112
problemlərin (ekoloji, informasiya texnologiyaları, atom
enerjisi və ondan istifadə
problemləri, ümumsağlamlıq məsələləri və s.) meydana çıxması və bu istiqamətdə
fəaliyyətlərin koordinasiyaya ehtiyacı, müstəmləkə sistemlərinin dağılmasından sonra
yaranmış yeni dövlətlərin dünya siyasətinə qatılması və onların gələcək fəaliyyətinin
istiqamətləndirilməsi və s. səbəblər də BHAT-ların yaranması və inkişafını şərtləndirən
amillər kimi qiymətləndirilir.
BHAT-lar müasir beynəlxalq münasibətlərin mühüm amili kimi dövlətlərarası
əlaqələrin müxtəlif istiqamətlərini əhatə edən – siyasi, iqtisadi, hərbi, sosial, mədəni,
informasiya, ekoloji və s. problemlər ilə məşğul olurlar. Bunların sırasında da BMT,
ATƏT kimi universal təşkilatlarla yanaşı, Beynəlxalq Səhiyyə Təşkilatı (BST),
Beynəlxalq Atom Enerjisi Agentliyi (BAEA), YUNESKO (Mədəni İrsin Qorunması üzrə
Beynəlxalq Təşkilat) və s. kimi konkret sahələrlə məşğul olan funksional BHAT-lar
mövcuddur. Bu təşkilatlar getdikcə milli dövlətlərdən öz asılılıqlarını azaldaraq, müstəqil
şəkildə fəaliyyət göstərir və beynəlxalq aləmdə əhəmiyyətli təsir gücü olan mərkəzlərə
çevrilirlər. Hətta BHAT-ları təsis edən milli dövlətlərlə bu təşkilatların maraqları üst-üstə
düşməyə bilir və bu halda BHAT-ların çıxardığı qərarlar dövlətlər tərəfindən qəbul edilir.
Bundan başqa, ərazi prinsipi ilə yaradılmış regional BHAT-lar da mövcuddur ki, bunlar
da həm universal (Afrika Birliyi Təşkilatı, Avropa İttifaqı, Müstəqil Dövlətlər Birliyi, İslam
Konfransı Təşkilatı və s.), həm də funksional (məsələn, Qara Dəniz İqtisadi Əməkdaşlıq
Təşkilatı, NATO, Avropa Şurası və s.) xarakter daşıyırlar.
Hazırda BHAT-lar dövlətlərin beynəlxalq proseslərdə iştirakını təmin etməklə
yanaşı, danışıqlar yolu ilə müxtəlif ölkələrin mövqelərinin uzlaşdırılması, üzv dövlətlərin
daxili və xarici siyasətində əsas prinsiplərin müəyyən edilməsi, onlara əməl olunmasına
nəzarət, qlobal proseslərin qarşısının alınması məqsədilə üzvlərin səylərinin
birləşdirilməsi və s. məsələlərlə yaxından məşğul olurlar.
BHAT-lar beynəlxalq münasibətlərin vəziyyəti, tendensiyası və əsas
problemlərinə müvafiq olaraq yeniləşir və dərinləşir. Əgər soyuq müharibə və ideoloji
qarşıdurma dövründə bu qurumlar o dövrün reallıqları çərçivəsində öz fəaliyyətini
planlaşdırırdısa, ikiqütblü sistemin dağılmasından sonra öz iş istiqamətini dəyişmək
məcburiyyəti qarşısında qaldılar. Yeni dünya nizamının əsas problemi hesab olunan
beynəlxalq terrorizm, etnik separatçılıq hərəkatlarının güclənməsi, iqtisadi və sosial
bərabərsizliyin artması, demokratiya, demoqrafiya və miqrasiya məsələləri, insan
hüquqları kimi dəyərlərin aparıcı tendensiyaya çevrilməsi və s. kimi müasir proseslər
BHAT-ları da öz fəaliyyətlərinə yenidən baxmağa sövq edib.
