108
HACI
Həyətdə şirin dəstəmaz almaqda idi.
Məxrəcdən gəlmə
«salavatlar» axşamın sakitliyində qonşulara dağılıb, hacını
səmimi «afərin»lərə nail edirdi. Birdən darvazada tappıltı gəlib,
ahəstə dəqqülbab oldu. Hacı buna əvvəlcə zərrəcə də etina
etməyib dəstəmazı ikmala yetirdi və sonra «ayətəl-kürsü»
qiraət edə-edə darvazaya rəvan oldu. Hacı darvazanı açan kimi
iki qıvraq geyimli adam bir böyük parça tayını içəri saldılar.
Hacı acıqlı, lakin qayət yavaş səslə:
– Bu saat bunu buradan aparın, mən oğurluq malı almağı
daha tövbə eləmişəm.
Oğrular hacının üzünə təhqiq ilə ətfi-nəzər edib yavaş və
təəccüblü dedilər:
– Ay Hacı, on beş ildir ki, bizim peşəmiz sənə oğurluq mal
satmaqdır. Elə hər dəfə sən bizə deyirsən «tövbə eləmişəm»,
yenə alırsan...
–
Onda
əlacım kəsilib alırdım: gətirib gecənin yarısı həyətə
salırsınız, nə deyim?
– Bu səfər də al, sonra görək nə cür olur.
–
Deyəsən almayacağam, pulum yoxdur.
–
Hacı, özün bilirsən ki, ipək parçanın topuna iki manat da
versən verəsiyik. Belə malı qapı-qapı gəzdirmək olmaz ki...
–
Sövdənin gödəyi, – oğruların sözlərindən bir az fikrə
gedib, hacı dedi, – ipək parçanın
topu bir manat, o biriləri də
ipək ayağından hesablarıq. Razısınız əgər, gətirin evə, açaq
baxaq, yoxsa götürün gedin. Allah sizə xeyir versin!..
Oğrular bir-birinin üzünə baxıb hacıya:
– Ay hacı, axı insaf da bir yaxşı şeydir, elə ver barı bir şey
düşsün. Canımızı ağzımıza alıb, gecə sabaha kimi yuxu
yatmırıq, dükanları güdürük.
–
Mən daha oğurluq mal almağı tövbə eləmişəm, bunu da
gətiribsiniz deyib alıram.
Sözlərini qurtarıb, hacı bunlardan üzünü döndərdi və
109
başladı «ayətəl-kürsü» qiraət eləməyə.
Oğruların əlacı kəsilib, hacı deyənə razı oldular. Tayı otağa
gətirib açdılar. Hacı pulları hesab etdikcə oğrunun biri
gülümsünüb deyirdi:
– Hm... on beş ilin oğrusu olasan, əlindən dünyanın malı,
şeyi, daşqaşı, qızılı gəlib gedə,
özün də bir şey yiyəsi
olmayasan!..
Hacı oğruların pulunu verib, yola saldı və sonra gəlib
parçaları «guman gəlməyən» yerlərdə xakrizlədi.
Hacının dəstəmaz suyu hələ qurumamışdı ki, səccadəni
təfriş edib, üzünü qibləyə çevirdi və əllərini qulağının dibinə
qoyub, pak dil və müqəddəs əqidə ilə namaza şüru etdi. Bu
əsnada oğurluq malı «əridib», hasil olan pulu ağır faizlə xırda
dükançılara vermək, oğruların onun hacılıq ləğəbi ilə müləqqəb
olmağına səbəb olmaqları bilmərrə fikrindən çıxmışdı. Əhli-
təfrid kimi dünyadan aralanıb, allahla məşğul idi, ruhu və qanı
allah eşqi ilə dolmuşdu...
Hacının uca və xoş sövt ilə namaz qılmasına yenə qonşular
sənaxan idi.
1911
110
«YENİ FARS»
Ağa Əli tərəqqipərvər iranlıların ən qeyrətli, ən məsləkli
çavanlarından idi. Cəmi vücudu İranın təməddün,
nicat və
səadət fikri ilə dolu idi. Kantorların birində az məvacibə qulluq
edən cavan həm ailəsini dolandırıb, həm də milli vəzifəsini ifa
edirdi. Qəzetlər yazıb bir dəqiqə nəfi-qiraətdən çəkinmirdi.
Görürdün iranlı məktəblərində şura olanda camaata bir səs
düşdü; hazirun bir-birinə müraciətlə: «Ağa Mirzə Əli gəldi»
deyib, gözlərini məclisin yuxarısına dikirdilər. Ağa Əli çıxdı...
gözləri fikirli, siması ciddi, zehnində guya bir ağır fikir tutub,
ehmal tərpənir ki, tökülüb məhv olmasın.
