140
gözlərimə ziya verərdi, istərdim tuğrayi-hümayun kimi təvil' olsun. O qərəzlə
belə tul yazdım. Həsrətli gözlərindən öpürəm, qardaşım. Təvəqqə edirəm ki, cavab
gecikdirməyəsən, vəssəlam.
Xeyirxahın Seyid Əzim Seyid Məhəmməd oğlu
fi 25 şəvval sənə... flan...
Ağa məktuba cavab verəndən sonra mütləq Ərəbçəltikciyə getməyi, şəxsən
Sonanı görməyi qərarlaşdırdı.
O, Mahmud ağadan Əlyar bəyin üstünə kağız alıb getmək, Sonanın əhvalından
xəbər tutub Tərlanın yanan ürəyinə bir parç su səpmək istəyirdi...
...Şair bazara girəndə Qapaqlı ilə Hacı Qədir dükanlarının qarşısındakı kiçik
meydançada qələbəlik idi. Adamlar dairə vurub nəyə isə tamaşa edirdilər.
Adamların nisbətən sakit dayanmasından anladı ki, meydandakı tamaşaçılar xoruz,
qoç və ya bildirçin döyüşməsinə tamaşa eləyənlər deyil. O yaxınlaşıb dəstəyə
qoşuldu. Tanıyanlardan bir neçəsi yol verdi, irəli boylandı. Meydanda iki dərviş
durmuşdu. Hələ səs çıxarmırdılar. Ya çıxışlarının əvvəli idi, ya da özü fasiləyə
gəlib çıxmışdı. Dərvişlərin geyimi bir-birinə çox bənzəsə də özlərində heç bir
oxşarlıq yox idi. Sağdakı qoca nəzərə gələn, ucaboy, qədd-qamətli kişi başındakı
şiş bərk, uzun ətəkli köhnə xirqə ilə daha da uca görünürdü. Əlində təbərzin və
qolunda keşkül var idi. Onunla üzbəüz dayanmış xirqəsi ayaqlarına dolaşan dərviş
cavan idi. Əlindəki təbərzini ucaya qaldırıb pəncələri üstünə qalxmış, müsahibinə
cavab verməyə hazırlaşırdı. Əvvəlcə yaşlı dərviş oxumağa başladı. Şiələrin birinci
İmamı Əlinin şənində oxunan qəsidə köhnə olsa da, dərvişin ləfzi gözəl, səsi yaxşı
idi. Ürəkdən, eşqlə oxuyurdu. Arabir aram olanda, cavan dərviş babət səsilə ona
cavab verir, qəsidəni kəsildiyi yerdən davam etdirirdi.
Adamların cərgəsində durmuş bala dərviş isə kiçik kəşkülünü sədəqə və ianə
toplamaq üçün hazır saxlamışdı; işarə, fürsət gözləyirdi.
Füzuli qəsidəsində imamın təriflərindən əvvəl verilən dərin fəlsəfi parçalar şairi
sevindirdisə, "Şahi-Mərdan", "Mürtəzanın lütfü qəhri" haqqındakı misraları
dinlədikcə təəssüflənirdi. "Böyük Füzuli, Əlini az qala Allah mövqeyinə qaldıran
bu misraları sənə yazdıran nə olub? Mənim kimi külfət dərdi, ruzi möhnətimi?
Doğrudanmı sən özün də onu Süleyman, Adəm, İsmayıl, Davud, Loğman, Nuh və
kainatın ən
141
böyük möcüzələrindən yüksək və qüdrətli bilmisən? Buna inanmısan? Bir bax; gör,
sənin sözünün qüdrətilə bədbəxt həmvətənlərin necə də baş və sinələrinə döyüb
ağlayırlar? Bilərəkdənmi onları ağladırsan, ya həqiqi imanlamı yazmısan bu
misraları? Qələminin gücünəmi ağlayırlar, sözünün təsirinəmi, ya imanınmı onları
ağladır, ey böyük uslad? Bəs
"Könül, ta var əlində cami-mey təsbihə əl vurma!
Namaz əhlinə uyma, onlar ilə durma, oturma!
mətləli qəzəlin hara, bu misralar, beytlər hara?"
Dərviş oxuyurdu:
Yüz məsəqqət çəksə kami-dil tapar əncami-kar,
Hər kimin aləmdə mövlası Şəhi-Mərdan olur...
Yığılanlar arasında səslər ucalırdı:
- Kömək ol, ya Şahi-Mərdan...
- Adına qurban olum..
