63
yekdildir. Buna görə də, Azərbaycan hökuməti Denikinlə, onun həmişə Azərbaycan
xalqının müstəqilliyinə qəsd etdiyinə görə, qızğın mübarizə aparırdı və bunun
müvəffəqiyyətli olması məqsədilə qonşu gürcü hökuməti ilə hərbi müdafiə ittifaqı
bağladı. Azərbaycan hökuməti tərəfindən qəbul edilmiş yuxarıda qeyd edilən xarici
siyasətin istiqaməti ona Azərbaycan və digər xalqlar arasında mehriban münasibətlərin
qurulmasına göstəriş verir. Buna əsasən, Azərbaycan hökuməti danışıqlar yolu ilə hər
iki dövlətini müstəqilliyi prinsiplərindən irəli gələn rus və Azərbaycan xalqları arasında
mehriban qonşuluq münasibətləri yaratmağa hazırdır”.
Antanta ölkələri Sovet Rusiyasının Zaqafqaziyada yarada biləcəyi təhlükənin
coğrafi miqyasının genişlənəcəyini nəzərə alaraq, fəal xarici siyasət kursu müəyyən
etmək qərarına gəldi. Bu məqsədlə, yanvarın 10-da Böyük Britaniyanın təşəbbüsü ilə
Paris sülh konfransı Ali Şurasının sessiyasında Zaqafqaziya respublikaları ətrafında
yaranmış vəziyyət geniş müzakirə olundu. Ali Şura hərbi ekspertlərin Zaqafqaziya
respublikalarına hərbi yardım göstərilməsi barədə təkliflər verməsini vacib hesab etdi.
Ali Şuranın iclasında İngiltərənin xarici işlər naziri lord Kerzon çıxış edərək, Lloyd
Corcun Azərbaycan və Gürcüstanın müstəqilliyini tanımaq məsələsini müzakirə
etməyin tərəfdarı olduğunu bildirdi. İclasda çıxış edən Avropa dövlətlərinin xarici işlər
nazirləri həqiqətən də Azərbaycan və Gürcüstan ətrafında təhlükəli vəziyyət yarandığını
vurğuladılar. Lord Kerzon Azərbaycan və Gürcüstan hökumətlərinin Antanta dövlətlərinə
yardım üçün müraciətlərini nəzərə alaraq, Azərbaycan və Gürcüstanı de-fakto
tanımağın vacib olduğunu bildirdi. Yanvarın 11-də Ali Şuranın qəbul etdiyi qərarda
bəyan edildi ki, “müttəfiq və birlik ölkələri Azərbaycan və Gürcüstan hökumətlərini
birlikdə de-fakto səviyyəsində tanıyırlar”. Fevralın 7-də Yaponiya hökuməti də Ali
Şuranın bu qərarını müdafiə etdiyi halda, ABŞ bu məsələni rəsmi surətdə
dəstəkləmədiyini bildirdi. Həmin vaxt ABŞ hökumətinin mövqeyi bundan ibarət idi ki,
Birləşmiş Ştatlar Böyük Britaniyanın və Fransanın Azərbaycana və Gürcüstana yardım
göstərməsinə etiraz etmir, lakin onların müstəqilliyinin tanınmasını Rusiyanın
parçalanması kimi dəyərləndirir.
Paris sülh konfransı Ali Şurasının yanvarın 19-da keçirilən iclasında Azərbaycan
və Gürcüstana hərbi və maliyyə yardımının göstərilməsi məsələləri müzakirə edildi.
İclasın sonunda Qafqaz məsələsinə dair 4 bənddən ibarət olan qərar qəbul edildi və
orada müttəfiq hökumətlərin Zaqafqaziya respublikalarına ordu göndərmək imkanına
malik olmadığı bildirildi. Lakin ərzaq və hərbi sursatla kömək göstərilməsi nəzərdə
tutlurdu.
64
Azərbaycan Respublikasının müstəqilliyinin Paris sülh konfransında tanınması
Azərbaycan hökumətinin, xüsusilə Azərbaycan nümayəndə heyətinin uğurlu xarici
siyasəti və diplomatik fəaliyyəti nəticəsində mümkün oldu. Bu tarixi hadisə
Azərbaycanda böyük təmtəraqla qeyd edildi. Yanvarın 14-də Baş nazir N. Yusifbəylinin
ölkə vətəndaşlarına müraciətində və həmin gün Azərbaycan parlamentinin iclasındakı
çıxışlarda bildirildi ki, Azərbaycanın müstəqilliyinin tanınması böyük tarixi əhəmiyyət
daşıyır. Parlamentin iclasına sədrlik edən Həsən bəy Ağayev qeyd edirdi ki, “bu
bayram yalnız bizim bayramımız deyil, bütün türk xalqının bayramıdır. Sübut etmək
lazım idi ki, biz müstəqil həyata layiqik. Avropa bizim dövlətimizdə olan nümayəndələri
vasitəsilə bizim xalqın həyat qabiliyyətinə inandı və bizim müstəqilliyimizi tanıdı. Böyük
qurbanlar bahasına biz buna nail olduq”.
