120
Beynəlxalq aləmdə yeni dünya nizamına geosiyasi yanaşma hazırda ən aktual
məsələlərdən biri hesab olunur. Dünya politoloqları beynəlxalq münasibətlər sisteminin
geosiyasi reallıqları sırasında qarşı-qarşıya duran dəniz (ABŞ və onun NATO üzrə
müttəfiqləri) və quru (Çin, Rusiya, Hindistan) sivilizasiyalarının mübarizəsini xüsusi
tədqiq edirlər. Tədqiqatçıların fikrinə görə, Çin, Rusiya və Hindistan öz aralarında nə
ideoloji, nə də ki, institusional bazis yarada bilmədiyi üçün dəniz sivilizasiyası bütün
dünyada, o cümlədən Avrasiya regionunda, Cənub-Şərqi Asiyada dominantlıq edir.
Yeni dünya nizamının səciyyəvi cəhətlərindən biri də qloballaşmanın getdikcə
daha çox vüsət alması, Qərb dəyərlərinin bütün dünyaya yayılması, dövlətlər, millətlər
və mədəniyyətlər arasında milli sədlərin silinməsi, dünyanın vahidləşməsi hesab olunur.
Elmi ədəbiyyatda “mondializm” kimi qiymətləndirilən dünyanın vahidləşməsi prosesi
ümumən obyektiv olsa da, əslində ABŞ və onun müttəfiqləri tərəfindən planlaşdırılan,
tənzimlənən və idarə olunan qlobal, lakin subyektiv bir prosesdir. Tədqiqatçılar
qloballaşmanı obyektiv proses kimi qiymətləndirsələr də, “mondializmi” (Qərb
dəyərlərinin bütün dünyaya qəbul etdirilməsini) dəniz sivilizasiyasının quru
sivilizasiyasına, ümumiyyətlə dünyanın bütün nisbətən az inkişaf etmiş dövlətlərinə zorla
qəbul etdirilən və fatal sonluqla bitəcək düşünülmüş ssenari hesab edirlər. Qərb
dəyərlərinin dünyanın qalan hissəsinə qəbul etdirilməsinin perspektivinə qiymət
verərkən, onlar gələcəkdə “vahid dünyanın ABŞ-ın böyümüş proyeksiyası kimi təşəkkül
tapacağı” proqnozunu verirlər.
Yeni dünya nizamı hərbi balans və kollektiv təhlükəsizlik məsələləri ilə bağlı BMT
çərçivəsində formalaşmış sistemin pozulması ilə şərtlənir. Vaxtilə dünyada hökm sürən
hərbi qüvvələr balansı, qarşı-qarşıya duran hərbi bloklar (NATO və Varşava Müqaviləsi
Təşkilatı) artıq öz yerini ABŞ və onun NATO üzrə müttəfiqlərinin ixtiyarına vermişdir.
Hazırda bu düşərgəni təmsil edən dövlətlər dünyanın bütün ərazilərinə hərbi müdaxilə
və hərbi təsir imkanlarına malikdirlər.
Yeni dünya nizamının ideoloji əsasları Qərb həyat tərzinin, Qərbin mənəvi
dəyərlərinin cəlbediciliyi, qabaqcıllığı, humanistliyi və liberallığı ilə əsaslandırılır. Bu da
qloballaşma, universallaşma və mənəvi inteqrasiya vasitələrilə bütün dünyada
insanların bu dəyərlərlə tərbiyə edilməsi, mənəvi cəhətdən qidalandırılması
istiqamətində istifadə olunur.
121
3. QLOBALLAŞMA VƏ DÜNYA SİYASƏTİNİN TRANSMİLLİLƏŞMƏSİ
XX əsrin sonlarından başlayaraq müasir beynəlxalq münasibətlərin əsas
tendensiyalarından biri olan qloballaşma prosesi dünya politoloqlarının müzakirə
mövzusuna çevrilməyə başlayır. Son on ildə qloballaşmaya həsr olunmuş yüzlərlə
monoqrafiyalar, dissertasiyalar yazılmış, elmi konfranslar keçirilmiş və dünya alimlərinin
iştirakı ilə geniş beynəlxalq müzakirələr təşkil olunmuşdur. Müzakirə olunan əsas
mövzular sırasında: qloballaşma nədir və onun reallaşmasında obyektiv və subyektiv
faktorların rolu necə müəyyən olunur; qloballaşma və milli dövlətlər, insan cəmiyyətləri;
qloballaşmanın insanlıq qarşısında dayanan iqtisadi, sosial, işsizlik, siyasi inkişaf
məsələlərinə təsiri; qloballaşmanı şərtləndirən, onun tendensiyalarını, perspektivlərini
müəyyən edən amillər və sairəni xüsusi qeyd etmək olar.
