81
ABŞ-ın mövqeləri ilə razılaşmamasını və s. kimi lider dövlətlərə məxsus hərəkətlərini
sadəcə həzm edə bilmirdi. Çünki ideya cəlbediciliyi və müharibədən sonra Avropanın
alman işğalçılarından azad edilməsində qazandığı “müsbət imic” istisna olmaqla SSRİ-
nin lider kimi çıxış etmək üçün heç bir əsası yox idi. Amerika isə əksinə, hərbi, iqtisadi,
maliyyə və əmək resurslarına görə 1945-ci il üçün dünyanın ən güclü, qüdrətli və
yeganə fövqəldövləti idi ki, dünya siyasətini və beynəlxalq münasibətlərin mahiyyətini
müəyyən edə bilərdi. Odur ki, ABŞ bütün dünyanın inkişafını, dövlətlərarası əlaqələri,
beynəlxalq münasibətləri özünün məqbul saydığı şəkildə tənzimləmək istəyirdi. SSRİ bu
yolda ABŞ-a və onun himayə etdiyi kapitalist dünyasına əngəl idi. Ona görə də, ABŞ
Sovet İttifaqına qarşı ideoloji mübarizə və “soyuq müharibə”yə başlayır. Özünün və
digər sosialist ölkələrinin siyasi, iqtisadi və ideoloji resurslarını səfərbər edən SSRİ də
öz növbəsində dünyada anti-kapitalist və anti-ABŞ fəaliyyətini gücləndirir.
SSRİ-ABŞ qarşıdurmasının kəskinləşməsini şərtləndirən faktorlardan biri də
müharibənin gedişində ABŞ-da atom silahının yaradılması, sonra isə Yaponiyada tətbiq
edilməsi və dünya hegemonluğu iddiasının reallaşdırılmasında bu silahın üstünlüyündən
ideoloji vasitə kimi istifadə olunması idi. ABŞ hökuməti elmin bu böyük kəşfini öz
xalqının və bütövlükdə insanlığın tərəqqisi üçün, yaxud dünyada sivil birgəyaşayış
normalarını pozan, kollektiv təhlükəsizliyə, sülhə maneçilik törədən dövlətlərə qarşı
təzyiq vasitəsi kimi deyil, özünün dünya hegemonluğu, SSRİ-nin təsirinin qarşısının
alınması istiqamətində istifadə etmək məqsədi daşıdığını nümayiş etdirirdi. Bu da SSRİ-
ni adekvat addım atmağa sövq edirdi ki, onun da nəticəsi insanlıq üçün yeni-yeni
təhlükələr vəd edirdi.
1946-cı ildən başlayaraq, ABŞ-SSRİ qarşıdurması güclənir və hər iki tərəf
müharibədən sonrakı razılaşdırılmış normalardan, kollektiv təhlükəsizliyin prinsip və
şərtlərindən birtərəfli qaydada öz maraqları çərçivəsində istifadə etməyə başlayırdı.
ABŞ malik olduğu atom silahı, iqtisadi, maliyyə üstünlüklərindən istifadə edərək,
dünyanı sosializm və SSRİ təhlükəsindən xilas etmək missiyasını öz üzərinə götürür və
Qərbi Avropa dövlətlərini bu istiqamətdə ətrafına toplayırdı.
SSRİ isə öz növbəsində kapitalizmə qarşı mübarizə və dünya proletar inqilabının
həyata keçirilməsi missiyasının daşıyıcısı kimi yenicə sosialist inkişafı yoluna qədəm
qoymuş ölkələrin müqavimət hərəkatına rəhbərlik edirdi. 1941-1945-ci illərdə müttəfiq
olmuş SSRİ, ABŞ, İngiltərə artıq rəqib dövlətlər kimi bir-birinə qarşı çıxış etməyə
başlayırdılar. Beləliklə, həm Avropa, həm də o vaxta qədər İngiltərə, Fransa, ABŞ,
82
Almaniya, Yaponiya və SSRİ-nin təsiri altında olan Asiya, Afrika, Latın Amerikası
ərazilərində ideoloji qarşıdurma və “soyuq müharibə” başlanır.
