61
maraqlı olması, bir tərəfdən, bu dövlətin dünya siyasətinin müəyyənləşməsində aparıcı
rol oynaması ilə bağlı olmuşdursa, digər tərəfdən ermənilərin ABŞ-da getdikcə
fəallaşması ilə əlaqədar idi. ABŞ-da fəaliyyət göstərən “Müstəqil Ermənistanın Amerika
Komitəsi” bu ölkənin siyasi dairələrində Azərbaycan haqqında böhtan və yalan
yaymaqla məşğul idi və bu mənfur niyyətlər Azərbaycan xalqını gözdən salmağa
yönəlmişdi. Azərbaycan hökuməti ermənilərin bu cür iyrənc məqsədlərini ifşa etmək və
Azərbaycanla bağlı həqiqətləri Amerika ictimaiyyətinin diqqətinə çatdırmaq üçün bu
ölkədə lazımi təbliğat aparmağı vacib hesab edirdi.
Həmin dövrdə Azərbaycan hökumətinin razılığına əsasən, Ə.M. Topçubaşov
Nyu-York şəhərindən olan hüquq məsləhətçisi Valter Çandlerlə iki müqavilə imzaladı.
Müqavilənin şərtlərinə görə, V.Çandler Azərbaycan nümayəndə heyətinin təbliğat
məsələləri üzrə hüquq məsləhətçisi təyin edilirdi və o, göstərilən müddət ərzində
Azərbaycan Respublikasının milli maraq və mənafelərini müdafiə etmək missiyasını öz
üzərinə götürürdü. Eyni zamanda, iqtisadçı Maks Rabinov da Azərbaycan
nümayəndəliyində işə qəbul edildi və bu şəxs dünya qiymətlərinə uyğun olaraq,
Azərbaycandan neft alınması və digər iqtisadi məsələlərlə məşğul idi. Göründüyü kimi,
Azərbaycan hökumətinin xarici siyasətində təbliğati və iqtisadi məsələlərə xüsusi diqqət
yetirilirdi.
Həmin vaxt Azərbaycanla Böyük Britaniya və Fransa kimi dövlətlər arasında
iqtisadi və ticarət əlaqələrinin yaradılması istiqamətində mühüm addımlar atıldı.
Xüsusilə, Fransa-Qafqaz Komitəsinin təşəbbüsü ilə oktyabrın 4-də keçirilən və
Azərbaycan, Gürcüstan, Fransa işgüzar dairələrinin iştirak etdiyi Qafqaz konfransı
mühüm əhəmiyyət daşıyırdı. Oktyabrın ortalarında Fransa Respublikasının Ticarət və
Sənaye Nazirliyinin nümayəndəsi Bakıya səfər edərək, Azərbaycanın xarici işlər naziri
M.Y. Cəfərovla danışıqlar apardı. Görüş zamanı Fransa tərəfinin nümayəndəsi öz
ölkəsi ilə Azərbaycan arasında dostluq əlaqələrinin yaradılmasının vacib olduğunu
bildirdi.
Həmin ərəfədə Azərbaycan hökuməti Böyük Britaniyanın “Kosmos” kompaniyası
ilə müqavilə imzaladı. Müqaviləyə görə, bu kompaniya Azərbaycan neftinin Qara dəniz
limanından daşınıb Avropaya satışını təşkil etməli idi. Azərbaycanla Fransanın teleqraf
və telefon kompaniyası arasındakı qarşılıqlı razılaşmaya görə isə Parisdən Bakıya xeyli
avadanlıq göndərilmişdi. Azərbaycan hökuməti xarici dövlətlərlə iqtisadi və ticarət
əlaqələrini genişləndirməklə yanaşı, Azərbaycanın müstəqilliyinin tanınması üçün
növbəti diplomatik səylərini davam etdirirdi.
