34
Şübhəsiz ki, ―veliki knyaz‖ cənablarının məqsədi ―nəcib və xeyirxah‖
məqsəd idi. Lakin baxaq görək ki, bu sözlərə həyatda nə cür əməl olunurdu. Buna
görə çox uzağa getmək lazım deyildir, M. Ə. Rəsulzadənin ―Məktəb və mədrəsə‖
adlı silsilə məqalələrini oxumaq kifayətdir. Əvvəlcə baxaq görək ki, ―veliki
knyazın‖ məmurlarından biri, Qafqaz maarif müdiri Rodolev cənabları nəyə
rişxənd edir. ―Rodolev cənabları‖ ―Bakıda yataq salan‖ müsəlman maarif
cəmiyyətlərinin darülmüəllimin və sair məktəbi-aliyyə ―xülya‖ları ilə ömür
keçirdiklərini məxsusi bir surətdə qeyd edir... Burada ―xülya‖ olacaq nə şey
varmış? Bəlkə bunun ―xülya‖ olan cəhəti odur ki, müsəlmanlar bunu özləri öz
ixtiyarları ilə, öz zövq və səliqələri ilə görmək istəyirlər. Əsrlərdən bəri dara
olduqları haqlarından, imdi də olsa, istifadə fikrinə düşmüşlər. Bəlkə burası
―xülya‖dır ki, məscid, məktəb və mədrəsələrini maarif nəzarətinə tabe etmədən
islah etmək istəyirlər» (―Açıq söz‖ qəzeti, 1916, № 138).
Əlbəttə, müsəlman balaları üçün ali məktəb əlçatmaz bir xülya idi.
Çarizm müsəlmanların savadlanmasına qarşı çıxırdı, çünki qorxurdu ki, avam və
küt saydığı müsəlmanlar maariflənib özlərini dərk edərlər, gözlərini geniş açıb
mütləqiyyətin yeritdiyi müstəmləkəçilik siyasətini anlayarlar və nəhayət öz təbii
hüquqlarını tələb edərlər. Nəticədə, milli sərvətlərinin, təbii ehtiyatlarının
göyə sovrulmasına, talan olunmasına mane olarlar. Çarizm müsəlmanlara nə qədər
təzyiq göstərirdisə, öz din qardaşları ilə bir o qədər mülayim rəftar edirdi.
Bəzilərinə hətta hədsiz hüsn-rəğbət göstərir, nazları ilə oynayırdı. Məsələn,
Məhəmməd Əmin Rəsulzadə adını çəkdiyimiz ―Məktəb və mədrəsə‖ silsilə
məqalələrinin birində yazırdı: ―Müsəlmanlar görürlər ki, qapıbir qonşularının
təqribən bir əsr bundan əvvəl mövcud olan kəlisa məktəblərində şəriət, ermənicə,
rusca, ümumi tarix, ziraət, tarixi təbii, erməni tarixi oxunur. Bu dərslərdən yalnız
Rusiya tarixi ilə coğrafiyası rus dilində təlim edilir, qalan dərslərin hamısı, hətta
ümumi tarix də haman erməni dili ilə oxudulur.
Bu məktəblərin hər dürlü idarələri, müəllimləri də öz ixtiyarlarında, kəlisa
məhəlləsinin ixtiyarındadır.
Müsəlmanlar bir ―xülya‖ deyil, bir həqiqət olaraq görürlər ki, qonşularının
ibtidai kəlisa məktəblərindən savayı altı yerdə 85 ruhani darülmüəlliminləri var.
Bunların fövqündə Eçmiadzindəki ruhani ―Akademiya‖nın dəxi ―xülya‖
olmadığını müsəlmanlar görürlər.
Əcəba, qapıbir qonşularımızın yarım əsrdən ziyadə nail olduqları bir şey
bizim üçün bu gün nədən bir xəyal, nədən bir xülya olsun?‖ (―Açıq söz‖ qəzeti,
1916, № 138).
M. Ə. Rəsulzadənin hiddətini başa düşmək çətin deyildir. O,
mütləqiyyətin müsəlmanlara qarşı tutduğu ədalətsiz mövqeyi görüb susa bilmirdi.
Çünki maarif o zaman xalq üçün bir işıq, bir ümid mənbəyi idi. Məhəmməd Əmin
milli dirçəlişdə maarifə geniş yer verirdi. Başlıca məqsədi milli məktəblərin
açılması idi, elə məktəblərin ki, onu qurtaranlar millətin və dinin fərqini görsün,
35
mənsub olduğu xalqın mədəniyyətinə qovuşsun, onu sevsin. Ona görə də mövcud
məktəb və mədrəsələrin islahına tərəfdar idi. Bu məktəblərin zəmanə ilə
ayaqlaşmasını istəyirdi.