Azərbaycan hökuməti dövlət müstəqilliyinin tanınmasından sonra Sovet Rusiyası
tərəfindən üzləşdiyi təzyiqləri dəf etmək yönündə fəaliyyətini davam etdirdi. Azərbaycan
Xarici İşlər Nazirliyi Hərbi Nazirliklə birlikdə Azərbaycan Respublikası ətrafında
yaranmış vəziyyəti nəzərə alaraq, ölkənin müdafiəsinin təşkil edilməsi tədbirləri və milli
ordunun ehtiyacları haqqında memorandum hazırlayaraq, onu müttəfiq dövlətlərin hərbi
ekspertlər şurasına göndərdi. Memorandumda Azərbaycanın dövlət təhlükəsizliyini
möhkəmləndirmək üçün ölkəyə hərbi, iqtisadi və siyasi yardım göstərilməsi xahiş
edilirdi.
Həmin dövrdə Avropa dövlətlərinin Bakıda konsulluqları fəaliyyətə başladı,
Azərbaycan hökuməti ilə ABŞ, Böyük Britaniya və İtaliya arasında iqtisadi əlaqələrin
qurulması yönündə mühüm işlər görüldü. Azərbaycanla İran arasında diplomatik
münasibətlər yaradıldı. Martın 20-də Azərbaycan Respublikası ilə İran arasında dostluq
haqqında müqavilənin imzalanması Azərbaycanın xarici siyasətinin böyük uğurlarından
biri idi. Müqavilənin birinci maddəsinə görə, İran hökuməti Azərbaycan Respublikasının
müstəqilliyini de-yure tanıdığını bəyan etdi. Məhz hər iki dövlət arasındakı əlaqələrin
möhkəmlənməsi sayəsində az bir müddət ərzində Tehranda Azərbaycan səfirliyi
fəaliyyətə başladı. Eyni zamanda, Təbriz, Rəşt, Məşhəd, Xoy və Əhərdə Azərbaycan
konsulluqları yaradıldı. 1920-ci il aprelin 15-də Azərbaycan parlamentində Avropa
dövlətlərinə və ABŞ-a diplomatik nümayəndəliklər göndərmək haqqında qanun layihəsi
müzakirə edildi. Parlamentin aprelin 19-da keçirilən iclasında isə Böyük Britaniya,
Fransa, İtaliya, ABŞ, İsveçrə, Polşa, Almaniya və Rusiyada diplomatik nümayəndəliklər
təsis etmək haqqında qanun qəbul olundu.
65
Azərbaycan hökumətinin 1920-ci ilin aprel böhranına qədərki dövrdə xarici
siyasət sahəsində qazandığı nailiyyətlər xalqımızın milli istiqlaliyyətinin tanınmasında
mühüm rol oynamışdır. 1918-1920-ci illərdə xarici siyasət kursunun
müəyyənləşməsində və mühüm diplomatik uğurların qazanılmasında Ə.M.Topçubaşov,
F.X.Xoyski və M. Hacınski kimi şəxsiyyətlərin böyük əməyi vardır.
1918-20-ci illərdə aparılan xarici siyasət dünyada Azərbaycanın sivil, demokratik
respublika kimi tanınmasında böyük rol oynamışdır.
5. 1922-1939-CU İLLƏRDƏ BEYNƏLXALQ MÜNASİBƏTLƏR VƏ
VERSAL-VAŞİNQTON SİSTEMİNİN BÖHRANI
Versal beynəlxalq münastbətlər sisteminin son səhifələri Vaşinqton konfransında
(1922) yazıldı. Avropada və dünyada sülh bərpa olundu, beynəlxalq münasibətləri
tənzimləyən “Millətlər Liqası” adlı beynəlxalq qurum yaradıldı, onun Nizamnaməsi
dünyanın 44 dövləti tərəfindən imzalandı. Sovet Rusiyasına və onun proletar inqilabını
dünyaya yayması cəhdlərinə qarşı həyata keçirilən tədbirlər istisna olmaqla, dünyada
əmin-amanlıq bərpa olundu. Lakin Versal sisteminin yaratdığı beynəlxalq münasibətlər
sistemi, sülh və təhlükəsizlik rejimi elə ilk gündən bəzi ziddiyyətli məqamları ilə özünü
büruzə verməyə başladı.
Ziddiyyətlərin bir qrupu onunla bağlı idi ki, sülh müqaviləsinə imza atan dövlətlər
razılaşdırılmış şərtləri yerinə yetirməkdən imtina edirdilər. Bu həm məğlub olan və
alçalmaq dərəcəsinə qədər təqib olunan Almaniya, Avstriya-Macarıstan, həm qalib
gələn Fransa, İngiltərə, İtaliya, ABŞ-a, həm də Versal prosesində haqqı tapdanan
Türkiyə, Yaponiya, Rumıniya, Bolqarıstan və başqalarına aid idi. Vəziyyət elə bir həddə
çatır ki, ABŞ və İngiltərə Fransanı sıxışdırmaq üçün Almaniyanı gizli dəstəkləyir və onu
sülhün şərtlərini pozmağa təhrik edirdilər.
Fransa və onun tərəfdarları başqa qonşu dövlətlərlə separat danışıqlara başlayır.
Fransa, İngiltərə və ABŞ-la dil tapa bilməyən, lakin müharibənin nəticələrindən narazı
qalan dövlətlər – Macarıstan, Türkiyə, Rumıniya və başqaları Sovet Rusiyası ilə
danışıqlara başlayır və öz problemlərini onun dəstəyi ilə həll etməyə can atır. Beləliklə,
Versal sistemi içərisində yavaş-yavaş bloklaşma, qarşıdurma və separat razılaşmalar
başlayır ki, bu da tezliklə sülh müqavilələrinin şərtlərinin kütləvi şəkildə pozulmasına
şərait yaradırdı.
Dostları ilə paylaş: |