124
durub getdi və dala baxa-baxa gülümsünüb deyirdi:
–
Elə olar, oynamazsan, çünki gələn-gedən var, baxır görür.
Hımm... Xəlvətdə olsa min iş törədərsən. Sizin mən dabbağda
gönünüzə bələdəm!
Belə-belə, dəli Səməd qazının qarasına bir az söylənib
bazarın ortası ilə ötub getdi. Bir az getməmişdi, bir-iki uşaq
onun dalınca yüyürüb çığırışdılar:
– Ay dəli Səməd! Ay dəli Səməd!
Səməd bunlara heç etina etməyib, ancaq dodağında
mırıldandı:
– Axmaqlar sevinirlər ki,
oğul əkmişik, bu da oğul!
Mənim qardaşım da deyir ki, Səmədə çörək verirəm, heç
mənim ayağıma durmur; Molla Qiyas da dəli Səmədə bir
çərşənbə, bir şənbə dua yazsa dəli yaxşı olar. Xa! Xa! Xa!..
Axmaq özü dəli olub, mənə deyir.
Bazarın başında yoğun və qırmızıbirçək bir baqqal «buy,
dəli Səmədə bax!» – deyib, ona bir çürük badımcan salbası atdı.
– Eşşək, qoca eşşək, get iylənmiş qatığını satmağa! –
Baqqala belə cavab verib, dəli Səməd adamların arasında itdi.
***
Yay girəndə Səmədin dəliliyi şiddətlənirdi. Görürdün, yol
gedəndə gözləri çanağından çıxıb oynayır, danışığı artıb,
məzmunsuz və dağınıq
kəlmələrdən ibarət olurdu; əxlaqı
pozulub, dinənə söyməmiş, acığını tutduranı döyməmiş
olmurdu. Evə gec-gec gələrdi və evdəkilərlə də əvvəlki xoş
rəftarını unudub, pis müamilədə olardı; qardaşı uşaqlarını
döyüb qardaşına dəqiqədə min söyüş verərdi. Ayağını
bağlardılar, çörək verməyib dama salardılarsa da, yenə Səmədin
xasiyyətinə təsir etməzdi; əvvəlki halətdə qalıb, ağzına gələni
söylərdi, əlindən gələni edərdi. Şəhərdə şikayət günü-gündən
artırdı. Deyirdilər: «Dəlinin yiyəsi olar, bilmirik Hacı Qara dəli
qardaşına niyə təhər çəkmir?!» Hacı Qara da gəlib dəli Səmədi
tut ağacına bağlayıb, tuburqu ilə döyməyə başlardı. Sübhdən
axşama kimi Səməd ağaca sərikli çığırardı, bağırardı və ağzına
125
gələni də qardaşına deyərdi.
Bir də görürdün, döyüldüyü yerdə
birdən gözləri yaşlı qəhqəhə çəkib gülürdü, məzəli-məzəli
qissələr nağıl eləyib, eşidənləri də gülməyə vadar edirdi.
Çığırmaqdan xırıldayan səsi ilə:
– Deyirlər «dəliyə qələm nist», pəs mən dəli olmaya-
olmaya bu axmaq məni niyə tutub bu ağaca səriyib? Xa-xa-
xa!.. Vallah, məlun lap dəli olub! Bircə saqqalına bax, başına
bax–dəccala oxşayır.
Sözlərini qurtaran kimi Səməd yenə qaş-qabağını sallayıb
sükuta gedərdi. Sonra yenə simasında bir təbəssüm görünüb,
yavaş-yavaş gözləri daralardı və dişləri ağarıb qəhqəhə ilə
gülərdi. Ondan, başlayıb öz-özünə danışardı, əvvəl aram ilə,
sonra bərkidərdi və axırda gücü gəldikcə çığırıb, yenə sükuta
gedərdi. Bir də başlayardı:
– Deyir dədədən qalma şeyləri əlindən
alaram və sonra da
səni ağaca bağlayıb döyərəm... Dədədən qalma... Dədə! Xa-xa-
xa!.. Dədə... də.... də xa-xa!.. Nə ... nə!.: hımm! ... Nənə ey,
yazıq nənə!
«Nənə» sözü Səmədə artıq təsir etdi, qəmli gözlərini yerə
dikib, belə hönkürtü ilə ağladı ki, gözlərinin yaşı pərişan
saqqalı ilə axıb döşünə töküldü.
***
Dəli Səməd evdən qovulub, küçələrdə dövran sürürdü.
