77
Beynəlxalq münasibətlərin “Yalta-Potsdam” sistemi müharibənin gedişində
yaranmışdı və dövlətlərarası əlaqələrin tənzimlənməsi, Avropanın və dünyanın gələcək
təhlükəsizliyinin təmin olunması, silahlı qarşıdurmanın aradan qaldırılması üçün bütün
lazımi mexanizmləri nəzərdə tutmuşdu. Necə ki, müharibənin ağır nəticələri insanların
və dövlətlərin xatirəsində yaşayırdı, bu sistemin üstünlüklərindən bütün dünya
danışırdı. Təəssüf ki, müharibənin başa çatmasından heç bir il keçmədi ki, “Yalta-
Potsdam” sisteminin dinc şəraitdə, müxtəlif ictimai-iqtisadi quruluşa malik olan dövlətlər
arasında münasibətləri tənzimləmək, onların dinc-yanaşı yaşamaq prinsiplərini təmin
etmək iqtidarında olmadığı üzə çıxdı. Sistemi yaradarkən müttəfiq olan SSRİ, ABŞ və
İngiltərə az keçməmiş bir-biri ilə ciddi mübarizəyə başlayır və rəqibə çevrilirlər.
Beləliklə, beynəlxalq münasibətlərin yeni sisteminin kapitalizm və sosializm quruluşuna
malik olan dövlətlər arasında sinfi qarşıdurma üzərində köklənmiş daha bir reallığı –
ideoloji mübarizəsi başlanır.
İkinci dünya müharibəsinin sonuna yaxın alman militarizminə qarşı mübarizədə
birgə iştirak edən dünyanın üç lider dövləti – SSRİ, ABŞ və İngiltərənin dövlət başçıları
Avropanın və dünyanın gələcək həyatı, müharibədən sonrakı nizamlama, beynəxalq
münasibətlər və kollektiv təhlükəsizlik sisteminin forma və prinsipləri üzərində
düşünməyə başlayır. Bu dövlətlərin hər biri öz milli maraqlarından çıxış edərək,
gələcək dövlətlərarası münasibətləri də özünə sərf edəcək şəkildə qurmağa çalışırdı.
SSRİ Avropada və dünyada sosialist dövlətlərinin sayını artırmağa və onların vasitəsilə
öz təsir dairəsini gücləndirməyə səy göstərirdi. İngiltərə Avropada yeni güc balansı
yaratmaq, Fransa və məğlub olmuş Almaniya ilə birlikdə SSRİ-yə, onun genişlənən
sosialist koalisiyasına qarşı gələcək mübarizələri haqqında düşünür və buna müvafiq
mövqe nümayiş etdirirdi. ABŞ özünün nəhəng iqtisadi, siyasi və maliyyə imkanlarını işə
salaraq Avropanı, Cənub-Şərqi Asiya və Sakit okean hövzəsini öz təsiri altına almaq,
SSRİ-yə qarşı gələcək mübarizənin mərkəzi koordinatorluğu uğrunda fəaliyyət
göstərirdi. Lakin beynəlxalq münasibətlərin yeni “Yalta-Potsdam” sisteminin
formalaşmasının bu mərhələsi əsasən İkinci dünya müharibəsində faşist Almaniyası və
onun müttəfiqlərinə, eyni zamanda Yaponiyaya qalib gəlmiş SSRİ və ABŞ arasında
dünyada öz təsir dairəsini genişləndirmək uğrunda mübarizə ilə xarakterizə olunur. Bu
mübarizə əslində müharibənin gedişində başlanmış, müharibə başa çatandan sonra
daha da kəskinləşmişdir. Məğlub olmuş Almaniya və onun müttəfiqlərinin sonrakı
taleyinin müəyyən edilməsində hər iki tərəf maksimum subyektivlik nümayiş etdirərək öz
maraqlarını yeritmək istəyirdi. Əslində 1945-ci ildə Yaponiyaya ABŞ tərəfindən atom
78
bombasının atılması, başqa cəbhədə SSRİ-nin canfəşanlıq göstərərək Yaponiyaya
məxsus əraziləri ələ keçirməsi heç də hərbi zərurətdən irəli gəlmirdi.
