30
savayı yuxarıda adı çəkilən jurnalların heç biri ayrıca tədqiq olunmamışdır. Həmin
jurnallarda xalqımızın həyatı və məişəti ilə bağlı saysız – hesabsız məqalələr,
lətifələr, karikaturalar və sairə çap olunmuşdur. Ciddi mətbuatdan fərqli olaraq
məzhəkə məcmuələri tənqid obyektini gülüşlə, kinayə və istehza ilə
qamçılayırdılar. Bu baxımdan məzhəkə jurnallarının ictimai rəyə təsiri daha güclü
idi. Camaatı güldürə - güldürə düşünməyə vadar edən məzhəkə məcmuələri
səhifələrində digər məsələlərlə yanaşı qadın məsələsinə də xüsusi fikir verilirdi.
Qadına həqarətlə baxanlar, hüququnu tapdalayanlar gülüş hədəfinə çevrilirdilər.
Məsələn, ―Molla Nəsrəddin‖ məcmuəsindəki ―Kişi gəlir‖ adlı yazını götürək.
Yazıda qadını kölə vəziyyətində görmək istəyənlər incə yumorla tənbeh olunur.
Yazının başlığı da mənalıdır: ―Kişi gəlir‖. Burada da bir kinayə vardır, qadının
hüquqsuzluğu üzərində öz səadətini qurmaq istəyənlər, cahilliyi və savadsızlığı
üzündən milli tərəqqiyə xor baxanlar tənqid atəşinə tutulur. Yazıda oxuyuruq: ―Və
bir də qaldı ki, bir para ağzı qəşənglər başlayıblar qəzetlərdə yazmağa ki, nə bilim,
gərək övrətlər oxusunlar, tərbiyə tapsunlar, uşaqlarına tərbiyə versünlər,
cəmiyyətlər tərtib etsünlər, çalışsunlar, vuruşsunlar, ta ki millət qabağa gəlsun...‖
(―Molla Nəsrəddin‖ məcmuəsi, 1914,
№ 13).
―Babayi – Əmir‖ məcmuəsi də qadın məsələsinə toxunur, lakin ―Molla
Nəsrəddin‖dən fərqli olaraq ―Babayi – Əmir ‖ qadın azadlığı haqqında mətbuat
səhifələrində çıxış etməyin faydasız olduğunu bildirir. Məcmuə qadın məsələsinin
həllinə bədbinliklə yanaşır, hətta inanmır: ―Zəhrimara qalsun bu arvad məsələsi...
on ildən bəri ―hürriyyəti - nisvan‖, ―hürriyyəti - nisvan‖ dadu – fəryad etməkdən
boğazımız dağılmışdır‖ (―Babayi - Əmir‖ məcmuəsi, 1916, № 31).
Birinci fəsilə yekun vurarkən, deməliyik ki, burada müxtəlif, baxışlı,
dünyagörüşlü şəxslərin və hətta ictimai təşkilatların inqilab və sosial azadlıq
probleminə münasibəti araşdırılmış və bununla da həmin problemlərin sosial
tərəqqiyə təsiri öyrənilmişdir. Məlum olmuşdur ki, sosial tərəqqidə inqilab təlimini
qətiyyətlə müdafiə edən bolşeviklərlə yanaşı Azərbaycan ziyalılarının bir qismi bu
sahədə milli azadlığın mühüm rol oynadığını xüsusilə qeyd etmişlər. Məsələn, M.
Ə. Rəsulzadə sosial tərəqqini milli tərəqqi ilə əlaqələndirmiş və milli tərəqqinin
tələblərini mövcud quruluşun tələbləri ilə uzlaşdırmağa çalışmışdır. Qeyriləri də
(Yusif Vəzir Çəmənzəminli, Ömər Faiq Nemanzadə və s.) məsələyə əsasən bu
mövqedən yanaşmışlar. Lakin onlar M. Ə. Rəsulzadən fərqli olaraq problemi və
onun həlli yollarını nisbətən sadə izah etmişlər.
Göründüyü kimi, o dövrdə sosial azadlıq problemi xırdalanaraq bütün
mürəkkəbliyi və incəliyi ilə tədqiqat obyektinə çevrilmişdir. Sosial azadlıq
fonunda şəxsiyyət azadlığı, vicdan azadlığı və qadın azadlığı məsələləri
araşdırılmışdır. O problemlər indi də qaldırılır. O zamankı şərhləri üzə çıxarmaqla
budünkü vəziyyətimizi daha dərindən öyrənməyə imkanımız olacaqdır. Biz
bugünkü fikrimizlə əski fikrimizi tutuşdurub daha qənaətbəxş nəticələrə gələ
bilərik.