O, məktəblərin islahını düşünərkən, ―xalqı işıqlandıracaq məktəblərin,
həm də məhkum və tabe millətlərə məxsus olan xalq və cəmaət məktəblərinin əsl
məqsədi nə olmalıdır?‖,—deyə öz-özünə sual verirdi. Göründüyü kimi,
Məhəmməd Əmin real vəziyyəti, nə qədər acı olsa da, nəzərə alırdı. Azərbaycan
xalqı hələ ki, məhkum və tabe idi, ixtiyarı öz əlində deyildi. Odur ki, istər-istəməz
bununla hesablaşmalıydı. Bir növ mövcud quruluşun mənafeyi ilə mənsub olduğu
xalqın mənafeyini mümkün qədər yaxınlaşdırmağa çalışırdı. Çarizmin getdiyi
güzəştlərdən faydalanmağı lazım bilirdi. Ona görə də öz sualına belə cavab verirdi:
―Salim və bitərəf bir baxışa görə məktəblərin vəzifəsi, görəcəyi işi yaşadığı dövlətə
mərbutiyyət və əlaqədarlıq tərbiyə etməklə bərabər mənsub olduğu xalqın
əməllərinə dəxi mədəni bir amil olmaqdır‖ (―Açıq söz‖ qəzeti, 1916, № 134).
Demək, məktəblərin başlıca vəzifəsi həm uşaqlara yaşadığı dövlətə
sədaqət və itaət hissi aşılamaqdan, həm də xalqının mədəniyyətini zənginləşdirəcək
savadlı ziyalı tərbiyələndirməkdən ibarətdir. Göründüyü kimi, M. Ə. Rəsulzadə
dövlətin mənafeyi ilə xalqın mənafeyini birləşdirməyə çalışırdı. Bununla belə,
sonrakı cümlə ilə tarazlığın nisbətini bir qədər pozur, milliliyə üstünlük verir.
―Demək ki, müsəlman balalarını tərbiyə edəcək xalq məktəbləri bu əxlaqın (yəni
müsəlmanların) anlı qismi tərəfindən bəslənməkdə olan milli arzu və əməllərə dəxi
yardımçı olmalıdır‖ (yenə orada).
O, məktəblərə daha geniş mövqelərdən yanaşır, onları qabaqcıl
Azərbaycan ziyalılarının köməkçiləri hesab edirdi. Başqa sözlə, xalq məktəblərini
bitirən şagirdlər gələcəyin millətpərvərləri, əməlpərvərləri olmalıydılar. Xalqın
xidmətində durmalı, əllərindən gələni əsirgəməməliydilər.
M. Ə. Rəsulzadə Rusiya müsəlmanlarını az bir istisna ilə türk-tatar
qövmünə mənsub edir. Onun fikrincə, müsəlmanlar mədəniyyət sahəsində bir şeyə
nail olmaqdan ötrü aralarındakı birliyi dərk etməlidirlər. Bu birlik anlamı ən böyük
mədəni qüvvədir. Hər hansı, bir vasitə ki, Rusiya müsəlmanlarını bu anlama
yaxınlaşdırır, o vasitəni müsəlman ziyalıları hər vəchlə təbliğ etməlidirlər. Rusiya
müsəlmanlarının arasındakı məzhəb ixtilaflarını qızışdırmaq, aralarına nifaq sal-
maq, Məhəmməd Əminin fikrincə, imperializmin siyasətidir. Halbuki dövlət bu
siyasətdən əl çəkməli və müsəlmanların birləşməsindən qorxuya düşməməlidir.
Bəlkə də əksinə, müsəlmanların birləşməsi dövlətə çoxlu mənfəət gətirə bilər. O
yazırdı: ―Müsəlmanların aralarındakı məzhəb ixtilaflarını qaldırıb, məsələn,
sünnilərlə şiələrin birləşmələri məqsədini güdmələrinin həmişə yanlış anlamışdılar.
Öylə təsəvvür olunur ki, bu iki zidd məzhəb birləşirsə, mütləqən siyasi bir
məqsədlə birləşmək istəyir və bu birləşməkdə mütləq bir ―təcavüz‖ fikri vardır və
guya ki, bu məşhur təcavüz ―ittihadi-islam‖ fikrinin doğurduğu ―təhlükə‖li bir
şeydir‖ (―Açıq söz‖ qəzeti, 1916, № 134).