Hər iki ölkə
müharibədən sonra dünyada baş verəcək hadisə və proseslərdə öz üstünlüyünü sübut
etmək, öz təsirini daha çox əraziyə yaymaq məqsədi güdürdü. Odur ki, İkinci dünya
müharibəsi 1945-ci il sentyabrın 2-də rəsmən başa çatsa da, müharibədə iştirak edən
hər iki blok ölkələri arasında çəkişmələr, diskussiyalar 1950-ci ilə qədər davam etdi.
SSRİ Almaniya və Yaponiyaya qarşı müharibənin əsas ağırlığını öz üzərinə götürən bir
dövlət kimi, nəticələri də öz xeyrinə həll etməyə, Avropada və Asiyada sosialist yönlü
dövlətlərin sayını artırmağa, ABŞ isə eyni ərazilərdə öz təsirini gücləndirməyə və
SSRİ-ni bu bölgələrdən sıxışdırmağa can atırdı.
SSRİ və ABŞ başda olmaqla anti-Hitler koalisiyasının Avropada və dünyada
müharibədən sonrakı vəziyyəti araşdırmaq və həll etmək məqsədilə bir yerə
toplaşdıqları son tədbir 17 iyul-2 avqust Potsdam (Berlin) və 29 iyul-15 oktyabr Paris
konfransları oldu. Birinci konfransda koalisiya üzvləri tərəfindən Almaniyanın sonrakı
taleyi həll edildisə, ikincidə onun müttəfiqləri və bu müharibədə ayaqaltı vəziyyətində
qalmış İtaliya, Rumıniya, Bolqarıstan, Avstriya, Macarıstan, Finlandiya, Yuqoslaviya kimi
dövlətlərin gələcək taleyi həll edildi. Onların bəziləri ilə sülh müqaviləsi imzalandı,
digərlərinə isə SSRİ və ABŞ-ın mövqeləri zorla qəbul etdirildi.
1947-ci ildən başlayaraq anti-Hitler koalisiyasında birgə iştirak etmiş dövlətlər
tamamilə iki cəbhəyə ayrıldı və bir-birinə qarşı silahlanmaya başladılar. Amerikalılar
hələ müharibənin gedişində atom bombasını sınaqdan keçirmiş və bütün dünyaya öz
üstünlüyünü sübut etmək üçün geniş təbliğat kompaniyasına başlamışdılar. Bu
mübarizədə ABŞ avropalıları sosializm təhlükəsi ilə qorxudaraq özünə müttəfiq etmək,
SSRİ-ni təkləmək, beynəlxalq aləmin gözündən salmaq və beləliklə, dünyada təkbaşına
hegemonluq etməyə çalışırdı.
SSRİ də öz iddialarına görə ABŞ-dan geri qalmırdı. Düzdür, hələ atom bombası
yarada bilməsə də, onun təbliğatda, anti-Amerika mübarizəsində öz arqumentləri var idi.
Əvvəla, SSRİ anti-faşizm mübarizəsi dövründə müharibənin ən çox ağırlığını daşımış,
Avropanın azad edilməsində həlledici rol oynamış və deməli, daha çox ölkədə öz
qoşunları vasitəsilə təsiretmə mexanizmləri yaratmışdı. Müharibənin gedişində sovet
qoşunlarının ayaq basdığı istənilən ölkədə hakimiyyət dərhal dəyişdirilmiş və sosialist
hökuməti yaradılmışdı. Bundan başqa, SSRİ müharibəni bitirəndə hərbi cəhətdən daha
güclü idi. Çünki müharibənin gedişində bütün sənaye hərbi rels üzərinə keçirilmiş, silah-
sursat istehsalı həddən artıq genişlənmiş, texnoloji cəhətdən inkişaf etdirilmişdi. SSRİ-