Gülüstan müqaviləsi
119
olmayacaqdı. Ona görə, Sisianovun qənaəti belə idi ki, Şəkinin ən
nüfuzlu beş bəyinin uşaqlarının girov götürülməsi ilə Şəki əhalisinin
ictimai fikrini də nəzarət altında saxlamaq olardı (23).
Səlim xanın Rusiyaya bağlılığını artırmaq üçün o da Sisianov
tərəfindən general-leytenant rütbəsinə təqdim edildi. İmzalanmış
müqaviləyə əsasən, Şəki xanının hakimiyyəti də kifayət qədər
məhdudlaşdırılırdı. Siyasi baxımdan varislik saxlansa da, xanlar Rusiya
imperatoru tərəfindən təsdiqlənməli idi. Şəki xanının qonşu xanlarla,
Qacar sarayı ilə bütün təmasları Sisianovun razılığı ilə baş verməli idi.
Sisianovun icazəsi olmadan Şəki xanı qonşu hakimlərlə hər hansı bir
razılaşmaya getməyə haqqı yox idi. İqtisadi baxımdan isə ilk növbədə
Rusiya xəzinəsi üçün müəyyənləşdirilmiş vəsait ödənməli idi.
Müqavilənin imzalanmasından sonra onun müəyyən şərtlərinin, o
cümlədən də Şəki xanlığı ərazisində rus qoşun dəstəsinin yer-
ləşdirilməsinin icrasına başlandı. Şəkiyə yerləşdiriləcək qoşun dəstəsinə
mayor Rebinder adlı birisi rəhbərlik etməli idi və ona tapşırıldı ki, qoşun
dəstəsinin yerləşdirilməsi üçün qala tikintisinə başlasın. Səlim xan rus
qolun dəstəsi üçün Böyük Dəhnə və Kiçik Dəhnə kəndləri yaxınlığında
qala tikilməsi üçün yer ayırdı. Lakin bu yer mayor Rebinderi qane
etmədi. Onun fikrincə, qala tikiləcək yerdə əlverişsiz coğrafi şərait, otlaq
sahələrinin olmaması və su ehtiyatlarının azlığı rusların vəziyyətini çətin-
ləşdirə bilərdi. Bölgənin təhlilini aparandan sonra mayor Rebinder qoşun
dəstəsinin Ərəş qalasında yerləşdirilməsini təklif edirdi. Ərəş qalası Bakı
ilə Gəncə arasındakı yolun təhlükəsizliyinin də təmin edilməsinə imkan
verirdi. Bundan əlavə, mayor Rebinder təklif etdi ki, əlavə olaraq
Mingəçevir və Kürəkbasanda kazak postları qurulsun (24).
Şəki xanı, Şəki bəyləri və Şəki ruhaniləri rus qoşun dəstəsinin Ərəş
qalasında yerləşməsinə razı deyildilər. Amma Kürəkçay müqaviləsinin
imzalanmasından sonra Qacar qoşunlarının Qarabağ xanlığı üzərinə
hücum xəbərini eşidəndə Səlim xan öz fikrini dəyişməli oldu. Çünki Ərəş
qalasında yerləşdirilmiş qoşun dəstəsi Qacar qoşunlarının hücumunun
qarşısını Şəki xanlığının sərhədində saxlaya bilərdi. Bundan əlavə,
burada müdafiə xətti təşkil etməklə xanlıq əhalisinin tarla məhsullarının
toplanması üçün də vaxt qazanmaq olardı. Təklif olunurdu ki, sonradan
rus qoşun dəstəsi Dəhnə kəndi istiqamətində, şəhərin qarşı tərəfindəki
köhnə qalada daimi olaraq yerləşsin. Mayor Rebinderin yazdığına görə,
qoşun dəstəsinin yerləşdirilməsi üçün bu qalada Ərəş qalasına nisbətən
daha yaxşı şərait var idi. Səlim xanın təklifinə əsasən, rus qoşun
dəstəsindən 60 nəfərlik bir qrup isə Nuxa qalasının mühafizəsinə
ayrılmalı idi. Bundan başqa, Səlim xan xahiş etdi ki, ruslar Nuxa
Mehman Süleymanov
120
qalasında olan topların təmirinə kömək etsinlər. Səlim xan bu toplardan
heç olmasa yaxınlaşacaq düşməni qorxutmaq üçün istifadə etmək
istəyirdi. Səlim xan eyni zamanda əlavə rus qoşun dəstəsinin
göndərilməsini istədi. Bu qoşun dəstəsinin göndərilməsini o, Qacar
qoşunlarının hücumlarından qorunmaq zərurəti ilə bağlayırdı. General
Sisianov əlavə qoşun dəstəsinin göndərilməsinə ehtiyac olmadığını və
təhlükə yaranan anda Səlim xanın Rusiya himayəsində olacağını bildirdi
(25).