Yağış vururdu, qar vururdu, acı soyuqlar kəsirdi və təbiətin
belə – belə hücumlarına bir dəfə də olsa, müqavimət etmirdi,
bolluca gülürdü, bolluca ağlayırdı və öz-özünə uzun-uzadı
danışırdı. Gündüzlər dükanlar qabağında tapdıqları ilə qarnını
doyurub, gecələr də bir guşəyə çəkilirdi. Xərabə damlarda,
axurlarda cındır libasına bürünüb yatırdı.
Sabahlar toza-torpağa
bulanmış yenə küçəyə çıxırdı. Yenə uşaqlar tökülüb hərə bir
tərəfdən onun cırıq arxalığından yapışıb çığırışırdılar: «Ay dəli
Səməd! Ay dəli Səməd!» Səməd əlini daşa, kəsəyə atıb uşaqları
qovalardı və öz-özünə danışa-danışa salıb gedərdi.
Daha Səmədin əvvəlki müdrikliyi, irəliki cəldliyi
126
qalmamışdı; zəmanənin gərdişi, fələyin vəfasızlığı, çovğun,
aclıq, rahətsizlik Səmədin belini büküb, saqqalını ağartmışdı. O
əcaib hal, dəlinin əksini göstərən siması sınıb əzilmiş bir lövhə
parçasına dönüb heç zad bəyan etmirdi. Bircə alnının
qırışlarında ağır məişət izi müşahidə olunurdu. Bu axır dəfə idi
ki,
mən dəli Səmədə rast gəldim, daha sonra nəzərimə keçmədi.
Bir də qışın çovğunlu bir gecəsində zarıltısı sübhə kimi
qulağımdan kəsilmədi:
«Ay balası çölə düşən nənə vay» – deyib, aramsız
ağlayırdı. Onun sabahı günü eşitdim ki, Səməd çəpərin altında
donub ölüb.
Bu hadisədən indi çox-çox illər keçir.
1911
127
DİNAYRI QARDAŞLAR
Qürbət bir şəhərin bazarında iki adam qabaq-qabağa gəlib
bir-birinə zənn ilə baxdılar. İkisi də əvvəl duruxdu, döyükdü və
sonra nifrətəngiz bir heyrətdə donub qaldılar.
– Pa, allah saxlasın, Kəblə Məhəmməd kirvə! Sən hara,
bura hara?
– Allah saxlasın, usta Karapet! Kefin yaxşıdırmı? Uşaqlar
da salamatdırlarmı?
«Uşaqlar» sözü usta Karapeti sükuta apardı.
Biçarə erməni
yaşarmış gözlərini Kərbəlayı Məhəmmədə döndərib, dolğun
səslə:
– Eh... allah mərdimazarın evini yıxsın! Heç uşaqları
yadıma salma! Uşaq da getdi, arvad da getdi, ev, mülk – hamısı
getdi, indi bu qürbət şəhərdə ağsaqqal vaxtımda bir tikə
çörəyin dalınca düşüb gəzirəm.
– Ay usta, o illər getsin gəlməsin! Yadıma salma. Mənim
də başıma az iş gəlmədi! Mən də evdən-eşikdən oldum,
oğlanlarım qırıldı, bir qızımı öldürdülər, bir balaca uşağım
yandı... Mən də indi bu qürbətdə bir tikə çörəkdən ötrü imanımı
satıram...
Usta Karapetlə Kərbəlayı Məhəmməd bir-biri ilə lap
qədimdən aşna idilər. Usta gözünü açıb Kərbəlayı Məhəmmədi
erməni bazarında baqqal görmüşdü, kərbəlayı da ustanın
müsəlman arasında dərzi olmağını çoxdan bilirdi. 1905-ci ildə
erməni-müsəlman davasında Kərbəlayı Məhəmməd erməni
məhəlləsində qalmışdı; Karapet də müsəlman içində. İki tərəf
də əsirlərin ələ düşənini qırıb tərk etmişdilər, ona görə
ermənilər Kərbəlayı Məhəmmədin və müsəlmanlar da usta
Karapetin ölməyinə heç şübhə etmirdilər. Bunun üçun də bu iki
həmşəhərli birbirinə rast kəldikdə heyrətə dalıb qaldılar.
Bir az sükutdan sonra Kərbəlayı Məhəmməd sadəlövh bir
maraqla başladı:
– Ay usta, sən deyirsən arvaddan, uşaqdan oldum; mən hələ