72
Müharibənin gedişində əsas məqsəd Avropanı və dünyanı alman işğalçılarından
və onların müttəfiqlərindən
azad etmək olsa da, müharibədən sonrakı dövlətlərarası
əlaqələr və münasibətlər, sivil birgəyaşayış normalarının yenidən bərpa olunması və
kollektiv təhlükəsizlik sisteminin yaradılması məsələləri beynəlxalq ictimaiyyətin əsas
müzakirə mövzusu oldu. Əlbəttə, hər şey Almaniyaya qarşı mübarizənin önündə gedən
SSRİ, İngiltərə və ABŞ-ın mövqeyindən, onlar arasındakı münasibətlərdən asılı idi.
Dünyanın və beynəlxalq münasibətlərin müharibədən sonrakı taleyi ilə bağlı üç böyük
dövlətin ilk məsləhətləşməsi 1943-cü ilin oktyabrında xarici işlər nazirlərinin Moskva
konfransında aparılmış, həmin il 28 noyabr – 1 dekabrda isə dövlət başçılarının Tehran
konfransında geniş müzakirə olundu. Bu konfranslarda müharibədən sonrakı Avropanın
taleyi və dövlətlərarası münasibətlərin bütün aspektləri ətrafında geniş fikir mübadiləsi
aparıldı.
Konfranslarda ABŞ və İngiltərə tərəfi Almaniyanın məğlubiyyətindən sonra
Versal-Vaşinqton sisteminə qayıtması, dövlətlərin müharibədən əvvəlki sərhəd və
ərazilərinin bərpası, onlar üzərində iri dövlətlərin kollektiv nəzarətinin yaradılması,
dövlətlərarası əlaqələrin yeni prinsiplərinin qəbulu və SSRİ isə Avropada xalqlara öz
müstəqil dövlətlərinin bərpası üçün lazımi şəraitin yaradılması, lakin dövlət
quruluşlarının, idarəçilik prinsiplərinin müəyyənləşməsində, özlərinə rəhbər və lider
seçməkdə müstəqillik verilməsi təklifini irəli sürür. Bütün bu məsələlərlə bağlı
məsləhətləşmək və fəaliyyətlərini əlaqələndirmək məqsədilə hər üç dövlət birgə
məsləhət komissiyasının yaradılmasına razılaşır. Komissiyaya tapşırıq verilir ki,
Almaniya ilə bağlanacaq müqavilələr, Avstriyanın müharibədən sonrakı statusu,
Avropada sonrakı vəziyyət və s. məsələləri işləyib hazırlasın və növbəti görüşün
gündəliyinə çıxarsın.
1942-44-cü illərdə hər üç dövlət Avropada və dünyada gələcək dövlətlərarası
əlaqələr və beynəlxalq münasibətlərlə bağlı öz mənafelərinə, xüsusən ideoloji
maraqlara cavab verən mövqe nümayiş etdirirdi. Müharibənin əsas mərkəzində
dayanan SSRİ çalışırdı ki, alman faşizminin işğalından azad etdiyi ölkələrdə proletar
diktaturası, sosialist yönlü hakimiyyət formalaşdırsın və onları SSRİ-nin təsiri altına
salsın. Əslində bu müharibə SSRİ-yə dünya inqilabı ideyasını reallaşdırmaq, sosializmi
yaymaq və özünü təcridolmadan xilas etmək üçün əlverişli şərait yaratmışdı. Odur ki,
Stalin Sovet qoşunlarının ayaq basdığı ölkələrdə dərhal məqbul hakimiyyətlərin
yaradılması və onların SSRİ ilə dostluq və müttəfiqlik müqavilələrinə cəlb olunması işini
intensiv şəkildə həyata keçirirdi. Belə tədbirlərin görülməsi və müqavilələrin
73