Ağa Əli irəli yeridi və camaatı bir nəzərdən keçirib, ağzını
açdı... Məclisdə adətdən kənar sakitlik bərpa oldu. Bir kərbəlayı
gözlərini qırpmağa cəsarət, bir məşədi öskürməyə cürət etmədi.
Natiq ağzından dürr tökürdü, sədəf səpirdi.
Xoş sövtlə söylənən
sözlər təkcə-təkcə almas danələri kimi düşüb göz şüşələrinə
rəxnə salırdı. Odlu yaşları yığıb toplamağa bir hacı və bir molla
dəsmalı qadir ola bilmirdi. Natiq İranın əsəfəngiz hali-
hazirəsini təsvir edirdi. Qabil, kamil, məharətli bir kəlam ilə
geniş aydın bir lövhə cızıb, hazirunun önünə qoydu: bir tərəfdə
məmurlar çamaatın qanını sorub, özləri üçün imarətlər tikirlər,
bir tərəfdən ruhanilər öz cibi xatirəsinə «laylay» deyib, xalqı
cəhalətə, xabi-qəflətə sövq edirlər; seyidlər lotuluğa dini bir
rəng verib, müftəxorluğa meydan açırlar, bəylər, xanlar, ağalar,
quldurlar... zor və güclərindən istifadə edib, əsnafa olmazın
zülm, əziyyət və məşəqqət edirlər... İran
bir zülm, bir
vicdansızlıq dəryasına dönüb, vətən övladını boğub məhv
edir!..
Budur, bir ayrı lövhə–cəmi İran arvadları matəm libası
geyib, öz günlərinə ağlayırlar. Bilümum mənbəi-tərbiyə və
bilxüsus mənbəi-nicati-müslimin ədd olunan analıq tapdalanıb
əzilir. Analar təbii vəzifələrini itirib, aləti-kef, aləti-ticarət
olublar. Kamil ikən–naqis, baliğ ikən–səbi ədd olunub,
111
qəyyumlar riyasəti-cahilanəsinə veriliblər. Bunlar arvadları
xırda vaxtından ərə verirlər, döyürlər, söyürlər, kəbin altında
neçə illər saxlayırlar, çürüdürlər. Ömürləri zəhərlənir,
şəxsiyyətləri təzyiq altında itir... Arvadlarımızın ictimai
vəziyyətləri fənalaşdıqca uşaqlarımız da tərbiyəsiz
böyüyəcəklər; tərbiyəsizdən
də vətən mühafizəsi, millət qeyrəti
gözləmək olmaz!.. İran batır! İran fövt olur gedir! O qoca İran
bu gün-sabah əcnəbilər arasında təqsim olunmağa hazırlanır...
Natiq nitqində davam edirdi. Yenə əvvəlki kimi xoşsövt,
sözləri aydın, simasında ciddi bir səmimiyyət, qəlbi bir iztirabi-
milli ilə dolu. Hazirun da əvvəlki minval ilə sakit, samit,
gözləri natiqdə, qulaqları dürdanə yığmaqda.
Natiq qurtardı, son sözləri: «Yaşasın İran! Ölsün millət
qanını soran məmurlar» məclisdə top kimi açılan alqışlara
səbəb oldu. Hazirun birbəbir natiqin əlini sıxıb, izhari-riza və
məhəbbət etdilər, belə də şad,
belə də bəxtiyar evlərinə
dağıldılar.
Ağa Əlini tanımayan yox idi, onun millətçiliyi hamıya
məlum idi. İran və Qafqazda bir qəzet yox idi ki, onun
nitqlərini dərc edib, oxucularına məlum etməsin. Tehranda yeni
fars mühafillərində Ağa Mirzə Əlinin fəaliyyətinə artıq məna
verilib, böyük ümidlər bağlanırdı.
Bir gün Ağa Əlini konsul çağırıb. Xanviran şəhərinə rəisi-
nəzmiyyə təyin olunmağını xəbər verdi. Üç gün çəkmədi Ağa
Əli kantordan istefasını verib, yığışıb İrana getdi.
***
Bir il keçdi. Bu bir ildə Ağa Əlidən bir aydın xəbər bilə
bilmədik. Hərdən Xanviran şəhərindən gələn qasidlər xəbər
verirdilər ki, Ağa Əli xan dalında yüz kazak, hakimlik eləyir:
basır, kəsir, öldürür, döyür; cəmi şəhər və ətrafı ona tabedirlər;
«Öl» desə, borclarıdır ölsünlər. Özünün də yaxşı imarəti,
nökər-naibi, fərraşları... kişinin cəlalı var!
Bir də rəfiqlərindən
biri deyirdi ki, Ağa Əli xan yazıb
məndən yaranal sırması və şaşka istəmişdi, mən də köhnə paltar