62
Milli müstəqilliyinin tanınması xahişi ilə çıxış edən respublikalarla birgə,
Azərbaycan hökuməti də oktyabrın 5-də Paris sülh konfransının sədri Jorj Klemansoya
nota ilə müraciət etdi. Notada müstəqilliyini yenicə əldə etmiş respublikaların böyük
dəstəyə ehtiyacı olduğu vurğulanır və onların milli istiqlaliyyətini tanımağın vacibliyi
göstərilirdi. Sənəddə qeyd edilirdi ki, “bizim dövlətlərimizin məsələlərinin beynəlxalq həlli
bundan sonra yubadılmamalıdır və rus məsələsindən asılı olmayaraq həll edilməlidir.
Bunu sülhün, humanizmin və tərəqqinin mənafeyi tələb edir”. Bu notada göstərilmiş
məsələlər və Azərbaycan, Gürcüstan nümayəndələrinin müraciəti nəzərə alınaraq,
oktyabrın 29-da Fransa müstəmləkə liqasının xarici siyasət bölməsində Zaqafqaziya
məsələsi müzakirə olundu.
1919-cu ilin dekabr ayında Fransadakı Azərbaycan nümayəndəliyi Azərbaycan
Respublikasının Millətlər Cəmiyyətinə qəbul edilməsi barədə memorandum hazırlayıb
bu qurumun katibliyinə təqdim etdi. Qeyd edək ki, analoji müraciəti Gürcüstan tərəfi də
Millətlər Cəmiyyətinə göndərdi. Bu qurum tərəfindən hər iki respublikanın müraciətlərinə
baxıldı və Çili nümayəndəsi Antonio Qunetsin sədrliyi ilə xüsusi komissiya yaradıldı.
Araşdırmalardan sonra komissiya belə bir qərara gəldi ki, Zaqafqaziya Respublikaları
de-yure tanınmadığı və öz aralarındakı ərazi məsələləri tam həllini tapmadığı üçün
onların Millətlər Cəmiyyətinə qəbul edilməsi müvəqqəti olaraq dayandırılsın. Təəssüf ki,
Azərbaycanın müstəqilliyinin tanınması üçün diplomatik səylərin göstərildiyi bir vaxtda,
bolşevik Rusiyasının getdikcə güclənməsi məsələləri daha da çətinləşdirirdi. RSFSR
Xarici işlər naziri G.V. Çiçerinin Azərbaycan və Gürcüstan hökumətlərinə müraciət
edərək, Denikinin könüllü ordusuna qarşı birgə mübarizə aparmaq üçün hərbi saziş
bağlamağı təklif etməsi artıq Sovet Rusiyasının mövqelərinin gücləndiyini ifadə edirdi.
1920-ci ilin yanvarından aprelinədək Sovet Rusiyasının Azərbaycana qarşı
ardıcıl təzyiqlər göstərməsi vəziyyətin mürəkkəbliyindən xəbər verirdi. Təbii ki,
Azərbaycan hökuməti Rusiya tərəfinin notalarına öz münasibətini bildirirdi. Yanvarın 6-
da N. Yusifbəylinin sədrliyi altında Azərbaycan Dövlət Müdafiə Komitəsinin iclasında
Sovet Rusiyasının Azərbaycan və Gürcüstanla hərbi saziş bağlamaq təklifi müzakirə
edildi. Müzakirələrin sonunda qəbul edilən qərarda Azərbaycan Respublikasının
müstəqil dövlət olaraq Sovet Rusiyası ilə qarşılıqlı münasibətlər yaratmaq üçün
danışıqlar aparmağa hazır olduğu bildirildi.
Yanvarın 14-də xarici işlər naziri F.X.Xoyski G.Çiçerinə cavab notasında qeyd
edirdi ki, “Azərbaycan Respublikası gələcəkdə bitərəf dövlət olmasına baxmayaraq, öz
azadlığının və müstəqilliyinin hər cür xarici qəsdlərdən müdafiə edilməsində tamamilə