imzalanması ilə bağlı qısa müddətdə Polşa, Yuqoslaviya, Çexoslovakiya, Rumıniya,
Bolqarıstan, Macarıstan, Finlandiya ilə münasibətlərdə konkret addımlar atıldı. Əlbəttə,
SSRİ-nin bu niyyətləri və planları İngiltərə və ABŞ-ın diqqətindən kənarda qala
bilməzdi. Bu dövlətlər bütün vasitələrlə çalışırdılar ki, həm müharibənin əsas ağırlığı
mümkün qədər SSRİ-nin üzərinə düşsün, bu dövlət getdikcə zəifləsin, həm də onun
Qərbi Avropa və digər ərazilərə daxil olmasının, müharibədən sonrakı Avropanın
işlərinə müdaxiləsinin qarşısı alınsın. Əlbəttə, sovet qoşunları tərəfindən bir-birinin
ardınca işğalçılardan azad edilən Şərqi Avropa dövlətlərində onların gələcək dövlət
quruluşu və taleyində SSRİ-nin təsirini və rolunu azaltmaq çox çətin idi. Odur ki, ABŞ və
İngiltərə Avropanı və dünyanı daha çox iqtisadi və maliyyə vasitələrilə SSRİ-nin
təsirindən, sosialistyönlü gələcəyindən qurtarmağa çalışırdı. Elə müharibənin gedişində
ideoloji baxımdan bir-birindən fərqlənən bu iki düşərgə - SSRİ və ABŞ-İngiltərə cütlüyü
arasında münasibətlər çox ehtiyatlı və qarşılıqlı etimadsızlıq mühitinə doğru istiqamət
aldı.
Məhz SSRİ-nin artan nüfuzuna zərbə vurmaq, dünyada öz iqtisadi və siyasi
təsirini artırmaq məqsədilə müharibənin gedişində, 1944-cü ildə ABŞ hökuməti maliyyə
naziri Q. Morqentaunun rəhbərliyi ilə 44 ölkənin nümayəndələrini Amerikaya yığaraq
Beynəlxalq Valyuta Fondunu yaradır. Əlbəttə, Fondda aparıcı rol ABŞ-a məxsus idi və
məhz bu ölkə öz zəngin maliyyə imkanları ilə dünya dövlətləri üçün həddən artıq
cəlbedici idi. Həmin konfransda ABŞ-ın hegemon mövqe tutduğu daha bir beynəlxalq
qurum – Beynəlxalq İnkişaf və Yenidənqurma Bankı yaradılır. Hər iki qurum tədricən
üzv ölkələrin çətin maliyyə-iqtisadi vəziyyətindən istifadə edərək onların büdcə,
inflyasiya, pul və iqtisadi siyasətinə müdaxilə etməyə və bu sahəni ABŞ-ın müvafiq
köməyi ilə nizamlamağa başlayır. İstehsal, hərbi, ticarət və maliyyə sahəsində o dövrün
ən nəhəng dövləti hesab olunan ABŞ müharibənin gedişində və xüsusən müharibədən
sonra Avropanın bərpasında üstünlüyü tamamilə öz əlinə alır. Fransa və İngiltərəyə,
müharibədən sonra isə digər Avropa dövlətlərinə külli miqdarda borc pul verir və onları
iqtisadi cəhətdən özündən asılı vəziyyətə salmağa çalışır.
Müharibənin sonu yaxınlaşdıqca dünyada gələcək rolların və təsir dairələrinin
bölünməsi uğrunda SSRİ-ABŞ mübarizəsi güclənirdi. Hər iki dövlət daha çox ölkəni öz
tərəfinə çəkməklə, orada istədiyi hakimiyyəti formalaşdırmaq və onların gələcək
siyasətlərinə təsir göstərmək üçün bütün mümkün vasitələri səfərbər etmişdi. SSRİ
Şərqi Avropanı demək olar ki, tam öz təsiri altına almış, bu ərazidə baş verən milli-
azadlıq hərəkatlarına, qurulmuş yeni rejimlərə nəzarət edirdi. ABŞ isə Qərbi Avropanı