Mehman Süleymanov
80
Rəssam F.Rubonun rəsmi" Canlı körpü. Polkovnik Karyaginin
1805-ci ildə Muxrata səfərinin epizodu"
Gülüstan müqaviləsi
81
Abbas Mirzə isə Sisianovu bir qədər də irəli çəkərək onu döyüşə cəlb
etmək istəyirdi. Ruslara vurulmuş bu zərbə Abbas Mirzə tərəfindən
sevinclə qarşılandı və döyüşün nəticələri haqqında məlumat Fətəli şaha
da çatdırıldı. Fətəli şah bu xəbəri “Təxti-Tavus” adlandırılan
məntəqədəki düşərgəsində aldı və Tərtər ətrafındakı döyüşün iştirakçıla-
rının mükafatlandırılması haqqında fərman verdi (82).
General Sisianovun təsvirinə görə isə iyul ayının 14-də dəstəsi ilə
Tərtər çayına yaxınlaşdıqda qarşı tərəfdə Qacar qoşunlarının atlı dəstəsi
göründü. Onun fikrincə, Qacar dəstəsi qarşı tərəfdə otlaq əraziləri
yandırmaq istəyirdi. Bunu görəndə Sisianov yasovul Frolov adlı birisinə
göstəriş verdi ki, kazak dəstəsi ilə Tərtər çayının qarşı sahilinə adlasın və
od vurulmuş ərazilərdə yanğını söndürsün və orada mövqe tutsun.
Sisianovun məlumatına görə, Qacar atlılarının sayı 2 minə çatırdı. Tərtər
çayının qarşı tərəfində Qacar atlıları ilə kazak dəstəsi arasında döyüş baş
verdi. Döyüşün nəticələri də onun xeyli gərgin keçdiyini deməyə əsas
verir. Bu döyüşdə ruslardan 12-si öldürüldü, 4 nəfər yaralandı və 4 nəfər
də itkin düşdü. İtkin düşənlər heç şübhəsiz ki farsdilli mənbələrdə
göstərilən əsirlər idi. Sisianova görə, Qacar atlıları geri çəkilmək
məcburiyyətində qaldılar. Frolovun rəhbərliyi altında olan dəstənin qarşı
tərəfdə əlverişli mövqelər tutması isə qalan dəstənin təhlükəsiz şəkildə
Tərtəri adlamasına şərait yaratdı (83).
İyul ayının 15-də Sisianov dəstəsi ilə irəliyə doğru hərəkətini davam
etdirdi. 13,5 verst yolu keçdikdən sonra Sisianovun dəstəsi dağıdılmış
Mardəşti kəndi yaxınlığında düşərgə saldı. Sisianov bu məntəqəni xüsusi
olaraq seçdi. Bu məntəqə polkovnik Karyaginin də hərəkət marşrutu
üzərində idi. Burada dayanmaqla general Sisianov polkovnik Karyaginin
dəstəsinin onun dəstəsinə birləşməsini asanlaşdırmaq istəyirdi. Bu hadisə
iyulun 16-da baş verdi. Polkovnik Karyagin Qacar qoşunlarının hücumla-
rından və təzyiqlərindən nicat taparaq, nəhayət ki, rus qüvvələrinə birləşə
bildi. Polkovnik Karyaginin dəstəsi əldən düşdüyü üçün mühafizə
qrupunun müşayiəti altında Gəncəyə yola salındı. Sisianovun yazdığına
görə, iyulun 17-də İbrahim xandan Qarabağ ərazisində olan Fətəli şahın
yenidən Arazın cənubuna çəkilməsi haqqında məlumat aldı. Guya Fətəli
şahın geri çəkilməsinə səbəb də Sisianovun qoşun dəstəsi ilə Qarabağa
doğru irəliləməsi olmuşdu (84).