1945-ci ildə ABŞ-da Prezident Ruzvelti Trumen əvəz edir və onun doktrinası
çərçivəsində SSRİ-yə və onun Avropaya təsirinə qarşı mübarizə gücləndirilir. 1947-ci
ildən ABŞ öz təsir dairəsinə daxil olan Avropa ölkələrinə “Marşal planı” çərçivəsində
yardımı artırır və Avropada öz üstünlüyünü təsdiq edir. SSRİ ya ABŞ-ın bu üstünlüyü,
deməli, hegemon rolu ilə barışmalı, ya da qarşıdurma yolunu qəbul etməli idi. SSRİ
məhz ikincini seçir və beləliklə, ideoloji qarşıdurmanı gücləndirir. O, “Marşal planı”
çərçivəsində təklif olunan ABŞ yardımından özü məhrum olduğu halda, Polşa,
Rumıniya, Çexoslovakiya, Yuqoslaviya və Macarıstana da ondan istifadə etməyə imkan
vermir və beləliklə, 1947-ci ildən Avropada iki sistem arasında “soyuq müharibə” açıq
şəkildə başlanır. 1948-ci ilin mart ayında Almaniya üzərində nəzarət üçün yaradılmış
müttəfiqlərin (SSRİ, ABŞ, İngiltərə, Fransa) dördtərəfli nəzarət komissiyası buraxılır.
Buna qədər ABŞ, İngiltərə və Fransa Almaniya ərazilərindəki “işğal zonaları”nı birləşdirir
və federativ alman dövlətinin yaradılmasını təşkil edirlər. 1948-ci ildə isə onun
Konstitusiyası qəbul olunur. Berlin və Almaniya, ardınca isə bütün Avropa iki
qarşıdurma zonasına bölünür. SSRİ də öz “işğal zonası”nda müvafiq olaraq Almaniya
Demokratik Respublikası adlı dövlət yaradır və onun idarəçilik sistemini təsis edir.
Bunun ardınca SSRİ özünün atom silahının yaradılması və ilk sınağını (1949) bütün
dünyaya nümayiş etdirir.
SSRİ-nin atom silahını sınaqdan çıxarması dünya ictimaiyyətini yenidən gələcək
təhlükə, kütləvi qırğın silahına malik olan iki qarşıduran ideoloji qütb arasında başlana
biləcək müharibənin nəticələri haqqında düşünməyə vadar etdi. Hələ 1945-ci ildə atom
enerjisi üzərində nəzarət üzrə BMT yanında xüsusi komissiyanın yaradılmasına və
Təhlükəsizlik Şurasının bütün üzvlərinin komissiyada təmsil olunmasına baxmayaraq,
SSRİ atomun sirlərini öyrənənə qədər bu qurum demək olar ki, heç bir əməli iş görə
bilməmişdi. Elə ki, atom üzrə ABŞ-ın monopoliyasına son qoyuldu, o zamana qədər
müxtəlif bəhanələrlə mütəmadi olaraq baxılması təxirə salınan SSRİ-nin “atomdan
yalnız dinc məqsədlər üçün istifadə edilməsi tələbləri” yada düşdü. Lakin tərəflər BMT-
nin sessiyalarını və iclaslarını, bir qayda olaraq, qarşılıqlı ittihamlara yönəldir,
silahlanmanın, xüsusən kütləvi qırğın silahlarının qarşısının alınmasında, qarşılıqlı
etimadsızlığın aradan qaldırılmasında əsaslı bir iş görmək istəmirdilər. Əvəzində isə bu
illərdə ABŞ Şimali Atlantika Blokunu, SSRİ isə sosialist ölkələrinin hərbi blokunu –
Varşava Müqaviləsi Təşkilatını yaratmaq üçün məxfi iş aparırdı.