79
sayılır. Bunlar qaraqoyunlu və ağqoyunlu tayfa birlikləridir, çox güman ki, onlar
əvvəllər bir tayfa olmuş, sonradan ayrılmışdırlar. Ancaq bu tayfa dövlətləri İran ta-
rixi üçün sadəcə, mədəni baxımdan deyil, siyasi, sülalə və dini səbəblərdən əhə-
miyyət kəsb edirlər. Bu tayfa birlikləri Osmanlılarla sıx əlaqədə olsa da, farslarla o
qədər yaxındılar ki, İran tarixini onlarsız təsəvvür etmək qeyri mümkündür. Müxtəlif
dövrlərdə bu tayfaların nümayəndələri İran ərazisinin müəyyən bir hissəsini işğal
etmiş və uzun müddət öz hakimiyyəti altında saxlamışdır. Bu dövrdə mövcud olmuş
kiçik tayfa dövlətləri demək olar ki, tez bir zamanda dağılmış və Osmanlı mədə-
niyyətində əldə edə bilmədiklərini İran mədəniyyətindən mənimsəmişdilər” [Roe-
mer, 2003:177].
Römer Qaraqoyunlu və Ağqoyunlu tayfalarının türkmənşəli olduğunu qeyd
etsə də, yaratdıqları dövləti İran dövləti adlandıraraq, tarixi yanlışlığa yol verir. Di-
gər tərəfdən, H. R. Römer bu tayfalara Qaraqoyunlu, Ağqoyunlu və Səfəvilər döv-
lətini adi edərək, onların tez dağıldığını vurğulayır.
Rəmzi Kılıç “Fatih dövrü (1451-1481) Osmanlı-Ağqoyunlu münasibətləri”
məqaləsində Ağqoyunlu dövləti haqqında yazırdı: “Ağqoyunluları dövlət halında
Qara Yuluq Osman bəy birləşdirmişdir. 1423-cü ildə Əli bəyin oğlu olaraq dünyaya
gələn Uzun Həsən babası Qara Yuluq Osman bəyin ölümündən sonra yaranmış
şahzadələr arasındakı mübarizələrdə böyümüş, özünü erkən yaşlarından göstərərək
1453-cü ildə Ağqoyunlu dövlətinin hökmdarı olmuşdur” [Kiliç, 2003:97]. Burdan
da göründüyü kimi türk müəllifləri H. R. Römerin əksinə olaraq, Ağqoyunlu və
yaxud da Qaraqoyunlu dövlətini heç də İran, fars dövləti hesab etmirlər.
Türk tarixçisi Əhməd Toksoy “Kitab-i Diyarbəkriyyədə bayındırlılar (Qara
Yuluq Osman Bəyə qədər)” adlı məqaləsində isə bu tayfa birliklərinin məhz Azər-
baycan ərazisində məskunlaşması və dövlət qurması haqqında dəqiq məlumat verir.
“Ağqoyunların Anadolu ərazisinə nə vaxt gəlməsi hələ də mübahisə mövzusudur. C.
Vudsun fikrincə, “Ağqoyunlular, Diyarbəkr və ətraf ərazilərə monqolların işğalları
nəticəsində yaranmış böyük köç zamanı, yəni XIII əsrdə gəlməsi haqqında məlumat
verir[Toksoy, 2008:807]. Z. V. Tolqan isə “Ağqoyunluların bir qisminin Azərbaycan
ərazisində çox öncədən məskunlaşmış olduğunu, əsas hissəsinin isə Elxanilər döv-
ründə Türküstandan Anadoluya gəlib yerləşdiyini göstərir” [Toksoy, 2008: 807].
H. R. Römer Osmanlı dövləti ilə bu iki “İran” dövlətinin münasibətlərinə də
toxunaraq yazır: “XV əsr Qərb səyyahlarının fikrincə, bu tayfalar hətta Osmanlı im-
periyasının Şərq sərhədləri boyunca onlara əsas rəqib sayılırdılar. Bəzi mənbələrdən
isə belə məlum olur ki, Avropa dövlətləri müxtəlif dövrlərdə onlarla müqavilə bağ-
layaraq ittifaq qurmuşdular. Sonralar onların hakimiyyəti altında şiə təriqəti yayılmış
və genişlənərək uzun müddət öz müstəqilliyini qoruyub saxlamışdır” [Roemer,
2003: 178]. Tarixdən də bildiyimiz kimi qərb diplomatiyasının səyləri nəticəsində
Osmanlı dövləti ilə Azərbaycan ərazisində müxtəlif dövrlərdə hökmranlıq etmiş
milli dövlətlərin münasibətləri müəyyən vaxtlarda kəskinləşmişdir.