- Balalarım sənə qurban... Dərviş daha da avaz ilə oxuyurdu:
Ol şahənsah kim, əgər bir murə qılsa iltifat,
Mur hökm eylər, Süleyman üstünə sultan olur...
Kövsəri-cənnət onun hökmündədir, ol vəch ilə
Cümlə nəslindən həmin Adəm ona mehman olur...
- Can... Qiyamət günü, kövsər ağası, nəzərini bizdən kəsmə. –Ya Əli,ya Əli!
- Can Əli!
Dərvişlər isə cuşa gəlmişdilər. Böyük dərviş getdikcə coşur, ağzı köpüklənə-
köpüklənə təbərzinini göydə oynadır və elə qeyzle oxuyurdu ki, elə bil gözləri
hədəqəsindən çıxırdı... Cavan dərviş səsini ona çatdıra bilmir, heyranlıqla ustadına
tamaşa eləyib dururdu.
Dərviş aranı tapıb durdu. O, qəsidəni bitirmişdi. Cavan ustadının işarəsilə bala
dərviş cərgələri gəzməyə başladı.
- Ağam Əli eşqinə...
- Ağam Şahi-Mərdan eşqinə,..
Kəşkülə diyirlənən pulların səsi eşidilməyə başlayanda, şair, qəlbini çuğlayan
dərin kədər və təəssüf hissilə dəstədən ayrıldı. Arxasınca Qapaqlının aydın səsini
eşitdi:
-
Çoxları şairlikdən dəm vurur, amma gör bir heç Əli şənində, öz cəddi şənində
bu rəhmətlik kimi bir şey yazır?
142
Başqa bir səs ona qoşuldu:
-Cəddi onu kəssin, heç olmasa Əli şənində cibindən bala dərvişə bir abbası
çıxardeydi... Şeri, qəsidəsi özünə qalsın...
...Şair bazardan çıxmamışdı. Bazara gətirilmiş təzə nübar meyvələrə gozü
sataşanda şair dərvişləri unudub düşünməyə başladı. Təzə meyvələr həmişə
nədənsə onun fərəhinə səbəb olardı:
-"İllər keçir, hər il təəccüb və heyranlığını azalmır ki, artır. Hər il bu və ya
başqa bir şeyin gəlişinə, nübarına sevinirəm. Bilirəm yarpaqlar açmalıdır, amma
yenə də görəndə "ilahi, nə gözəl, nə tez gəlibdir bu il bahar" - deyirəm, ürəyim
fərəhlə dolur. Təzə tehrani, təzə xiyar... hər birisi, bilirəm ki, yenə də hər il olduğu
kimi bu il də çıxacaq! Dostlar bir töhfə kimi, ilk nübar kimi göndərəcək, özüm
bazarda görəndə alacağam, yenə də hər bir meyvəni adamlar bir-birinə "neçə bele
nübarlara çıxasan" deyib töhfə verəcək. Amma yenə də mən qırmızı gilası, yaşıl
alçanı, ağ tutu... təbiətin ilk ecazı kimi, hədiyyəsi kimi qarşılayır, heyrət və
fərəhimi gizləyə, saxlaya bilmirəm..."
Şair bunları düşünə-düşünə bazardakı təzə xiyar, gilas və alçalara tamaşa eləyir
və irəliləyirdi. O, Qırmızı Qulamın kitabfurüş dükanına tərəf üz tutmuşdu. Dükana
çata-çatda çayçı Əlmuxtarın şagirdi Rəziylə rastlaşdı: şamaxılılara məxsus bir
ahənglə sözü incə-incə uzadaraq dedi:
-Salam, Rəzi bala, xoş gördük səni, aadə...
-Əleykəssalam, Ağa, xoş günün olsun.
-Məşədi Qulam dükəndədi?
-Bəli, elə indicə qulluğuna çay apardım.
-Birini də mənə gəti, meşədiynən balaca söhbətim var...
Rəzi sevincək tərpəndi:
-Baş üstə, can üstə, Ağa... Elə sən içəri girən kimi məşədi özü
buyurtduracaqdı...
Seyyid güldü:
-Bilirəm, ona görə də meşədinin boğazına qıymadım, özüm sifariş elədim.
Rəzi daban aldı,Şair dükanın qapısına çatan kimi Məşədi Qulamı özünəməxsus
bir tərzdə salamladı:
-Əssəlamu-əleykə, ey şairlər ağası, şeirşünaslar gözünün işığı...
-Və əleykəssalam, Ağa, cəddinə qurban olum, xoş gəlmisən,qədəm əziz
eləmisən, həmişə sən gələsən, aadə, Rəzi - bir çay...
Dostları ilə paylaş: |