rusların
xoşuna gəlmirdi. Guya İbrahim xan Abbas Mirzəyə göndərdiyi və ruslar
tərəfindən ələ keçirilən məktublarının birində Rusiya təbəəliyini qəbul
etdiyinə görə onu bağışlamağı xahiş edir və vəd edirdi ki, əgər ona şah
qüvvələri yardım edərsə rusları çox qısa zaman ərzində Qarabağ torpaq-
larından çıxarmaq mümkündür. Qarşılıqlı münasibətlərin yaxşı-
laşdırılması xatirinə guya İbrahim xan öz iki qızını Fətəli şahın
oğlanlarına ərə verməyə hazır olduğunu da bildirmişdi (101).
Farsdilli mənbələr də İbrahim xanın ruslar tərəfindən qətlinin
səbəblərinə toxunarkən bir-birindən fərqli olan versiyalar irəli
sürülmüşdürlər. Hər halda bu mənbələrdə İbrahim xanda rus təbəəliyinə
qarşı bir nifrətin yarandığı və bu təbəəlikdən qurtulmağın yeganə yolu
kimi Qacar sarayına müraciət edilməsi öz əksini tapmışdır. “Məəssər-e
Soltaniyyə”dəki məlumatlara görə, Sisianovun qətlindən sonra İbrahim
xanda Qacar sarayına müraciət etmək meyli daha da gücləndi. Çox
Gülüstan müqaviləsi
91
güman ki, İbrahim xan Sisianovun qətlə yetirilməsindən sonra Rusiyanın
Cənubi Qafqazdakı gücünün zəifləyəcəyi qənaətinə gəlmiş və ona görə
də Qacar sarayı ilə münasibətlərə yenidən baxmaq məcburiyyətində
qalmışdı. Bildirilir ki, bundan sonra İbrahim xan öz nümayəndələrini şah
sarayına göndərdi. Fətəli şah Qarabağ xanının bu mövqeyini razılıqla
qarşılayaraq onunla yeni münasibətlər qurmağa hazır olduğunu bildirdi.
Bu xəbəri alandan sonra İbrahim xan öz nümayəndəsini Ərdəbildə olan
Abbas Mirzənin yanına göndərdi və Abbas Mirzədən xahiş olundu ki,
Əbülfət ağanı silahlı dəstə ilə Qafan istiqamətində, Fərəculla xan
Şahsevəni isə Çanaxçı yolundan Qarabağa göndərsin. Əbülfət ağa və
Fərəculla xan Qarabağa doğru hərəkətə başlayaraq Araz çayı kənarında
düşərgə saldılar. Burada Əbülfət ağaya xəbər çatdı ki, Cəfərqulu bəy
İbrahim xanın Qacar sarayı ilə əlaqələrinin genişləndirilməsi haqqında
rusları məlumatlandırıb və İbrahim xan da ailəsi ilə birlikdə ruslar
tərəfindən qətlə yetirilib (102).
Mirzə Məhəmməd Sadıq Vəqayeneqar isə əsərində İbrahim xanın ailə
üzvləri ilə birlikdə qətlə yetirilməsini ruslar tərəfindən törədilən kütləvi
qətl kimi dəyərləndirirdi. Mirzə Məhəmməd Sadıq da İbrahim xanda
rusların sədaqətinə və etibarına inamsızlıq yarandığını yazırdı. Müəllifə
görə, İbrahim xan “Rusiya ilə saziş bağlanmasını hər vətənpərəstin
şərəfinə zidd əməl” kimi qəbul etdi. Bildirilir ki, İbrahim xan nəvəsi
Cəfərqulu bəyin yanında Abbas Mirzə ilə düşmənçilik xəttini tutmaqdan
peşman olduğunu və onunla barışıq niyyətində olduğunu bəyan etmişdi.
Müəllifə görə, Cəfərqulu bəy Qarabağ xanlığının Rusiya nəzarətindən
kənarlaşmasını istəmirdi. Bunu müəllif Cəfərqulu bəy ilə bir erməni qızı
arasındakı eşq macərası ilə əlaqələndirirdi. Müəllifə görə, Cəfərqulu bəy
bilirdi ki, ruslarla münasibətlər gərginləşsə, Tiflisdə yaşayan həmin
erməni qızı ilə daha əlaqə saxlaya bilməyəcəkdir. Adı çəkilən müəllif öz
əsərində Cəfərqulu bəyin tanışı olan erməni qızı məkrli bir insan kimi
təsvir etmişdir. Bir sözlə guya Rusiyadan uzaqlaşmaq istəməyən
Cəfərqulu bəy İbrahim xanın Qacar sarayı ilə yaxınlaşması haqqında
ruslara məlumat çatdırdı və ruslar da İbrahim xanın bu əməlinə görə onu
ailəsi ilə birlikdə qətlə yetirdilər (103).
Rus tarixçilərinin iddiasına görə, İbrahim xanın rus təbəəliyindən üz
çevirməsi Fətəli şah tərəfindən böyük məmnunluqla qarşılandı. Fətəli şah
hətta Qarabağa, İbrahim xanın köməyinə hərbi dəstə göndərməyi, ona
120 min rubl maliyyə vəsaiti ayırmağı və Qaradağı Əbülfət ağanın
idarəçiliyinə verməyi vəd etdi. Belə vədləri alandan sonra İbrahim xan
guya mayor Lisaneviçin müdaxilələrinə dözmədiyi üçün Şuşa qalasında
qala bilməyəcəyini bəhanə edib qala kənarında çadır qurdu və ailəsi ilə
ora köçdü.