Sisianov iyul ayının 17-də heç bir təhlükə ilə qarşılaşmadığını
bildirirdi. Amma həmin gün Qacar qüvvələri Sisisnovun dəstəsini
dövrələyərək Gəncə şəhəri ətrafına çıxmış və burada ruslarla döyüşə
qatılmışdılar. Rus mənbələrində və tarixi ədəbiyyatında olan məlumata
görə, Abbas Mirzə 25 min nəfərlik qoşunla Gəncə üzərinə hücum etdi
Mehman Süleymanov
82
(85). Abbas Mirzənin qoşun dəstəsinin sayı haqqında göstərilən bu rəqəm
elə də inandırıcı görünmür. Tərtər çayı kənarında dayanan Sisianovun
nəzarətindən kənar 25 minlik qoşunun Gəncə istiqamətinə ötürülməsi elə
də asan deyildi. Hər halda iyul ayının 17-də Abbas Mirzənin qüvvələri
Gəncə ətrafında idilər. Qacar qoşun dəstəsinin yetişməsi rus işğalından
cana doymuş yerli əhalinin sevincinə səbəb oldu və yerli əhalinin xeyli
nümayəndəsi ruslarla mübarizə aparmaq üçün Qacar qoşunlarına
qoşuldular. Rusiya işğalına qarşı üsyan qaldıran Şəmşəddil əhalisinin bir
hissəsi də Qacar qoşunlarına qoşuldular. Gəncə ətrafında yaşayan
ermənilər isə rusların ağır vəziyyətə düşməsini görərək Gəncəyə, onların
yardımına yollandılar. Yerli əhalinin də kömək etdiyi Qacar qüvvələri
Gəncəni mühasirəyə aldılar. İyul ayının 18-də Gəncəyə gedən içməli
suyun qarşısı kəsildi. Rus tarixi ədəbiyyatında olan məlumata görə,
Abbas Mirzə və onun yanında olan gürcü şahzadəsi Aleksandr Qazax
əhalisinə müraciət edib onları da ruslara qarşı mübarizəyə səslədilər.
Bildirilir ki, Qazax əhalisi Qacar qoşunlarına qoşulmaqdan imtina etdilər.
Sisianov Qarabağa doğru hərəkətə başlayanda mayor Koçiyev adlı
birisini Gəncədə qalan rus qoşun dəstəsinin komandiri təyin etmişdi.
Mayor Koçiyev heç bir yerdən kömək almayacağı üçün ixtiyarında olan
qüvvələrlə Qacar qoşunlarına müqavimət göstərməyi qərara aldı. İyul
ayının 19-da mayor Koçiyev 200 silahlı və 50 kazakdan ibarət bir dəstəni
bir topun müşayiəti ilə qaladan kənara çıxardı ki, Abbas Mirzənin
dəstəsini şəhər ətrafından uzaqlaşdırmağa cəhd göstərsin. Ruslara 300
nəfərlik erməni dəstəsi də köməklik edirdi. Sisianovun yazdığına görə,
azərbaycanlı əhali də ruslara qarşı fəal şəkildə döyüşürdü. Onların sol
cinahda əzmkarlıq göstərməsi Qacar qüvvələrinin Gəncədən uzaqlaşdırıl-
masını müəyyən qədər ləngitdi. Göstərilən müqavimət nəticəsində hər
halda ruslar Abbas Mirzənin dəstəsini şəhərdən uzaqlaşdırılmasına nail
oldular. Bununla belə, ruslar 3 nəfər itirdilər və onlardan 7 nəfəri isə
yaralandı. Sisianovun fikrincə, Abbas Mirzənin Gəncə üzərinə hücum
etməsi Cavad xanın oğlu Uğurlu xanın ruslara qarşı apardığı işlərin
nəticəsi idi (86).
General Sisianov Qacar qoşunlarının Gəncə-Şamxor ətrafında
toplaşmasından xəbər tutsa da, Qarabağdakı vəziyyəti nəzarətdən kənar
qoymamaq üçün geri qayıda bilmədi. Onun geri qayıtması Qarabağ
xanlığının tamamilə Qacar qüvvələrinin nəzarəti altına keçməsi ilə
nəticələnə bilərdi. Gəncə istiqamətində isə Abbas Mirzənin dəstəsi iyulun
23-də yenidən ruslarla döyüşə girdi. Həmin gün Tiflisdən Gəncəyə ərzaq
karvanı gəlirdi. Bu ərzaq karvanını 2 ədəd topa malik olan 300 nəfərlik
rus qoşun dəstəsi müşayiət edirdi. Gəncə şəhərinin 47 verstliyində,