Rusiya təbəəliyini qəbul etməsinə baxmayaraq, Səlim xanın general
Sisianovun siyasətinə qarşı şübhəli və ehtiyatlı bir mövqeyi var idi. Səlim
xanın öz mühafizəsini ləzgi silahlılarına tapşırması və rus qoşun
dəstəsinin mümkün qədər Nuxa qalasından kənarda saxlaması da bununla
bağlı idi. Çox güman ki, bu ehtiyatlı münasibətə görə, Səlim xan nəzərdə
tutulan girovların Tiflisə göndərilməsində də qətiyyətlilik göstərmədi.
Qacar qoşunlarının hücum xəbəri Səlim xanın xanlıq ərazisinə göndə-
rilmiş rus qoşun dəstəsinin yerləşdirilməsinə münasibətini bir qədər
dəyişdi. Səlim xan özü də etiraf edirdi ki, rus qoşun dəstəsinin Nuxa
yaxınlığına buraxılması Qacar qoşunlarının Qarabağ ərazisində olması ilə
bağlı idi. Qacar qoşunları geri qayıdan kimi Şəki xanlığı ərazisindən rus
qoşun dəstəsi də geri qayıdaraq Ərəş qalasında yerləşməli idi. Rus qoşun
dəstəsinin rəhbəri mayor Rebinder Nuxaya yaxınlaşmasının ardınca
Səlim xanın qarşısına yeni bir tələb qoydu. Mayor Rebinder istəyirdi ki,
rus qoşun dəstəsi Nuxa qalasının daxilinə buraxılsın. Bu, Şəki xanının
fəaliyyətinin daha ciddi nəzarət altına alınmasına imkan verərdi. Səlim
xan isə bu tələblə razılaşmadı. İmzalanmış müqavilədə rus qoşun
dəstəsinin Nuxa qalasına buraxılması haqqında şərt olmadığını əsas
tutaraq Səlim xan Sisianov qarşısında belə bir tələbin irəli sürülməməsi
məsələsini qaldırdı. General Sisianov mövcud tarixi şəraitdə Səlim xanın
bu xahişi ilə razılaşdı. Onun fikrincə, Səlim xana təzyiq etmək Nuxa
daxilində rus qoşunlarının mövcudluğuna qarşı münasibəti dəyişə bilərdi.
Xüsusilə, Sisianov ondan qorxurdu ki, Qacar əyanları Şəki xanlığının
ruhaniləri vasitəsilə xanlıq əhalisini Rusiya işğalı əleyhinə səfərbər edə
bilərdilər. Ona görə Sisianov mayor Rebinderə yazdı ki, qoşun dəstəsinin
Nuxa qalasında yerləşdirilməsi ilə bağlı Səlim xana təzyiqi dayandırsın
(26).
Amma bu heç də o demək deyildi ki, general Sisianov rus qoşun
dəstəsinin Nuxa qalasına yerləşdirilməsi planlarından əl çəkdi. Sisianov
da əmin idi ki, rus qoşun dəstəsini Nuxa qalasına yerləşdirilməklə Şəki
xanının Rusiya itaətində qalmasına etibarlı zəmanət əldə etmiş olardı. Bu
məqsədə çatmaq üçün Sisianov mayor Rebinderlə Səlim xana gizli