219
Ay Əşrəf, gəl sağ gününə ağlama,
Ağlın olsun-“ağ” gününə ağlama.
Bu qisası qiyamətə saxlama,
Qardaşım hey, yurddaşım hey, balam, hey!
***
2000
BİR ƏL QAPIMIZI DÖYƏ QƏFİLDƏN
Ürəyimin köksündən uçmaq həvəsi gələ,
Şən nəğmələr dindirə qayaları, daşları.
Kövrək, həzin anamın titrəyən səsi gələ;-
“Şəhərdən Əşrəf gəlib, başında yoldaşları”!
Üstündən buludlar dağılmış ola,
Bir günlük əlimə düşə kəndimiz.
Yenə dostlarımla dolub-boşala
Günəşdən asılan şüşəbəndimiz.
Kövrək xatirələr əlimdən tuta,
Gözünə nur gələ bəzi dostumun.
Bir gün eşidəm ki, Ostayırda da
Məzarı çat verib Feyzi dostumun.
Yellər bu xəbəri yaya qəfildən,
Baxam ki, yollardan duman çəkilib.
Bir əl qapımızı döyə qəfildən,
Açam ki, atamın ruhudur gəlib.
***
May 2002
220
QARABAĞ
Ərənləri şəhid olub davada,
Nə ölməyib, nə itməyib Qarabağ.
Aman Allah! -əli qalıb havada,
De, kimə əl uzatmayıb Qarabağ.
Qayaları yalçınların yalçını,
Qan ağlayır Xocalısı, Laçını.
Anaları yolub töküb saçını,
Ölənləri yubatmayıb Qarabağ.
Qızıl güllə kürəyimi deşdimi,
Ürəyimdə dəfn eylədim eşqimi.
Sanıram ki, mənim kimi heç kimin
Gözlərini sulatmayıb Qarabağ.
Dərdimizin nalə çəkən ozanı
Görə-görə, baxa-baxa usanır.
İndi bildim həsrət niyə uzanır-
Arxamızca su atmayıb Qarabağ.
***
221
MƏZƏN OLSUN AY ERMƏNİ
Torpaq mənim, yer mənim,
Tüstüsü ərşə qalxan,
Yanan kəndlər mənimdir.
Mənim üçün darıxan
O sərhədlər mənimdir…
Bir fikir ver adına-
Adın da türkdən gəlir.
Qışın oğlan çağında
Odun da türkdən gəlir.
Tarixin yaddaşından
Türkün adını pozmaq
Sənə gəlməsin asan!...
Bir özünə yaxşı bax-
Sən dünyanın çiynində
Dilənçi torbasısan!...
***
2011
222
GÖYNƏYİR
Gün batan tərəfə baxa bilmirəm,
Qırılan ömrümün köçü göynəyir.
Qarlı zirvələrə qalxa bilmirəm,
Yaşlı gözlərimin içi göynəyir.
Günəşli günlərdə, yağışda,çəndə,
Xəyalım dolanıb gedir o kəndə.
Əlvan çiçəklərin hər yaz gələndə
Başının üstündə tacı göynəyir.
O nədir-qəlbimi yandırıb-yaxan,
O kimdir-həsrətlə yollara baxan...
Ərləri şəhidlik taxtına qalxan
Cavan gəlinlərin saçı göynəyir.
Vətən harayına çatan əsgərin,
Özünü odlara atan əsgərin,
Şəhid məzarında yatan əsgərin
Bəlkə Xocalıda qıçı göynəyir.
Kövrək arzularla dolur sinələr,
Pozulur o növraq, o ənənələr.
Qovrulur, sızlayır qoca nənələr
Ürəkdə min ağrı, acı göynəyir.
Göylərə əl açıb Allah deyənlər,
Hər sözün başında sabah deyənlər,
Günləri əliylə itələyənlər,
Səhəri gözüylə açır, göynəyir.
223
Zülmət gecələrim səhər gözləyir,
Səpdiyim toxumlar bəhər gözləyir.
Gözüm “Xəbərlərdə”xəbər gözləyir,
Ürəyim min yerdən sancır, göynəyir.
Bir də əlim çatmaz ötən çağlara,
Dodağım həsrətdir buz bulaqlara.
Könlüm qanadlanır o torpaqlara,
Qolum o yerləri qucur, göynəyir.
Dünyanın özündən əzəl Qarabağ,
Düşmən tapdağında xəzəl Qarabağ.
Gözəl sözündən də gözəl Qarabağ
Yanır, tüstülənir, uçur, göynəyir.
Sarayı olanlar yuvasız qalıb,
Əri əsir düşən gəlin, qız qalıb..
Bizim binada da atasız qalıb,
Körpə balaların üçü göynəyir.
Bağrı şan-şan olub dilsiz daşın da,
Vətən savaşında, yurd savaşında.
Kövrək anaların doqqaz başında
Təndiri göynəyir, sacı göynəyir.
Həsrətdən gözləri dolan kəndlərə,
Bənizi gül kimi solan kəndlərə,.
Yanıb qar altında qalan kəndlərə,
Günəş də nurunu saçır, göynəyir.
224
Hayandan başlayır, hardadır Vətən,
Gör neçə ildir ki, dardadır Vətən.
“Qarabağ”kəlməsi dilində bitən
Qardaş sızıldayır, bacı göynəyir.
Ay Əşrəf, taleyim hey döyür məni,
Dağılmış bir səhman gözləyir məni.
Atamın məzarı səsləyir məni,
Mənimçün burnunun ucu göynəyir.
***
1997
A KƏNDİM
Əlim ətəyindən tutar, üzülməz,
Yolların kəsilər, ümid kəsilməz.
Sənsizlik dözülməz dərddir, dözülməz,
Dözüb yaşayıram sənsiz, a kəndim.
Sən idin pənahım xeyirdə, şərdə,
Qorxuram görməyəm üzünü bir də...
Tanış döngələrdə, dost küçələrdə
Azıb yaşayıram sənsiz, a kəndim.
Başsızlar düşmədi başa şeirimi,
İş açıb tikdilər işə şeirimi.
Havaya, torpağa, daşa şeirimi
Yazıb yaşayıram sənsiz, a kəndim.
De necə tablaşım, necə dözüm mən,
Anamdan əmdiyim gəldi gözümdən.
Tanışdan-bilişdən, hətta özümdən
Küsüb yaşayıram sənsiz, a kəndim
Dostları ilə paylaş: |