Rəmzi Kılıç Osmanlı Ağqoyunlu münasibətlərinə Qərb dövlətlərinin təsiri ilə
bağlı yazır: “... Ağqoyunlular Osmanlılara qarşı Venesiya Rsepublikası, Trabzon-
Rum İmperiyası, Qaramanoğulları dövləti, Papalıq, İsfəndiyaroğulları və s. kimi bir-
80
liklərlə ittifaqda idi” [Kiliç, 2003: 98]. Bu haqda digər bir fikir isə B. Dədəyevə məx-
susdur. O, “Azərbaycan-Osmanlı iqtisadi əlaqələri (1450 -1520)” məqaləsində ya-
zırdı: “Ticarət baxımından Avropalılar, Ağqoyunlu və Səfəvilər dövləti ilə həmçinin
siyasi münasibətlər də qururdu” [Dedeyev, 2006:107]. Beləliklə əksər tarixçilər
Osmanlı –Ağqoyunlu münasibətlərində yaranmış narazılıqdan Qərbin istifadə
etdiyini təsdiq edir.
H. R. Römer öz əsərində Qaraqoyunlu və ağqoyunlu tayfalarının mənşəyi
probleminə də toxunmuşdur. O, bu haqda yazırdı: “Köçəri tayfalarda ağ qoyun şək-
linin Ağqoyunlular, qara qoyun şəklinin isə Qaraqoyunluların rəmzi olması heç də
qeyri-adi sayılmamalıdır. Bu bir totem də ola bilər, Fəzlullahın Rəşiddədinin məlu-
matına görə, qədim türklərdə totem sayılan heyvanın ətini yemək qadağan olunurdu.
Onda bu ad onların bəslədikləri sürülərə bir işarə sayılmalıdır” [Roemer, 2003:179].
Belə görünür ki, bu tayfa adlarının totem sayılan qoyunların rəngi ilə əlaqədar olduğu
ehtimal edilir. Həmin tayfalara məxsus olan qoç heykəlləri şəklində məzar daşlarının
zəmanəmizədək çatdığı məlumdur [Azərbaycan tarixi, 2007:71].
T. Nəcəfli “Qaraqoyunlu və Ağqoyunlu dövlətlərinin tarixi müasir türk tarix-
şünasliğinda” əsərində Qaraqoyunlu və Ağqoyunlu tayfa adlarının mənşəyi haqqında
yazır: “Türk tarixçisi Faruq Sümərə görə, "Qaraqoyunlu tayfasının adı bu gün hakim
olan ümumi qənaətə əsasən, totemlərinin qoyun olması ilə əlaqəli sayılsa da, qədim
türklərdə digər tayfalarda olduğu kimi totem olan heyvanların ətinin yeyilməsi qəbul
olunmadığına görə bu adın onlara aid sürülərinin rəngi ilə bağlı verilmiş olması
mümkündür". Əbdülxaluq Çay Faruq Sümerin bu fikrini müdafiə edir və başlıca
məşğuliyyəti heyvandarlıq olan Qaraqoyunlulara bu adın bəslədikləri heyvanların
rənginə görə verildiyini əsaslandırmağa çalışır” [Nəcəcfli, 2000:11].
Hər iki tayfa adınınyaranmasında həm onların totemlərinin, həm də saxladıq-
ları qoyun sürülərinin rənginin xüsusi önəm daşıdığı ortaya çıxır. Bu zaman qo-
yunların rəng müxtəlifliyinin olması böyük əhəmiyyət kəsb edir. H. R. Römer məhz
bununla bağlı yazırdı “Beləliklə, Ağqoyunlu və Qaraqoyunlu tayfa birliklərininmən-
şəyi ilə bağlı məsələlər bu cürdür. Hələ dəqiq qərar verilməmişdir ki, bu tayfalar
əvvəldən bir kökə sahib olmuş, eyni birlik yaratmışdır yoxsa, sonradan parçalanaraq,
xoşbəxtlikdən müstəqil dövlətlər yaratmağa nail olunmuşdurlar” [Roemer, 2003:180].
H. R. Römer əsərində Qaraqoyunlu və Ağqoyunlu tayfalarının mənşəyi haq-
qında maraq kəsb edən məsələlərdən biri də tayfaların mənsubiyyəti məsələsidir. H.
R. Römer yazır: “Monqol işğalından əvvəlki dövrlərdə Ağqoyunlu və Qaraqoyunlu
tayfa adlarına rast gəlinmir. Yalnız müəyyən mənbələrdə hakim sülaləni təmsil edən
Bayandır (Ağqoyunlu), Baharlu və ya Barani (Qaraqoyunlu) soyları haqqında mə-
lumatlara təsadüf olunur. Bayandırlar haqqında F. Rəşiddədin 24 Oğuz tayfasının
adlarını əks etdirən cədvəlində rast gəlmək olur. Bununla yanaşı, “Dədə Qorqud”
dastanında o, Oğuz elinin hökmdarı kimi təsvir olunub. Belə hesab olunur ki, Ağqo-
yunlular Bayandurların bir qoludur. Həmçinin mənbələrdə Bayandur, yaxud Bayan-
duriyyə Ağqoyunlunun simvolu kimi istifadəsinə də rast gəlinir. XIV əsrdə Bayan-
dur adına Kiçik Asiyada rast gəlinir. Səlcuq dönəminə qayıtdıqda görmək olur ki,
Bayandrr Səlcuqlara Kiçik Asiyanı tutmaqda yardım etmişdir, onlara məxsus yer
adlarının bu ərazilərdəolması da bunu sübut edir. Ağqoyunluların süqutundan sonra