Qloballaşma həm də dünyanın siyasi və iqtisadi strukturunun dəyişməsi, dünya
siyasətinin transmilliləşməsi fonunda öyrənilir. Bəzi tədqiqatçılar hesab edir ki,
qloballaşma nə müstəmləkə imperiyalarının hökm sürdüyü və əmtəə-pul
münasibətlərinin əsasən imperiya çərçivəsində dövr etdiyi XVII-XIX əsrlərdə, nə də ki,
dünyanın iki blok arasındakı sinfi-ideoloji qarşıdurmasının mövcud olduğu dövrdə (XX
əsrin ortalarından başlayaraq müasir dövrə qədər) mümkün deyildi. Bunun üçün mütləq
formal da olsa, bərabərhüquqlu dövlətlərdən təşkil olunmuş indiki dünya sistemi və
bütün dünyaya ümumi maraqları altında vahid bir insan yaşayış sistemini (bütün daxili
tələbləri ilə) təbliğ və təşviq edən inkişaf etmiş mərkəzin (mərkəzi dövlətin) mövcudluğu
vacib idi. Bir sözlə, dünya iyerarxik sisteminin, yaxud sosialist-kapitalist qarşıdurmasının
mövcudluğu şəraitində qloballaşma mümkün deyildi.
Qloballaşmanın mahiyyətini və ona təsir edən əsas faktorları tədqiqatçılar
müxtəlif cür izah etsələr də, ən çox qəbul olunan ümumiləşmiş fikirlər aşağıdakı kimidir:
- qloballaşma tarixi və obyektiv prosesdir, xalqlar və dövlətlər arasında əsrlərlə
gedən beynəlxalq əmək bölgüsünün formalaşması və dərinləşməsi nəticəsində baş
vermişdir;
-
qloballaşma istehsal münasibətlərinin dəyişməsi və inkişaf etmiş ölkələrin yeni
sosial-iqtisadi münasibətlərinin vahid bir model kimi bütün dünyada tətbiqidir;
- dünya dövlətlərinin siyasi quruluşunda baş verən dəyişikliklər, sosializmin
süqutu nəticəsində ölkələrin demokratik transformasiyası, dünya siyasətinin
transmilliləşməsi qloballaşmanın əsas faktorlarından biri hesab olunur;
122
- qloballaşma insanların ağlının, qabiliyyətinin ümumiləşdirilməsi və bütün
bəşəriyyətə müxtəlif variantlar şəklində (alternativ seçim imkanları) təqdim edilməsidir;
- qloballaşma dünyanın və insanların universallaşması, həyat tərzi və
davranışların vahid standartlarının yaranması, istehsal, istehlak və ticarətin
unifikasiyasıdır;
- dünyanın vahid və universal mədəni dəyərlərlə, texnologiya, nəqliyyat
arteriyaları və vasitələrilə, informasiya, kommunikasiya, ticarət və maliyyə sistemi ilə bir-
birinə bağlanmasının nəticəsidir;
- dünyada yaranan ümumdünya əmtəə, xidmət və maliyyə bazarının,
iqtisadiyyatın, ticarətin, əmək resurslarının (işçi qüvvəsi də daxil olmaqla), kütləvi
informasiya vasitələrinin və demokratik institutların qloballaşması və s.
Hazırda dünyada elə vəziyyət yaranıb ki, transmilli korporasiyalar harada xammal
və ucuz işçi qüvvəsi mövcuddursa, orada istehsal, harada əlverişli bazar mövcuddursa,
orada satış təşkil edir (əmək resurslarının qloballaşması). Yaxud ümumi maraqlar və
ünsiyyət üzrə təmas klubları, gənclər, qadınlar, ayrı-ayrı peşə sahibləri üçün nəzərdə
tutulan və bütün dünyanı əhatə edən televiziyalar, radiolar, jurnallar, musiqi, moda
mərkəzləri yaradılır. İnformasiya və kommunikasiya texnologiyalarının indiki vəziyyəti
bütün dünyanın fikir və düşüncələrini birləşdirmiş və standartlaşdırmışdır. Planetimizdə
elektronikanın yaratdığı imkanlar (internet vasitəsilə ticarət, pul köçürmələri,
müqavilələr bağlanması və s.) insanların qarşılıqlı ünsiyyətində əsl inqilabi çevriliş etmiş
və bütün milli sədləri dağıtmışdır.
Qloballaşma prosesində ABŞ dünya nizamına rəhbərlik etməklə, hegemon dövlət
rolunu saxlamaqla yanaşı, ciddi müqavimət və rəqabətlə qarşılaşır. Məsələ ondadır ki,
bu prosesdə Amerikanın müttəfiqi olan Avropa ölkələri və Yaponiya da müstəqil tərəf
kimi çıxış etməyə meyl göstərir və qloballaşma prosesində ona ciddi rəqabət yaratmağa
çalışırlar. Bu hal özünü xüsusən, qlobal iqtisadiyyatda, regionlaşma və regional
inteqrasiyada, yeni-yeni enerji daşıyıcılarına və xammal, satış bazarlarına yiyələnməkdə
daha qabarıq göstərir. Bu sahələrdə ABŞ və Avropa İttifaqı ilə yanaşı, Asiya dövlətləri -
Çin, Cənubi Koreya, Tayvan, Latın Amerikası, Afrika və Şərqi Avropa ölkələri də öz
iddialarını, fərqli iqtisadi maraqlarını gizlətmirlər.
Qloballaşmanın tarixinə fikir versək görərik ki, İkinci dünya müharibəsindən sonra
(1945) bütün dünyada eyni zamanda iki proses cərəyan etməyə başlayır: 1)
müstəmləkə imperiyalarının dağılması və yeni-yeni müstəqil dövlətlərin meydana
çıxması, planetin milli sərhədlər çərçivəsində bölünməsi; 2) milli dövlətlərin bir-birinə
Dostları ilə paylaş: |