113
Hazırda dünya ictimai rəyində BHAT-larla milli dövlətlərin qarşılıqlı səlahiyyət və
mənafe fərqləri geniş müzakirə olunur. BHAT-ların tələblərinin bəzən milli dövlət
maraqlarına zidd olması, dövlətlərin daxili həyatına müdaxilə etməsi və s. kimi
problemlər, dəyişən dünyanın tələblərinə müvafiq olaraq BHAT-ların yeniləşməsi və
müasir dünya nizamına transformasiya olunması zərurəti dünya siyasətçilərini və
politoloqlarını düşündürən əsas məsələlərdəndir. Məsələn, son illərdə Yaponiya və
Almaniya kimi böyük və qüdrətli dövlətlər BHAT-ların, xüsusən BMT kimi təşkilatların
yenidən qurulması, bu dövlətlərin statusuna bir daha baxılması kimi tələblər qoyur.
Digər tərəfdən, Afrika, Latın Amerikası və müsəlman dünyası da BMT Təhlükəsizlik
Şurasında təmsilçilik tələb edirlər. Eyni zamanda, BHAT-larda ayrı-ayrı dövlətlərin
mövqeyinin və təsir gücünün fərqli olması, bu təşkilatların çıxardığı qərarların icrasında
yol verilən müxtəlif standartlar və s. kimi məsələlər də müasir dövrün əsas problemi kimi
müzakirə olunur. Əslində böyük dövlətlər, xüsusən ABŞ, Rusiya, Çin, Fransa və
İngiltərə kimi BMT Təhlükəsizlik Şurasının daimi üzvləri BHAT-ları istədikləri kimi
yönəldir, onların fəaliyyətini öz maraqlarına uyğunlaşdırırlar. Bu dövlətlər BHAT üzvü
olan digər dövlətlərin problemlərinə, milli mənafelərinə yalnız öz maraqları
çərçivəsində yanaşırlar.
Müasir beynəlxalq münasibətlərin əsas və yeni aktorlarından biri də qeyri-
hökumət təşkilatlarıdır (QHT). Bu təşkilatlar həm beynəlxalq, həm də lokal statusla
BHAT-larla bərabər müasir dünya siyasətində mühüm mövqeyə malikdirlər.
Əgər 1950-ci ildə beynəlxalq münasibətlər sistemində cəmi 100 dövlət,
hökumətlərarası və dövlətlərarası təşkilat iştirak edirdisə, 1996-cı ildə onların sayı 300-
dən artıq olmuşdur. 1952-ci ildə bu sistemdə 1000, 1996-cı ildə isə 6000 qeyri-hökumət
təşkilatı iştirak edir. Hazırda qeyri-hökumət təşkilatları beynəlxalq və milli siyasətin
formalaşması və həyata keçirilməsində, qlobal və lokal məsələlərin həllində nəinki
iştirak edir, həm də dövlətləri, hökumətlərarası və beynəlxalq təşkilatları onlarla
hesablaşmaq məcburiyyətində qoyur. Müasir dünyada qeyri-hökumət təşkilatları, bir
qayda olaraq, öz sahə maraqlarından çıxış edərək bəzən nəinki ayrı-ayrı dövlətlərə,
ümumən beynəlxalq aləmə də ciddi problemlər yaradırlar. Məsələ ondadır ki, BHAT-ları
beynəlxalq hüquq normaları, qarşılıqlı vəzifə və öhdəliklərlə müəyyən qədər idarə
etmək mümkün olduğu halda, qeyri-hökumət təşkilatlarının fəaliyyətini tənzimləmək və
yönəltmək çox çətindir. QHT-lər BHAT-lara nisbətən sayca daha çox, daha
rəngarəngdir və daha geniş mənafelərə xidmət edirlər. Müasir politologiyada QHT-lərin
təsnifatında daha çox beynəlxalq qeyri-hökumət təşkilatlarını (BQHT), transmilli