31
II FƏSİL
MAARİF VƏ MƏDƏNİYƏTİN SOSİAL TƏRƏQQİYƏ
TƏSİRİ
Mədəniyyət anlayışı mürəkkəb və çoxşaxəlidir. Əslinə qalsa, maarifin özü
də bu anlayışa daxildir. Lakin maarifi ayırmaqda bizim məqsədimiz vardır. Bu
məqsəd hər şeydən əvvəl ondan ibarətdir ki, maarifi ayrıca götürməklə tədqiq
etdiyimiz dövrdə—1914—1917-ci illərdə maarifə nə qədər böyük əhəmiyyət
verildiyini qeyd etməyə çalışmışıq. Azərbaycan ziyalılarını o zamam ilk növbədə
xalqın maariflənməsi, təlim və təhsili narahat edirdi. Ümumiyyətlə, bu
barədə fikir birliyi, müəyyən mənada həmrəylik var idi. Maarif məsələsi o
zamankı yazıların başlıca məzmununu təşkil edirdi. Bu həm də ondan irəli
gəlirdi ki, çarizm Qafqazda müsəlmanların maarif sistemini kökündən
dəyişmək istəyirdi. Məktəbləri böyütmək bəhanəsi ilə türklərin təhsil
almasına mane olan, milli hüquqlarını boğan son dərəcə mürtəce bir layihə
hazırlanmışdı. Qəribə burası idi ki, layihədə türk dili, Azərbaycan dili əvəzinə
nədənsə tatar dili yazılmışdı. Bu da, şübhəsiz ki, böyük dövlətçilik siyasətinin
məhsulu idi, xalqın mənəviyyatını məhv etmək istəyənlərin xəbis planlarından irəli
gəlirdi. M. Ə. Rəsulzadə bu barədə belə yazmışdır: ―Dil milliyyətin hamısını
təşkil etməsə də, yüzdə doxsanını vücuda gətirən böyük bir amildir. Bir milliyyətin
məhv edib aradan götürmək qəsdində olan siyasilər də əsl bunun üçündür ki,
təmsil (asimilyasion) əməliyyatı icra edərkən ən birinci fikirlərini dilə verər
və ən əvvəl bir millətin dilini yaddan çıxartmağa səy edərlər‖ (―Dirilik‖ məcmuəsi,
1914, № 6).
Haqqında danışdığımız layihə nə cür hazırlanmışdı? Kim tərəfindən
yazılmışdı? O dövrdə nəşr olunan mətbuatı diqqətlə izləyərkən bu sualın cavabı
tapıldı. Sualın cavabı Ömər Faiqin ―Nə umuyoruz?‖ adlı silsilə məqalələrindədir.
Məqalələrdən məlum olur ki, Qafqaz maarif müdiri Rodolev bəzi şəxslərə tək-tək
müaciət edib maarif barəsində fikirlərini öyrənmək istəmişdir. Ömər Faiq
yazmışdır: ―Bən bu xəbəri duyan gibi, tək-tək adamlara müraciətin millətimiz üçün
zərərli olduğunu və bunun üçün mütləq bir yığıncaq lazım gəldigini yazmışdım‖
(―Açıq söz‖ qəzeti, 1916, №108). O, öz fikrini bu cür əsaslandırır: ―Tək-tək
şəxslərə müraciət ondan ötrü zərərlidir ki, maarif müdirinin tanıyub, sayub fikrini
bilmək istədiki şəxs bizdən artıq müdirin xatirinə, arzusuna— imdiki tərbiyə və
əxlaqımız təsirilə—xidmət edəcəki zənni yadə gəlməyor‖ (yenə orada). Bəri
başdan deyək ki, Rodolevip layihəsi olduqca mürtəce idi və müsəlman, ilk
növbədə isə türk xalqlarının əleyhinə yönəldilmişdi. Köhnə ―Ömər‖ və ―Əli‖
məktəblərinin əvəzinə üçpilləli məktəblər yaranmalıydı. Birinci pillə: bir əlifba və
üç hazırlıq sinfi, təhsil müddəti dörd il: Oxunan dərslər: şəriət, rus dili, tatar dili